අධික උෂ්ණත්වය

උෂ්ණාධික කාලගුණය හේතුවෙන් රෝගාතුරව යාපනය රෝහලේ ප්‍රතිකාර ගනිමින් සිටි තවත් පුද්ගලයෙකු අද (13) මිය ගිය බව
යාපනය ශික්ෂණ රෝහලේ ජ්‍යෙෂ්ඨ ප්‍රකාශකයෙකු පැවසීය.

එලෙස මියගොස් ඇත්තේ එම ප්‍රදේශයේම පදිංචි 45 හැවිරිදි පුද්ගලයකු වන අතර ඔහු දහවල් මිතුරන් පිරිසක් සමග මත්පැන් පානය කර නිවසෙට පැමිණි අවස්ථාවේ සිහිසුන්වීම හේතුවෙන් රෝහල්ගත කිරීමට කටයුතු කර ඇතත් විජලනය තත්වය හේතුවෙන් ඔහු මියගොස් ඇති බව රෝහල් ආරංචි මාර්ග පවසයි.

මීට පෙරද අයහපත් කාලගුණ තත්වය හේතුවෙන් යාපනය දිස්ත්‍රික්කයේ පුද්ගලයින් කිහිපදෙනකු මියගොස් ඇති බව වාර්තා වේ.

මේ දිනවල උතුරු , උතුරුමැද හා නැගෙනහිර පළාත්වල උෂ්ණත්වය සාමාන්‍යයෙන් සෙල්සියස් අංශක 39 දක්වා ඉහළ මට්ටමක පවතින බව සඳහන්.

පේරාදෙණිය විශ්වවිද්‍යාලයේ පර්යේෂකයින් කල විශ්ලේෂණයකදී අනාවරණයවී ඇත්තේ වසර 08කට පසු මේ වසරේ දිවයිනේ උෂ්ණත්වය වාර්තාගත ලෙස ඉහළ ගොස් ඇති බවයි.

දිවයිනට බලපා ඇති අධික උෂ්ණත්වයෙන් ජනතාව ආරක්ෂා විය යුතු ආකාරය පිළිබඳව ජනතාව දැනුවත් කිරීමේ මාධ්‍ය සාකච්ඡාවක් යාපනය ශික්ෂණ රේහලේදී පැවති අතර එම අවස්ථාවට සහභාගී වූ වෛද්‍යවරුන් පවසා සිටියේ, පසුගිය සතිය තුලදී තාප ආගාතය බලපෑම හේතුවෙන් යාපනය ශික්ෂණ රෝහලේ නේවාසිකව ප්‍රතිකර ලැබූ රෝගීන් සිව් දෙනෙකුට මිය ගොස් ඇති බවයි.

නේවාසිකව ඇතුලත් කරනු ලැබූ රෝගීන් එම රෝගීන්ට තිබූ විවිධ රෝග හේතුවෙන් මිය ගියද එම රෝගීන්ගේ රෝගී තත්වයන් මාරාන්තික වීමට අධික උෂ්ණත්වය හේතුවෙන් ඇතිවූ තාප ආගාතය ප්‍රධාන වශයෙන් බලපෑ බවත් ඒ හේතුවෙන් වකුගඩු, හෘදයේ සහ පෙනහලුවල ක්‍රියාකාරීත්වය අඩපණ වීම මෙන්ම මොළයේ ක්‍රියාකාරීත්වයද අඩපන වීමෙන් මෙම මරණ සිදුව ඇති බවත් වෛද්‍යවරුන් පෙන්වා දුන්හ.

සෙල්සියස් අංශක 40 කට අධික උෂ්ණත්වයක් පසුගිය සතිය පුරාවට යාපනයේ බොහෝ ස්ථනයන්හි වර්ථා වූ අතර එය වයෝවෘද්ද පිරිස් වෙත ඔරොත්තු නොදෙන මට්ටමක උෂ්ණත්වයක් බව පෙන්වාදුන් වෛද්‍යවරුන් ජනතාව වෙත නිර්දේශ කර සිටියේ ශරීරයේ ප්‍රමාණවත් ජල මට්ටමක් පවත්වා ගැනීම සඳහා කොමඩු, පිපිංඥා, කරවිල, ආදී දෑ නිතර ආහාරයට ගන්නා ලෙසත් එමෙන්ම තාප ආගතය වැලඳීමෙන් ආරක්ෂ වීමට නිතරම තමන්ගේ මුහුණ මෙන්ම ඇහිබැමද සේදීමට ලක් කරනා ලෙසටත්‍ ය.