Local news

ශ්‍රීමත් ජෝන් කොතලාවල ආරක්ෂක විශ්වවිද්‍යාල රෝහලේ පහසුකම් භාවිතා කරමින් ශ්‍රී ලංකා ජාතික රෝහලේ හෘද හා උරස් කුහර ශල්‍යකර්ම සේවා පුළුල් කිරීම සඳහා අවබෝධතා ගිවිසුමකට අත්සන් තැබීමට කැබිනට් අනුමැතිය හිමිව ඇත.

ආරක්ෂක අමාත්‍යාංශය යටතේ පැවැති ජෙනරාල් ශ්‍රීමත් ජෝන් කොතලාවල ආරක්ෂක විශ්වවිද්‍යාල ශික්ෂණ රෝහල නවීන රෝහල් පහසුකම්, දියුණු වෛද්‍ය උපකරණ සහ ප්‍රමාණවත් ‌භෞතික ධාරිතාවකින් සමන්විතවන නමුත්, විශේෂඥ සායනික කාර්ය මණ්ඩලයේ සීමිත බව හේතුවෙන් එම සම්පත් වර්තමානයේදී උපරිම වශයෙන් උපයෝගීනයට ලක් නොවන බව නිරීක්ෂණය කර ඇත.

ශ්‍රී ලංකා ජාතික රෝහලේ හෘද හා උරස් කුහර ඒකකය, ඉහළ විශේෂඥ දැනුමෙන් යුතු මානව සම්පත්, උසස් තාක්ෂණය හා අතිනවීන පහසුකම් සහිතව ශ්‍රී ලංකාවේ හෘද හා උරස් කුහර ශල්‍යකර්ම සඳහා වන ප්‍රමුඛතම ජාතික මධ්‍යස්ථානය ලෙස ක්‍රියාත්මක වන නමුත්, ශල්‍යකර්ම සඳහා පවතින ඉල්ලුම ඉහළ යාම හේතුවෙන් මෙතෙක් දීර්ඝ පොරොත්තු ලේඛන පවතින තත්ත්වයට පත්ව ඇත.

ඒ අනුව ශ්‍රීමත් ජෝන් කොතලාවල ආරක්ෂක විශ්වවිද්‍යාල රෝහලේ පහසුකම් භාවිතා කරමින් කොළඹ ජාතික රෝහලේ හෘද සැත්කම් පොරොත්තු ලේඛනයේ සිටින රෝගීන්ට සැත්කම් කිරීමට කැබිනට් අනුමැතිය හිමිව ඇත.

2026 අයවැය යෝජනාවකට අනුව, අඩු ආදායම්ලාභී පවුල්වල විශේෂ අධ්‍යාපන අවශ්‍යතා සහිත සිසුන් සඳහා දීමනාවක් ලබාදීමට අමාත්‍ය මණ්ඩල අනුමැතිය හිමිව ඇත.

ඒ අනුව අඩු ආදායම්ලාභී පවුල්වල විශේෂ අධ්‍යාපන අවශ්‍යතා සහිත එක් සිසුවෙකුට රුපියල් 5,000ක මාසික දීමනාවක් ලබාදීමට රජය තීරණය කර ඇත.

දිවයිනේ සියලුම පාසල්වල අධ්‍යාපනය ලබන සුදුසුකම් ලත් සිසුන් හඳුනාගැනීම සඳහා අයදුම්පත් කැඳවා ඇති අතර ඒ අනුව සිසුන් 5,530 දෙනෙකු මෙම දීමනාව සඳහා සුදුසුකම් ලබා ඇත.

එම සිසුන්ට මාසික දීමනාව ලබාදීම සඳහා අවශ්‍ය ප්‍රතිපාදන සලසා ගැනීමට අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යවරිය ලෙස අග්‍රාමාත්‍යවරිය ඉදිරිපත් කළ යෝජනාවට මෙලෙස අනුමැතිය හිමිව ඇත.

ආණ්ඩුක්‍රම ව්‍යවස්ථාවේ 22 වන සංශෝධන පනත් කෙටුම්පත ආණ්ඩුක්‍රම ව්‍යවස්ථාවට පටහැනි බවට තීන්දුවක් ලබාදෙන ලෙස ඉල්ලා අද (18) දින පළමු පෙත්සම ශ්‍රේෂ්ඨාධිකරණයට ඉදිරිපත් කර ඇත.

අදාළ පනත් කෙටුම්පත සම්මත කිරීමට අවශ්‍ය නම්, පාර්ලිමේන්තුවේ තුනෙන් දෙකක බහුතර ඡන්දයකින් අනුමත වී, අනතුරුව එය ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසට පෙත්සම්කරුවන් ඉල්ලා සිටියි.

ශ්‍රී ලංකා නීතීඥ සංගමයේ භාණ්ඩාගාරික ටී.එම්.එස්. පසිදු සිල්වා සහ එම සංගමයේ සහකාර ලේකම්වරයා විසින් මෙම පෙත්සම ඉදිරිපත් කර ඇත.

දූෂණ චෝදනාවක් සම්බන්ධව අත්අඩංගුවට ගෙන රක්ෂිත බන්ධනාගාරගත කර සිටි හිටපු අමාත්‍ය අකිල විරාජ් කාරියවසම් අද (18) දින කොළඹ ප්‍රධාන මහේස්ත්‍රාත් අධිකරණය වෙත ඉදිරිපත් කළේය.

