Local news

බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත් කෙටුම්පත සඳහා කථානායක වෛද්‍ය ජගත් වික්‍රමරත්න අද (17) සිය සහතිකය සටහන් කළේය.

උක්ත පනත් කෙටුම්පත 2026.03.17 දින පළමුවර කියවන ලද අතර 2026.05.06 දින විවාදයට ගැනීමෙන් අනතුරුව පාර්ලිමේන්තුව විසින් සම්මත කරන ලදී.

ඒ මගින් බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත, 2007 අංක 07 දරන සමාගම් පනත, 2017 අංක 24 දරන දේශීය ආදායම් පනත සහ 1988 අංක 72 දරන සමථ මණ්ඩල පනත සංශෝධනය කිරීම සහ බංකොලොත්භාවය පිළිබඳ ආඥා පනත (97 වන පරිච්ඡේදය) අවලංගු කිරීම සිදු කෙරේ.

ණයගැතියාගේ සාධාරණ ආදායම සහ අත්‍යවශ්‍ය දේපළ ආරක්ෂා කිරීම තහවුරු කරන අතරම, ණය ආරක්ෂණ, තාවකාලික නිවාඩු සහ ප්‍රතිව්‍යුහගත කිරීමේ විධිවිධාන වැනි පුද්ගලික බංකොලොත්භාවය සඳහා නිශ්චිත ක්‍රියා පටිපාටි මෙම පනතේ ඇතුළත්ව ඇත.

තවද, ණය වෙළඳපොළේ පුරෝකථනය කිරීමේ හැකියාව වැඩි දියුණු කිරීම සඳහා ආයතනික පරිපාලනය, ග්‍රාහකත්වය සහ දේශසීමා බංකොලොත්භාවය පිළිබඳ ගැටලු උක්ත පනත් කෙටුම්පත මගින් ආවරණය කෙරේ.

එමෙන්ම, මෙම පනත මගින් අවංක තනි ණය ගැතියන් සඳහා නැවුම් ආරම්භයක් සහ පීඩාවට පත්ව ඇති නමුත් මූලික වශයෙන් ශක්‍ය සමාගම් පුනරුත්ථාපනය කිරීම සඳහා ව්‍යුහගත යාන්ත්‍රණයක් සැපයීමට උත්සාහ කිරීමද අපේක්ෂිතය.

ඒ අනුව බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත් කෙටුම්පත, 2026 අංක12 දරන බේරාගැනීම්, පුනරුත්ථාපන සහ වස්තුභංගත්ව (ආයතනික සහ පුද්ගලික) පනත ලෙස බලාත්මක වේ.

ඉදිරියේදී මෙරටට පැමිණීමට තිබෙන්නේ පසුගිය මාසවල මිලදී ගත් ඉන්ධන තොග බවත් ඒ අනුව ඉන්ධන මිල ගණන් තීරණය වන බව කම්කරු අමාත්‍ය සහ මුදල් හා ක්‍රමසම්පාදන නියෝජ්‍ය අමාත්‍ය අනිල් ජයන්ත සඳහන් කරයි.

වර්තමානයේ රට තුළ පරිභෝජනය කරමින් පවතින්නේ මීට පෙර ඉහළ මිලකට මිලදී ගත් ඉන්ධන බැවින් එම ඉන්ධන තොග අවසන් වන තුරු මෙරට තුළ ඉන්ධන මිල පහත දැමීමට හැකියාවක් නොමැති බවද අමාත්‍ය අනිල් ජයන්ත සඳහන් කරයි.

ලෝක වෙළෙඳපොළේ ඉන්ධන මිල ගණන් පහළ ගියද, එම මිල ගණන් අනුව මෙරට පවතින ඉන්ධන මිල පහළ දැමීමට කිසිදු හැකියාවක් නොමැති බවද අමාත්‍ය අනිල් ජයන්ත සඳහන් කරයි.

කෙසේ වෙතත් වැඩි මිල ගණන් වලට මෙරටට ආනයනය කළ ඉන්ධන තොග පරිභෝජනය කර අවසන් වූ පසුව ඉන්ධන මිල සම්බන්ධව තීරණයක් ගැනීමට හැකි වන බවද අමාත්‍ය අනිල් ජයන්ත සඳහන් කරයි.

අමාත්‍ය අනිල් ජයන්ත සඳහන් කළේ,

“අපිට ඉදිරියේදී එන්න තියෙන්නේ කලින් මාසවල ගත්ත ඒවා. ඒ අනුව තමයි මිල තීරණය වෙන්නේ. ඉදිරියට පරිභෝජනය කරන්න තියෙන්නේ අපි වැඩි මිලට ගත්ත ඒවා ටික. අඩු මිලේ ඒවා ඉදිරියේදී තමයි අපිට ලබාගන්න වෙන්නේ.

