Attention

එයාර් බස් ගනුදෙනුව සම්බන්ධව ප්‍රකාශයක් ලබාදීම සඳහා හිටපු ජනාධිපති මහින්ද රාජපක්ෂට එළැඹෙන (12) වැනි දින අල්ලස් කොමිසම හමුවේ පෙනී සිටින ලෙසට ලිපියක් මගින් දැනුම් දී තිබුණේය.

ඒ අනුව අල්ලස් හෝ දූෂණ චෝදනා විමර්ශන කොමිසම හමුවේ පෙනී සිටින ලෙසට සිදුකර තිබූ කැඳවීම පිළිගන්නා අතර අදාළ දිනයේදී ඒ සඳහා පෙනී සිටීමට තමා සූදානම් බව හිටපු ජනාධිපති මහින්ද රාජපක්ෂ සඳහන් කරයි.

හිටපු ප්‍රධාන විධායක නිලධාරී කපිල චන්ද්‍රසේනගේ දේහයට අවසන් ගෞරව දැක්වීමට එක්වෙමින් හිටපු ජනාධිපතිවරයා මේ බව සඳහන් කරයි.

එම ගනුදෙනුව සම්බන්ධයෙන් සිදුකළ විමර්ශන වලදී කපිල චන්ද්‍රසේන අල්ලස් කොමිසම හමුවේ ප්‍රකාශ කළේ, තමන්ට ලද අමෙරිකානු ඩොලර් මිලියන 02ක මුදලින් රුපියල් මිලියන 60ක් එවක ජනාධිපති මහින්ද රාජපක්ෂට ලබාදුන් බවයි.

ඒ අනුව ඒ සම්බන්ධයෙන් ප්‍රකාශයක් ලබාදීම සඳහා හිටපු ජනාධිපති මහින්ද රාජපක්ෂ එළැඹෙන (12) වැනි දින අල්ලස් කොමිසම හමුවේ පෙනී සිටීමට නියමිතය.

මේ අතර එළඹෙන (12) වැනිදා අල්ලස් කොමිසම හමුවේ පෙනී සිටීමට හිටපු ජනාධිපති මහින්ද රාජපක්ෂ පැමිණෙන විට, එම ස්ථානයට සියයක පමණ පිරිසක් රැගෙන පැමිණීමට නියමිත බව වාර්තා වේ.

දැරියක් අපයෝජනය කිරීමේ සිද්ධියට අදාළව, අටමස්ථානාධිපති පල්ලේගම හේමරතන හිමියන් සහ අදාළ දැරියගේ මව සැකකරුවන් ලෙස නම් කර වහාම අත්අඩංගුවට ගෙන අධිකරණයට ඉදිරිපත් කරන ලෙස අනුරාධපුර මහේස්ත්‍රාත් අධිකරණය අද (08) නියෝග කර ඇත.

අද ජාතික ළමා ආරක්ෂක අධිකාරිය විසින් අධිකරණය හමුවේ සිදුකළ කරුණු දැක්වීම් සහ ඉදිරිපත් කළ සාක්ෂි සලකා බැලීමෙන් අනතුරුව මහේස්ත්‍රාත්වරයා මෙම නියෝගය නිකුත් කළේය.

තවද විදෙස් ගමන් තහනමක් පැනවීමට ද මහේස්ත්‍රාත්වරයා නියෝග කළේය.

පසුගිය අප්‍රේල් (27) වනදා නිට්ටඹුව පොලිස් බල ප්‍රදේශයේ ලැගුම්හලක සිය පෙම්වතා සමඟ රැඳී සිටියදී පොලිස් භාරයට ගත් මෙම දැරිය, ගම්පහ මහ රෝහලේ විශේෂඥ අධිකරණ වෛද්‍ය නිලධාරියා වෙත ඉදිරිපත් කළ අවස්ථාවේදී ඇය අවස්ථා ගණනාවකදී දූෂණයට ලක්ව ඇති බව තහවුරු විය.