අධිකරණයට ඉදිරිපත් කිරීමෙන් අනතුරුව හිටපු අමාත්‍ය අකිල විරාජ් කාරියවසම් සහ ඔහුගේ ඉන්ධන හලේ සේවකයා ඇප මත මුදාහරින ලෙස කොළඹ මහෙස්ත්‍රාත් අධිකරණය නියම කළේය.

ඒ අනුව එක් එක් සැකකරු රුපියල් ලක්ෂ 50 බැගින් වූ ශරීර ඇප දෙකක් මත මුදාහැරීමට නියෝග කළ මහෙස්ත්‍රාත්වරයා සැකකරුවන්ගේ විදේශ ගමන් තහනම් කරන ලෙසත් නියෝග කළේය. 

අල්ලස් කොමිසමේ නිලධාරීන් සහ සැකකරුවන් නීතිඥවරු ඉදිරිපත් කළ කරුණු සලකා බැලීමෙන් අනතුරුව කොළඹ ප්‍රධාන මහෙස්ත්‍රාත් අසංග එස් බෝදරගම මෙම නියෝගය නිකුත් කළේය. 

අද (18) දින හිටපු සෞඛ්‍ය අමාත්‍ය කෙහෙළිය රඹුක්වැල්ල අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගෙන ඇත.

සිදුකරන විමර්ශනයකට අදාළව ප්‍රකාශයක් ලබාදීමට අද (18) පෙරවරුවේ එම කොමිසම හමුවට පැමිණීමෙන් අනතුරුව කෙහෙළිය රඹුක්වැල්ල මෙලෙස අත්අඩංගුවට ගෙන ඇත.

රූපවාහිනි සංස්ථාවට අනුබද්ධ කාර්ය මණ්ඩලය ඉක්මවා සේවකයන් 6 දෙනෙකු බඳවා ගැනීමෙන් රජයට පාඩුවක් සිදුකිරීම සම්බන්ධයෙන් කෙහෙළිය රඹුක්වැල්ලට චෝදනා එල්ල වී ඇත.

ලංකාවේ වැඩිම නිවාස හදනවා කියලා ලංකා ඉතිහාසයේ වැඩිම නිවාස නාස්තිය කරපු පුද්ගලයා විපක්ෂ නායක සජිත් ප්‍රේමදාස බව සභානායක, ප්‍රවාහන, මහාමාර්ග සහ නාගරික සංවර්ධන අමාත්‍ය බිමල් රත්නායක සඳහන් කරයි.

අමාත්‍ය බිමල් රත්නායක අද (18) දින පාර්ලිමේන්තුවේදී සඳහන් කළේ,

“ගරු කථානායකතුමනි, ලංකාවේ වැඩිම නිවාස, ලංකාවේ වැඩිම නිවාස හදනවා කියලා ලංකා ඉතිහාසයේ වැඩිම නිවාස නාස්තිය කරපු පුද්ගලයා. ඔයා ඕක අල්ලගෙන ඉන්න ඕන අවුරුදු ගාණක් හරිද. ඒනිසා හැබැයි දවසම ඉන්න ඕන ඕක අල්ලගෙන.“

හිටපු අමාත්‍ය රාජිත සේනාරත්නගේ සහෝදරයෙකු වන මහීල් සේනාරත්න අල්ලස් කොමිසම විසින් අද (18) දින අත්අඩංගුවට ගෙන ඇත.

රාජිත සේනාරත්නගේ සහෝදරයෙකු වන මහීල් සේනාරත්න පසුගිය 2010 – 2012 කාල වකවානුවේ ධීවර සංස්ථාවේ සභාපතිවරයා ලෙස කටයුතු කර ඇත.

දිවයින පුරා මත්ස්‍ය අලෙවි මධ්‍යස්ථාන පිහිටුවීම සහ නඩත්තු කිරීම සඳහා නිසි ප්‍රසම්පාදන ක්‍රියාවලීන් අනුගමනය නොකිරීමේ චෝදනාවකට අදාළව මෙම අත්අඩංගුවට ගැනීම සිදුකර ඇත.

ඉන්දීය ආරක්ෂක අමාත්‍ය රාජනාත් සිං එළඹෙන සැප්තැම්බර් මස පළමු සතිය තුළ මෙරට නිල සංචාරයක නිරත වීමට නියමිතව ඇත.

ආරක්ෂක අමාත්‍යවරයාගේ ශ්‍රී ලංකා සංචාරය සම්බන්ධයෙන් කොළඹ පිහිටි ඉන්දීය මහකොමසාරිස් කාර්යාලය සහ ආරක්ෂක අමාත්‍යංශය අතර සාකච්ඡාවක් පසුගියදා පවත්වා ඇත.

මෙම සංචාරය අතරතුරදී ඉන්දීය ආරක්ෂක අමාත්‍ය රාජනාත් සිං ජනාධිපති අනුර කුමාර දිසානායක ඇතුළු රජයේ ඉහළපෙළේ නියෝජිතයින් සමග ද්වීපාර්ශ්වික සාකච්ඡා පැවැත්වීමට නියමිත බව වාර්තා වේ.