ඒකට යම් කාල පමාවක් යාවි. නමුත් අපි බලාපොරොත්තු වෙනවා මිල අඩු වේවි කියලා. ඒ අනුව, මේ දැන් ලබාදී තිබෙන සහනය අපිට අයින් නොකර මේ මිලේම පවත්වා ගැනීම හෝ මිල අඩු කිරීම ඉදිරියේදී සලකා බලනවා.”

අද (17) දින ප්‍රවෘත්ති දෙපාර්තමේන්තුවේදී පැවති විශේෂ මාධ්‍ය සාකච්ඡාවකට එක්වෙමින් අමාත්‍ය අනිල් ජයන්ත මේ බව සඳහන් කරයි.

ශ්‍රී ලංකා නාවික හමුදාවට සහ බ්‍රිතාන්‍ය නාවික හමුදා ඇකඩමියට සම්බන්ධ වීමට අදාළව සිදුකෙරෙන විමර්ශනයකට අදාළව අද (17) දින යෝෂිත රාජපක්ෂ අල්ලස් කොමිසම හමුවේ පෙනී සිටීමෙන් අනතුරුව අත්අඩංගුවට ගත්තේය.

අත්අඩංගුවට ගැනීමෙන් අනතුරුව යෝෂිත රාජපක්ෂ කොළඹ මහෙස්ත්‍රාත් අධිකරණය හමුවට ඉදිරිපත් කළේය.

අධිකරණයට ඉදිරිපත් කිරීමෙන් අනතුරුව යෝෂිත රාජපක්ෂ ඇප මත මුදාහරින ලෙස කොළඹ මහෙස්ත්‍රාත් අධිකරණය නියම කළේය.

රුපියල් ලක්ෂ 50 බැගින් වූ ශරීර ඇප 3ක් මත සැකකරු මුදාහරින ලෙස නියෝග කළ මහෙස්ත්‍රාත්වරයා, සැකකරුගේ විදේශ ගමන් තහනම් කරන බවද දැනුම් දුන්නේය.

අල්ලස් කොමිසමේ නිලධාරිනියන් සහ සැකකරුගේ නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ අතිරේක මහෙස්ත්‍රාත් ලහිරු සිල්වා විසින් මෙම නියෝගය නිකුත් කළේය.

පාස්කු ත්‍රස්ත ප්‍රහාර සිද්ධිය සම්බන්ධයෙන් තමන්ම අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා ජේෂ්ඨ නියෝජ්‍ය පොලිස්පති වරුණ ජයසුන්දර විසින් ඉදිරිපත් කළ රිට් පෙත්සම ශෂී මහේන්ද්‍රන් සහ ආදිත්‍ය පටබැඳිගේගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී, ජේෂ්ඨ නියෝජ්‍ය පොලිස්පති වරුණ ජයසුන්දර මෙම අවස්ථාවේදී අත්අඩංගුවට ගැනීමේ තීරණයක් නොමැති බවට නීතිපතිවරයා විසින් අධිකරණයට කරුණු දක්වා ඇති බැවින් ඔහු විසින් ඉදිරිපත් කළ පෙත්සමේ විභාගය අවසන් කිරීමට අභියාචනධිකරණය අද (17) තීන්දු කළේය.

ඒ අනුව පෙත්සම්කරු මෙම අවස්ථාවේදී අත්අඩංගුවට ගැනීමට තීරණයක් ගෙන නොමැති බවට නීතිපතිවරයා අධිකරණයට ප්‍රතිඥාවක් ලබාදී තිබෙන බැවින්, පෙත්සමේ ඉදිරි කටයුතු අත්හිටුවන බව විනිසුරු මඩුල්ල දැනුම් දුන්නේය.

පසුගිය අයවැය යෝජනාවකට අනුව නගර 10ක් ජීවන නගර ලෙස සංවර්ධනය කිරීමේ ව්‍යාපෘතිය ලබන ඔක්තොම්බර් මාසයේදී ආරම්භ කරන බව නාගරික සංවර්ධන අධිකාරිය සඳහන් කරයි.

මේ යටතේ යාපනය, වව්නියාව, මාතලේ, හැටන්, මඩකලපුව, හලාවත, තඹුත්තේගම, බදුල්ල, ඇහැළියගොඩ සහ මාතර යන නගර විධිමත් සංවර්ධනයකට ලක් කරන බව එම අධිකාරියේ අධ්‍යක්ෂ ජෙනරාල් දමිත් දිසානායක සඳහන් කරයි.

