Local news

සියලු විද්‍යුත් වාහන සඳහා කොළ පාට පසුබිම සහිත අංක තහඩු නිකුත් කරන බව මෝටර් රථ ප්‍රවාහන දෙපාර්තමේන්තුව පවසයි.

විද්‍යුත් වාහන සඳහා නිකුත් කරන කොළපාට අංක තහඩු නීත්‍යානුකූල බව මෝටර් රථ ප්‍රවාහන කොමසාරිස් ජනරාල්, විශ්‍රාමික එයා වයිස් මාෂල් තුෂාර ප්‍රනාන්දු සඳහන් කරයි.

අනෙකුත් සෙසු වාහන සඳහා සුදු සහ කහ වර්ණය සහිත අංක තහඩු නිකුත් කෙරෙන බවද මෝටර් රථ ප්‍රවාහන කොමසාරිස් ජනරාල්, විශ්‍රාමික එයා වයිස් මාෂල් තුෂාර ප්‍රනාන්දු සඳහන් කරයි.

ලියාපදිංචි කරන ලද වාහන 88,740ක නව අංක තහඩු සකස් කර අවසන්ව ඇති බවත් 2026 ජුනි (10) වැනිදා සිට 2026 අගෝස්තු (31) වැනිදා දක්වා ලියාපදිංචි කළ අංක තහඩු 56,233 ක්ද ඒ අතර වන බවද සඳහන් කරයි.

තවද, පසුගිය 2023 හා 2024 වසර දෙක තුළ ලියාපදිංචි කළ වාහන 32,507 ක අංක තහඩුද සකස් කර අවසන්ව බවද මෝටර් රථ ප්‍රවාහන කොමසාරිස් ජනරාල්, විශ්‍රාමික එයා වයිස් මාෂල් තුෂාර ප්‍රනාන්දු සඳහන් කරයි.

අදාළ වාහන හිමිකරුවන්ට දැනුම් දෙන්නේ, නාරාහේන්පිට මෝටර් රථ ප්‍රවාහන දෙපාර්තමේන්තු කාර්යාල වෙත පැමිණ තම වාහන අංක තහඩු ලබා ගන්නා ලෙසද මෝටර් රථ ප්‍රවාහන කොමසාරිස් ජනරාල්වරයා සඳහන් කරයි.

ඩීසල් ලීටරයක මිල රුපියල් 507ක් වනවිට රජය රුපියල් 100ක පාඩුවක් දරාගෙන ඩීසල් ලීටරයක් රුපියල් 407ට ලබාදුන් බවත් පෙට්‍රල් ලීටරයක් වෙනුවෙන් රුපියල් 20ක පාඩුවක් දරාගත් බව ජනාධිපති අනුර කුමාර දිසානායක සඳහන් කරයි.

ඒ අනුව ලංකා ඛණිජ තෙල් සංස්ථාව, IOC සමාගම ඇතුළු සියලු ඉන්ධන සමාගම් සෑම මසකම (15) වැනිදා වනවිට විකුණපු තෙල් ප්‍රමාණය ගණනය කර, ඩීසල් ලීටරයක රුපියල් 100 ගානේ සහ පෙට්‍රල් ලීටරයකට රුපියල් 20 ගානේ එම සමාගම් වලට රජයෙන් ලබාදුන් බවද ජනාධිපති අනුර කුමාර දිසානායක සඳහන් කරයි.

රටේ ජනතාවට අසීරු ලෙස බර නොදමා රජය විසින් ඉන්ධන සහ විදුලිය වෙනුවෙන් සහනාධාර වලට රුපියල් කෝටි 10,000ක් වෙන් කළ බවද ජනාධිපති අනුර කුමාර දිසානායක සඳහන් කරයි.

ජනාධිපති අනුර කුමාර දිසානායක සඳහන් කළේ,

“බය කරා රටේ ජනතාව තෙල් වලට පෝලිම් ඇති වෙනවා කිවුවා. විදුලිය කපනවා කිවුවා. ජනතාව බියවැද්දුවා. හැබැයි අපි බලශක්ති අර්බුදය, තෙල් සහ විදුලි අර්බුදය ඉතා හොදින් කළමණාකරණය කරා.

