Local news

සමගි ජන බලවේගයේ පාර්ලිමේන්තු මන්ත්‍රී වෛද්‍ය කාවින්ද ජයවර්ධනගේ නිවස පිටුපස ඇළ මාර්ගයක තිබී විදේශීය නිෂ්පාදිත අත්බෝම්බයක් හමුවී ඇත.

මන්ත්‍රීවරයාගේ ජා-ඇළ, වැලිගම්පිටිය ප්‍රදේශයේ පිහිටි නිවස පිටුපසින් ගලා බසින දෙල්ගහ අර ඇළ මාර්ගයේ තිබී මෙම ජීව අත්බෝම්බය හමුවී ඇත.

ජාඇල නගර සභාවේ සේවකයින් විසින් අද (01) දින ඇළ මාර්ගය පිරිසිදු කරමින් සිටියදී මෙම අත්බෝම්බය හමුවී ඇති අතර අනතුරුව එම සේවකයින් කඳාන පොලිසිය දැනුවත් කිරීමෙන් පසුව පොලිස් නිලධාරීන් එම ස්ථානයට පැමිණ පරීක්ෂණ ආරම්භ කර ඇත.

අනතුරුව සිදුකළ මූලික පරීක්ෂණ වලින් පසුව එම ජීව අත්බෝම්බය නිෂ්ක්‍රීය කිරීම සඳහා පොලිස් විශේෂ කාර්ය බළකායේ බෝම්බ නිෂ්ක්‍රීය අංශයේ නිලධාරීන් එය රැගෙන ගොස් ඇත.

සංවිධානාත්මක අපරාධකරු සහ මත්ද්‍රව්‍ය ජාවාරම්කරු වන ශෙහාන් සත්සර හෙවත් “දෙහිබාලේ මල්ලි” නම් සැකකරුගේ බාල සහෝදරයා වන පටබැඳිගේ තුෂාන් සත්සර හෙවත් ‘කළු මල්ලි’ ඩුබායි හිදී අත්අඩංගුවට ගෙන ඇත.

අත්අඩංගුවට ගත් පටබැඳිගේ තුෂාන් සත්සර හෙවත් ‘කළු මල්ලි’ නම් 25 හැවිරිදි සැකකරුට දකුණු පළාතේ සිදුවූ ඝාතන කිහිපයක් සම්බන්ධයෙන් ජාත්‍යන්තර පොලිසිය හරහා රතු වරෙන්තු නිකුත් කර තිබුණේය.

‍අපරාධ පරීක්ෂණ දෙපාර්තමේන්තුවේ අධ්‍යක්ෂ ධූරය සඳහා ජ්‍යෙෂ්ඨ පොලිස් අධිකාරී රොෂාන් අමරසිංහ පත්කර ඇත.

සේවා අවශ්‍යතා මත පොලිස්පතිවරයාගේ උපදෙස් පරිදි අදාළ පත්කිරීම සිදුකර ඇති බව පොලිස් මාධ්‍ය කොට්ඨාසය සඳහන් කරයි.

අපරාධ පරීක්ෂණ දෙපාර්තමේන්තුවේ අධ්‍යක්ෂ ලෙස කටයුතු කළ ශානි අබේසේකර නියෝජ්‍ය පොලිස්පති ධූරයට උසස් කිරීම හේතුවෙන් අධ්‍යක්ෂ ධූරය පුරප්පාඩුව පැවතිණි.

ආණ්ඩුව දැවැන්ත මර්දනයක් සිදු කරන බවත් ලබන (12) වැනිදාට කලින් තමන් ඇතුළට දැමීමට ඉඩ තිබෙන බව ශ්‍රී ලංකා පොදුජන පෙරමුණ පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

එහෙත් ඉදිරියට තමන්ගේ සාටකය ගලවන එක ලේසි වෙන්නේ නැති බවද පාර්ලිමේන්තු මන්ත්‍රී නාමල් රාජපක්ෂ සඳහන් කරයි.

