Local news

පාස්කු ඉරුදින ත්‍රස්ත ප්‍රහාරය සම්බන්ධයෙන් සිදුකරන විමර්ශන වලට බාධා වන අයුරින් ක්‍රියාකරමින් ඇතැයි කියමින් හිටපු පාර්ලිමේන්තු මන්ත්‍රීවරුන් ඇතුළු පිරිසක් නම් කරමින් අධිකරණයට ඊයේ (10) දින කරුණු වාර්තා කර ඇත.

විමල් වීරවංශ, උදය ගම්මන්පිල, ටිරාන් අලස්, සරත් වීරසේකර, අනුරාධා යහම්පත්, ජයන්ත සමරවීර, සංජීව එදිරිමාන්න, මධුභාෂන ප්‍රභාත්, චානක බණ්ඩාර, පුජ්‍ය බලංගොඩ කස්සප හිමි සහ පුජ්‍ය බෙංගමුවේ නාලක හිමි ඇතුළු පිරිස නම් කරමින් අධිකරණයට කරුණු වාර්තා කර ඇත.

මේ අතර සුරේෂ් සලේ, උදය ගම්මන්පිල, විමල් වීරවංශ සහ දිලිත් ජයවීර පාස්කු ඉරිදා ත්‍රස්ත ප්‍රහාර විමර්ශනයට බාධා කරන බවට අපරාධ පරීක්ෂණ දෙපාර්තමේන්තුව පසුගිය (08) දින කොටුව මහේස්ත්‍රාත් අධිකරණයට දැනුම් දුන්නේය.

අද (10) දින ලෝක මලල ක්‍රීඩා සංගමය විසින් ප්‍රකාශයට පත් කරන ලද නවතම හෙල්ල විසිකිරීමේ ලෝක ශ්‍රේණිගත කිරීම්වලට අනුව ශ්‍රී ලංකාවේ රුමේෂ් තරංග ලෝකයේ තෙවැනි ස්ථානය දක්වා ඉදිරියට පැමිණ ඇත.

නවතම වර්ගීකරණයට අනුව රුමේෂ් තරංග ශ්‍රේණිගත ලකුණු 1,324ක් හිමිකරගෙන සිටින අතර ලැයිස්තුවේ ප්‍රථම ස්ථානය හිමිකරගෙන සිටින ජර්මානු ක්‍රීඩක ජූලියන් වෙබර් විසින් ලකුණු 1,360ක් ලබා සිටියි.

දෙවැනි ස්ථානයේ සිටින ග්‍රෙනඩා රාජ්‍යයේ ඇන්ඩර්සන් පීටර්ස්ට ලකුණු 1,326ක් ලබාගෙන ඇති අතර එය රුමේෂ් තරංගට වඩා ලකුණු 2ක ඉතා සුළු පරතරයක් වීම විශේෂත්වයකි.

ලෝක මලල ක්‍රීඩා ක්ෂේත්‍රයේ දැවැන්තයන් වන ඔලිම්පික් රන් පදක්කම් ලාභී ක්‍රීඩකයන් දෙදෙනෙකුම අභිබවා යාමට රුමේෂ් තරංගට හැකියාව ලැබී ඇත. 

ශ්‍රී ලංකාවේ වත්මන් මූල්‍ය ප්‍රතිපත්තිය, විනිමය අනුපාත ප්‍රතිපත්තිය සහ රටේ ආර්ථික තත්ත්වය සම්බන්ධයෙන් පාර්ලිමේන්තු මන්ත්‍රීවරුන් දැනුවත් කිරීමේ වැඩසටහනක් පාර්ලිමේන්තුවේදී අද (10) දින පැවැත්විණි.

කථානායක වෛද්‍ය ජගත් වික්‍රමරත්නගේ ප්‍රධානත්වයෙන් පැවති මෙම වැඩසටහන සඳහා සම්පත් දායකයින් ලෙස ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ ඇතුළු ශ්‍රී ලංකා මහ බැංකුවේ ජ්‍යෙෂ්ඨ නිලධාරීහු පිරිසක් සහභාගී වූහ.

