Attention (Sinhala)

අද (09) ජනාධිපති කාර්යාලයේදී අති උතුම් බ්‍රයන් උඩෙයිග්වේ (Rev. Dr.Brian Udaigwe) හිමිපාණන් ජනාධිපති අනුර කුමාර දිසානායක මහතා හමුවිය.

නව ජනාධිපති ධූරයට පත්වීම නිමිත්තෙන් අනුර කුමාර දිසානායක මහතා වෙත සිය උණුසුම් සුබ පැතුම් පිළිගැන්වූ වතිකාන තානාපතිවරයා, කතෝලික සභාවේ ප්‍රධානී සහ ස්වෛරී වතිකාන රාජ්‍යයේ ශුද්ධෝත්තම ෆ්‍රැන්සිස් පාප්වහන්සේගේ හෘදයාංගම සුබපැතුම් ද ජනාධිපතිවරයා වෙත පිළිගන්වන ලදී.

අනුර කුමාර දිසානායක මහතාගේ නායකත්වය යටතේ ශ්‍රී ලංකාව සාර්ථකත්වය සහ සෞභාග්‍ය කරා ගෙන යාමට හැකිවනු ඇති බව පැවසූ වතිකානු තානාපති උඩෙයිග්වේ හිමිපාණන් ඒ වෙනුවෙන් තමන් හදවතින්ම සුබ පතන බවද පැවසීය.

මෙරට අනාගතය පිළිබඳව මෙහිදී සුබවාදීව අදහස් පළ කළ අති උතුම් උඩෙයිග්වේ හිමිපාණන් ජනතාව අපේක්ෂා කරන අයුරින්ම මනා සංවර්ධනයක් රට තුළ මේ වන විටත් සිදු වෙමින් පවතින බවද සඳහන් කළේය.

එමෙන්ම ජනාධිපතිවරයාගේ දැක්ම සහ කැපවීම ඇගයිමට ලක් කළ තානාපතිවරයා එම සියලු ප්‍රයත්නයන් වෙනුවෙන් වතිකානයේ සහාය ලබා දෙන බව අවධාරණය කළේය.

පාස්කු ඉරිදා බෝම්බ ප්‍රහාරය සම්බන්ධයෙන් ද කණගාටුව ප්‍රකාශ කළ අති උතුම් උඩෙයිග්වේ හිමිපාණන් ඒ පිළිබඳ විනිවිදභාවයෙන් සහ විශ්වාසනීත්වයෙන් යුතුව පරීක්‍ෂණ පැවැත්වීම සඳහා ජනාධිපති අනුර කුමාර දිසානායක මහතාගේ කැපවීමද පැසසුමට ලක් කළේය.

පාස්කු ප්‍රහාරයේ වින්දිතයින්ට සහ ඔවුන්ගේ පවුල්වලට යුක්තිය සහ සාධාරණය ඉටු කිරීම වෙනුවෙන් ජනාධිපතිවරයා ගෙන යන අඛණ්ඩ උත්සාහයට වතිකානයේ පූර්ණ සහයෝගය ලබා දෙන බවට ද උඩෙයිග්වේ හිමිපාණන් සහතික විය.

වතිකානුව සහ ශ්‍රී ලංකාව අතර පවතින ශක්තිමත් රාජ්‍ය තාන්ත්‍රික සබඳතා පිළිබඳව ද මෙම හමුවේදී විශේෂ අවධානය යොමු වූ අතර, ශ්‍රී ලාංකීය ජාතියේ සහ ජනතාවගේ අභිවෘද්ධිය වෙනුවෙන් දෙරට අතර අන්‍යෝන්‍ය සහයෝගීතාව ඉහළ නංවා ගැනීමට ද ජනාධිපති අනුර කුමාර දිසානායක මහතා සහ වතිකාන තානාපති අති උතුම් බ්‍රයන් උඩෙයිග්වේ හිමිපාණන් එකඟ වූහ.

ජනතා විමුක්ති පෙරමුණු ප්‍රධාන ලේකම් ටිල්වින් සිල්වා මහතා නව පාර්ලිමෙන්තුවට කොළඹ දිස්ත්‍රික්කය නියෝජනය කරමින් තරඟවදිනා බවට පැතිරයන ප්‍රවෘතිය සම්බන්ධයෙන් අදහස් දැක්වීය.

ඊයේ (08) රූපවාහිනී වැඩසටහනකට එක්වෙමින් ඔහු පවසා සිටියේ තමා පාර්ලිමේන්තුවට පත්වීම සඳහා කිසිදු බලාපොරොත්තුවක් තබා ආණ්ඩුවේ කිසිඳු තනතුරක් හෝ භාර නොගන්නා බවයි.

