රජරට මහා වාරි පද්ධතියට එකතු වීමට නියමිත තවත් සුවිශේෂී ජලාශ ව්‍යාපෘතියක් වන පහළ මල්වතුඔය බහුකාර්ය සංවර්ධන ව්‍යාපෘතියේ කටයුතු සොයා බැලීමට ජනාධිපති අනුර කුමාර දිසානායක අද (29) එහි නිරීක්ෂණ චාරිකාවක නිරත විය.
මීට වසර 10කට පෙර ආරම්භ කළ මෙම ව්‍යාපෘතියේ කටයුතු විවිධ හේතුන් මත අතරමග නැවතී තිබු අතර, වත්මන් රජය යටතේ ව්‍යාපෘතිය යළි ආරම්භ කරමින් 2026 වර්ෂය සඳහා රුපියල් මිලියන 5000ක ප්‍රතිපාදන වෙන් කෙරිණි.
මතුව ඇති ගැටලු නිරාකරණය කර ගනිමින් එහි ඉදිකිරීම් කඩිනම් කර තිබීම විශේෂත්වයක් වන අතර සම්පූර්ණයෙන් දේශීය අරමුදල් මත ක්‍රියාත්මක ව්‍යාපෘතිය 2029 වසරේ අගභාගයේදී අවසන් කිරීමට නියමිතය.
උතුරු මැද පළාතේ අනුරාධපුර දිස්ත්‍රික්කය සහ උතුරු පළාතේ වවුනියාව දිස්ත්‍රික්කය යා කරමින් තන්තිරිමලේ බෝගොඩදී මල්වතුඔය හරස් කර, ඉදිකෙරෙන පහළ මල්වතුඔය ජලාශය අක්කර අඩි 169,400ක ජල ධාරිතාවකින් සමන්විත අතර මෙය ඉදිකිරීමෙන් පසු උතුරු මැද පළාතේ විශාලතම ජලාශය බවට පත් වේ.
අනුරාධපුර, වවුනියාව, මන්නාරම යන දිස්ත්‍රික්කවල ජනතාවගේ පානීය ජල ගැටලුවට ස්ථීර විසඳුමක් ලබා දීම, මල්වතුඔය පහළ නිම්නයේ ග්‍රාමීය සංවර්ධනය හා කෘෂිකර්මාන්තයට අවශ්‍ය ජලය සැපයීම, තන්තිරිමලේ ප්‍රදේශයේ නව සංවර්ධන ප්‍රදේශයක් බිහි කිරීම, ජල විදුලි උත්පාදනය, ගංවතුර පාලනය සහ සංචාරක කර්මාන්තයේ හා මිරිදිය මත්ස්‍ය කර්මාන්තයේ ප්‍රවර්ධනය මෙමගින් අපේක්ෂා කෙරේ.
එසේම, මන්නාරම දිස්ත්‍රික්කයේ යෝධ වැව සහ අකිතමුරුප්පු වැව යටතේ පවතින සහල් නැළිය ප්‍රදේශයේ මහ කන්නයේදී අක්කර 40,000ක් වගා කෙරුණද, යල කන්නයේදී ජල හිඟය නිසා ඉන් අක්කර 10,000ක් පමණක් වගා කෙරෙන අතර මෙම ජලාශය ඉදිවීමත් සමග යල මහ දෙකන්නයේම කුඹුරු අක්කර 40,000ම අස්වැද්දීමට හැකියාව ලැබේ.
මෙහිදී ව්‍යාපෘති නිලධාරීන් සමග සාකච්ඡාවක නිරතවූ ජනාධිපතිවරයා ව්‍යාපෘතිය ක්‍රියාත්මක කිරීමේදී මතුව ඇති ගැටලු, අභියෝග සහ අවශ්‍යතා පිළිබඳ සොයා බැලූ අතර, අදාළ ඉදිකිරීම් කඩිනම් කර ජනතාවට ප්‍රතිලාභ සලසා දීමේ අවශ්‍යතාවද පෙන්වා දුන්නේය.
ව්‍යාපෘතිය හේතුවෙන් අවතැන් වන ජනතාවගේ ගැටලු පිළිබඳවද ජනාධිපතිවරයාගේ විශේෂ අවධානය යොමු කෙරුණු අතර එම පවුල් 315 සඳහා ඉඩමක් සහ විදුලිය, පානීය ජල සැපයුම් සහිත නිවසක් රජයෙන් ලබා දීමටත්, එම ඉඩම්වල සූර්‍ය විදුලි බලයෙන් ක්‍රියාත්මක උස්සාන වාරිමාර්ග මගින් සුහුරු කෘෂිකාර්මික වගාවන් සඳහා යොමු කිරීමටත් උපදෙස් දුන්නේය.
ව්‍යාපෘතියේ මෙතෙක් ප්‍රගතියද ජනාධිපතිවරයා මෙහිදී විමසා බැලූ අතර කිලෝමීටර් 3.4ක දිගින් යුත් ජලාශයේ ප්‍රධාන බැම්මේ ඉදිකිරීම් මේ වන විට 60%ක් පමණ අවසන් කර තිබෙන බවත්, දකුණු ඉවුරු සොරොව්වේ ව්‍යූහාත්මක කොටස් නිමකර ඇති බවත් සඳහන් කෙරිණි.
ව්‍යාපෘතිය යටතේ විදුලි බලාගාරයක් ද ඉදිකෙරෙන අතර ඒ සඳහා අත්තිවාරම කැපීම හා කළු ගල පිපිරවීම වැනි කාර්යයන් ආරම්භ කර තිබෙන බවද අනාවරණය විය. මිට අමතරව අලි වැට ඉදිකිරීම, කුඩා වැව් ප්‍රතිසංස්කරණය, පුරාවිද්‍යා කෞතුකාගාරයක් ඉදිකිරීම ආදී කටයුතුද සිදු කෙරේ.
ඓතිහාසික තන්තිරිමලය රාජමහා විහාරාධිපති, උතුරු නැගෙනහිර දෙපළාතේ උප ප්‍රධාන සංඝනායක පූජ්‍ය තන්තිරිමලේ චන්දරතන නාහිමිපාණන් වහන්සේද මෙම අවස්ථාවට වැඩම කර සිටියේය.
මෙතෙක් කිසිදු රාජ්‍ය නායකයෙක් මෙතරම් සමීපව මෙම ව්‍යාපෘතිය පිළිබඳ අවධානය යොමු නොකළ බවත්, වත්මන් ජනාධිපතිවරයා ආරම්භයේ සිටම එහි කටයුතු සොයා බලමින් සහ අවශ්‍ය මගපෙන්වීම සිදු කරමින් ව්‍යාපෘතිය සාර්ථක කර ගැනීමට ලබා දෙන දායකත්වය අගය කරන බවත් සඳහන් කළ උන්වහන්සේ, සියලු ඉදිරි කටයුතු වෙනුවෙන් සිය ආශිර්වාදය පළ කළහ.
