Attention

ඉන්දියාව විසින් ශ්‍රී ලංකාව වෙත ලබා දෙන ආපදා ආධාර රැගත් 09 වන ඉන්දීය ගුවන් යානයත් අද (06) පස්වරුවේ කටුනායක ගුවන් තොටුපොළ වෙත පැමිණ බව වාර්තා වෙයි.

මෙම ගුවන් යානය තුළ අඩි 110ක් දිගැති, මෙට්‍රික් ටොන් 65ක් බරැති බේලි පාළමක්, ජේ.සී.බී.බැකෝ යන්ත්‍රයක් ද ඒ අතර වන බව වාර්තා වෙයි.

ඒ සමඟ ඉන්දියාවේ යුධ හමුදාවේ ඉංජිනේරු බළකායේ ඉංජිනේරුවරුන් 13දෙනෙකු ද සහාය දැක්වීම සඳහා මෙරටට පැමිණි බව වාර්තා වෙයි.

මෙම භාණ්ඩ තොගය භාර ගැනීම සඳහා ශ්‍රී ලංකා යුධ හමුදා ඉංජිනේරු බළකායේ නිලධාරීන් පිරිසක් සහ ශ්‍රී ලංකාවේ ඉන්දීය මහකොමසාරිස් කාර්යාලයේ නිලධාරීන් පිරිසක් ද කටුනායක ගුවන් තොටුපොළ වෙත පැමිණ සිටියහ.

නාවික හමුදා නිලධාරීන් විසින් කල්පිටිය මුහුදු තීරයේ ගමන් කරමින් තිබූ සැකකටයුතු බෝට්ටුවක් පරීක්ෂා කිරීමේදී මත්ද්‍රව්‍ය කිලෝ 77කට අධික ප්‍රමාණයක් නාවික භාරයට ගෙන ඇත.

ඊයේ (05) රාත්‍රියේ සිදුකළ මෙම මෙහෙයුමේදී පොහොර උර 03 ක බහා තිබූ අයිස් මත්ද්‍රව්‍ය කිලෝ 63යි ග්‍රෑම් 718ක් හා හෙරොයින් කිලෝ 14යි ග්‍රෑම් 802ක් මෙලෙස අත්අඩංගුවට ගෙන තිබේ.

අදාළ මත්ද්‍රව්‍ය තොගය වැඩිදුර විමර්ශන සඳහා පොලිස් මත්ද්‍රව්‍ය කාර්යංශය වෙත භාරදී ඇති බව වාර්තා වෙයි.

මත්ද්‍රව්‍ය තොගය රැගෙන පැමිණි බෝට්ටුවේ හිමිකරු කල්පිටිය ප්‍රදේශයේ පදිංචිකරුවෙකු බවත් ඔහු අත්අඩංගුවට ගැනීම සඳහා පොලිස් මත්ද්‍රව්‍ය කාර්යංශය වැඩිදුර විමර්ශන සිදුකරන බවත් වාර්තා වෙයි.

දිත්වා ව්‍යසනයෙන් නිවාස අහිමි වූ පුද්ගලයින්ට නිවෙස්වල හිමිකාරිත්වය නොසලකා, අත්‍යවශ්‍ය ගෘහ භාණ්ඩ මිලදී ගැනීම සඳහා එක් නිවසක් සඳහා රුපියල් 50,000ක දීමනාවක් ලබා දෙන බව ජනාධිපති අනුර කුමාර දිසානායක පවසනවා.

පාර්ලිමේන්තුවේ විශේෂ ප්‍රකාශයක් සිදු කරමින් ජනාධිපතිවරයා මේ බව කියා සිටියා.

2026 අයවැය තෙවන වර කියවීමේ ඡන්ද විමසීම සංශෝධන සහිතව වැඩි ඡන්ද 157කින් අද පස්වරුවේ සම්මත විය.

ඡන්ද විමසීමේදී අයවැයට පක්ෂව ඡන්ද 158ක්ද විරුද්ධව එක් ඡන්දයක් හිමිවූ අතර දෙදෙනෙකු ඡන්දය ප්‍රකාශ කිරීමෙන් වැළකී සිටියේය.

