Local news

අයහපත් කාලගුණ තත්ත්වය හමුවේ දිස්ත්‍රික්ක කිහිපයකට නායයෑම් පිළිබඳ පූර්ව අනතුරු ඇඟවීමේ නිවේදන නිකුත් කර ඇත.

අයහපත් කාලගුණ තත්ත්වය හමුවේ මහනුවර දිස්ත්‍රික්කයේ පස්බාගේ කෝරළය, ගඟ ඉහළ කෝරළය ප්‍රාදේශීය ලේකම් කොට්ඨාස වලට අදියර 3 යටතේ ඉවත්වීමේ නායයෑම් අනතුරු ඇඟවීම් නිකුත් කර ඇත.

ජාතික ගොඩනැගිලි පර්යේෂණ සංවිධානය විසින් අදියර 1 සහ අදියර 2 යටතේ නායයෑම් පිළිබඳ පූර්ව අනතුරු ඇඟවීමේ නිවේදනයක් නිකුත් කර ඇත.

මහනුවර දිස්ත්‍රික්කය – පන්විල සහ මැදදුම්බර, කෑගල්ල දිස්ත්‍රික්කය දෙහිඕවිට සහ දැරණියගල, රත්නපුර දිස්ත්‍රික්කය – නිවිතිගල සහ කුරුවිට යන ප්‍රදේශීය ලේකම් කොට්ඨාස වලට අදියර 1 යටතේ පූර්ව අනතුරු ඇඟවීම් නිකුත් කර ඇත.

මහනුවර දිස්ත්‍රික්කයේ උඩුදුම්බර සහ උඩපළාත යන ප්‍රාදේශීය කොට්ඨාස ,කෑගල්ල දිස්ත්‍රික්කයේ යටින්තොට සහ අරණායක,නුවරඑළිය දිස්ත්‍රික්කයේ නුවරඑළිය, නෝර්වුඩ්, අඹගමුව කෝරළය, කොත්මලේ බටහිර සහ කොත්මලේ නැගෙනහිර,රත්නපුර දිස්ත්‍රික්කයේ ඕපනායක, ඉඹුල්පේ සහ රත්නපුර යන ප්‍රදේශීය ලේකම් කොට්ඨාස වලට අදියර 2 යටතේ පූර්ව අනතුරු ඇඟවීම් නිකුත් කර ඇත.

අදාළ නිවේදනය අද (03) උදෑසන 09.00 සිට හෙට (04) උදෑසන 09.00 දක්වා වලංගු වන බව ජාතික ගොඩනැගිලි පර්යේෂණ සංවිධානය සඳහන් කරයි.

මේ දිනවල පවතින අයහපත් කාලගුණික තත්ත්වය සැලකිල්ලට ගනිමින්, පාසල් වසා තබන්නේ ද, නැද්ද යන්න පිළිබඳ තීරණය කිරීම මධ්‍යම පළාතේ හැටන් සහ නුවරඑළිය අධ්‍යාපන කලාපයේ පාසල්වල විදුහල්පතිවරුන් වෙත පවරා ඇත.

ඒ අනුව අදාළ පාසල්වල විදුහල්පතිවරුන්ට පවතින අහයපත් කාලගුණික තත්ත්වය යටතේ එම පාසල් පවත්වන්නේද නැතිද යන්න තීරණය කළ හැකි බව පළාත් අධ්‍යාපන අධ්‍යක්ෂවරයා සඳහන් කරයි.

අද (03) දින ලෝක වෙළෙඳපොළේ බොරතෙල් මිල ගණන් පහළ ගොස් ඇත.

ඒ අනුව BRENT බොරතෙල් බැරලයක මිල අමෙරිකානු ඩොලර් 83.46 දක්වා පහළ ගොස් ඇත.

WTI බොරතෙල් බැරලයක මිල අමෙරිකානු ඩොලර් 79.81 දක්වා පහළ ගොස් ඇත.

MURBAN බොරතෙල් බැරලයක මිල 85.49 දක්වා ඉහළ ගොස් ඇත.

අද උදෑසන කෑගල්ල කරඩුපන හංදිය ප්‍රදේශයේදී ලංගම බස් රථයක් සහ පෞද්ගලික බස් රථයක් ගැටීමෙන් අනතුරක් සිදුව ඇත.

මෙම අනතුරෙන් පුද්ගලයන් 20දෙනෙකු පමණ තුවාල ලබා ඇති අතර ඔවුන් කෑගල්ල ශික්ෂණ රෝහල වෙත ඇතුළත් කිරීමට පියවර ගෙන ඇත.

