Local news

වනජීවී සංරක්ෂණ දෙපාර්තමේන්තුව සහ ශ්‍රී ලංකා යුද හමුදාව එක්ව දියත් කළ විශේෂ ඒකාබද්ධ සෝදිසි මෙහෙයුමේ ප්‍රතිඵලයක් ලෙස “අග්බෝ” ඇතා නාච්චාදූව වැව් රක්ෂිතයේදී සොයා ගැනීමට හැකි වී ඇත.

එම ප්‍රදේශය භාර වනජීවී අඩවි සහකාර බුද්ධික විසින් තහවුරු කර ඇති පරිදි, සොයා ගන්නා අවස්ථාව වන විටත් අග්බෝ ඇතා ඉතා නිරෝගී සුවයෙන් සහ යහපත් ශාරීරික තත්ත්වයෙන් පසුවෙයි.

ඒ අනුව, අග්බෝ ඇතා මේ වනවිට නාච්චාදූව වැව් රක්ෂිත පරිශ්‍රයේ කිසිදු උවදුරකින් තොරව, පූර්ණ සුරක්ෂිතභාවයෙන් සහ නිරෝගීව සැරිසරන බව වනජීවී නිලධාරීන් සඳහන් කරයි.

හිටපු අමාත්‍ය විමල් වීරවංශ, උදය ගම්මන්පිල සහ පාර්ලිමේන්තු මන්ත්‍රී දිලිත් ජයවීර ඇතුළු පිරිසකට එරෙහිව අධිකරණයට අපහාස කිරීමේ චෝදනාව සම්බන්ධයෙන් ඉදිරිපත් කර ඇති පැමිණිල්ල අද (19) අභියාචනාධිකරණය හමුවේ කැඳවයි.

අනතුරුව ඉදිරිපත් වූ කරුණු සලකා බැලූ විනිසුරු මඩුල්ල එම පැමිණිල්ල ලබන (23) වැනිදා යළි කැඳවීමට නියෝග කර ඇත.

රාජ්‍ය බුද්ධි සේවයේ හිටපු අධ්‍යක්ෂ සුරේෂ් සලේ අත්අඩංගුවට ගෙන රඳවා තබා ගැනීමට එරෙහිව පළ කළ විරෝධතාවලදී විමල් වීරවංශ, උදය ගම්මන්පිල සහ දිලිත් ජයවීර ඇතුළු පිරිස සිදුකළ ප්‍රකාශ මඟින් අධිකරණයට අපහාසයක් සිදුකර ඇති බවට චෝදනා එල්ල වී ඇත.

අද (19) දින අකුරණ ප්‍රදේශයේ වාහන කිහිපයක් එකිනෙක ගැටීමෙන් සිදුවූ රිය අනතුරකින් පුද්ගලයන් සිව්දෙනෙකු ජීවිතක්ෂයට පත්ව ඇත.

අකුරණ, කුරුගොඩ හන්දිය ප්‍රදේශයේ අද (19) පෙරවරුවේ මාර්ගයේ ධාවනය වෙමින් තිබු වාහන කිහිපයක සිමෙන්ති පැටවූ ලොරි රථයක් ගැටී මෙම අනතුර සිදුව ඇත.

අනතුරින් සිදුවූ තුවාල, ජීවිත හානි සහ දේපොළ හානි සම්බන්ධයෙන් මෙතෙක් නිශ්චිත තොරතුරු අනාවරණය වී නොමැති බව පොලිස් මාධ්‍ය කොට්ඨාසය සඳහන් කරයි.

කෙසේ වෙතත් අනතුරින් ත්‍රිරෝද රථ, ලොරි රථ සහ යතුරුපැදි ඇතුළු වාහන අටකට පමණ හානි සිදුව ඇති අතර එම අනතුරින් මාර්ගයේ ගමන් කරමින් සිටි පදිකයන් කිහිපදෙනෙකු ද අනතුරට ලක්ව ඇත.

තුවාල ලැබු පුද්ගලයින් අටදෙනෙකු අකුරණ ප්‍රාදේශිය රෝහල වෙත ඇතුළත් කර ඇති බව වාර්තා වේ.

කාවන්තිස්ස ඇතාට වෙඩි තැබීමේ සිදුවීමට හා ඒ ආශ්‍රිත නීතිවිරෝධී ක්‍රියාකාරකම් වලට සම්බන්ධ වූ තවත් සැකකරුවන් 5 දෙනෙකු අත්අඩංගුවට ගෙන ඇත.

