Local news

අවිධිමත් විදේශ ගමන් බලපත්‍රයක් සන්තකයේ තබා ගැනීම සම්බන්ධයෙන් නියම කෙරුණු වසර දෙකක සිරදඬුවම හා දඩයට එරෙහිව විමල් වීරවංශගේ බිරිඳ වන ශෂී වීරවංශ ඉදිරිපත් කළ අභියාචනය කොළඹ මහාධිකරණය අද (11) ප්‍රතික්ෂේප කළේය.

අභියාචක විත්තිකාරියට එරෙහිව කොළඹ මහෙස්ත්‍රාත් අධිකරණය විසින් දුන් තීන්දුව ස්ථීර කරන බව, තීන්දුව ප්‍රකාශයට පත් කරමින් කොළඹ මහාධිකරණ විනිසුරු මංජුල තිලකරත්න සඳහන් කරයි.

අදාළ චෝදනාවට වරදකරු කෙරුණු ශෂී වීරවංශට පසුගිය 2022 වසරේ කොළඹ මහෙස්ත්‍රාත් අධිකරණය විසින් වසර දෙකක සිරදඬුවමක් හා රුපියල් ලක්ෂයක දඩයක් නියම කර තිබුණි.

එම දඬුවම්වලින් තමන්ව නිදහස් කරන ලෙස ඉල්ලා ඇය විසින් කොළඹ මහාධිකරණයට මෙම අභියාචනය ඉදිරිපත් කළාය.

හිටපු පාර්ලිමේන්තු මන්ත්‍රී විමල් වීරවංශට එරෙහිව කඩුවෙල දිසා අධිකරණය විසින් වාරණ නියෝගයක් පනවා ඇත.

සිය කීර්ති නාමයට හානි වන අයුරින් අසත්‍ය ප්‍රකාශ සිදු කළේ යැයි පවසමින් දිවයිනේ ජනප්‍රිය මෙන්ම ප්‍රමුඛ සමාගමක් විසින් ගොනු කරන ලද පැමිණිල්ලකට අනුව විමල් වීරවංශට එරෙහිව මෙම වාරණ නියෝගය පනවා ඇත.

2026 වසරේ පෙබරවාරි, අප්‍රේල් සහ මැයි මාසවල පෞද්ගලික රූපවාහිනී නාළිකාවක විකාශය වූ වැඩසටහනක් හරහා විමල් වීරවංශ සෘජුව හා වක්‍රව අදාළ සමාගමට අපහාසාත්මක ප්‍රකාශ සිදුකොට ඇති බව පැමිණිල්ලේ සඳහන් වේ.

මේ හේතුවෙන් අදාළ වාරණ නියෝගයට අමතරව සිය සමාගමේ කීර්තිනාමයට වූ හානිය වෙනුවෙන් රුපියල් බිලියන හයක වන්දියක් විත්තිකරුගෙන් අය කර දෙන ලෙසද පැමිණිලිකාර සමාගම අධිකරණයෙන් ඉල්ලා ඇත.

පැමිණිලිකාර සමාගමට අදාළව මෙතෙක් කළ ප්‍රකාශ නැවත පළකිරීම, හෝ පැමිණිලිකරු සම්බන්ධව කිසිදු අසත්‍ය නොමඟ යවනසුලු හෝ අපහාසාත්මක ප්‍රකාශයක් සිදු කිරීම, ප්‍රසිද්ධ කිරීම වළකාලමින් නියෝගය පනවා ඇත.

අනතුරුව ඉදිරිපත් වූ කරුණු සලකා බැලූ කඩුවෙල දිසා අධිකරණය විමල් වීරවංශට එරෙහිව මෙම වාරණ නියෝගය නිකුත් කළ අතර මෙම නඩුව ජූනි (26) දින නැවත කැඳවීමට නියමිතය.

පාස්කු ඉරුදින ත්‍රස්ත ප්‍රහාරය සම්බන්ධයෙන් සිදුකරන විමර්ශන වලට බාධා වන අයුරින් ක්‍රියාකරමින් ඇතැයි කියමින් හිටපු පාර්ලිමේන්තු මන්ත්‍රීවරුන් ඇතුළු පිරිසක් නම් කරමින් අධිකරණයට ඊයේ (10) දින කරුණු වාර්තා කර ඇත.

