Attention

දිට්වා සුළි කුණාටුවෙන් ඇති වූ ආපදා තත්ත්වය හේතුවෙන් පාසල් දහසකට ආසන්න සංඛ්‍යාවක් පූර්ණ සහ අර්ධ වශයෙන් හානියට පත්ව තිබෙන බව අධ්‍යාපන අමාත්‍යංශ පවසයි.

යුනිසෙෆ් සංවිධානය පවසන්නේ මෙරටට බලපෑ අයහපත් කාලගුණයෙන් මෙරට දරුවන් 275,000 කට පමණ බලපෑම් එල්ල වී ඇති බවයි.

එවන් පසුබිමක් තුල ආපදාවට ලක්වූ බොහෝ ප්‍රදේශවල දරුවන්ගේ පාසල් පෙළපොත් ඇතුළු පාසල් උපකරණ ද ගංවතුරට හසුවීමෙන් විනාශ වී තිබේ.

එමෙන්ම, බොහෝ ප්‍රදේශවල පාසල් ගොඩනැගිලිවලට ද දැඩි හානි සිදුව තිබුණා.

මේ අතර ආපදා තත්ත්වය හේතුවෙන් දීර්ඝ කළ නව පාසල්වාරය එළඹෙන 16 වනදා ආරම්භ කිරීමටයි අධ්‍යාපන බලධාරීන් මේ වන විට සැලසුම් කර ඇත්තේ.

පාරිභෝගික කටයුතු පිළිබඳ අධිකාරියට ලද තොරතුරු මත සිදුකළ වැටලීමකදී වැඩිමිලට පානීය ජල බෝතල් අලෙවි කළ නිවාඩු නිකේතනයකට සහ පුද්ගලික සමාගමකට රුපියල් මිලියනයක දඩ මුදලක් පනවා තිබේ.

මෙලෙස නඩු පවරා ඇත්තේ බෙලිහුල්ඔය සහ බණ්ඩාරවෙල ප්‍රදේශයේ නිවාඩු නිකේතනයකට සහ පුද්ගලික ආයතනයකටය.

බෙලිහුල්ඔය ප්‍රදේශයේ අදාළ නිවාඩු නිකේතනය විසින් රුපියල් 100ක මිලකට අලෙවි කළ යුතු ලීටරයක පානීය ජල බෝතලක් රුපියල් 400ක මිලට අලෙවි කිරීමේ චෝදනාව මත අදාළ ආයතනට එරෙහිව බලන්ගොඩ මහේස්ත්‍රාත් අධිකරණයේ නඩු පැවරීමට එම අධිකාරිය පියවර ගෙන තිබේ.

එහිදී බලන්ගොඩ මහේස්ත්‍රාත් අධිකරණය මගින් අදාළ නිවාඩු නිකේතනයට රුපියල් මිලියනයක දඩ මුදලක් පැනවීමට නියෝග කර ඇත.

එමෙන්ම රුපියල් 70කට අලෙවි කළ යුතු මිලිලීටර් 500 පානිය ජල බෝතලයක් එම මිල ඉක්මවා රුපියල් 230කට අලෙවි කළ බණ්ඩාරවෙල ඇල්ල ප්‍රදේශයේ පුද්ගලික සමාගමකටද පාරිභෝගික කටයුතු පිළිබඳ අධිකාරිය මගින් නඩු පවරා ඇති අතර එහිදී ද අදාළ සමාගම වෙත රුපියල් මිලියනයක දඩ මුදලක් පැනවීමට බණ්ඩාරවෙල මහේස්ත්‍රාත් අධිකරණය නියෝග කර තිබේ.

එක්සත් අරාබි එමීර් රාජ්‍යය විසින් ආපදා ආධාර වශයෙන් මෙරටට ලබා දුන් 09 වන ආධාර තොගය රැගත් එරට ගුවන් හමුදාවට අයත් විශේෂ භාණ්ඩ ප්‍රවාහන ගුවන් යානය අද (07) කටුනායක ගුවන් තොටුපොළ වෙත පැමිණියේය.

