Local news

ලබන 2029 වසරේදී වෙනත් ආණ්ඩුවක් බලයට ආවොත් අධිකරණ අමාත්‍යවරයාට අවුරුදු 25කට සිරදඬුවම් නියම කරන බව පාර්ලිමේන්තු මන්ත්‍රී අර්ච්චුනා රාමනාදන් සඳහන් කරයි.

අධිකරණ අමාත්‍යවරයාට එරෙහි විශ්වාසභංග යෝජනාව පිළිබඳ පාර්ලිමේන්තු විවාදය අතරතුර අදහස් දක්වමින් මන්ත්‍රීවරයා සඳහන් කළේ,

“මම පාර්ලිමෙන්තුවේ උදේ 9.00 ඉදන් ඉන්නවා. මේ දැන් වරෙන්තුවක් නිකුත් කරලා තියෙනවා. මම බොහොම කණගාටුවෙන් කියනවා. කරුණාකරලා ඇමති ඉල්ලා අස්වෙලා යන්න.

මම කියනවා දැන්මම මෙයාව ඉවත් කරලා, නඩුවක් දාලා, ඇරෙස්ට් කරලා හිරේ දාලා, බොරුවට චෝදනාවක් දාලා, නඩුව ඉවර කරන්න කියලා.

නැත්තම් 2029 දී අවුරුදු 25කට මම මෙයාව ඇතුලට දානවා. තව අණ්ඩුවක් ආවොත් 2029 දී මෙයාව අවුරුදු 20 – 25කට හිරේ දානව මිනීමරුම් 30කට. අනිවාර්යෙන් 2029යේ දානවා.

මෙයාලට හොදට පුරුදුයිනේ බොරුවට නඩු දාලා. ඒ නිසා බොරු නඩුවක් දාලා, බොරුවට ඇතුළට ගිහිල්ලා, සාක්කි දීලා එයටම ඒවා ඉවර කරගෙන එන්න කියලා. නැත්නම් 2029 මම දන්නෑ කෙහෙද දුවන්න වෙන්නේ කියලා.”

මේ අතර පාර්ලිමේන්තු මන්ත්‍රී අර්ච්චුනා රාමනාදන්ට වරෙන්තු නිකුත් කිරීමට කොටුව මහේස්ත්‍රාත් අධිකරණය ඊයේ (24) දින පියවර ගත්තේය.

කොටුව පොලිස් නිලධාරීන්ගේ රාජකාරියට බාධා කිරීමේ සිද්ධියකට අදාළව නඩුවකට අදාළව පෙනී නොසිටීම හේතුවෙන් මන්ත්‍රී අර්ච්චුනා රාමනාදන්ට වරෙන්තු නිකුත් කර ඇත.

ඉ-ජනගහන ලේඛන වැඩසටහන යටතේ ඩිජිටල් මරණ සහතික නිකුත් කිරීමේ කටයුතු ආරම්භ කර ඇතැයි රෙජිස්ට්‍රාර් ජනරාල් දෙපාර්තමේන්තුව සඳහන් කරයි.

ඒ අනුව මීට පෙර භාවිත වූ අතින් ලියන ලද මරණ සහතිකය වෙනුවට පරිගණක දත්ත පද්ධතියක් මඟින් මෙම ඩිජිටල් මරණ සහතික නිකුත් කෙරේ.

ඩිජිටල් පද්ධතියක් මගින් මරණ සහතික නිකුත් කිරීම හරහා යාවත්කාලීන කරන ලද පුද්ගල දත්ත පද්ධතියක් පවත්වා ගැනීමටත්, විවිධ ආයතන අතර කාර්යක්ෂමව දත්ත හුවමාරු කිරීමටත් හැකියාව ලැබෙන බව සඳහන් කරයි.

ආරක්ෂිතව දත්ත ගබඩා කිරීම මඟින් තොරතුරු වල සුරක්ෂිතතාවද තහවුරු වන අතර මෙම සහතික මුද්‍රණය කරනු ලබන්නේ ආරක්ෂිත උපාංග ඇතුළත් කරන ලද විශේෂිත කඩදාසියක වේ.

