අධිකරණයට අපහාස කිරීමේ චෝදනා මත සිරදඬුවම් නියම වී සිටි බොදුබල සේනා සංවිධානයේ ලේකම්, පූජ්ය ගලගොඩඅත්තේ ඥානසාර හිමිට හිටපු ජනාධිපති මෛත්රීපාල සිරිසේන විසින් ප්රදානය කළ ජනාධිපති පොදුසමාව බලරහිත බව ශ්රේෂ්ඨාධිකරණය තීන්දු කළේය.
ඒ අනුව බොදුබල සේනා සංවිධානයේ ලේකම්, පූජ්ය ගලගොඩඅත්තේ ඥානසාර හිමිට ලබාදී තිබු ජනාධිපති සමාව ශ්රේෂ්ඨාධිකරණය විසින් අවලංගු කර ඇති හෙයින් ඥානසාර හිමිට එම සිරදඬුවමේ ඉතිරි කාලය ගෙවීමට සිදුවනු ඇති බව මහාචාර්ය නීතීඥ ප්රතිභා මහානාමහේවා සඳහන් කරයි.
අතුරුදන් මාධ්යවේදී ප්රගීත් එක්නැලිගොඩගේ බිරිඳවන සන්ධ්යා එක්නැලිගොඩ ඇතුළු පිරිසක් විසින් ගොනුකළ මූලික අයිතිවාසිකම් පෙත්සම් විභාග කිරීමෙන් අනතුරුව ශ්රේෂ්ඨාධිකරණය විසින් මෙම තීන්දුව ලබාදී ඇත.
අධිකරණයට අපහාස කිරීමේ චෝදනාවට වරදකරු කෙරුණු ඥානසාර හිමිට 2018 වසරේ අභියාචනාධිකරණය විසින් වසර හයක සිරදඬුවම් නියම කර තිබුණද, එම දඬුවමින් ඥානසාර හිමි නිදහස් කරමින් එවක ජනාධිපති මෛත්රීපාල සිරිසේන විසින් පොදු සමාවක් ප්රදානය කළේය.
අධිකරණයට අපහාස කළ බවට එල්ල වූ චෝදනා හතරකට 2018 අගෝස්තු (08) වනදා වරදකරු කෙරුණු ගලගොඩඅත්තේ ඥානසාර හිමිට වසර 19ක සිරදඬුවමක් නියම කළ අභියාචනාධිකරණය එකී දඬුවම වසර 6කින් ගෙවී යන සේ දඬුවම් නියම කෙරිණි.