වනජීවි සංරක්ෂණ දෙපාර්තමේන්තුව, පානදුර වලාන මධ්‍යම දූෂණ මර්දන ප්‍රහාරක බලකාය සහ පොලිස් නිලධාරීන් එක්ව අදාළ බල ප්‍රදේශය කේන්ද්‍ර කරගනිමින් සිදුකළ විශේෂ සෝදිසි මෙහෙයුමකදී මෙම සැකකරුවන් අත්අඩංගුවට ගෙන ඇත.

සිද්ධිය සම්බන්ධයෙන් මූලිකව අත්අඩංගුවට ගත් ප්‍රධාන සැකකරු, කාවන්තිස්ස හස්තියාට වෙඩි තැබීමේ ප්‍රධාන සිද්ධියට සෘජුවම සම්බන්ධ බවට මේ වනවිට විමර්ශන මඟින් අනාවරණය වී ඇති බව පරිසර අමාත්‍යාංශය සඳහන් කරයි.

අදාළ වෙඩි තැබීමට භාවිත කළ ගිනිඅවි සහ වන සතුන් ඉලක්ක කරගත් සංවිධානාත්මක ජාවාරම් ජාලයක් ක්‍රියාත්මක වූයේද යන්න පිළිබඳව ඉදිරි විමර්ශන පුළුල් කර ඇති බවද පරිසර අමාත්‍යාංශය සඳහන් කරයි.

වනජීවී නිලධාරීන් සහ ගල්ගමුව පොලිසිය එක්ව අත්අඩංගුවට ගත් සැකකරුවන්ගෙන් ප්‍රශ්න කරමින් සිටියි.

පුත්තලම නගර සභාවේ හිටපු මන්ත්‍රීවරයෙකු කේරළ ගංජා තොගයක් සමග අත්අඩංගුවට ගත් බව පොලීසිය සඳහන් කරයි.

පුත්තලම, තිල්ලඩිය ප්‍රදේශයේදී ඊයේ (18) පස්වරුවේ සිදුකළ සෝදිසි මෙහෙයුමකදී මෙම සැකකරු අත්අඩංගුවට ගත් බව පොලිසිය සඳහන් කරයි.

සැකකරු තිල්ලඩිය ප්‍රදේශයේ සිට පුත්තලම නගරයට කේරළ ගංජා ප්‍රවාහනය කරන බවට ලද තොරතුරක් අනුව යතුරුපැදිය නවතා පරීක්ෂා කිරීමේදී එහි සඟවා තිබූ කේරළ ගංජා තොගය සොයාගෙන ඇත.

මෙලෙස අත්අඩංගුවට ගෙන ඇත්තේ පුත්තලම නගර සභාවේ හිටපු මන්ත්‍රීවරයෙකු වන නකුලේෂ්වරන් නමැති අයෙකු වන අතර ඔහු ශ්‍රී ලංකා මුස්ලිම් පක්ෂයේ අපේක්ෂකයෙක් ලෙසද කටයුතු කර ඇත.

පොලිස් භාරයට ගත් කේරළ ගංජා තොගය සහ ජාවාරම සඳහා යොදාගත් බව කියන යතුරුපැදිය අද (19) පුත්තලම අධිකරණයට ඉදිරිපත් කිරීමට නියමිත බව පොලිස් මත්ද්‍රව්‍ය පාලන අංශය සඳහන් කරයි.

ශ්‍රී ලංකන් ගුවන් සේවයේ නාමය භාවිත කරමින් සිදුකරන වංචනික ක්‍රියාකාරකම් වලට හසු නොවන ලෙස එම ගුවන් සේවය මහජනතාවට දැනුම් දෙයි.

ගුවන් සේවයේ නාමයෙන් පෙනී සිටින ව්‍යාජ ජංගම යෙදුම් සහ සමාජ මාධ්‍ය ගිණුම් හරහා සිදුවිය හැකි මූල්‍ය වංචා සම්බන්ධයෙන් අවධානයෙන් පසුවන ලෙසද එම ගුවන් සේවය සඳහන් කරයි.

WhatsApp ඇතුළු සමාජ මාධ්‍ය ඔස්සේ පළ කෙරෙන සැක සහිත දැන්වීම් සහ පණිවිඩවල සඳහන් සබැඳි හරහා ගෙවීම් සිදුකිරීමෙන් වළකින ලෙසද එම ගුවන් සේවය අවධාරණය කරයි.

තවද OTP අංක, බැංකු කාඩ්පත්වල PIN අංක සහ අනෙකුත් රහස්‍ය තොරතුරු කිසිදු පුද්ගලයෙකු සමඟ හුවමාරු කර නොගන්නා ලෙසද එම ගුවන් සේවය සඳහන් කරයි.