තෙල් හිගයක් සහ විදුලිය කැපීමක් සිද්ද වුණේ නෑ. ඒ කොහොමද කරන්නේ. ඒ විතරක් නෙමෙයි ජනතාවට අසීරු ලෙස බර දැම්මෙත් නෑ. අපි ඉන්ධන සහ විදුලිය වෙනුවෙන් සහනාධාර වලට කෝටි 10,000ක් වෙන් කරා.

ඩීසල් ලීටරය 407ට විකුණනකොට, ඇත්ත ගාණ 507යි. අපි කිවුවා තෙල් සංස්ථාවට 407ට විකුණන්න. අපි 100 ගානේ ආණ්ඩුවෙන් දුන්නා තෙල් ලීටරයකට. රුපියල් 20 ගානේ දුන්නා පෙට්‍රල් ලීටරයකට.

IOC එක වික්කත්, ආර් එම්පාක් වික්කත්, තෙල් සංස්ථාව වික්කත් හැම මාසෙම 15 වැනිදාට විකුණපු තෙල් ප්‍රමාණය ගණනය කරලා ඩීසල් ලීටරයක රුපියල් 100 ගානේ දුන්නා. මුහුදුයන ධීවර ජනතාවට අපි කිවුවා, දවසට ලීටර 25 ගානේ දවස් 25කට ඩීසල් ලීටර 625ක් රුපියල් 50ක් අඩුවෙන් දෙන්නම් කිවුවා.”

පසුගියදා ඇතිවු බන්ධනාගාර සිදුවීම් ටික හැරුනුකොට රටේ මහජනයාගේ කිසිදු උද්ඝෝෂණයකට කඳුළු ගෑස් ප්‍රහාරයක් එල්ල නොකළ බව ජනාධිපති අනුර කුමාර දිසානායක සඳහන් කරයි.

මේ වනවිට තිබෙන කඳුළු ගෑස් කල්ඉකුත් වී තිබෙන බවට පොලිස්පතිවරයා දැනුම් දුන් බවද ජනාධිපති අනුර කුමාර දිසානායක සඳහන් කරයි.

ජනාධිපති අනුර කුමාර දිසානායක සඳහන් කළේ,

“මතක තියාගන්න. බන්ධනාගාර සිදුවීම් ටික හැරුනුකොට මහජනයාගේ කිසිදු උද්ඝෝෂණයකට මේ අවුරුදු⁣ දෙක එක කඳුළු ගෑස් එකක් නොගහපු, බැටන් චාර්ජ් එකක් නොදුන්නු, වතුර බවුසරයකින් වතුර නොගහපු අවුරුදු දෙක.

කොතනකවත් බැටන් පහරක් එල්ල කරලා නෑ. වතුර ගහලා නෑ. කඳුළු ගෑස් ගහලා නෑ. දැන් පොලිස්පතිතුමා මට කියනවා, මාර වැඩේ ජනාධිපතිතුමා වෙලා තියෙන්නේ කඳුළු ගෑස් එක්ස්පයර් (Expire) වෙලා. ඇත්ත මේ කියන්නේ.

ඇයි, ජනතාව සහ පාලකයා අතර සම්බන්ධයක් තියෙන්න ඕන. ඒක තමයි දේශපාලනය කියන්නේ. අපේ රටේ තිබුණේ කළු දේශපාලනයක්. පාලකයාට බය ජනතාවක්.

පාලකයාට විරුද්ධව ලිවුවොත් මැරුවා මතක තියාගන්න. මහ පාරේ වෙඩි තියලා මැරුවා. ආයතන වලට බෝම්බ ගැහුවා. මේ කළු කැත දේශපාලනය මේ වෙනස් කරන්නේ. අද අපිට විවේචනය කරන්න පුළුවන්. අපට බනින්න පුළුවන්.”