පසුගිය නොවැම්බර් මස 15 වනදා අයවැය තෙවන වර කියවීම හෙවත් කාරක සභා විවාදය ආරම්භ වුණි.

පසුගිය නොවැම්බර් මස 7 වනදා මුදල්, ක්‍රමසම්පාදන හා ආර්ථික සංවර්ධන අමාත්‍යවරයා ලෙස ජනාධිපති අනුර කුමාර දිසානායක මහතා විසින් විසර්ජන පනත් කෙටුම්පත පාර්ලිමේන්තුවට ඉදිරිපත් කළේය.

ආපදා තත්වය හේතුවෙන් මේ වනවිට අවතැන් කඳවුරු වල සිටිනා ජනතාව රජය විසින් පූර්ණ වශයෙන් රැක බලා ගැනීමට සූදානම් බව ජනාධිපතිවරයා අද පාර්ලිමේන්තුවේදී ප්‍රකාශ කළේය.

එම කඳවුරුවල රැඳී සිටිනා ජනතාව ස්ව කැමැත්තෙන් ඉන් ඉවත්ව යන්නේ නම් ඔවුන්ට කුළී නිවසක් ලබා ගැනීමට රුපියල් 25,000 බැගින් මාසික දීමනාවක් ලබාදෙන බවත් දෙදෙනෙකුට වැඩි පිරිසකගෙන් යුතු පවුලක් සඳහා තවත් රුපියල් 50,000ක ජීවන දීමනාවක් ලබා දෙන බවද ජනපතිවරයා සඳහන් කලේය.

දිට්වා සුළිකුණාටුව හේතුවෙන් රටපුරා ඇතිවූ ආපදාවලින් මියගිය ගණන 607 දක්වා ඉහළ ගොස් ඇති බව ජාතික ආපදා කළමනාකරණ මධ්‍යස්ථානය පවසනවා.

අතුරුදන් සංඛ්‍යාව මේ වනවිට 214ක් දක්වා අඩුවී තිබෙන බවයි එහි නවතම වාර්තාවේ දැක්වෙන්නේ.

ආරක්ෂිත මධ්‍යස්ථාන 1211ක පවුල් 43715කට අයක් 152,537 දෙනකු රඳවා සහන සලසනවා.

අධික වැසි, තද සුළං, නායයාම්, ගංවතුර, පස් කණ්ඩි කඩාවැටීමෙන් පවුල් 586,464කට අයත් 2,082,195 දෙනකු පීඩාවට පත්ව තිබෙනවා.

දිට්වා සුළි කුණාටුවෙන් ඇතිවූ ගංවතුර සහ කුණාටුවේ බලපෑම මේ වනවිට මුළුමනින්ම පහව ගොස් ඇති බවයි වාර්තාවන්නේ.

බදුල්ල දිස්ත්‍රික් මන්ත්‍රී චාමර සම්පත් දසනායක මහතා අද (5) පාර්ලිමේන්තුවේදී සඳහන් කළේ වාරිමාර්ග ඇමතිවරයාට ජම්පරය ඇඳීමට සිදුවන බවයි.

‘බදුල්ලේ ගල් පැලුනේ මාලිමාවේ උදවිය ගහපු බොරු වලට. මේක සෙල්ලමකට ගන්න එපා. ටිකෙන් ටික වතුර ඇරලා තිබුනා නම් මේ ප්‍රශ්න වෙන්නේ නෑ.

අපි නාය ගිය ඒවට මොකුත් කියන්නෙ නෑ. අපි කියන්නෙ වතුර ඇරපු නැති එකට. හරි නම් වාරිමාර්ග ඇමැති ඉල්ලා අස්වෙන්න ඕන. මේවා වගකීමෙන් පැහැර හරින්න බෑ.ඒ වගේම අපිට කන්න දීපු දකුණේ මිනිස්සුන්ට මෙහිදී ස්තූති කළ යුතුයි. වාරිමාර්ග ඇමතිට ජම්පර අඳින්න වෙනවා. එයා මේ මරණ වලට වග කියන්න ඕන යනුවෙන්ද මන්ත්‍රීවරයා කීය.