ජනතා විමුක්ති පෙරමුණේ ප්‍රධාන ලේකම්වරයාවන ලෙස තමා සෑම විටම පක්ෂයේ කටයුතු ඉදිරියට කරගෙන යෑම සඳහා සහෝගය ලබාදෙන බව ඔහු පැවසීය.

එමෙන්ම ඔහු සඳහන් කළේ පක්ෂ ලේකම්වරයා ලෙස ආණ්ඩුවේ තනතුරු දැරීම පක්ෂ ව්‍යවස්ථාවටද පටහැනි බවයි.

පසුගිය රජය යටතේ නුවරඑළිය තැපැල් කාර්යාල ගොඩනැගිල්ල හෝටල් ව්‍යාපෘතියක් සඳහා පෞද්ගලික අංශයට පැවරීම සම්බන්දයෙන් ගත් තීරණය සමාජය තුල වඩාත් කතා බහට ලක්විය.

අද (09) පෙරවරුවේ 150 වන ලෝක තැපැල් දිනය වෙනුවෙන් අරලියගහ මන්දිරයේ පැවැති උත්සවය අමතමින් අමාත්‍ය විජිත හේරත් මහතා පැවසූවේ වසර 130ක් පැරණි ඓතිහාසික වටිනාකමකින් යුත් නුවරඑළිය තැපැල් කාර්යාල ගොඩනැගිල්ල සම්බන්ධයෙන් මෙතෙක් ගෙන තිබූ සියලු තීරණ අත්හිටුවීමට කටයුතු කළ බවයි.

අමාත්‍යවරයා වැඩිදුරටත් පවසා සිටියේ නුවරඑළිය තැපැල් කාර්යාලය ඉදිරියටත් රජය සතු වත්කමක් ලෙස පවත්වාගෙන යන බවත් එම ගොඩනැගිල්ල සහ එහි පරිශ්‍රය තැපැල් දෙපාර්තමේන්තුවේ කටයුතු සඳහා පමණක් භාවිත කරන බවත් ය.

නුවරඑළිය තැපැල් කාර්යාල ගොඩනැගිල්ල පසුගිය රජය සමයේ බලහත්කාරයෙන් පවරා ගැනීමට තීරණය කර තිබුනද නව රජයේ ප්‍රතිපත්ති අනුව නුවරඑළිය තැපැල් කාර්යාල ගොඩනැගිල්ල සහ එම භූමිය කිසි විටෙකත් විකිනීමට හෝ පැවරීමකට කටයුතු නොකරනා බව අමාත්‍යවරයා එහිදී අවධාරණය කළේය.

ප්‍රවීණ රංගන ශිල්පී රංජන් රාමනායක මහතා එළඹෙන මහ මැතිවරණයට තරඟවැදීම සඳහා නව දේශපාලන පක්ෂයක් නිර්මාණය කරමින් නැවතත් වැඩ කටයුතු අරඹා තිබේ.

එතුමාගේ පළමු මාධ්‍ය හමුව අද (09) පැවැත්වූ අතර එහිදී එතුමා පවසා සිටියේ පැරණි දේශපාලන පක්ෂ නියෝජනය කරනා දූෂිතයන් සමඟින් කටයුතු කිරීමට නොහැකි බැවින් නව දේශපාලන පක්ෂයකින් ජනතා සේවය ආරම්භ කළ බවයි.

මාධ්‍ය හමුවේදී එතුමා තවත් බොහෝ සුවිශේෂී කරුණු රැසක්ද හෙළි කළේය.

එම සාකච්චාව පහතින්,

අඛණ්ඩව වසර 36 ක් පාර්ලිමේන්තුව නියෝජනය කළ විපක්ෂයේ හිටපු සංවිධායක මෙන්ම සමගි ජන සන්ධානයේ හිටපු පාර්ලිමේන්තු මන්ත්‍රීවරයෙකු වූ ලක්ෂ්මන් කිරිඇල්ල මහතා සිය දේශපාලනයෙන් සමුගැනීමට තීරණය කර ඇති බව වාර්තා වෙයි.

ඔහු වැඩිදුරටත් පවසන්නේ තමා ජාතික ලැයිස්තුවෙන් හෝ පාර්ලිමේන්තුවට පිවිසීමට බලාපොරොත්තු නොවන බවත් විවේක සුවයෙන් සිටීමට බලාපොරොත්තු වන බවත්ය.

