සැකකටයුතු ලෙස වත්කම් උපයාගැනීම සම්බන්ධයෙන් අපරාධ පරීක්ෂණ දෙපාර්තමේන්තුවේ නීති විරෝධී වත්කම් විමර්ශන අංශය සිදුකරන විමර්ශනයකට අදාළව තමන්ව අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා නිරූපණ ශිල්පිනී පියුමි හංසමාලි විසින් ඉදිරිපත් කර තිබූ රිට් පෙත්සම අභියාචනාධිකරණය හමුවේ (24) ඉල්ලා අස්කරගෙන ඇත.
මෙම පෙත්සම මායාදුන්නේ කොරයා සහ ලක්මාලී කරුණානායක යන අභියාචනාධිකරණ විනිසුරු මඩුල්ල හමුවේ කැඳවනු ලැබුවේය.
නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ශනිල් කුලරත්න අධිකරණය හමුවේ කරුණු දක්වමින් කියා සිටියේ, ඇයගේ වත්කම් සම්බන්ධයෙන් අපරාධ පරීක්ෂණ දෙපාර්තමේන්තුව පුළුල් විමර්ශනයක් සිදු කරමින් සිටින බවත්, එම පරීක්ෂණ කටයුතු අවසන් කිරීම සඳහා නිශ්චිත කාලසීමාවක් ප්රකාශ කළ නොහැකි බවයි.
එම විමර්ශන සම්පූර්ණ කිරීම සඳහා අපරාධ පරීක්ෂණ දෙපාර්තමේන්තුවට තවදුරටත් ප්රමාණවත් කාලයක් අවශ්ය වන බවද නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ශනිල් කුලරත්න සඳහන් කළේය.
එහිදී, පියුමි හංසමාලි වෙනුවෙන් පෙනී සිටි ජනාධිපති නීතිඥ රොනල්ඩ් පෙරේරා අධිකරණයට කරුණු දක්වමින් සඳහන් කළේ, සිය සේවාදායිකාව මෙතෙක් අත්අඩංගුවට ගෙන නොමැති බැවින් මෙම පෙත්සම ඉල්ලා අස්කර ගැනීමට අවසර ලබාදෙන ලෙස ඉල්ලා සිටියේය.
අනතුරුව ඉදිරිපත් වූ කරුණු සලකා බැලූ අභියාචනාධිකරණ විනිසුරු මඩුල්ල අදාළ රිට් පෙත්සම ඉල්ලා අස්කර ගැනීමට පෙත්සම්කාර පාර්ශ්වයට අවසර දුන්නේය.