Local news

ප්‍රවාහන, මහා මාර්ග හා නාගරික සංවර්ධන අමාත්‍ය බිමල් රත්නායක ඊයේ (12) කොළඹ පිටකොටුව මධ්‍යම බස් නැවතුම්පොළේ නිරීක්ෂණ චාරිකාවකට සහ එහි පැවති සාකච්ඡාවකට එක් වු අතර එම අවස්ථාවට ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) ද සහභාගී ව්ය.

ශ්‍රී ලංකා ගුවන් හමුදාව විසින් සිදු කරන ලද පුළුල් ප්‍රතිසංස්කරණ හා නවීකරණ කටයුතු වලින් අනතුරුව, මෙරට ප්‍රධානතම පොදු ප්‍රවාහන මධ්‍යස්ථානයක් වන පිටකොටුව මධ්‍යම බස් නැවතුම්පොළ මෑතකදී යළි විවෘත කරන ලදි.

රුපියල් මිලියන ගණනක පිරිවැයකින් ක්‍රියාත්මක වූ මෙම ව්‍යාපෘතිය, පොදු ප්‍රවාහන යටිතල පහසුකම්වල ගුණාත්මක භාවය, ආරක්ෂාව සහ කාර්‌යක්ෂමතාව ඉහළ නැංවීමේ අරමුණින් රජයේ ” Clean ශ්‍රී ලංකා” වැඩසටහන යටතේ ක්‍රියාත්මක කරන ලද්දකි.

මෙම සංචාරය අතරතුරදී අමාත්‍යවරයා සහ ආරක්ෂක ලේකම්වරයා බස් නැවතුම්පොළ පරිශ්‍රය නිරීක්ෂණය කළ අතර එහි පවතින පහසුකම්, සේවාවන් සහ මෙහෙයුම් කටයුතු සංවිධානය කර ඇති ආකාරය පිළිබඳව සොයා බැලූහ.

අනතුරුව පැවැති සාකච්ඡාවේදී, බස් පර්යන්තයේ නඩත්තු කටයුතු, මෙහෙයුම් කළමනා කරණය, දැනට ක්‍රියාත්මක සංවර්ධන කටයුතු, ආරක්ෂාව මෙන්ම එහි දෛනික ක්‍රියාකාරිත්වයේදී මතුවන විවිධ අභියෝග පිළිබඳව අවධානය යොමු විය.

එමෙන්ම, මගී පහසුව, රථවාහන ගමනාගමනය, පිරිසිදුකම සහ සමස්ත මෙහෙයුම් කාර්යක්ෂමතාව තවදුරටත් ඉහළ නැංවීම සඳහා ගත යුතු ප්‍රායෝගික පියවර පිළිබඳව ද මෙහිදී දීර්ඝ වශයෙන් සාකච්ඡා කළහ.

පෙර පාසල් වයසේ පසුවන අවුරුදු 05ක් වයසැති කුඩා දැරියකට ලිංගික අතවර කළ බව පැවසෙන 65 හැවිරිදි ව්‍යාපාරිකයෙකුව අත්අඩංගුවට ගෙන ඇත.

එම දැරිය බිස්කට් මිලදී ගැනීම සඳහා සැකකරු විසින් පවත්වා ගෙන යනු ලබන වෙළෙඳසැල වෙත ගොස් ඇති අතර එම අවස්ථාවේදී දැරියව වෙළෙඳසැල තුළට ගෙන සැකකරු විසින් මෙම අතවරය සිදුකර ඇති බවට දැරියගේ මව විසින් පොලීසියට පැමිණිලි කර ඇත.

එම පැමිණිල්ලට අනුව මාදම්පේ, කරුකුවටව ප්‍රදේශයේ පදිංචි 65 හැවිරිදි එම ව්‍යාපාරිකයා මාදම්පේ පොලීසිය විසින් අත්අඩංගුවට ගෙන ඇත.

අතවරයට පත් දැරිය මේ වනවිට වෛද්‍ය පරීක්ෂණයක් සඳහා හලාවත මහ රෝහලේ අධිකරණ වෛද්‍ය නිලධාරීවරයා වෙත යොමු කර ඇති අතර අත්අඩංගුවට ගත් සැකකරු හලාවත මහෙස්ත්‍රාත්වරයා වෙත ඉදිරිපත් කිරීමට නියමිතය. 