කෙසේවෙතත් මෙවර මහ මැතිවරණයට ලක්ෂ්මන් කිරිඇල්ල මහතාගේ දියණිය, සමගි ජන බලවේගය නියෝජනය කරමින් මහනුවර දිස්ත්‍රික්කය සදහා තරග වැදීමට නියමිත බවට නිල නොලත් තොරතුරු වාර්තා වෙයි.

ජනප්‍රිය රංගවේදී හිටපු පා.ම රන්ජන් රාමනායක මහතා එක්සත් ප්‍රජාතන්ත්‍රවාදී හඬ නමින් නව පක්ෂයක් ආරම්භ කිරීමට නියමිතව ඇති බව වාර්තා වෙයි.

දේශපාලන ආරංචි මාර්ග පවසන්නේ අද (09) කොළඹදී පැවැත්වෙන මාධ්‍ය හමුවකදී රන්ජන් රාමනායක මහතා මෙම නව දේශපාලන පක්ෂය නිල වශයෙන් එළිදැක්වීමට සැලසුම් කර ඇති බවයි.

රංජන් රාමනායක මහතාගේ නායකත්වයෙන් යුතු නව පක්ෂය මයික්‍රෆෝනය ලකුණින් ඉදිරි පාර්ලිමේන්තු මැතිවරණයට තරඟ කිරීමට සූදානමින් පසුවනා අතර, කඩිනමින් ඔවුන්ගේ ප්‍රතිපත්ති ප්‍රකාශය එළිදැක්වීමට නියමිතව බවද පැවසේ. 

32 හැවිරිදි පේරාදෙණිය පොලිස් වසමේ පුද්ගලයෙකුට මහනුවර මහ අධිකරණය මගින් වසර 22 ක බරපතළ වැඩ සහිතව සිර දඩුවම් නියම කළේය.

ඒ තම වැඩිමල් සොහොයුරාගේ 08 හැවිරිදි දියණිය කෙළෙසූ බවට අධිකරණය හමුවේ තහවුරු වීමෙන් අනතුරුවයි.

සිය සොයුරිය සමග තම සීයාගේ නිවසට රූපවාහිනිය නැරඹීමට ගිය අවුරුදු 08 ක් වයසැති දැරිය මෙම ඛේදවාචකයට ගොදුරු වී ඇති බව වාර්තා වෙයි.

2018 වසරේ දී සිදුව මෙම සිදුවීමට අදාළව නඩු කටයුතු 2024 වසරේ අවසන් කරමින් චූටි මාමා නමැති මෙම සැකකරුට අගතියට පත් දැරියට ලක්ෂ 10 ක වන්දියක් ගෙවන ලෙසට ද අධිකරණය නියම කළේය. එසේ නොගෙවන්නේ නම් වසර 22ට අමතරව තවත් වසර දෙකක සිරදඬුවමක් නියම කරන ලදී.

66 හැවිරිදි අනුර වික්‍රමසිංහ නැමති කතරගම ප්‍රදේශයේ සේවය කළ විශ්‍රාමික ග්‍රාමසේවා නිලධාරී වරයා පෙරේදා (07දා) රාත්‍රී සිය බලපත්‍ර සහිත ගිනි අවියෙන් කතරගම කඳසුරිඳුගම පිහිටි එම මහතාගේ නිවසේ කාමරයක් තුළ වෙඩි තබාගෙන සිය දිවි හානි කරගෙන ඇත.

අනුර වික්‍රමසිංහ මහතා කතරගම සහ මොනරාගල දිස්ත්‍රික්කයේ ස්ථාන රැසක ග්‍රාමසේවා නිලධාරියකු ලෙස සේවය කර ඇති නිළධාරියෙකි.

ලේඛකයකු ලෙස පොත් 09ක් රචනා කර ඇති අනුර වික්‍රමසිංහ මහතා පසුගියදා කතරගමට ප්‍රදේශයේ ජනතාවට නව මත්පැන්හලක් අවශ්‍ය බව ප්‍රසිද්ධියේ ප්‍රකාශ කිරීමෙන් මාධ්‍ය හරහා නැවත කරලියට පැමිණියේය.

හෙතෙම කතරගම හදිසි මරණ පරීක්ෂක සමන් වික්‍රමසිංහ මහතාගේ සහ කතරගම ප්‍රාදේශීය සභාවේ හිටපු සභාපති අසෝක වික්‍රමසිංහ මහතාගේ වැඩිමහල් සොයුරාද වෙයි.

මෙම මරණය සම්බන්ධයෙන් කතරගම පොලිසිය පරීක්ෂණ පවත්වන අතර සිය දිවි නසාගැනීමට හේතුව මෙතෙක් අනාවරණය වී නොමැත.