අනතුරුව දැරිය හෙළි කර ඇත්තේ, තමන්ව මුලින්ම දූෂණය කළේ අනුරාධපුර විහාරස්ථානයක විහාරාධිපති හිමිනමක බවත් අනතුරුව සිය පෙම්වතා සහ ඥාති මස්සිනා අතින් දූෂණයට ලක්වූ බවයි.

සිදුකළ විමර්ශන වලදී විහාරාධිපති හිමියන් තමන්ව මුලින්ම දූෂණය කළ අවස්ථාවේ රුධිරය තැවරුණු ඇඳුම් දැරියගේ නිවස ආසන්නයේ වළ දමා තිබියදී පොලිසිය විසින් සොයාගෙන ඇති අතර ඇඳුම් සහ අනෙකුත් නඩු භාණ්ඩ රජයේ රස පරීක්ෂකවරයා වෙත යවා වාර්තාවක් කැඳවන ලෙස අධිකරණය මීට පෙර නියෝග කළේය.

මූලික පොලිස් විමර්ශනවලදී අනාවරණය වී ඇත්තේ, එම දැරියගේ පියා සහ මව අදාළ විහාරාධිපති හිමියන්ගෙන් වරින් වර විශාල මුදලක් ලබාගෙන තම 15 හැවිරිදි දියණිය එම හිමියන් වෙත ලබාදී ඇති බවයි.

ශ්‍රී ලංකාවේ රාජ්‍ය සංචාරයක නිරත වියට්නාම් සමාජවාදී ජනරජයේ ජනාධිපති සහ වියට්නාම් කොමියුනිස්ට් පක්ෂයේ මධ්‍යම කමිටුවේ මහලේකම් ටෝ ලාම් (TO LAM) මහතා සහ අග්‍රාමාත්‍ය ආචාර්ය හරිනි අමරසූරිය මහත්මිය අතර ද්වීපාර්ශ්වික සාකච්ඡාවක් අද (08) පස්වරුවේ කොළඹ හිල්ටන් හෝටලයේදී පැවැත්විණ.

මෙහිදී වියට්නාම ජනාධිපතිවරයා ඉතා උණුසුම් ලෙස පිළිගත් අග්‍රාමාත්‍ය ආචාර්ය හරිනි අමරසූරිය මහත්මිය, ජනාධිපති අනුර කුමාර දිසානායක මහතාගේ ආරාධනය පිළිගෙන ශ්‍රී ලංකාවේ සංචාරයකට එක්වීම පිළිබඳව කෘතඥතාව පළ කළේය.

ශ්‍රී ලංකාව සහ වියට්නාමය අතර රාජ්‍ය තාන්ත්‍රික සබඳතාවලට 56 වසරක් සපිරෙන අවස්ථාවේ සිදු කෙරෙන ටෝ ලාම් මහතාගේ ශ්‍රී ලංකා සංචාරය මගින් දෙරට අතර ශක්තිමත් හවුල්කාරිත්වය, විශ්වාසය සහ මිත්‍රත්වය පිළිබිඹු කෙරෙන බවත් ඉදිරියේදි දෙරට අතර සබඳතාවල නව සන්ධිස්ථානයක් සනිටුහන් කෙරෙනු ඇති බවටත් අග්‍රාමාත්‍යවරිය මෙහිදී ප්‍රකාශ කළාය.

දෙරටේ ජනතාවට අන්‍යෝන්‍ය ප්‍රතිලාභ හිමිවන අයුරින් ආර්ථික, සංස්කෘතික හා සමාජයීය සබඳතා ඇතුළු බහුවිධ හවුල්කාරිත්වය තවදුරටත් වර්ධනය කර ගැනීම සහ විවිධාංගීකරණය කිරීමේ ක්‍රමෝපායන් පිළිබඳව මෙම සාකච්ඡාවේදී විශේෂ අවධානය යොමු විය.