මන්ත්‍රී නාමල් රාජපක්ෂ මාධ්‍ය වෙත අදහස් දක්වමින් සඳහන් කළේ,

“අද දැවැන්ත මර්දනයක් යනවා. සමහරවිට මේ කතා කරන නාමල් රාජපක්ෂ ලබන (12) වෙනිදාට කලින් ඇතුළට දාන්න ආණ්ඩුව උත්සාහ කරන්න බැරිත් නැ. මොකද (12) වෙනිදා අනුරාධපුරයට විශාල ජනකායක් එනවා කියලා ආණ්ඩුවට දැනුනාම සමහරවිට (12) වැනිදා වෙන්න කලින් නාමල් රාජපක්ෂව ඇතුළට දාන්න බැරිත් නෑ.”

“අපි පැහැදිළිවම මේ රටේ ජනතාව එක්ක දේශපාලනය කරලා තියෙනවා. ජනතාවට අපි අවංකව පෙනී සිටිනවා. සමහරු දිනන කොට එක ඇදුමයි, පැරදුනාම තව ඇදුමයි. ජනතා විරෝධයක් එනකොට එක විදියයි. අපි ඉදිරියටත් අපේ ඇදුම ගලවන්න ලේසි වෙන්නේ නෑ. සාටකය ගලවන්නත් බෑ, ජාතික ඇදුම නැත්නම් රෙද්දයි බැනියමයි ගලවන්නත් බෑ. “

දෙහිවල ගල්කිස්ස හිටපු නගරාධිපති ධනසිරි අමරතුංග අද (01) දින ප්‍රකාශයක් ලබාදීම සඳහා මධ්‍යම අපරාධ විමර්ශන කාර්යාංශය හමුවට පැමිණ ඇත.

මහා පරිමාණ මත්ද්‍රව්‍ය ජාවාරම්කරුවකු වන ශිරාන් බාසික් නැමැත්තා සම්බන්ධයෙන් සිදුකරන විමර්ශනයන්ට අදාළව ප්‍රකාශයක් ලබාදීම සඳහා එලෙස පැමිණ ඇත.

මහා පරිමාණයෙන් මත්ද්‍රව්‍ය බෙදාහරින ප්‍රධාන පෙළේ ජාවාරම්කරුවන්ගෙන් අයෙකු ලෙස සැලකෙන ශිරාන් බාසික්, ඩුබායි රාජ්‍යයේදී එරට ආරක්ෂක අංශ මගින් අත්අඩංගුවට ගනු ලැබූ අතර, පසුගිය අගෝස්තු (14) වැනිදා ඔහු මෙරටට රැගෙන එනු ලැබීය.

රජය විසින් පාර්ලිමේන්තුවට ඉදිරිපත් කර තිබෙන ආණ්ඩුක්‍රම ව්‍යවස්ථාවේ 22 වන සංශෝධන පනත් කෙටුම්පත අභියෝගයට ලක් කරමින් ගොනුකර ඇති පෙත්සම් පිළිබඳ කරුණු සලකා බැලීම ශ්‍රේෂ්ඨාධිකරණය විසින් ආරම්භ කර ඇත.

අගවිනිසුරු ප්‍රීති පද්මන් සූරසේන, අචල වෙංගප්පුලි, අර්ජුන ඔබේසේකර, සම්පත් අබේකෝන් සහ ගිහාන් කුලතුංග යන මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඬුල්ලක් ඉදිරියේ මෙම පෙත්සම් විභාගය පැවැත් වේ.

අද (01) දින අදාළ පෙත්සම් විභාගය සඳහා 502 ශාලාවේ කැඳවා තිබුණ අතර පසුව එම ශාලාව තුළ ප්‍රමාණවත් ඉඩ පහසුකම් නොමැතිකම නිසා එය 501 ශාලාවට මාරු කරන ලෙස ජනාධිපති නීතීඥ එම්. ඒ. සුමන්දිරන් ඇතුළු නීතිඥවරු අධිකරණයෙන් ඉල්ලීම් කර තිබුණි.

ඒ අනුව 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පතට අදාළ පෙත්සම් සලකා බැලීම ශ්‍රේෂ්ඨාධිකරණයේ 501 ශාලාවට මාරු කිරීමට පංච පුද්ගල විනිසුරු මඩුල්ල නියම කර ඇත.

මේ වනවිට ශ්‍රෙෂ්ඨාධිකරණයේ ආරක්ෂාව තර ඇත.