රුපියල් මිලියන 1475ක් වැය කෙරෙන වැඩසටහන යටතේ එම නගර ආශ්‍රිතව ඒකාබද්ධ සංවර්ධන ව්‍යෘපතියක් ක්‍රියාත්මක කරන බවද අධ්‍යක්ෂ ජෙනරාල් දමිත් දිසානායක සඳහන් කරයි.

ජනතාවට අවශ්‍ය කරන සියලු මූලික පොදු පහසුකම් එම නගරවල ස්ථාපිත කිරීම මෙම වැඩපිලිවෙල යටතේ සිදු කෙරෙන බවද අධ්‍යක්ෂ ජෙනරාල් දමිත් දිසානායක සඳහන් කරයි.

සංචාරක ප්‍රවර්ධන කාර්යාංශයේ අරමුදල් අනිසි ලෙස භාවිතා කිරීම සම්බන්ධයෙන් හිටපු අමාත්‍ය බැසිල් රාජපක්ෂ වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ කොටුව මහේස්ත්‍රාත් පසන් අමරසේන විසින් අපරාධ පරීක්ෂණ දෙපාර්තමේන්තුවේ නීති විරෝධී වත්කම් ඒකකයට නියෝග කර ඇත.

පසුගිය 2014 වසරේදී සංචාරක ප්‍රවර්ධන කාර්යාංශය වෙත වෙන් කර තිබූ රුපියල් මිලියන 7.8 ක මුදලක් එම කාර්යාංශයේ ප්‍රවර්ධන කටයුතු සඳහා යෙදවීම වෙනුවට, ඌව පළාත් සභා මැතිවරණ ව්‍යාපාරය වෙනුවෙන් ටී-ෂර්ට් 12,000 ක් මිලදී ගැනීමට වැය කර තිබීම යන සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව විසින් මෙම නඩුව ගොනුකර ඇත.

නඩු විභාගය අතරතුර, අධිකරණය සංචාරක ප්‍රවර්ධන කාර්යාංශයේ හිටපු කළමනාකාර අධ්‍යක්ෂ රූමි ජවුෆර්ට ඇප ලබාදී විදේශ ගමන් තහනමක් පැනවු අතර අතිරේක සැකකරුවන් සම්බන්ධයෙන් නීතිපතිවරයාගේ වැඩිදුර උපදෙස් විභාග වෙමින් පවතින අතර පොදු දේපළ පනත යටතේ චෝදනා ගොනු කර ඇති බව අපරාධ පරීක්ෂණ දෙපාර්තමේන්තුව තහවුරු කළේය.

රජයේ මුදල් මෙලෙස වෙනත් කාර්යයකට උපයෝගී කරගනිමින් රජයට පාඩු සිදුකිරීමේ චෝදනාව මත මෙම නඩුව සිදු කරනු ලබන අතර මෙම නඩුව ඔක්තෝබර් (14) වන දින නැවත කැඳවීමට නියමිතය.

පාස්කු ත්‍රස්ත ප්‍රහාර සිද්ධිය සම්බන්ධයෙන් සිදුකරන විමර්ශන වලට අදාළව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ විසින් ඉදිරිපත් කර ඇති පෙත්සම අද (17) දින කැඳවනු ලැබුවෙිය.

අභියාචනාධකරණයේ සභාපති විනිසුරු රොහාන්ත අබේසූරිය සහ ප්‍රියන්ත ප්‍රනාන්දුගෙන් සමන්විත අභියාචනාධිකරණ විනිසුරු මඩුල්ලක් ඉදිරියේ මෙම පෙත්සම කැඳවනු ලැබුවෙිය.

එහිදී පාස්කු ප්‍රහාරය සම්බන්ධයෙන් සිදුකරන විමර්ශන වලට අදාළව ගොනු කර ඇති පෙත්සමේ වගඋත්තරකරුවන්ගෙන් උපදෙස් ලබා ගැනීමකින් තොරව හිටපු ජනාධිපති ගෝඨාභය රාජපක්ෂ අත්අඩංගුවට නොගන්නා බවට තමන්ට අධිකරණය හමුවේ ප්‍රතිඥාවක් ලබා දිය නොහැකි බව නීතිපතිවරයා අද (17) අභියාචනාධිකරණය හමුවේ ප්‍රකාශ කළේය.