ශ්‍රී ලාංකීය දේපළ වෙළඳාම් ඉතිහාසය උඩුයටිකුරු කරමින්, මුළු මහත් කොළඹ නගරයම මවිතයට පත් කළ පෙරළිකාර රාත්‍රියක් පසුගියදා නිමාවට පත් වුණා.

ඒ, Prime Group සහ මෙල්වා සමාගම එක්ව දියත් කරන ශ්‍රී ලංකාවේ අති සුඛෝපභෝගී නිවාස ව්‍යාපෘතිය වන “Prime Marina” දියත් කිරීමත් සමඟයි.

ශ්‍රී ලංකාවේ නව මූල්‍ය හා ව්‍යාපාරික හදවත වන Port City, Colombo හි, මනරම් සාගර තීරයට සහ යාත්‍රාංගනයට සෘජුවම මුහුණලා ඇති භූමියේ මෙම සුවිශේෂී උත්සවය පැවැත්වුණා.

එදින රාත්‍රියේ මුළු කොළඹ අහසම ආලෝකමත් වූයේ ශ්‍රී ලංකා ඉතිහාසයේ පළමු වරට ඉදිරිපත් කෙරුණු අති දැවැන්ත 3D Animated Drone සංදර්ශනයෙන්.

කොළඹ නගරයටම ඉතා පැහැදිලිව දර්ශනය වන පරිදි ඩ්‍රෝන යානා සිය ගණනක් අහසේ විවිධ රටා මවද්දී, ඊට සමගාමීව නෙළුම් කුලුන “Prime Marina” සන්නාම වර්ණවලින් හැඩ වී තිබුණා.

එමෙන්ම මනස්කාන්ත ගිනිකෙළි සංදර්ශනයකින්ද Port City, Colombo ආලෝකමත් වුණා.

මෙම සුවිශේෂී අවස්ථාව සඳහා මෙරට මෙන්ම විදේශීය ප්‍රමුඛ පෙළේ ව්‍යාපාරිකයින්, ආයෝජකයින් සහ සුවිශේෂී ආරාධිත අමුත්තන් 1,500කට අධික පිරිසක් සහභාගී වී සිටියා.

ශ්‍රී ලාංකීය දේපළ වෙළඳාම් ක්ෂේත්‍රයේ නව විකුණුම් වාර්තාවක් ද සනිටුහන් කරමින් “Prime Marina” ව්‍යාපෘතියේ නිවාස ඒකක 400කට වඩා මේ වනවිටත් විකිණී අවසන්.

ගෝලීය මට්ටමේ උසස්ම ප්‍රමිතියෙන් ඉදිවන “Prime Marina” වෙත ආයෝජනය කිරීම, දේශීය හා ජාත්‍යන්තර ආයෝජකයින් සඳහා අනාගතයට තැබිය හැකි හොඳම ආයෝජනයක් වනු නොඅනුමානයි.

එක්සත් ජනපද නාවික හමුදාවට අයත් ලිටෝරල් කොම්බැට් නෞකාවක් වන  USS කැන්බරා නෞකාව අද (12) කොළඹ වරායට පැමිණ ඇත.

කමාන්ඩර් ජේම්ස් මික්ලොෆ්ලින්ගේ අණදීම යටතේ USS කැන්බරා නෞකාව ඉන්ධන සහ සැපයුම් රැගෙන යාමට කෙටි නැවතුමක් සඳහා කොළඹ වරායට පැමිණ ඇත.

මෙරටට පැමිණි සිව් වන එක්සත් ජනපද නාවික හමුදා ලිටොරල් කම්බැට් නෞකාව මෙය වන බව ශ්‍රී ලංකාවේ එක්සත් ජනපද තානාපති කාර්යාලය නිවේදනය කළේය. 

කොළඹ වරායට පැමිණි එක්සත් ජනපද නාවික මිතුරන් ශ්‍රී ලංකා පාර්ශවය උණුසුම් ලෙස පිළිගෙන ඇති අතර නෞකාවේ නාවිකයින්ට සහ කාර්ය මණ්ඩලයට සිය හෘදයාංගම සුබ පැතුම් ද පළ කර ඇත.