රඹුක්කන සිට මහනුවර බලා ධාවනය වූ ලංගම බස් රථයක් සහ දිගන සිට කොළඹ දෙසට ධාවනය වූ පෞද්ගලික බස් රථයක් මෙලෙස අනතුරට ලක්ව ඇත.

ශ්‍රී ලංකා පාරිභෝගික සමුපකාර සමිති සංගමය (COOPFED), දේශීය කර්මාන්තකරුවා ශක්තිමත් කරමින් පාරිභෝගිකයාට සහනදායී මිලකට අත්‍යවශ්‍ය භාණ්ඩ සැපයීමේ අරමුණින් ලංකා සීනි සමාගම සහ BCC ලංකා සමාගම සමඟ විශේෂ අවබෝධතා ගිවිසුම් දෙකකට අත්සන් තබා ඇත.

මෙය සමුපකාර ඉතිහාසයේ ඓතිහාසික පියවරක් ලෙස සනිටුහන් වන අතර ඒ හරහා පාරිභෝගිකයාට ගුණාත්මක දේශීය නිෂ්පාදන සෘජුවම ලබා ගැනීමට අවස්ථාව සැලසෙයි.

මෙම නව වැඩපිළිවෙළ යටතේ ලංකා සීනි සමාගමෙන් මසකට දුඹුරු සීනි ටොන් 1000ක්, BCC ලංකා සමාගමෙන් ඇසුරම් කරන ලද පොල්තෙල් ලීටර් 20000ක් මෙන්ම සබන් ඇතුළු අනෙකුත් නිෂ්පාදන සමුපකාර ජාලය වෙත ලබා ගැනීමට නියමිතය.

මෙම නිෂ්පාදන පාරිභෝගික සමුපකාර 75ක නියෝජිතයින් හරහා තවත් ප්‍රාදේශික වෙළදසැල් 3500ක් දක්වා විහිදී යන පුළුල් බෙදාහැරීමේ ජාලයක් ඔස්සේ ජනතාව වෙත ළඟා කිරීමට නියමිතය.

2026 වසරේ අධ්‍යයන පොදු සහතික පත්‍ර උසස් පෙළ විභාගය සම්බන්ධයෙන් විභාග දෙපාර්තමේන්තුව නිවේදනයක් නිකුත් කර ඇත.

ඒ අනුව උසස් පෙළ විභාගයට අදාළ සියලුම උපකාරක පන්ති, විෂයානුබද්ධ දේශන, සම්මන්ත්‍රණ සහ වැඩමුළු පැවැත්වීම හෙට (04) දින මධ්‍යම රාත්‍රියෙන් අවසන් කළ යුතු බව විභාග දෙපාර්තමේන්තුව සඳහන් කරයි.

මෙම තහනම් නියෝගය විභාග කටයුතු අවසන් වන තෙක් දැඩි ලෙස ක්‍රියාත්මක වන අතර එම කාලසීමාව තුළ විභාගය ඉලක්ක කරගත් අනුමාන ප්‍රශ්න පත්‍ර මුද්‍රණය කිරීම සහ ඒවා බෙදාහැරීම සම්පූර්ණයෙන්ම තහනම් කර ඇත.

විභාග ප්‍රශ්න පත්‍ර සඳහා සෘජුවම ප්‍රශ්න ලබාදෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත්පත්‍රිකා මෙන්ම විද්‍යුත් හෝ මුද්‍රිත මාධ්‍ය හරහා ප්‍රසිද්ධ කිරීම හෝ එවැනි ද්‍රව්‍ය ළඟ තබාගැනීම සපුරා තහනම් කර ඇත.

මේ අතර 2026 අ.පො.ස උසස් පෙළ විභාගය එළඹෙන (10) වන දින සිට සැප්තැම්බර් මස (05) වන දින දක්වා දිවයින පුරා පිහිටි විභාග මධ්‍යස්ථාන 2,532ක් ආවරණය කරමින් පැවැත්වීමට නියමිතව ඇත.

මහර බන්ධනාගාරයේ ඇතිවූ තත්ත්වය මීගමුව බන්ධනාගාරයේ සිද්ධියට වඩා වෙනස් බව අධිකරණ අමාත්‍ය හර්ෂණ නානායක්කාර සඳහන් කරයි.

බන්ධනාගාරය තුළ ඇතිවූ නොසන්සුන්කාරී තත්ත්වයන් හුදෙක් පවතින තදබදය නිසාම ඇති වූවක් නොවන බවත් ඒවා පිටුපස කිසියම් බාහිර කණ්ඩායමක සංවිධානාත්මක මෙහෙයවීමක් පවතින්නේද යන්න පිළිබඳව සැකයක් පවතින බව අමාත්‍ය හර්ෂණ නානායක්කාර සඳහන් කරයි.