ක්‍රිෂ් ගනුදෙනුවට අදාළව පාර්ලිමේන්තු මන්ත්‍රී නාමල් රාජපක්ෂ සම්බන්ධයෙන් අල්ලස් කොමිසම පවත්වාගෙන යන විමර්ශනයේදී ඔහු අල්ලස් චෝදනාවක් යටතේ සැකකරුවෙකු ලෙස නම් කර නුදුරේදීම අධිකරණයට ඉදිරිපත් කිරීමට නියමිත බව වාර්තා වේ.

මන්ත්‍රී නාමල් රාජපක්ෂ සැකකරුවෙකු ලෙස අධිකරණයට ඉදිරිපත් කරන අවස්ථාවේ 2023 අංක 9 දරන දූෂණ විරෝධී පනතේ 149 වගන්තිය යටතේ අල්ලස් කොමිසමේ අධ්‍යක්ෂ ජනරාල්වරයාගේ සහතිකයක්ද අධිකරණයට ඉදිරිපත් කිරීමට නියමිත බවද වාර්තා වේ.

පසුගිය 2025 වසරේ ජනවාරි (22) වැනිදා අල්ලස් හෝ දූෂණ චෝදනා විමර්ශන කොමිෂන් සභාව නාමල් රාජපක්ෂලට එරෙහිව ක්‍රිෂ් ගනුදෙනුව සම්බන්ධයෙන් වෙනම විමර්ශනයක් ආරම්භ කර ඇති බවට කොළඹ කොටුව මහේස්ත්‍රාත් අධිකරණය වෙත නිල වශයෙන් දැනුම් දුන්නේය.

නීතිපතිවරයා විසින් මන්ත්‍රී නාමල් රාජපක්ෂට එරෙහිව දැනටමත් කොළඹ මහාධිකරණයේ ගොනුකර ඇති ක්‍රිෂ් නඩුවට පදනම් වූ රුපියල් මිලියන 70ක මුදල් ගනුදෙනුව සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව වෙනම විමර්ශනයක් පවත්වාගෙන යයි.

ඉන්දියානු ආයෝජකයන්ට සම්බන්ධ “Krish Lanka Pvt. Ltd” සමාගම කොළඹ කොටුවේ Transworks Square හි අක්කර 4.3කට ආසන්න ඉඩමක දැවැන්ත මිශ්‍ර සංවර්ධන ව්‍යාපෘතියක් ක්‍රියාත්මක කිරීමට සූදානම් වූ සමයේ මෙම මුදල් ගනුදෙනුව සිදුව ඇත.

මත්ද්‍රව්‍ය භාවිතා කිරීම සහ සන්තකයේ තබා ගැනීම හේතුවෙන් පසුගිය අවුරුදු දෙක තුළ පාසල් දරුවන් 9,000ක් අත්අඩංගුවට ගත් බව ජනාධිපති අනුර කුමාර දිසානායක සඳහන් කරයි.

ජනාධිපති අනුර කුමාර දිසානායක සඳහන් කළේ,

“අපි මේ අවුරුදු දෙකේ පාසල් දරුවන් 9,000ක් අත්අඩංගුවට අරන් තියෙනවා. අපි එක දරුවෙක් අත්අඩංගුවට අරන් ප්‍රශ්න කරා. ඒ දරුවා අතේ කඩු තිබිලා. ඒ දරුවා අපිට කිවුවා, පොලීසියේ මහත්තුරුන්ට කිවුවා,

මම විතරක් නෙමෙයි මගේ යාළුවෝ 200ක් විතර මේ වැඩේ කරනවා කිවුවා. එහෙමයි මේ ව්‍යසනය තියෙන්නේ. පාසල් පුරා පැතිරිලා තියෙනවා. ගම් නියම්ගම් කරා මේ රකුසා ව්‍යාප්ත වෙලා තියෙනවා.”

බේරුවල පැවති ජන රැළිය අමතමින් ජනාධිපති අනුර කුමාර දිසානායක මේ බව සඳහන් කරයි.