මෙම වරාය සංචාරය, එක්සත් ජනපද සහ ශ්‍රී ලංකා නාවික හමුදාවන් අතර පවතින දිගුකාලීන සබඳතා මෙන්ම අපගේ ද්විපාර්ශ්වික සබඳතාවයේ ලක්ෂණයක් වන සමීප සහයෝගීතාවය පෙන්නුම් කරයි.

හිටපු අටමස්ථානාධිපති පල්ලේගම හේමරතන හිමිගේ DNA පරීක්ෂණයක් සඳහා ලබන (16) දින රජයේ රස පරීක්ෂක දෙපාර්තමේන්තුවට ගොස් තම රුධිර සාම්පල රජයේ රස පරීක්ෂකවරයා වෙත ලබා දෙන ලෙසට අනුරාධපුර ප්‍රධාන මහේස්ත්‍රාත් සියපත් සසිඳු වික්‍රමරත්න අද (12) නියෝග කළේය.

නිට්ටඹුව පොලිසිය වැඩිදුර වාර්තාවක් මගින් අධිකරණයට කළ කරුණු දැක්වීමක් සැලකිල්ලට ගනිමින් අනුරාධපුර ප්‍රධාන මහේස්ත්‍රාත් සියපත් සසිඳු වික්‍රමරත්න විසින් මෙම නියෝගය කළේය.

තවද හිටපු අටමස්ථානාධිපති පල්ලේගම හේමරතන හිමිගේ සිය රුධිර සාම්පල ලබා දීමෙන් අනතුරුව සිදු කරන DNA පරීක්ෂණයේ වාර්තාව අධිකරණය හමුවට ඉදිරිපත් කරන ලෙසද ප්‍රධාන මහේස්ත්‍රාත්වරයා රජයේ රස පරීක්ෂණවරයාට නියෝග කළේය.

අධිකරණ නියෝගයකට අනුව 2026 මැයි (04) වන දින රජයේ රස පරීක්ෂකවරයා වෙත DNA පරීක්ෂණයක් සඳහා යවන ලද, දැරිය විසින් වළ දමා සඟවා තිබියදී සොයා ගත් රුධිරය තැවරුණ බවට සැක කෙරෙන ඇදුම් රජයේ රස පරීක්ෂකවරයා වෙත යොමු කළ බව එහිදී නිට්ටඹුව පොලිසිය අධිකරණයට දැනුම් දුන්නේය.

නඩු භාණ්ඩ ලෙස නම් කර ඇති එම ඇඳුම් සම්බන්ධයෙන් රජයේ රස පරීක්ෂකවරයා DNA පරීක්ෂණයක් පවත්වා ඇති බවත් දැරියගේ ඇඳුම්වල “DNA ඇලීල අන්තර්ගතව ඇති බව” DNA පරීක්ෂණයේදී තහවුරු වී ඇති බවට රජයේ රස පරීක්ෂක වාර්තාව මගින් අනාවරණ වී ඇති බවද පොලීසිය සඳහන් කළේය.

එනිසා අදාළ DNA ඇලීල සමග සැසඳීමට සැකකාර හිමිනමගේ රුධිර සාම්පල ලබා ගැනීමට අවශ්‍ය බැවින් රජයේ රස පරීක්ෂකවරයා වෙත රුධිර සාම්පල ලබාදෙන ලෙසට සැකකාර හිමිනමට නියෝග කරන ලෙසට පොලීසිය අධිකරණයෙන් ඉල්ලා සිටියේය.

තවද දැරියගේ ඇඳුම්වල අඩංගු DNA ඇලීල සමග සැකකාර හිමිනමගේ රුධිර සාම්පල ගැළපේද යන්න අනාවරණය කර ගැනීම සඳහා සිදුකෙරෙන DNA පරීක්ෂණයේ රස පරීක්ෂක වාර්තාව අධිකරණයට ඉදිරිපත් කරන ලෙසට රජයේ රස පරීක්ෂකවරයාට නියෝග කරන ලෙසද පොලිසිය අධිකරණයෙන් ඉල්ලා සිටියේය.

