Local news

දෙවිනුවර උත්පලවණ්ණ ශ්‍රී විෂ්ණු මහා දේවාලයේ වාර්ෂික ඇසළ පෙරහැර මංගල්‍යයේ පසුගිය වසරේ නර්තනයේ යෙදුණු කාවඩි නර්තන කණ්ඩායම් 45 සඳහා අවසර ලබාදී ඇත.

මාතර දිසාපති කාර්යාලයේ අද (27) පස්වරුවේ පැවති විශේෂ සාකච්ඡාවේදී මෙම තීරණය ගෙන ඇත.

ඒ අනුව දෙවිනුවර ශ්‍රී විෂ්ණු මහා දේවාලයේ මෙවර පෙරහැරේදී එම කණ්ඩායම් 45ට නර්තනයේ යෙදීමට අවසර ලබාදීමට මහජන ආරක්ෂක අමාත්‍ය ආනන්ද විජේපාල තීරණය කර ඇත.

මෙම සාකච්ඡාව මහජන ආරක්ෂක අමාත්‍ය ආනන්ද විජේපාල, එම අමාත්‍යාංශ ලේකම් රවී සෙනෙවිරත්න, පොලිස්පති ප්‍රියන්ත වීරසූරිය සහ මාතර දිස්ත්‍රික් ලේකම් චන්දන තිලකරත්න ඇතුළු පාර්ශ්ව වල සහභාගීත්වයෙන් පැවැත්විණ.

ඒ අනුව හෙට (28) දින පැවැත්වෙන පෙරහැරට පොලිස් විශේෂ කාර්යය බළකාය සහ පොලීසිය ආරක්ෂාව සඳහා යෙදවීමට තීරණය කර ඇත.

තමන්ගේ පුත්‍රයා වන අනුද බණ්ඩාර මුදල් කොල්ලකෑමේ චෝදනාවට අදාළව ඔප්පු කළ හැකි කිසිදු සාක්ෂියක් නොමැති බවට තම නීතීඥයින් ප්‍රකාශ කළ බව හිටපු පාර්ලිමේන්තු මන්ත්‍රී ශාන්ත බණ්ඩාර සඳහන් කරයි.

තමන්ගේ පුත්‍රයා ඉල්ලක්ක කරගෙන පසුගිය දින කිහිපය පුරාවටම සමාජ මාධ්‍ය ඔස්සේ හා විවිධ මාධ්‍යයන් ඔස්සේ විශාල වශයෙන් අසත්‍ය ප්‍රවෘත්ති වාර්තා කර තිබූ බවද ශාන්ත බණ්ඩාර සඳහන් කරයි.

අනුද ජනාදිත් බණ්ඩාර ඇප මත මුදා හැරීමෙන් අනතුරුව අධිකරණයෙන් පිටතට පැමිණ මාධ්‍ය වෙත අදහස් දක්වමින් ශාන්ත බණ්ඩාර සඳහන් කළේ,

“මගේ පුතා විතරක් නෙමෙයි, කවුරු වැරැද්දක් කරත් නීතිය ක්‍රියාත්මක වෙන්න ඕන. එතන අපි පැහැදිළිව ඉන්නවා. නමුත් පසුගිය දින ටිකේදී මම ඉතාම කණගාටු වෙනවා. වැරදි පුවත් රාශියක් පළවුණා.

සමාජ මාධ්‍ය ඔස්සේත්, වෙනත් මාධ්‍ය ඔස්සේත් මම දැක්කා සත්‍ය නොවන වාර්තා රාශියක් පළවෙලා තිබුණා. නමුත් අපි විශේෂයෙන්ම ගරු අධිකරණය ගැන විශාල විශ්වාසයක් අපිට තිබ්බා. අද ආවෙත් අධිකරණයේ විශ්වාසය මතයි.