අගවිනිසුරු ප්‍රිති පද්මන් සුරසේන ප්‍රමුඛ පංච පුද්ගල විනිසුරු මඩුල්ලක් හමුවේ 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත සම්බන්ධව ගොනුකර ඇති සියලු පෙත්සම් අද (01) සලකා බැලීමට නියමිතව ඇත.

22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත පසුගිය (18) වනදා දින පාර්ලිමේන්තුවට ඉදිරිපත් කරනු ලැබු අතර අනතුරුව එම පනත් කෙටුම්පත සම්බන්ධයෙන් පෙත්සම් ගොනුකිරීමට අවස්ථාව ලබාදී තිබුණේය.

ඒ අනුව අද (01) දින පෙරවරු 10.00 සිට ශ්‍රේෂ්ඨාධිකරණය හමුවේ මෙම පෙත්සම් සලකා බැලීමට නියමිතව ඇත.

එම පෙත්සම් සලකා බැලීමට අගවිනිසුරුවරයා විසින් පංච පුද්ගල විනිසුරුමඩුල්ලක් ඊයේ (31) දිනයේ ප්‍රකාශයට පත්කළ අතර ඒ සඳහා අගවිනිසුරුවරයාට අමතරව අචල වෙන්ගප්පුලි, අර්ජුන ඔබේසේකර, සම්පත් අබේකෝන් සහ ගිහාන් කුලතුංග නම් කරනු ලැබීය.

එල්-නිනෝ තත්ත්වය හේතුවෙන් වැඩි අවධානයක් අවශ්‍ය රටක් ලෙස ශ්‍රී ලංකාව හඳුනාගෙන ඇති බව එක්සත් ජාතීන්ගේ සංවිධානය සඳහන් කරයි.

නවතම තක්සේරුවට අනුව මෙරටට අදාළ ප්‍රධාන අවදානම වන්නේ වියළි කාලගුණ තත්ත්වයට වඩා වැඩි වර්ෂාපතනයක් ලැබීම බවද එක්සත් ජාතීන්ගේ සංවිධානය සඳහන් කරයි.

ඒ අනුව එල්නිනෝ දේශගුණික තත්ත්වය හේතුවෙන් ශ්‍රී ලංකාවට මේ වසරේ අවසාන භාගයේදී වඩා වැඩි වර්ෂාපතනයක් ඇතිවීමේ හැකියාවක් පවතින බව එක්සත් ජාතීන්ගේ සංවිධානය සඳහන් කරයි.

එම වැඩි වර්ෂාපතනය හේතුවෙන් ගංවතුර, ජලයෙන් යටවීම් සහ කෘෂිකාර්මික කටයුතු වලට බලපෑම් ඇතිවීමේ අවදානමක් පවතින බද එක්සත් ජාතීන්ගේ සංවිධානය සඳහන් කරයි.

එල්-නිනෝ දේශගුණික තත්ත්වය පිළිබදව ආසියානු කලාපයේ රටවලට සිදුව හැකි බලපෑම සම්බන්ධයෙන් වන නවතම තක්සේරු වාර්තාව නිකුත් කරමින් එක්සත් ජාතීන්ගේ සංවිධානය මේ බව සඳහන් කරයි.

ලබන ඔක්තෝබර් සහ නොවැම්බර් මාස වලදී බොහෝ ප්‍රදේශ වලට වර්ෂාපතනයක් ලැබෙනු ඇති අතර දෙසැම්බර් සිට පෙබරවාරි දක්වා ඊසාන දිග මෝසම සක්‍රීය වීමත් සමග සාමාන්‍යයට වඩා වැඩි වර්ෂාවක් ලැබිය හැකි බවද සඳහන් කරයි.

දේශගුණික අවදානමත් සමඟ මැදපෙරදිග කලාපයේ පවතින අර්බුදයේ බලපෑම හේතුවෙන් ශ්‍රී ලංකාවේ ආර්ථික පීඩනය ඉහළ යා හැකි බවද එක්සත් ජාතීන්ගේ සංවිධානය සඳහන් කරයි.

එහෙත් මෙම අවදානම පුළුල් බලපෑමක් බවට පත්ව නොමැති බැවින් පූර්ව සූදානම් වීම සඳහා තීරණාත්මක අවස්ථාවක් තවමත් පවතින බවද එක්සත් ජාතීන්ගේ සංවිධානය සඳහන් කරයි.