ශ්‍රී ලංකා රජය නියෝජනය කරමින් පරිසර අමාත්‍ය වෛද්‍ය ධම්මික පටබැඳි, කර්මාන්ත සහ ව්‍යවසායකත්ව සංවර්ධන නියෝජ්‍ය අමාත්‍ය චතුරංග අබේසිංහ, අග්‍රාමාත්‍ය ලේකම් ප්‍රදීප් සපුතන්ත්‍රී, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කලුවැව ඇතුළු නිලධාරිහු පිරිසක් මෙම අවස්ථාවට සහභාගි වූහ.

මුදල් විශුද්ධිකරණය වැළැක්වීමේ පනත යටතේ හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂට එරෙහිව ගොනුකර තිබෙන නඩුව කොළඹ මහාධිකරණ විනිසුරු උදේශ් රණතුංග ඉදිරියේ අද (08) කැඳවනු ලැබුවෙිය.

එහිදී යෝෂිත රාජපක්ෂට එරෙහිව ගොනුකර තිබෙන නඩුවේ මූලික විරෝධතා පිළිබඳ නියෝගය, එළැඹෙන (14) වැනිදා ප්‍රකාශයට පත් කරන බව කොළඹ මහාධිකරණය අද (08) දැනුම් දුන්නේය.

මෙම නඩුවේ දෙවන විත්තිකාර ඩේසි ෆොරස්ට් නමැත්තිය නඩුවෙන් මුදාහරිනු ලැබුවේ ඇයගේ අයහපත් සෞඛ්‍ය තත්ත්වය නිසා බව පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර අධිකරණය හමුවේ කරුණු දක්වමින් සඳහන් කරයි.

ශ්‍රී ලංකාවේ ඩිජිටල් ආර්ථිකයේ සහ විදේශ විනිමය ගලා ඒමේ දැවැන්ත හැරවුම් ලක්ෂ්‍යයක් සනිටුහන් කරමින්, ලොව ප්‍රමුඛතම මාර්ගගත ගෙවීම් පද්ධතියක් වන PayPal හරහා සෘජුවම ශ්‍රී ලංකාවට මුදල් ගෙන්වා ගැනීමේ පහසුකම ස්ථාපිත කිරීමට රජය තීරණය කර ඇත.

වසර ගණනාවක් පුරා මෙරට ව්‍යාපාරික ප්‍රජාව තොරතුරු තාක්ෂණ වෘත්තිකයින් සහ නිදහස් සේවකයින් විසින් සිදුකළ ඉල්ලීම් සහ ඔවුන්ගේ බලවත් අවශ්‍යතාවය සැලකිල්ලට ගනිමින් රජය මෙම සේවාව ආරම්භ කිරීමට කටයුතු කර ඇත.

ඒ අනුව එළඹෙන මැයි මස (15) වනදා සිට මෙම සේවාව ක්‍රියාත්මක කිරීමට සියලු කටයුතු සූදානම් කර ඇත.

PayPal හරහා මෙරටට මුදල් ගෙන්වා ගැනීමට පැවති නීතිමය සහ තාක්ෂණික බාධා ඉවත් කිරීම සඳහා ඩිජිටල් ආර්ථික අමාත්‍යාංශය, ශ්‍රී ලංකා මහ බැංකුව සහ මෙරට පෞද්ගලික බැංකු පද්ධතිය එක්ව පසුගිය කාලය පුරා සිදුකළ සාකච්ඡා සාර්ථක වීමත් සමඟ මෙම අවස්ථාව උදා වී ඇත.

මින් ඉදිරියට විදේශීය සේවාදායකයින්ගෙන් ලැබිය යුතු ගෙවීම් ලබා ගැනීම සඳහා ව්‍යාජ විදේශීය ලිපින භාවිත කිරීමට හෝ අවධිමත් මුදල් හුවමාරු ක්‍රම මත යැපීමට මෙරට ව්‍යවසායකයින්ට අවශ්‍ය නොවන බව සඳහන් කරයි.