ඉලුෂියන් අයි.එල්.- 76 වර්ගයේ විශාලතම භාණ්ඩ ප්‍රවාහන ගුවන් යානයක් වූ එය අද පස්වරු 04.47 ට අබුඩාබි නුවර සිට කටුනායක ගුවන්තොටුපොළ වෙත පැමිණ තිබුණි.

එම ගුවන් යානයෙන් කිලෝ ග්‍රෑම් 13,482 ක් බරැති කූඩාරම් සහ ගමන් මලු තොගයක් රැගෙනවිත් තිබේ.

ඒවා භාරගැනීම සඳහා ශ්‍රී ලංකා යුද හමුදා නිලධාරීන්, ආපදා කළමනාකරණ මධ්‍යස්ථානයේ සහ ශ්‍රී ලංකා විදේශ කටයුතු අමාත්‍යංශයේ නිලධාරීන් පිරිසක් ද කටුනායක ගුවන්තොටුපොළ වෙත පැමිණ ඇත.

බූස්ස බන්ධනාගාරයේ ඇති වු නොසන්සුන්කාරී තත්ත්වයකදී එම බන්ධනාගාරයේ බන්ධනාගාර අධිකාරීවරයෙකු තුවාල ලබා ඇතැයි වාර්තා වෙයි.

එහි රඳවා සිටි පිරිසක් ඔවුන් සිටින සිර මැදිරිවලින් වෙනත් සිරමැදිරිවලට මාරු කිරීමට යාමේදී මෙම නොසන්සුන්කාරී තත්ත්වය ඇති වී ඇති බව වාර්තා වේ.

එම අදාළ මාරුකිරීම්වලට රැදවියන් විරෝධය පළ කර ඇති අතර එහිදී රැදවියන් විසින් සිදුකළ පහරදීමේදී බන්ධනාගාර අධිකාරිවරයෙකුට මෙසේ තුවාල කබා තිබේ.

කෙසේවෙතත් මේ වන විට තත්ත්වය සමතයකට පත් කර ඇති අතර බන්ධනාගාර අධිකාරිවරයාගේ නාසයට තුවාල සිදුව ඇති බව ද බන්ධනාගාර ආරංචිමාර්ග සඳහන් කළේය.

පසුගියදා ඇතිවූ දිට්වා ආපදා තත්ත්වය හේතුවෙන් මියගිය පුද්ගලයින් සංඛ්‍යාව 627 දක්වා ඉහළ ගොස් තිබේ.

මේ අතර පුද්ගලයින් 190ක් පිළිබඳ තොරතුරු තවමත් වාර්තා වී නොමැති බවයි ආපදා කළමනාකරණ මධ්‍යස්ථානය පවසයි.

මාර්ග සංවර්ධන අධිකාරිය පවසන්නේ පැවති ආපදා තත්ත්වය හේතුවෙන් අවහිර වූ මාර්ගවලින් සියයට 85කට වඩා වැඩි ප්‍රමාණයක් මේ වන විට විවෘත කර ඇති බවයි.

ආපදාවලින් හානි වූ සියලුම මාර්ග එලඹෙන සතිය තුළදී රථවාහන ධාවනය සදහා විවෘත කිරීමට බලාපොරොත්තු වන බව එහි අධ්‍යක්ෂ ජනරාල් විමල් කණ්ඩම්බි රජයේ ප්‍රවෘත්ති දෙපාර්තමේන්තුවේ ඊයේ පැවති ප්‍රවෘත්ති සාකච්ඡාවකට එක්වෙමින් කියා සිටියේය.

මේ අතර, කොළඹ – මහනුවර ප්‍රධාන මාර්ගයේ ගනේතැන්න සහ කඩුගන්නාව අතර කොටස පස්වරු 6 සිට පෙරවරු 6 දක්වා රාත්‍රි කාලයේ තවදුරටත් වසා තැබෙනවා.

නායයෑම් අවදානමක් හේතුවෙන් කෑගල්ල දිස්ත්‍රික්කයේ රුවන්වැල්ල, රත්තාගල ප්‍රදේශයේ සහ හැටන්, රොසැල්ල මාණික්කාවත්ත ජනපදයේ සිටින පවුල් ඉවත් කිරීමට පියවර ගෙන තිබේ.