විමල් වීරවංශ, උදය ගම්මන්පිල, ටිරාන් අලස්, සරත් වීරසේකර, අනුරාධා යහම්පත්, ජයන්ත සමරවීර, සංජීව එදිරිමාන්න, මධුභාෂන ප්‍රභාත්, චානක බණ්ඩාර, පුජ්‍ය බලංගොඩ කස්සප හිමි සහ පුජ්‍ය බෙංගමුවේ නාලක හිමි ඇතුළු පිරිස නම් කරමින් අධිකරණයට කරුණු වාර්තා කර ඇත.

මේ අතර සුරේෂ් සලේ, උදය ගම්මන්පිල, විමල් වීරවංශ සහ දිලිත් ජයවීර පාස්කු ඉරිදා ත්‍රස්ත ප්‍රහාර විමර්ශනයට බාධා කරන බවට අපරාධ පරීක්ෂණ දෙපාර්තමේන්තුව පසුගිය (08) දින කොටුව මහේස්ත්‍රාත් අධිකරණයට දැනුම් දුන්නේය.

අද (10) දින ලෝක මලල ක්‍රීඩා සංගමය විසින් ප්‍රකාශයට පත් කරන ලද නවතම හෙල්ල විසිකිරීමේ ලෝක ශ්‍රේණිගත කිරීම්වලට අනුව ශ්‍රී ලංකාවේ රුමේෂ් තරංග ලෝකයේ තෙවැනි ස්ථානය දක්වා ඉදිරියට පැමිණ ඇත.

නවතම වර්ගීකරණයට අනුව රුමේෂ් තරංග ශ්‍රේණිගත ලකුණු 1,324ක් හිමිකරගෙන සිටින අතර ලැයිස්තුවේ ප්‍රථම ස්ථානය හිමිකරගෙන සිටින ජර්මානු ක්‍රීඩක ජූලියන් වෙබර් විසින් ලකුණු 1,360ක් ලබා සිටියි.

දෙවැනි ස්ථානයේ සිටින ග්‍රෙනඩා රාජ්‍යයේ ඇන්ඩර්සන් පීටර්ස්ට ලකුණු 1,326ක් ලබාගෙන ඇති අතර එය රුමේෂ් තරංගට වඩා ලකුණු 2ක ඉතා සුළු පරතරයක් වීම විශේෂත්වයකි.

ලෝක මලල ක්‍රීඩා ක්ෂේත්‍රයේ දැවැන්තයන් වන ඔලිම්පික් රන් පදක්කම් ලාභී ක්‍රීඩකයන් දෙදෙනෙකුම අභිබවා යාමට රුමේෂ් තරංගට හැකියාව ලැබී ඇත. 

ශ්‍රී ලංකාවේ වත්මන් මූල්‍ය ප්‍රතිපත්තිය, විනිමය අනුපාත ප්‍රතිපත්තිය සහ රටේ ආර්ථික තත්ත්වය සම්බන්ධයෙන් පාර්ලිමේන්තු මන්ත්‍රීවරුන් දැනුවත් කිරීමේ වැඩසටහනක් පාර්ලිමේන්තුවේදී අද (10) දින පැවැත්විණි.

කථානායක වෛද්‍ය ජගත් වික්‍රමරත්නගේ ප්‍රධානත්වයෙන් පැවති මෙම වැඩසටහන සඳහා සම්පත් දායකයින් ලෙස ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ ඇතුළු ශ්‍රී ලංකා මහ බැංකුවේ ජ්‍යෙෂ්ඨ නිලධාරීහු පිරිසක් සහභාගී වූහ.

වැඩසටහන අතරතුර රට තුළ මූල්‍ය ප්‍රතිපත්ති ක්‍රියාත්මක වන ආකාරය, විනිමය අනුපාතයේ හැසිරීම, ආර්ථික ස්ථාවරත්වය සහ රටේ ආර්ථික ප්‍රගතියට අදාළ කරුණු පිළිබඳව මන්ත්‍රීවරුන් දැනුවත් කෙරිණි.

එසේම, මන්ත්‍රීවරුන් විසින් ඉදිරිපත් කළ ප්‍රශ්න සහ අදහස් සඳහා ද ශ්‍රී ලංකා මහ බැංකු නිලධාරීන් විසින් කරුණු පැහැදිලි කරමින් පිළිතුරු ලබා දෙන ලදී.