මෙරට ශ්‍රී ලාංකිකයන් සිය ගණනක් මේ වනවිට රුසියානු හමුදාවට එක්වී ඇති බවත් රුසියානු හමුදාවට බැඳුණු ශ්‍රී ලාංකිකයකු මසකට ඇමෙරිකානු ඩොලර් 3000 ක පමණ වැටුපක් ලබාගන්නා බවත් අල් ජසීරා පුවත් සේවය වාර්තා කළේය.
මෙරට පවතින දුෂ්කර ආර්ථික තත්ත්වය හේතුවෙන් සහ එරට පුරවැසි භාවය ලබා ගැනීමේ බලාපොරොත්තුවෙන් මෙසේ ශ්‍රී ලාංකිකයන් විශාල ලෙස රුසියානු හමුදාව වෙත එක්වීමට උත්සහකරන බව එම සේවය සදහන් කරයි.
විශේෂයෙන්ම ඒ සදහා උත්සහ දරන්නේ ශ්‍රී ලංකා හමුදාවෙන් විශ්‍රාම ගෙන සිටින සොල්දාදුවන් බවත් ඔවුන් තම පවුලට යහපත් අනාගතයක් උදා කර දීම සඳහා යුක්රේන හමුදාව අතින් ඝාතනයට ලක් වීමට පවා සූදානමින් සිටින බවත් අල් ජසීරා පුවත් සේවය තවදුරටත් ප්‍රකාශ කළේය.
මෙරට විශ්‍රාමික හමුදා සොල්දාදුවෙක් වූ 27 හැවිරිදි නිපුණ සිල්වා මෙම මස මුලදී යුක්රේන රුසියා යුද්ධය අතරතුර මියගිය බව ඔහු සමඟ රුසියානු හමුදාවේ සේවය කළ 36 හැවිරිදි සේනක බණ්ඩාර අල් ජසීරා පුවත් සේවයට ප්‍රකාශ කර ඇත.
යුක්රේන හමුදාවේ ඩ්‍රෝන ප්‍රහාරයකින් නිපුණ මියගිය බවත් ප්‍රහාරයෙන් නිපුණගේ පපුවට, අත් වලට සහ පාද වලට තුවාල වී අධික ලෙස රුධිරය වහනය වූ බවත් තමන් නිපුණව කර තබාගෙන පැමිණෙද්දී තවදුරටත් එල්ලවූ ප්‍රහාර හමුවේ ඔහුව දමා ඒමට සිදු වූ බවත් සේනක බණ්ඩාර ප්‍රකාශ කර ඇත.