ඒ අනුව රුවන්වැල්ල රත්තාගල ප්‍රදේශයේ පවුල් 11ක් රත්තාගල ප්‍රාථමික විද්‍යාලය වෙත යොමු කිරීමට පියවර ගෙන ඇත.

එමෙන්ම වටවල රොසැල්ල මාණික්කාවත්ත ජනපදයේ සිටි පවුල් 13ක පුද්ගලයින් 50 දෙනෙකුද එම ප්‍රදේශයෙන් ඉවත් කර වැලිඔය දමිළ මහා විද්‍යාලය වෙත යොමු කිරීමට පියවර ගෙන තිබේ.

මියන්මාර රජයේ දූත පිරිසක් සමග ඊයේ (06) රාත්‍රියේ ආධාර රැගත් එරට හමුදාවේ ගුවන් යානයක් කටුනායක ගුවන් හමුදා කඳවුර වෙත පැමිණ තිබේ.

දිවයිනට බලපෑ අයහපත් කාලගුණ තත්ත්වය හේතුවෙන් පීඩාවට පත් වූ මෙරට ජනතාව වෙනුවෙන් සහන සැලසීමේ අරමුණින් මෙම ගුවන් යානය සහ දූත පිරිස දිවයිනට පැමිණ ඇත.

සනීපාරක්ෂක ද්‍රව්‍ය, වෛද්‍යාධාර මෙන්ම අනෙකුත් අත්‍යවශ්‍ය ද්‍රව්‍යද විශාල ප්‍රමාණයක් මෙම ආධාර තොගය තුල ඇතුළත් බව වාර්තා වෙයි.

මෙම සහනාධාර භාර දීමේ අවස්ථාවට ශ්‍රී ලංකා මියන්මාර තානාපතිනී මාර්ලා තාන් ටයික්, මියන්මාර රජයේ විදේශ කටයුතු අමාත්‍යාංශයේ අධ්‍යක්ෂ ජනරාල් zසෝ  ෆියෝ වින් ඇතුළු එරට රජයේ නියෝජිත නියෝතවරියන් රැසක් එක්ව සිටිහය.

එමෙන්ම මෙම භාණ්ඩ තොගය භාර ගැනීම සඳහා ශ්‍රී ලංකා ගුවන් හමුදාවේ අධ්‍යක්ෂ ජනරාල් සැලසුම් එයාර් වයිස් මාර්ෂල් දේශප්‍රිය සිල්වා මහතා ඇතුළු ගුවන් හමුදා නිලධාරීන් පිරිසක්ද සහභාගි විය.

ජාතික ගොවිජන එකමුතුවේ සභාපති අනුරාධ තෙන්නකෝන් පැවසූවේ පැවති ගංවතුර තත්වය හේතුවෙන් වී වගාකළ අක්කර 253, 125 ක් පූර්ණ ලෙස සහ අක්කර 420,000 ක් අර්ධ ලෙස හානියට ලක්ව ඇති බවයි.

නිරාවිය පාලම ආසන්නයෙන් කලා ඔය පිටාර ගැලීම හේතුවෙන් තඹුත්තේගම ප්‍රාදේශීය ලේකම් බල ප්‍රදේශයට අයත් තිස්පණේපුර ප්‍රදේශයේ කුඹුරු අක්කර දෙසීයකට වැඩි ප්‍රමාණයක් මුළුමනින්ම විනාශයට පත්ව තිබෙන බවද ඔහු සඳහන් කළේය.

එමෙන්ම පැවති ගංවතුර හේතුවෙන් පොළොන්නරුව දිස්ත්‍රික්කයේ කුඹුරු රැසක්ද ජලයෙන් යටවී විනාශයට පත්ව තිබේ.

මේ අතර ගංවතුර තත්වය හේතුවෙන් ත්‍රිකුණාමල, සේරුනුවර ප්‍රදේශයේ ගවයින් විශාල සංඛ්‍යාවක් මිය ගොස් ඇති බව ගොවීන් පවසයි.

පවතින අධික වර්ෂාපතනයත් සමග තම අමු මිරිස් වගාවන් විනාශ වී ඇති බව තිරප්පනේ ගොවීන් පවසති.

නායයෑම් අනතුරු ඇඟවීම් යාවාත්කාලීන කිරීමට ජාතික ගොඩනැගිලි පර්යේෂණ සංවිධානය පියවර ගෙන තිබේ.