නිකුත් කරනු ලබන සෑම මරණ සහතිකයකම සත්‍යතාව පද්ධතිය හරහා ක්ෂණිකව පරීක්ෂා කරගත හැකි පරිදි විශේෂ QR කේතයක් අඩංගු කර ඇත.

ඉන්දිය තරුණයන්ගේ අරගලය හේතුවෙන් අධ්‍යාපන අමාත්‍ය ධර්මේන්ද්‍ර ප්‍රධාන් සිය ධුරයෙන් ඉල්ලා අස්වන බවට ලිපියක් අග්‍රාමාත්‍ය නරේන්ද්‍ර මෝදි වෙත යොමු කර ඇත

අමාත්‍යවරයා සිය නිල X ගිණුම ඔස්සේ මේ බව ප්‍රසිද්ධියට පත් කර ඇත.

“කොක්‍රෝච් ජනතා පක්ෂය” සහ ඉන්දීය මධ්‍යම රජය අතර පැවැත්වීමට නියමිතව තිබූ තෙවන වටයේ සාකච්ඡාවලට පැය කිහිපයකට පෙර ඉන්දීය අමාත්‍යවරයා මෙම තීරණය ගෙන ඇත. 

අධ්‍යාපන අමාත්‍යවරයා මෙලෙස සිය ධුරයෙන් ඉවත් වීමට තීරණය කරන්නේ මසකට ආසන්න කාලයක් පැවති එරට තරුණ විරෝධතා වලින් අනතුරුවයි.

තරුණ ප්‍රජාව නියෝජනය කරන කැරපොත්තා ජනතා පක්ෂය සිය විරෝධතා ආරම්භ කිරීමේ ප්‍රධානතම සටන් පාඨයක් වන්නේ අධ්‍යාපන අමාත්‍යවරයාගේ ඉල්ලා අස්වීමයි.

නඩු කටයුතු අවසන් කළ කිලෝග්‍රෑම් 100කට ආසන්න මත්ද්‍රව්‍ය තොගයක් විනාශ කිරීම සඳහා අද (25) දින පුත්තලම වනාතවිල්ලුව ලැක්ටොවත්ත ප්‍රදේශයේ ස්ථාපිත කර තිබෙන දහන උදුන වෙත රැගෙන ගියේය.

පොලිස් මත්ද්‍රව්‍ය කාර්යංශය විසින් අත්අඩංගුවට ගෙන මාරවිල ගරු මහේස්ත්‍රාත් අධිකරණයේ නඩු කටයුතු අවසන් කළ හෙරොයින් කිලෝග්‍රෑම් 99 ග්‍රෑම් 478ක් සහ නොයෙක් ප්‍රදේශවල ගරු අධිකරණ මගින් විභාග කළ නඩු කටයුතු 208ක් අවසන්ව එම නඩු කටයුතු වලට අදාලව රස පරීක්ෂක දෙපාර්තමේන්තුව භාරයේ තිබූ මත්‍ද්‍රව්‍ය ප්‍රමාණයක් දවා විනාශකිරීම සඳහා අද (25) වන දින උදෑසන පුත්තලම වනාතවිල්ලුව ලැක්ටොවත්ත ප්‍රදේශයේ ස්ථාපිත කර තිබෙන දහන උදුන වෙත රැගෙන යන ලදී.

මෙම ක්‍රියාවලිය රාජ්‍ය නිලධාරීනගේ අධීක්ෂණය යටතේ සහ පොලිස් විශේෂ කාර්ය බලකායේ දැඩි ආරක්ෂාව යටතේ සිදු කළේය.

මහවලතැන්න, කජුවත්ත ප්‍රදේශයේ ගල්වලක තිබී 17 හැවිරිදි දැරියකගේ මළසිරුරක් හමු වී ඇත.