තමන් අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා ගෝඨාභය රාජපක්ෂ ඉදිරිපත් කරනු ලැබ ඇති පෙත්සම අභියාචනාධිකරණය හමුවේ කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් සුහර්ෂි හේරත් මෙම දැනුම්දීම සිදු කළාය.

පෙත්සම්කාර ගෝඨාභය රාජපක්ෂ වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා අධිකරණය හමුවේ කරුණු දක්වමින් සිය සේවාදායකයා අත්අඩංගුවට ගැනීම වළක්වමින් අතුරු තහනම් නියෝගයක් නිකුත් කරන ලෙස තමන් අධිකරණයෙන් ඉල්ලා සිටින බව සඳහන් කළේය.

එහිදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජනරාල් සුහර්ෂි හේරත් පැවසුවේ, මෙම නඩුකරයට අදාළ ලේඛන තමන්ට ලැබුණේ අද පෙරවරුවේ බවත් වගඋත්තරකරුවන්ගෙන් තමන්ට කිසිදු උපදෙසක් මේ දක්වා ලැබී නොමැති බවයි.

වගඋත්තරකරුවන්ගෙන් උපදෙස් ලබා ගැනීමකින් තොරව මෙම පෙත්සම්කරු ගෝඨාභය රාජපක්ෂ අත්අඩංගුවට නොගන්නා බවට තමාට අධිකරණය හමුවේ ප්‍රතිඥාවක් ලබා දිය නොහැකි බවද නියෝජ්‍ය සොලිසිටර් ජනරාල්වරිය සඳහන් කළාය.

නව තාක්ෂණය උපයෝගී කරගනිමින් ශ්‍රී ලංකා පොලිසියේ පොලිස් සේවාවන් රැසක් ඇඟිලි තුඩින් ලබාගැනීමේ පහසුව මහජනතාවට හිමිකරදීම සඳහා පොලිස්පති නීතිඥ ප්‍රියන්ත වීරසූරියගේ උපදෙස් හා මඟපෙන්වීම මත වීශේෂ ව්‍යාපෘතියක් ක්‍රියාත්මක කර ඇත.

ව්‍යාපෘතිය අවසානයේ IOS හා Android මෙහෙයුම් පද්ධති සඳහා සරිලන ජංගම දුරකථන යෙදවුමක් (Mobile App) හා නව පොලිස් වෙබ් අඩවියක් ඔබගේ තාක්ෂණික උපාංගය (Device) මගින් පරිශීලනය කිරීමට හැකිවනු ඇත.

ජංගම දුරකථන යෙදවුම(App) ඔස්සේ පොලිස් මාධ්‍ය කොට්ඨාසය සමාජ මාධ්‍ය ඔස්සේ ඔබ වෙත සමීපකරන දැනුවත්කිරීම්, පුවත්, ඡායාරූප, වීඩියෝ පහසුවෙන් නිරීක්ෂණය කිරීමට හැකිවනු ඇති අතර Notification පහසුකම හරහා ඔබ වෙත යම් හදිසි දැනුවත් කිරීමක් එසැණින් ලබාදීම මෙහි ප්‍රධාන අරමුණක් වේ.

පොලිස් නිශ්කාෂණ වාර්තා අයදුම් කිරීම්, හදිසි දුරකථන ඇමතුම් අංක, හදිසි අවස්ථාවක Location Alerts වැනි පහසුකම් වැනි පොලිස් සේවා ඔබට පහසුවෙන් ලබාගත හැකිවන පරිදි මෙම ජංගම දුරකථන යෙදවුම සකස් කිරීමට නියමිතය.

“Vampior Design” මෘදුකාංග සංවර්ධන පුද්ගලික ආයතනයේ නිර්මාණයක් වන මෙම යෙදවුම හා වෙබ් අඩවිය සඳහා අවශ්‍ය තාක්ෂණික සහය හා පාලනය පොලිස් තොරතුරු තාක්ෂණ කොට්ඨාසය මගින්ද අන්තර්ගත කරුණු පොලිස් මාධ්‍ය කොට්ඨාසය මගින්ද සකස්කරමින් පවතී.

ඒ් අනුව පොලිස් සේවා ලබාගැනීම සඳහා මෙන්ම තොරතුරු දැනගැනීම සඳහා විවිධාකාරයෙන් වැයවන මහජනතාවගේ කාලය හා ශ්‍රමය ඉතිරිකර දෙමින් මෙම යෙදවුම නුදුරු කාලයේදී සෑම පුරවැසියෙකුගේ නවීන ජංගම දුරකථනයක් තුළ සුලභව භාවිතාවන යෙදවුමක් (App) වනු ඇත.