2019 අප්රේල් (21) වනදා, පාස්කු ඉරිදා දිනයේ එල්ල කළ මරාගෙන මැරෙන ත්රස්ත ප්රහාරයට අදාළව මේ වනවිට බරපතල කරුණු රැසක් අනාවරණය වෙමින් පවතියි.
පාස්කු දින ප්රහාරය එල්ල කළ කල්ලියේ සිටි පුලස්තිනී මහේන්ද්රන් හෙවත් සාරා ජස්මින් කටුවාපිටිය සාන්ත සෙබස්තියන් දේවස්ථානයේ බෝම්බය පුපුරුවා ගත් මොහොමදු හස්තූන්ගේ බිරිඳ වේ.
සාරා ජස්මින් මෙම ත්රස්ත ක්රියාව සඳහා සක්රීයව දායකවූ බව විමර්ශන වලදී හෙලිවන අතර පාස්කු ත්රස්ත ප්රහාරයට අදාළ සමස්ථ ක්රියාවළිය පිළිබඳව ඇය ප්රබල සාක්ෂියකි.
පාස්කු ඉරිදා ප්රහාරයෙන් පසු 2019 අප්රේල් (26) ආරක්ෂක අංශ අම්පාර සයින්දමර්දුවල සහරාන්ගේ නිවස වැටලු අතර සහරාන් හෂීම්ගේ සහෝදරයා, මොහොමඩ් රිල්වාන් බෝම්බයක් පුපුරවා ගත්තේය.
වැඩිහිටියන් සහ ළමයින් ඇතුළු 16 දෙනෙක් මේ ස්ථානයේ මියගිය බව පසුව ප්රකාශය කෙරුණද එම වෙලාවේ සාරා ජස්මින් හිටියාද.? නැතිනම් පැනලා ගියාද.?
ප්රහාරයෙන් පසුව දෙවතාවක් සිදුකල DNA පරීක්ෂණ වලින් සාරා ජස්මින් මියගිය බව තහවුරු වූ නොමැති අතර 2022 අප්රේල් (27) වෙනිදා ආයෙමත් DNA පරීක්ෂාවක් සඳහා සායින්දමර්දුවලදී මියගිය සිරුරු ගොඩ ගත්තේය.
අනතුරුව හදුනානොගත් අස්ථි කොටස් දැමූ බෑගයක තිබූ අස්ථි කොටස් දෙකකින් ඒවා සාරා ජස්මින්ගේ මවගේ දියණියකගේ බවට DNA පරීක්ෂාවේදී හදුනා ගත් බව එවක නිලධාරින් සඳහන් කළේය.
කෙසේ වෙතත් එම අවස්තාවේදි හරියටම සාරා ජස්මින්ගේ කියලා සඳහන් නොකළ අතර පසුව 2023 වසරේ මාර්තු මාසයේ එවක අපරාධ පරීක්ෂණය සිදුකල පිරිස නිවේදනයක් නිකුත් කළේය.
ඒ නිවේදනයේ සඳහන් වුණේ, 2019 අප්රේල් මස (26) සායින්දමර්දුවල මියගිය අය අතර සාරා ජස්මින් සිටින බව රජයේ රස පරීක්ෂක දෙපාර්තමේන්තුව නිකුත් කළ වාර්තාවකින් තහවුරු කරන බවයි.
සාරාගේ මවගෙන් ලබාගත් DNA සමඟ අපරාධ ස්ථානයෙන් සොයාගත් අස්ථි කොටස් කීපයක DNA සාම්පල මව සහ දරුවන් අතර පවතින ජීව විද්යාත්මක සම්බන්ධතාව තහවුරුවන ප්රතිපලයක් බවත් එහි සඳහන් කළේය.
කෙසේ වෙතත් 2022 වසරේ සිදුකළ මෙම DNA පරීක්ෂාව සැකසහිත බවට අපරාධ පරීක්ෂණ දෙපාර්තමේන්තුව 2025 වසරේ නැවත පන ගැන්වූ විමර්ශනයෙන් පසුව අධිකරණයට වාර්තා කළේය.
මෙම විමර්ශනයේදී පොලිස් විශේෂ කාර්ය බලකායේ ප්රධාන පොලිස් පරීක්ෂකවරයෙකු සාක්ෂි දෙමින් හෙළිකර තිබුණේ සායින්දමර්දු බෝම්බ පිරිම්වලින් හා වෙඩි තැබීම්වලින් පසු ප්රදේශයම සම්පුර්ණයෙන් නිශ්ෂබ්ද වූ බවයි.
එම අවස්ථාවේදී යතුරු පැදියක් පණගන්වා පිටව යන ශබ්දය හොදින් ඇසුණු බව සාක්ෂිකරු හෙළිකර ඇති අතර පොලිස් අධිකාරීවරයෙකු ලබාදුන් තවත් සාක්ෂියක හෙළිකර තිබුණේ එම යතුරුපැදියේ ශබ්දය තමාටද ඇසුණු බවයි.
සහරාන්ගේ පවුලේ සමාජිකයින් මෙම සායින්දමර්දු නිවස වෙත පැමිණීමට වෑන් රථයක් සහ යතුරු පැදි දෙකක් උපයෝගී කරගත් බවට තොරතුරු ලැබුනද පිපිරීම අවස්ථාවේ තිබී ඇත්තේ එක් යතුරු පැදියක් පමණක් බව පොලිස් අධිකාරිවරයාගේ ප්රකාශයේ සඳහන් වේ.
බදුල්ල අපරාධ ස්ථාන පරීක්ෂණාගාරයේ එවක ප්රධාන පොලිස් පරීක්ෂකවරයෙකු ප්රකාශ කර ඇත්තේ, සාරා ජස්මීන්ගේ සිරුර වාෂ්පවී යාමට තරම් පිපිරීමක් සයින්දමර්දු නිවස තුළ සිදුව නොතිබූ බවයි.
සාරා ජස්මින් සායින්දමර්දු පිපිරීමෙන් පසු කල්මුණේ නගරයට පැමිණ වෙල්ලාවලි පිහිටි ඇගේ ඥාතී නිවසකට ගොස් ඇති බවත් පසුව මංකාඩු සිට මන්නාරමට මුහුදු මාර්ගයෙන් ගොස් ඇති බවත් පොලිස් විශේෂ කාර්යාංශයේ බුද්ධි නිලධාරියෙකුගේ සාක්ෂියකින් හෙලිවී ඇත.
සාරා ජස්මින් සමග සමීප සබඳතාවක් පවත්වාගෙන ගිය ජෝසුවා නැමැත්තා පිපිරීමෙන් පසු ඇයට දුරකතන ඇමතුමක් ලබාගෙන ඇති බවත් එවිට ඇගේ දුරකථනය විසංධි වී තිබූ නමුත් පසුව ජෝසුවාගේ දුරකථනයට සාරාගේ දුරකථනයෙන් ඇමතුමක් ගෙන තිබූ බවද එම බුද්ධි නිලධාරීයා ප්රකාශ කර ඇත.