එනිසා මගේ නීතීඥයින් මට කිවුවා, මෙයා සම්බන්ධව කිසිම චෝදනාවක් එල්ල කරන්න වැරදි සම්බන්ධව මොනවත් සාක්ෂි ඇත්තටම තිබුණේ නෑ කියලා. පොලීසියත් ඇත්තටම මේ සම්බන්ධව ලොකු විමර්ශනයක් කරලා තිබ්බා.”

ශ්‍රේෂ්ඨාධිකරණය සහ අභියාචනාධිකරණය යන ආයතනවල විනිසුරුවන්ගේ විශ්‍රාම වයස දීර්ඝ කිරීමේ ආණ්ඩුක්‍රම ව්‍යවස්ථා සංශෝධනය සිදු නොකරන ලෙසට ශ්‍රී ලංකා අධිකරණ සේවා සංගමය අධිකරණ අමාත්‍යවරයාට ලිපියක් යොමුකර ඇත.

ආණ්ඩුක්‍රම ව්‍යවස්ථා සංශෝධනය හරහා අධිකරණ පද්ධතියේ ස්වාධීනත්වයට හා ස්ථාවර පැවැත්මට ඉන් බලපෑම් එල්ල වන බැවින් එය සිදු නොකරන ලෙස එම සංගමය අධිකරණ අමාත්‍යවරයාගෙන් ඉල්ලා ඇත.

මෙම ව්‍යවස්ථා සංශෝධනය සිදු නොකොට අධිකරණ පද්ධතිය කෙරෙහි මහජනතාවට ඇති විශ්වාසනීයත්වය සහ අඛණ්ඩ ගෞරවය ආරක්ෂා කරන ලෙසද එම සංගමය අධිකරණ අමාත්‍යවරයාගෙන් ඉල්ලා ඇත.

විනිසුරුවන්ගේ විශ්‍රාම වයස දීර්ඝ කිරීමට අදාළව ආණ්ඩුක්‍රම ව්‍යවස්ථාව සංශෝධනය කිරීමේ යෝජනාව ආණ්ඩුව කැබිනට් මණ්ඩලයට ගෙන ඒමට නියමිත අතර එම යෝජනාව සම්බන්ධයෙන් ශ්‍රී ලංකා නීතිඥ සංගමය ඇතුළු පාර්ශ්ව රැසක් මේ වනවිටත් සිය විරෝධය ප්‍රකාශ කර ඇත.

චීන ජාතිකයෙකුගෙන් රුපියල් කෝටි 02ක මුදලක් කොල්ලකෑමේ සිද්ධියට අදාළව රක්ෂිත බන්ධනාගාරගත කර තිබූ හිටපු රාජ්‍ය අමාත්‍ය ශාන්ත බණ්ඩාරගේ පුත් අනුද ජනාදිත් බණ්ඩාර ඇතුළු සැකකරුවන් 5 දෙනා අද (27) කොටුව මහේස්ත්‍රාත් අධිකරණයට ඉදිරිපත් කළේය.

අධිකරණයට ඉදිරිපත් කිරීමෙන් අනතුරුව ශාන්ත බණ්ඩාරගේ පුත් අනුද ජනාදිත් බණ්ඩාර ඇතුළු සැකකරුවන් 5 දෙනා ඇප මත මුදා හැරීමට කොටුව මහේස්ත්‍රාත් අධිකරණය නියෝග කර ඇත.

සැකකරුවන් ලක්ෂ 5ක ශරීර ඇපයක් මත මුදා හැරීමට නියෝග කළ මහේස්ත්‍රාත්වරයා ඔවුන්ගේ විදේශ ගමන් තහනම් කිරීමට නියෝග කළේය.

ලංකා ඛනිජ තෙල් නීතිගත සංස්ථාව ලෝක වෙළදපොලේ තෙල් මිල ගණන් සම්බන්ධව නිරන්තරයෙන් නිරීක්ෂණය කරමින් සිටින බව ලංකා ඛනිජ තෙල් නීතිගත සංස්ථාව සඳහන් කරයි.