මෙමගින් දිස්ත්‍රික්ක 05 ක් ප්‍රාදේශීය ලේකම් කොට්ඨාස රැසක් සඳහා නායයෑම් අනතුරු ඇඟවීම් තවදුරටත් යාවාත්කාලීන කිරීමට එම සංවිධානය පියවර ගෙන ඇත.

ජාතික ගොඩනැගිලි පර්යේෂණ සංවිධානය පැවසුවේ අද 4.00 සිට හෙට පස්වරු 4.00 දක්වා මෙම අනතුරු ඇඟවීමේ නිවේදනය ක්‍රියාත්මක වන බවය. 

ඒ අනුව මහනුවර දිස්ත්‍රික්කයේ පාතදුම්බර, කුන්ඩසාලේ, පාතහේවාහැට, පානවිල, මැදදුම්බර, දොළුව, තුම්පනේ, උඩුනුවර, දෙල්තොට, ගඟඉහළ කොරලය, පස්බාගේ කොරළය, යටිනුවර, හතරලියද්ද, උඩුදුම්බර, මිනිපේ, උඩපළාත, ගඟවට කෝරළය, අකුරණ, පූජාපිටිය, හාරිස්පත්තුව, කෑගල්ල දිස්ත්‍රික්කයේ අරණායක, මාවනැල්ල, දෙහිඕවිට, බුලත්කොහුපිටිය, රඹුක්කන, යටියන්තොට, වරකාපොල, 

කුරුණෑගල දිස්ත්‍රික්කයේ අලව්ව, රිදීගම, පොල්ගහවෙල, මල්ලවපිටිය, මාවතගම, නාරම්මල

මාතලේ දිස්ත්‍රික්කයේ උකුවෙල, නෙළුව, යටියන්තොට, ලග්ගල, පල්ලේගම, පල්ලේපොල, මාතලේ, රත්තොට, අඹන්ගඟ කොරළය, විල්ගමුව, නුවරඑළිය දිස්ත්‍රික්කයේ හඟුරක්කෙත, මතුරට, නිල්දණ්ඩාහේන, වලපනේ යන ප්‍රාදේශීය ලේකම් කොට්ඨාස සඳහා ඉවත් වෙන ලෙස දන්වා රතු නිවේදන නිකුත් කර තිබේ.

තවද බදුල්ල දිස්ත්‍රික්කයේ ඌව පරණගම, බදුල්ල, කන්දෙකැටිය, බණ්ඩාරවෙල, සොරණාතොට, හාලිඇළ, මීගහකිවුල, පස්සර, 

නුවරඑළිය දිස්ත්‍රික්කයේ කොත්මලේ, නෝවුඩ්, අඹගමුව කොරළය, තලවාකැලේ, කොත්මලේ නැගෙනහිර, නුවරඑළිය, 

රත්නපුර දිස්ත්‍රික්කයේ ගොඩකවෙල, කහවත්ත, කොලොන්න යන ප්‍රාදේශීය ලේකම් කොට්ඨාස සඳහා අවධානයෙන් සිටින ලෙසත් අනතුරු ඇඟවීම් කර තිබේ.

එමෙන්ම කොළඹ දිස්ත්‍රික්කයේ සීතාවක, පාදුක්ක, 

ගාල්ල දිස්ත්‍රික්කයේ ඇල්පිටිය, යක්කලමුල්ල, 

ගම්පහ දිස්ත්‍රික්කයේ මීරිගම, දිවුලපිටිය, 

කළුතර දිස්ත්‍රික්කයේ ඉංගිරිය, බුලත්සිංහල, හොරණ, 

රත්නපුර දිස්ත්‍රික්කයේ කුරුවිට, බලන්ගොඩ, ඇහැලියගොඩ, පැල්මඩුල්ල, කල්තොට, කලවාන, ඕපනායක, අයගම, නිවිතිගල, ඉඹුල්පේ, ඇලපාත, රත්නපුර, කිරිඇල්ල යන ප්‍රාදේශීය ලේකම් කොට්ඨාස සඳහා විමසිලිමත්බවින් සිටින ලෙසත් අනතුරු ඇඟවීම් සිදුකර ඇත.