වැඩසටහන අතරතුර රට තුළ මූල්‍ය ප්‍රතිපත්ති ක්‍රියාත්මක වන ආකාරය, විනිමය අනුපාතයේ හැසිරීම, ආර්ථික ස්ථාවරත්වය සහ රටේ ආර්ථික ප්‍රගතියට අදාළ කරුණු පිළිබඳව මන්ත්‍රීවරුන් දැනුවත් කෙරිණි.

එසේම, මන්ත්‍රීවරුන් විසින් ඉදිරිපත් කළ ප්‍රශ්න සහ අදහස් සඳහා ද ශ්‍රී ලංකා මහ බැංකු නිලධාරීන් විසින් කරුණු පැහැදිලි කරමින් පිළිතුරු ලබා දෙන ලදී.

පාරිභෝගික කටයුතු පිළිබඳ අධිකාරිය විසින් දේශීයව ඇසුරුම් කළ හෝ බෝතල් කළ පානීය ජලය (PET බෝතල්) සඳහා නව උපරිම සිල්ලර මිල ගණන් නියම කරමින් අති විශේෂ ගැසට් නිවේදනයක් නිකුත් කර ඇත.

2003 අංක 9 දරන පාරිභෝගික කටයුතු පිළිබඳ අධිකාරිය පනතේ 20 (5) වගන්තිය යටතේ නිකුත් කර ඇති මෙම අංක 96 දරන අති විශේෂ ගැසට් නිවේදනය (ගැසට් අංක: 2492/29) අද (10) දිනයේ සිට වහාම ක්‍රියාත්මක වන පරිදි බලපැවැත්වේ.

ඒ අනුව, නියමිත උපරිම සිල්ලර මිල ඉක්මවා පානීය ජල බෝතල් අලෙවි කිරීම, අලෙවිය සඳහා ප්‍රදර්ශනය කිරීම හෝ ඉදිරිපත් කිරීම කිසිදු නිෂ්පාදකයෙකුට, ඇසුරුම්කරුවෙකුට, බෙදාහරින්නෙකුට හෝ වෙළෙන්දෙකුට සම්පූර්ණයෙන්ම තහනම් කර ඇත.

මි. ලීටර 500 සිට 999 දක්වා උපරිම සිල්ලර මිල රුපියල් 80කි.

ලීටර 1 සිට 1.499 දක්වා උපරිම සිල්ලර මිල රුපියල් 120කි.

ලීටර 1.5 සිට 1.999 දක්වා උපරිම සිල්ලර මිල රුපියල් 150කි.

ලීටර 2 සිට 2.499 දක්වා උපරිම සිල්ලර මිල රුපියල් 180කි.

ලීටර 5 සිට 6.999 දක්වා උපරිම සිල්ලර මිල රුපියල් 400කි.

හිටපු අමාත්‍ය විමල් වීරවංශගේ සොහොයුරු සරත් වීරවංශට අද (10) දින කොළඹ කොටුව මහේස්ත්‍රාත් පසන් අමරසේන විසින් විදෙස් ගමන් තහනමක් පැනවීය.

ජනාධිපති ලේකම් කාර්යාලයෙන් ජාතික නිදහස් පෙරමුණට ලබාදුන් වාහන 40 ක් අවභාවිත කරමින්, රජයට රුපියල් මිලියන 09 ක් පාඩුවක් සිදු කළ බව කියන සිද්ධියක් සම්බන්ධයෙන් ඔහු සැකකරුවෙකු ලෙස නම් කර ඇත.

අපරාධ පරීක්ෂණ දෙපාර්තමේන්තුව කළ ඉල්ලීමක් සලකා බැලීමෙන් අනතුරුව ප්‍රධාන මහේස්ත්‍රාත්වරයා එම නියෝගය නිකුත් කළේය.