මෙය මනුෂ්‍ය ඝාතනයක්ද, සියදිවි නසා ගැනීමක්ද, දියේ ගිලී මියයාමක්ද යන්න සම්බන්ධව මෙතෙක් තොරතුරු අනාවරණය වී නොමැති බව පොලීසිය සඳහන් කරයි.

මෙම දැරිය පසුගිය (23) වනදා සිට නිවසින් අතුරුදන්ව සිට ඇති අතර ඇයගේ පියා විසින් ඒ සම්බන්ධයෙන් බලංගොඩ පොලීසිය වෙත පැමිණිල්ලක් සිදුකර ඇත.

මේ සම්බන්ධයෙන් පශ්චාත් මරණ පරීක්ෂණය අද (25) බලංගොඩ රෝහලේදී පැවැත්වීමට නියමිත අතර බලංගොඩ පොලිසිය සිද්ධිය සම්බන්ධයෙන් වැඩිදුර විමර්ශන සිදු කරයි.

රටපුරා ඇති ජනපති මන්දිරවල පසුගිය 2025 වසරේදි ජනාධිපතිවරයා නවාතැන් නොගත්තද ඉන් බොහෝමයක විවිධ පුද්ගලයන් 3,089 දෙනෙකු නවාතැන් ගෙන ඇති බව ජාතික විගණන කාර්යාලය සඳහන් කරයි.

ජාතික විගණන කාර්යාලය නිකුත් කළ නවතම වාර්තාවක මේ බව සඳහන් කර ඇත.

අදාළ කාලයේදී පවත්වා ඇති රැස්වීම් සංඛ්‍යාව තුනක් බවත් ජනාධිපති මන්දිර හතේ විදුලිය, දුරකතන ඇතුළු අනෙකුත් පහසුකම් සඳහා එම වර්ෂයේදී වැය කර ඇති මුදල රුපියල් 32,982,675ක් බව සඳහන් කරයි.

කතරගම, මහියංගනය හා බෙන්තොට මන්දිරවල 2025 වර්ෂය තුළදී කිසිදු රැස්වීමක් හෝ නවාතැන් ගැනීමක් සිදු කර නොමැති බව අදාළ වාර්තාවේ සඳහන් වේ.

එහෙත් 2025 වසරේදී දුරකථන, විදුලිය ඇතුළු අනෙකුත් වියදම් සඳහා රුපියල් 2,447,754ක් දරා ඇති බවද අදාළ වාර්තාවේ සඳහන් වේ.

කොළඹ, මහනුවර, අනුරාධපුර, කතරගම, මහියංගනය, නුවරඑළිය සහ බෙන්තොට යන ප්‍රදේශවල ජනාධිපතිවරයා වෙනුවෙන් වෙන් කෙරුණු මන්දිර හතක් පිහිටා ඇත.

‍අද (25) දින මාතර – තිස්ස ප්‍රධාන මාර්ගයේ වීරවිල ප්‍රදේශයේදී බස් රථයක් යතුරුපැදියක ගැටීමෙන් සිදුවූ අනතුරකින් පුද්ගලයින් 19 දෙනෙකු තුවාල ලබා රෝහල්ගත කර ඇත.

අනතුරින් තුවාල ලැබු පිරිමි පුද්ගලයින් 11 දෙනෙකු සහ කාන්තාවන් 8 දෙනෙකු දෙබරවැව රෝහලට ඇතුළත් කළ බව පොලීසිය සඳහන් කරයි.

අනතුරුව බරපතළ තත්ත්වයේ පසු වූ සිව්දෙනෙකු වැඩිදුර ප්‍රතිකාර සඳහා හම්බන්තොට රෝහලට මාරුකර යවා ඇත.

තිස්සමහාරාම සිට මාතර බලා ධාවනය වූ පෞද්ගලික බස් රථයක් යතුරු පැදියක ගැටී පසුව මාර්ගයෙන් ඉවතට පැන අසල තිබූ ගසක ගැටීමෙන් මෙම අනතුර සිදුව ඇත.