බෙංගාල බොක්ක මුහුදු ප්‍රදේශයේ පවතින “ඔර්නබ්” නමැති සුළි කුණාටුව අද (27) දිනයේ චන්ඩ සුළි කුණාටුවක් දක්වා වර්ධනය වන බව ජාත්‍යන්තර කාලගුණ දත්ත පෙන්වා දෙයි.
ඒ හේතුවෙන් දිවයින වටා වන මුහුදු ප්‍රදේශ සහ බෙංගාල බොක්ක මුහුදු ප්‍රදේශය සඳහා කාලගුණ විද්‍යා දෙපාර්තමේන්තුවේ ස්වභාවික විපත් පිළිබඳ පූර්ව අනතුරු ඇඟවීමේ මධ්‍යස්ථානය විසින් රතු නිවේදනයක් නිකුත් කර ඇත.
එම චණ්ඩ සුළි කුණාටුව අද (27) දින ඉතාම චණ්ඩ සුළි කුණාටුවක් බවට පත්වී, හෙට (28) දිනයේ පෙ.ව. 11.30 පමණ වනවිට අන්ද්‍රා ප්‍රදේශය හරහා ඉන්දියානු වෙරළ තීරයට ඇතුල් වනු ඇතැයි අපේක්ෂා කරයි.
මෙම සුළි කුණාටුවේ සෘජු බලපෑමක් ශ්‍රී ලංකාවට නොමැති වුවද එහි වක්‍ර බලපෑමෙන් දිවයිනේ නිරිති දිග කොටසට තද වැසි සහ තද සුළං අපේක්ෂා කරන බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අජිත් විජයමාන්න සඳහන් කරයි.
ඒ අනුව උතුරු, බස්නාහිර, සබරගමුව, දකුණු, වයඹ, මධ්‍යම සහ උතුරුමැද පළාත්වල සහ ත්‍රිකුණාමලය දිස්ත්‍රික්කයේ ඇතැම් ස්ථාන වලට මි.මී. 100 ට වැඩි තද වැසි ඇති විය හැකි බවද අධ්‍යක්ෂ ජනරාල් අජිත් විජයමාන්න සඳහන් කරයි.