මීගමුවේ ගැටුම ඇතිවූයේ රැඳවියන් රැඳවියන් අතර බවත් මහර සිදුවූයේ රැඳවියන් හා බන්ධනාගාර පරිපාලනය අතර බවත් මීට පෙර හේතුවක් නොමැතිව මෙවැනි තත්ත්වයන් ඉස්මතු නොවූ බවද අමාත්‍ය හර්ෂණ නානායක්කාර සඳහන් කරයි.

මත්ද්‍රව්‍ය වැටලීම් දැඩි වීමත් සමඟ බන්ධනාගාර තුළට මත්ද්‍රව්‍ය ගලා ඒම සීමා වීම මෙවැනි නොසන්සුන්තා ඇති වීමට එක් හේතුවක් විය හැකි බවද අමාත්‍ය හර්ෂණ නානායක්කාර සඳහන් කරයි.

රජයේ රස පරීක්ෂක වාර්තා ප්‍රමාද වීම නිසා ඇප ලබා ගැනීමට ඇති බාධා ඉවත් කිරීමට පියවර ගන්නා බවත් නීතිය මගින් පමණක් මත්ද්‍රව්‍ය උවදුර පාලනය කළ නොහැකි බවත් සමාජයීය වශයෙන් ද මේ සඳහා විසඳුම් සෙවිය යුතු බවද අමාත්‍යවරයා සඳහන් කරයි.

පැවති උත්සවයකින් අනතුරුව මාධ්‍ය වෙත අදහස් දක්වමින් අමාත්‍ය හර්ෂණ නානායක්කාර මේ බව සඳහන් කරයි.

මහර බන්ධනාගාරයේ ඇතිවූ තත්ත්වය හේතුවෙන් එක් රැඳවියෙකු මියගොස් තවත් රැඳවියන් 09 දෙනෙකු තුවාල ලබා ඇත.

යතුරුපැදියක් සොරකම් කිරීම සහ අයිස් මත්ද්‍රව්‍ය ග්‍රෑම් 20ක් ළඟ තබාගැනීමේ චෝදනාව සම්බන්ධයෙන් රක්ෂිත බන්ධනාගාර ගත කර සිටි 33 හැව්රිදි පුද්ගලයෙක් එලෙස මරණයට පත්ව ඇත.

බන්ධනාගාරයේ මෙම නොසන්සුන්කාරී තත්ත්වය මෙහෙයවා ඇත්තේ සාතන්, අසාර්, පැට්ටා සහ තවත් රැඳවියෙකු එකතු වී බව පොලීසිය සිදුකළ මූලික පරීක්ෂණ වලදී අනාවරණය වී ඇති බව වාර්තා වේ.

මෙම සිදුවීමට සම්බන්ධ බවට සැක කරන රැඳවියන් 104 දෙනෙකු බූස්ස ඇතුළු තවත් බන්ධනාගාර 7ක් වෙත මාරුකර යැවීමට බන්ධනාගාර දෙපාර්තමේන්තුව පියවර ගත්තේය.

බන්ධනාගාරය තුළ මත්ද්‍රව්‍ය හුවමාරු වීම පාලනයට දැඩි පියවර ගෙන තිබීමෙන් මේ දිනවල බන්ධනාගාරයේ මත්ද්‍රව්‍ය හිඟවීම මත මෙම නොසන්සුන්කාරි තත්ත්වය හටගෙන ඇති බව වාර්තා වේ.

රැඳවියන් සිව්දෙනක් වහලයකට නැග, බන්ධනාගාර පාලනාධිකාරියට විරෝධය දැක්වූ අතර එම අවස්ථාවේදී බන්ධනාගාරයේ උසස් නිලධාරියෙක් පැමිණ මේ සම්බන්ධයෙන් රැඳවියන්ගෙන් කරුණු විමසා ඇති බව වාර්තා වේ.

එහිදී රැඳවියන් බන්ධනාගාර නිලධාරීන් දෙසට ගල් ප්‍රහාර එල්ල කිරීමත් සමග බන්ධනාගාර රෝහලේ ඇති ඖෂධ, මුළුතැන්ගෙයහි ඇති තියුණු ආයුධ සහ ගිනිඅවි ගබඩාවේ ඇති අවි ඇතුළු උපකරණ ආරක්ෂිතව එම ස්ථාන වලින් ඉවත් කිරීමට නිලධාරීන් කටයුතු කර ඇත.

