By unusuma.lk on (LK time)
ජාතික ගමනාගමන කොමිෂන් සභාවේ සභාපති ශෂී වෙල්ගම මහතා පැවසුවේ අවස්ථා දෙකකදී ඩීසල් මිල අඩු කළද සමස්ත අඩුවීම් ප්‍රතිශතය අඩුවීම 2.8%ක් පමණක් බවයි.
ජාතික ගමනාගමන කොමිෂන් සභාවේ ස්ථාවරය අනුව, බස් ගාස්තු අඩු කිරීමක් ක්‍රියාත්මක කිරීමට පෙර අවම වශයෙන් 4% ක අඩුවීමක් අවශ්‍ය බව සභාපති වරයා පැවසීය.
එමනිසා ඩීසල් මිල අඩු කළ ද බස් ගාස්තු අඩු නොකරන බව ගමනාගමන කොමිෂන් සභාව නිවේදනය කර සිටී.
එමෙන්ම වාර්ෂික බස් ගාස්තු සංශෝධනයක් මේ මාසය තුළ සිදු කිරීමට නියමිත බවත් එම සංශෝධනය ඩීසල් මිල පහත වැටීම කෙරෙහි පමණක් අවධානය යොමු නොකරනු ඇති බවත් ඒ වෙනුවට, ඩීසල් මිල අඩුවීමත් සමඟ බස් රථ අමතර කොටස්වල මිල අඩු කිරීම ඇතුළු කරුණු දොළහක් සැලකිල්ලට ගනු ලබන බවත් සභාපතිවරයා වැඩිදුරටත් පැවසීය.
මේ අතර, සමස්ත ලංකා පෞද්ගලික බස් හිමියන්ගේ සංගමයද පැවසුවේ මේ අවස්ථාවේදී බස් ගාස්තු අඩු කිරීමක් සිදු නොවන බවයි.
එමෙන්ම, ඉන්ධන මිල අඩු වුවද වාහන අමතර කොටස් මිල අධික වීම හේතුවෙන් පාසල් ප්‍රවාහන ගාස්තු අඩු කළ නොහැකි බව සභාපති මල්සිරි ද සිල්වා ප්‍රමුඛ සමස්ත ලංකා පාසල් ප්‍රවාහන වෑන් රථ හිමියන්ගේ සංගමය ප්‍රකාශ කරයි.
කෙසේවෙතත් ඊයේ මධ්‍යම රාත්‍රියේ සිට ක්‍රියාත්මක වන පරිදි ලංකා ඛනිජ තෙල් නීතිගත සංස්ථාව ඛනිජ තෙල් නිෂ්පාදන කිහිපයක මිල අඩු කළ අතර ඔක්ටේන් 92 පෙට්‍රල් රුපියල් 13/-, ලංකා ඔටෝ ඩීසල් රුපියල් 16/- සහභූමිතෙල් රු. 13/- ලෙස මිල ගනන් පහත හෙලා ඇත.
