ලෝක වෙළෙදපොළ අර්බුදය හේතුවෙන් මෙරට තෙල් සැපයුම් කරන පෞද්ගලික සමාගම් ඩීසල් මිල වැඩි කිරීමක් ඉල්ලා ඇත.
කෙසේ වෙතත් රට තුළ ඩීසල් සැපයුම සම්බන්ධව කිසිදු ගැටලුවක් නිර්මාණය වී නොමැති බවත් කිසිදු ඩීසල් හිගයක් නොමැති බවද ඛනිජ තෙල් නීතිගත සංස්ථාව සඳහන් කරයි.
බලශක්ති අමාත්‍යංශයට එම පෞද්ගලික ඉන්ධන සමාගම් දැනුම් දී ඇති ආකාරයට,
*IOC සමාගම ඩීසල් ලීටරයකින් රුපියල් 141ක් පාඩු ලබන බව සඳහන් කරයි.
*RM PARKS සමාගම ඩීසල් ලීටරයකින් රුපියල් 160ක් පාඩු ලබන බව සඳහන් කරයි.
*සිනොපෙක් සමාගම ඩීසල් ලීටරයකින් රුපියල් 163ක් පාඩු ලබන බව සඳහන් කරයි.
ඩීසල් ලීටරයක් සඳහා රජය ලබාදුන් රුපියල් 100ක සහනාධාරය පසුගිය ජුලි මාසයේ සිට අත්හිටුවීමට පියවර ගත්තේය.
එහෙත් මේ වනවිට මැදපෙරදිග මතුව ඇති යුදමය තත්ත්වය හේතුවෙන් තෙල් මිල ඉහළ යාම හමුවේ ඩීසල් ලීටරයකින් ලබන පාඩුව ඉහළ ගොස් ඇති බව එම සමාගම් සඳහන් කරයි.
මෙම තත්ත්වය හේතුවෙන් එම පෞද්ගලික සමාගම් තුන ඩීසල් නිකුත් කිරීම සීමාකර තිබෙන බව ඛනිජ තෙල් බෙදුම්කරුවන්ගේ සංගමයේ සභාපති ඩබ්ලිව්. එච්. එස්. ප්‍රනාන්දු සඳහන් කරයි.
කෙසේ වෙතත් ඛනිජ තෙල් නීතිගත සංස්ථාවට ඩීසල් වලින් සිදුවන පාඩුව කළමණාකරනය කර ගැනීමට හැකියාව පවතින බව එම සංස්ථාවේ සභාපති ඩී. ජේ. රාජකරුණා සඳහන් කරයි.
මෙම මිල සම්බන්ධ ගැටලුව ගැන අමාත්‍යංශය අදාළ ඉන්ධන සමාගම් සමග සාකච්ඡා කර ඇති අතර ඛනිජ තෙල් නීතිගත සංස්ථාවට අයත් ඉන්ධන පිරවුම්හල් නොමැති ප්‍රදේශ 52කට අඛණ්ඩව ඩීසල් සැපයීමට එහිදී එම සමාගම් එකග වු බව බලශක්ති අමාත්‍ය අනුර කරුණාතිලක සඳහන් කරයි.
පවතින තත්ත්වය හමුවේ කටයුතු කිරීම අභියෝගයක් බවට පෞද්ගලික ඉන්ධන බෙදාහැරීමේ සමාගම් රජයට කරුණු වාර්තා කර ඇති අතර එම සමාගම් නියෝජිතයන් සමග සාකච්ඡා කර ඉදිරියේදී සුදුසු තීරණයකට එළඹෙන බවද අමාත්‍යවරයා සඳහන් කරයි.
පෞද්ගලික ඉන්ධන සමාගම් විවිධ යෝජනා ඉදිරිපත් කර තිබුණද රටේ පාරිභෝගිකයා කෙරෙහි ද අවධානය යොමු කරමින් අවසන් තීරණය ගන්නා බවද අමාත්‍යවරයා සඳහන් කරයි