තවත් රැඳවියන් 1,500ක පමණ පිරිසක් බන්ධනාගාරයේ එක් පසෙක ඉදිකෙරෙමින් පවතින තාප්පය බිඳ පලායාමට උත්සාහ දරා ඇති අතර එම උත්සාහය ව්‍යර්ත කිරීම සඳහා බන්ධනාගාර නිලධාරීන් විසින් වෙඩි තැබීමක් සිදුකර ඇත.

එම අවස්ථාවේදී තවත් රැඳවියන් පිරිසක් බන්ධනාගාර ගොඩනැගිල්ලකට ගිනිතබා ඇති අතර පසුව රැඳවියන්ගෙන් අත්අඩංගුවට ගන්නා මත්ද්‍රව්‍ය ගබඩා කරන ගොඩනැගිල්ල කඩා එහි තිබූ මත්ද්‍රව්‍ය භාවිත කර ඇත.

එම තත්ත්වය අතරතුර තවත් රැඳවියන් පිරිසක්, සෙසු රැඳවියන් රඳවා ඇති වාට්ටු වෙත ගොස් එහි ඉබි යතුරු කඩා ඔවුන්ටත් එම සිර මැදිරිවලින් පිටතට ඒමට අවස්ථාව සලසා දී ඇත.

කෙසේ වෙතත් මෙම නොසන්සුන්තාව හටගෙන පැය 13කට අධික කාලයකින් පසු අද උදෑසන 6.00 පමණ වනවිට තත්ත්වය සම්පූර්ණයෙන්ම පාලනය කිරීමට ආරක්ෂක අංශ කටයුතු කළේය.

මහර බන්ධනාගාර රැඳවියන් බන්ධනාගාරයේ දේපොළ රැසක් විනාශ කර ඇති බව බන්ධනාගාර දෙපාර්තමේන්තුව සඳහන් කරයි.

ඒ අනුව මහර බන්ධනාගාරයේ ඇතිවූ ගැටුමෙන් බන්ධනාගාරයට සිදුව ඇති හානිය රුපියල් කෝටි 15කට අධික බව වාර්තා වේ.

බන්ධනාගාරයේ වාට්ටු හැර සියලු පරිපාලන ගොඩනැගිලි, කාර්යාල, ජල සැපයුම්, වැසිකිලි සහ වැසිකිලි වලවල් පවා විනාශ කර ඇත.

තවද මුළුතැන්ගෙය, අලුතින් විවෘත කළ පුනුරුත්තාපන ගොඩනැගිල්ල, පුනුරුත්තාපන කාර්යාලය, ප්‍රධාන ජේලර් කාර්යාලය සහ බන්ධනාගාර රෝහල විනාශ කර ඇත.

බොහෝ ගොඩනැගිලි වල උළු බිඳී, වහලට දැඩි ලෙස හානි සිදුකර ඇති බවත් බන්ධනාගාර පුනරුත්ථාපන වැඩසටහන් වලදී මැහීම් කටයුතු සඳහා භාවිත කරන උපකරණ රැසක් රැඳවියන් විනාශ කර ඇත.

සිද්ධිය ඇතිවූ ඊයේ මධ්‍යම රාත්‍රීය වනතුරුම රැඳවියන් බන්ධනාගාර පරිශ්‍රයේ සිට පිටතට ගල් මුල් ප්‍රහාර එල්ල කළ අතර එම ගල‍් ප්‍රහාර නිසා බන්ධනාගාරය අවට නිවාස කිහිපයකට හානි සිදුව ඇත.

මෙම බන්ධනාගාර ගැටුමට හේතුව සොයා මේ වනවිට විමර්ශන ආරම්භ කර ඇත.

කාලගුණ විද්‍යා දෙපාර්තමේන්තුව විසින් නාවික සහ ධීවර ප්‍රජාවට අනතුරු ඇඟවීමක් නිකුත් කර ඇත.

ඒ අනුව නැවත දැනුම් දෙන තුරු ගාල්ල සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශ වෙත යාත්‍රා නොකරන ලෙස නාවික සහ ධීවර ප්‍රජාවට දැනුම් දී ඇත.

මෙම අනතුරු ඇඟවීම හෙට (03) දින ප.ව. 8.00 දක්වා වලංගු වන බව කාලගුණ විද්‍යා දෙපාර්තමේන්තුව සඳහන් කරයි.

එම ප්‍රදේශවල සුළගේ වේගය හෙට විටින් විට පැ.කි.මි. 60-70 දක්වා වැඩිවිය හැකි බවත් ඒ හේතුවෙන් එම මුහුදු ප්‍රදේශ වරින්වර ඉතා රළු විය හැකි බවද එම දෙපාර්තමේන්තුව සඳහන් කරයි.