ඒ අනුව අනුරාධපුර ප්‍රධාන මහේස්ත්‍රාත්වරයා, ලබන (16) වන දින රජයේ රස පරීක්ෂක පරීක්ෂක දෙපාර්තමේන්තුවට ගොස් තම රුධිර සාම්පල DNA පරීක්ෂණයක් සඳහා රජයේ රස පරීක්ෂකවරයාට ලබාදෙන ලෙසට සැකකාර පල්ලේගම හේමරතන හිමියන්ට නියෝග කළේය.

ලොව පුරා Facebook, Instagram සහ Threads යන සමාජ මාධ්‍ය බිඳවැටී ඇති බවට තොරතුරු වාර්තා වේ.

මේ හේතුවෙන් පරිශීලකයින් දැඩි අපහසුතාවයකට පත්ව ඇති බවද වාර්තා වේ.

සංවිධානාත්මක අපරාධකරු ගණේමුල්ල සංජීව ඝාතන සිද්ධියට අදාළ නඩුකරය අද (12) දින කොළඹ ප්‍රධාන මහේස්ත්‍රාත් අසංග එස් බෝදරගම ඉදිරියේ කැඳවනු ලැබුවේය.

එහිදී අත්අඩංගුවට ගත් ඔස්මන්ඩ් ගුණසේකර හෙවත් ‘ගම්පහ ඔස්මන්ඩ්’ නමැත්තා තවදුරටත් රැඳවුම් නියෝග මත රඳවා ගෙන විමර්ශන සිදු කරන බව කොළඹ අපරාධ කොට්ඨාශය අද (12) දින කොළඹ මහේස්ත්‍රාත් අධිකරණයට දැනුම් දුන්නේය. 

සෝදිසි වරෙන්තුවක් ලබාගෙන ඔස්මන්ඩ් ගුණසේකර නමැත්තාගේ නිවස හා භූමිය පරීක්ෂා කළ අවස්ථාවේදී එහි තිබී ලේඛන කිහිපයක් හමු වූ බවත් ඒ අතර කෙහෙල්බද්දර පද්මේ නමැත්තාගේ රතු නිවේදනය තිබූ බව පොලිසිය සඳහන් කරයි.

ගණේමුල්ල සංජීව නමැත්තාට පෙර තිබූ නඩු, දැනට පවතින නඩුවල විස්තර සහ ඔහු ආශ්‍රය කළ පුද්ගලයින් මෙන්ම දුරකථන අංක සම්බන්ධයෙන් ලේඛනයක් ඒ අතර තිබී හමුවූ බවත් මේ තුළින් ගණේමුල්ල සංජීව නමැත්තාගේ ක්‍රියාකාරකම් පිළිබඳව මෙම සැකකරු අවදියෙන් සිට ඇති බව පැහැදිලි වන බවද පොලීසිය සඳහන් කරයි.

තවද එම සැකකරුගේ නිවාස භූමියේ තිබී ලියාපදිංචි නොකළ යතුරුපැදියක් සහ ගිනි අවියක් හමුවූ බවත් ඒවා පිළිබඳව ගම්පහ මහේස්ත්‍රාත් අධිකරණයට කරුණු වාර්තා කර තිබෙන බවද පොලීසිය සඳහන් කරයි.

මෙම සිද්ධියේ ප්‍රධාන සැකකාරියක් වන ඉෂාරා සෙව්වන්දි නමැත්තිය තවදුරටත් දින 30 ක් රඳවාගෙන ප්‍රශ්න කිරීම සඳහා රැඳවුම් නියෝග ලබාගෙන තිබෙන බවද පොලිසිය සඳහන් කරයි.

මේ අතර මීළඟ නඩු දිනයේදී කොළඹ අපරාධ කොට්ඨාශයේ අධ්‍යක්ෂවරයාට අධිකරණයේ පෙනී සිට කරුණු දක්නට ලෙස දන්වා නොතීසි නිකුත් කරන ලෙස මහේස්ත්‍රාත්වරයා නියම කළේය.

ඉන්තරුව මෙම පැමිණල්ල ලබන (26) වනදා කැඳවන ලෙස මහේස්ත්‍රාත්වරයා නියම කළේය.