22 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ මතය කතානායකවරයා විසින් මේ සතියේ පාර්ලිමේන්තුවට ඉදිරිපත් කිරීමට නියමිත බව වාර්තා වේ.

මෙරට ආණ්ඩුක්‍රම ව්‍යවස්ථාව අනුව යම් පනත් කෙටුම්පතක් අභියෝගයට ලක්වුවහොත් ඒ සම්බන්ධයෙන් ශ්‍රේෂ්ඨාධිකරණයේ මතය ජනාධිපතිවරයා සහ කතානායකවරයා වෙත නිල වශයෙන් දැනුම් දිය යුතුයි.

කෙසේ වෙතත් ආණ්ඩුක්‍රම ව්‍යවස්ථා සංශෝධන පනත් කෙටුම්පත බොහෝ දුරට අඟහරුවාදා දින කතානායකවරයාට ලැබුණහොත් බදාදා දින එය පාර්ලිමේන්තුවට ඉදිරිපත් කිරීමට කිරීමට නියමිත බව වාර්තා වේ.

පාර්ලිමේන්තුව හෙට (08) දින සිට ලබන (11) වැනිදා දක්වා රැස්වීමට නියමිතය.

මේ අතර 22 සංශෝධනය සම්බන්ධ තීන්දුව ඉක්මනින් ලැබෙන බවත් එම තීන්දුව ලැබුණට පසුව එය පාර්ලිමේන්තුවට ඉදිරිපත් කර ඉක්මනින් සම්මත කරගන්නා බව ජනාධිපති අනුර කුමාර දිසානායක සඳහන් කරයි.

මහ නගර සභා, නගර සභා ආඥා පනත් හා ප්‍රාදේශීය සභා පනත යන ප්‍රධාන පනත් තුනෙහි සංශෝධන කටයුතු අවසන් අදියරේ පවතින බව පළාත් සභා සහ පළාත් පාලන නියෝජ්‍ය අමාත්‍ය රුවන් සෙනරත් සඳහන් කරයි.

ඒ අනුව යල්පැන ගිය කරුණු සහිත පළාත් පාලනය හා සම්බන්ධ පනත් වර්තමානයට ගැළපෙන අයුරින් සංශෝධනය කිරීම ආරම්භ කර ඇති අතර තවත් පනත් 07ක් සංශෝධනය කිරීමට අමාත්‍ය මණ්ඩල අනුමැති ලැබී ඇති බවද නියෝජ්‍ය අමාත්‍ය රුවන් සෙනරත් සඳහන් කරයි.

මාලිම්බඩ ප්‍රාදේශීය සභා ශ්‍රවණාගාරයේ පැවති වැඩසටහනකට එක්වෙමින් නියෝජ්‍ය අමාත්‍ය රුවන් සෙනරත් මේ බව සඳහන් කරයි.

සියලුම රජයේ පාසල් සහ රජයේ අනුමත පෞද්ගලික පාසල්වල තුන්වන පාසල් වාරයේ දෙවන අදියර හෙට (07) දින ආරම්භ වන බව අධ්‍යාපන අමාත්‍යාංශය සඳහන් කරයි.

මෙම පාසල් වාරය ලබන දෙසැම්බර් මස (04) වැනි සිකුරාදා දින අවසන් වීමට නියමිත බවද අධ්‍යාපන අමාත්‍යාංශය සඳහන් කරයි.

ඒ අනුව අද (06) සහ හෙට (07) යන දිනවල පාසල් පරිශ්‍රයන්හි ඩෙංගු මර්දන වැඩසටහන් ක්‍රියාත්මක කරන ලෙස අධ්‍යාපන අමාත්‍යංශය උපදෙස් ලබාදී ඇත.

හෙට දින පාසල් ආරම්භ වීමත් සමඟ ඇති වන මගී ඉල්ලුම මත පදනම්ව ‘සිසු සැරිය’ සේවා ඇතුළු අමතර බස් රථ යෙදවීමට ශ්‍රී ලංකා ගමනාගමන මණ්ඩලය පියවර ගෙන ඇත.