ඊසාන දිග මෝසම ක්‍රමයෙන් ස්ථාපිත වීම හේතුවෙන් ලබන 09 වනදා සිට වැසි තත්ත්වයේ වැඩි වීමක් අපේක්ෂා කරන බව කාලගුණ විද්‍යා දෙපාර්තමේන්තුව පවසනවා.

එහි අධ්‍යක්ෂ ජනරාල් අතුල කරුණානායක කියා සිටියේ මේ හේතුවෙන් උතුර, උතුරු මැද, වයඹ, නැගෙනහිර සහ ඌව පළාත්වල වැසි තත්ත්වයේ වැඩිවීමක් අපේක්ෂා කළ හැකි බවයි.

මේ අතර, බදුල්ල දිස්ත්‍රික්කයේ ප්‍රදේශ රැසකට මේ වන විට වැසි ඇදහැලෙමින් පවතින බව බදුල්ල අප ප්‍රාදේශීය වාර්තාකරු සදහන් කළා.

තමාට ලබාදීමට නියමිත කැබ් රථය අවශ්‍ය නැති බවත් ඊට අදාළ මුදල වතුකරයේ ජනතාවට බෙදා දෙන ලෙස තමා ඉල්ලීමක් කරන බවත් යාපනය දිස්ත්‍රික් පාර්ලිමේන්තු මන්ත්‍රී අර්චුනා රාමනාදන් මහතා පාර්ලිමේන්තුවේදී අද පැවසීය

ඒ සඳහා කැමැත්ත පලකරමින් ලිපියක් ලබාදීමට සූදානම් බව ද ඔහු ප්‍රකාශ කළේය.

තමුන්නාන්සේලාගේ ඒ කැබ් එක මට එපා. වතුකරයේ මිනිසුන්ට ඒ සල්ලි ලක්ෂ දහය ගානේ බෙදන්න. මට කාර් එකකුත් නෑ. මම අද යාපනයට යන්නේ බස් එකේ. ඔයාලා කවුරුත් මෙතන බස් එකේ යන අය ඉන්නවද.

ඔයාලා එනවනම් උතුරට මම සපෝට් කරන්නම්. මම ඩයොස්පෝරාවෙන් සල්ලි ගෙනල්ලා උතුරටත් නැගෙනහිරටත් බෙදන්නම්. ඕනෑ නම් දකුණටත් දෙන්නම්. මම හා කිව්වොත් සල්ලි වැටෙනවා ඕන තරම්.

ස්වභාවික විපත්වලට පත්ව අසරණ වූ ජනතාවට විවිධ පරිත්‍යාගශීලීන් දුන් පානීය ජල බෝතල් තොගයක් මහනුවර ගඟවට කෝරළේ ප්‍රාදේශීය ලේකම් කාර්යාලය සතු කැබ් රියකින් රැගෙන ගොස් අම්පිටිය හන්දියේ රතු බෝක්කුය අසල ආපන ශාලාවකට විකුණූ බව කියන එම ප්‍රදේශීය ලේකම් කාර්යාලයේ රියදුරකු අසල තරුණ පිරිසක් අල්ලා මහනුවර පොලීසියට බාර දී තිබේ.

මෙම වතුර බෝතල් පැහැරගෙන ගොස් මුදලට කඩවලට විකුණූ රියදුරාගේ වැඩ තහනම්කි රීමට පියවර ගන්නා බව මේ පිළිබඳව විමසීමේදී ගඟවට කෝරළේ ප්‍රාදේශීය ලේකම් අමිල නවරත්න මහතා පැවැසීය. එම රියදුරා සේවයට බැඳී සති කීපයක් වන බවද ප්‍රාදේශීය ලේකම්වරයා පැවසීය.

ආපද‍ාවන් වලින් විපතට පත් ජනතාවට නොමිළේ බෙදා දීමට පරිත්‍යාගශීලීන් ලබාදුන් මෙම වතුර බෝතල් හොර පාරෙන් මිළදී ගත් හෝටල් හිමියාට ද එරෙහිව නීතීමය පියවර ගත යුතු බව එම සොරකම අල්ලා දුන් මහජනතාව පවසති.