ලෝක වෙළඳපොළේ ඉන්ධන මිලේ පවතින උච්චාවචනයන් හමුවේ, ලබන අගෝස්තු මාසයේදී ඉන්ධන මිල සංශෝධනය කරනවාද.? නැද්ද.? යන්න පිළිබඳව මෙතෙක් අවසන් තීරණයක් ගෙන නොමැති බව ලංකා ඛනිජ තෙල් නීතිගත සංස්ථාව සඳහන් කරයි.

ඒ අනුව ඉදිරි දින කිහිපයේදී ලෝක වෙළදපොලේ පවතින ඉන්ධන මිල ගණන් පරීක්ෂා කිරීමෙන් අනතුරුව මෙරට ඉන්ධන මිල ගණන් සම්බන්ධයෙන් තීරණයක් ගන්නා බව, සංස්ථාවේ කළමණාකාර අධ්‍යක්ෂක මයුර නෙත්තිකුමාරගේ සඳහන් කරයි.

මෙරට ඉන්ධන මිල නියම කිරීමේ කාලසීමාව අවසන් වීමට තවත් දින කිහිපයක් ඉතිරිව ඇති බැවින්, ඉන්ධන මිල ඉහළ යන්නේද, නැද්ද යන්න පිළිබඳව මේ මොහොතේ නිශ්චිතව ප්‍රකාශ කළ නොහැකි බවද කළමණාකාර අධ්‍යක්ෂක මයුර නෙත්තිකුමාරගේ සඳහන් කරයි.

මැදපෙරදිග යුද ගැටුම් පැවතියද මෙරටට ඉන්ධන රැගෙන ඒමට කිසිදු බාධාවක් නොමැති බවත් මේ වනවිට ප්‍රමාණවත් ඉන්ධන තොග සංචිත රට තුළ පවතින බවද කළමණාකාර අධ්‍යක්ෂක මයුර නෙත්තිකුමාරගේ සඳහන් කරයි.

මේ අතර කළමණාකාර අධ්‍යක්ෂක මයුර නෙත්තිකුමාරගේ පසුගියදා සඳහන් කළේ, මෙම මස අවසානයේ සිදු කිරීමට නියමිත ඉන්ධන මිල සංශෝධනයේදී විශාල වෙනසක් සිදු නොවනු ඇති බවයි.

මෙරටට ඉන්ධන රැගෙන ඒමේදී විශාල ලෙස බලපෑමක් සිදු නොවන අතර ඉන්ධන මිල සංශෝධනය පිළිබඳ තීරණය මාසික මිල නියම කිරීමේ කාලසීමාව තුළ පවතින ජාත්‍යන්තර තෙල් මිල ගණන් මත පදනම්ව සිදු කිරීමට නියමිතව ඇත.

මේ අතර පසුගිය දිනවල ලෝක වෙළදපොලේ බොරතෙල් බැරලයක මිල ඩොලර් 100ක් දක්වා ඉහළ ගියද, මේ වනවිට නැවතත් පහළ යමින් පවතියි.

මේ දිනවල මැදපෙරදිග පවතින යුද ගැටුම් අතරතුර ලෝක වෙළෙඳපොළේ බොරතෙල් මිල ගණන්වල සුළු වෙනසක් සිදුව ඇත.

ඒ අනුව අද (27) දින ලෝක වෙළෙඳපොළේ බොරතෙල් මිල ගණන් 5%කින් පමණ පහළ ගොස් ඇත.

ඒ අනුව BRENT බොරතෙල් බැරලයක මිල අමෙරිකානු ඩොලර් 93.08 දක්වා පහළ ගොස් ඇත.

WTI බොරතෙල් බැරලයක මිල අමෙරිකානු ඩොලර් 85.60 දක්වා පහළ ගොස් ඇත.

MURBAN බොරතෙල් බැරලයක මිල ඩොලර් 97.05 දක්වා පහළ ගොස් ඇත.