ශ්රී ලංකාවේ සංවර්ධන ක්රියාවලියට ආසියානු සංවර්ධන බැංකුවේ අඛණ්ඩ සහාය ලබා දෙන බවත්, වසර ගණනාවක් තිස්සේ ගොඩනඟා ගත් ශක්තිමත් හවුල්කාරිත්වය මත පදනම්ව ශ්රී ලංකාව සමඟ පවතින සබඳතා තවදුරටත් පුළුල් කර ගැනීමට අපේක්ෂා කරන බවත් ආසියානු සංවර්ධන බැංකුවේ (ADB) නව දේශීය අධ්යක්ෂ Shannon Cowlin සඳහන් කළාය.
ශ්රී ලංකාව සඳහා අලුතින් පත් වූ ආසියානු සංවර්ධන බැංකුවේ දේශීය අධ්යක්ෂවරිය වන Shannon Cowlin අද (12) පස්වරුවේ ජනාධිපති කාර්යාලයේදී ජනාධිපති අනුර කුමාර දිසානායක හමු වූවාය.
නව අධ්යක්ෂවරිය නිල වශයෙන් ජනාධිපතිවරයාට හඳුන්වා දීම ආසියානු සංවර්ධන බැංකුවේ කලාපීය අධ්යක්ෂවරයා විසින් සිදු කෙරිණි.
ආසියානු සංවර්ධන බැංකු ආධාර යටතේ මෙරට ක්රියාත්මක වැඩසටහන් ශ්රී ලංකාව විසින් ක්රියාත්මක කරනු ලැබ ඇති ආකාරය සහ ආයතනික සම්බන්ධීකරණ ක්රියාවලියේ පවතින ඵලදායිතාව පිළිබඳව නියෝජිත පිරිස මෙහිදී සතුට පළ කළහ.
දිට්වා සුළි කුණාටුවෙන් සිදු වූ ව්යසනය පිළිබඳවද මෙම සාකච්ඡාවේදී ප්රමුඛ අවධානයක් යොමු වූ අතර යථා තත්ත්වයට පත්කිරීමේ වැඩපිළිවෙළ සහ ප්රතිසංස්කරණ කටයුතු වේගවත් කිරීම වෙනුවෙන් රජය ආරම්භ කර තිබෙන වැඩපිළිවෙළ පිළිබඳවද සාකච්ඡා කෙරිණි.
වත්මන් රජය යටතේ ළඟා කර ගත් ආර්ථික ප්රගතිය විශේෂයෙන් අවදානමට ලක්විය හැකි ප්රදේශවල සිටින ජනතාව වෙත දැනෙනසුලු ලෙස ගලායාමට සැලැස්වීම රජයේ අරමුණ බව ජනාධිපති අනුර කුමාර දිසානායක මෙහිදී සඳහන් කළේය.
මධ්යම කඳුකරය සහ කඳුකර ප්රදේශ ආශ්රිතව පවතින දිගුකාලීන පාරිසරික බලපෑම්ද පැහැදිලි කරමින්, එම පරිසර පද්ධති යථා තත්ත්වයට පත් කිරීම, ජල මූලාශ්ර ආරක්ෂා කිරීම සහ බලපෑමට ලක් වූ ප්රජාව සඳහා ස්ථිර ජීවනෝපාය මාර්ග සකස් කර දීම සඳහා වන කඩිනම් අවශ්යතාව ජනාධිපතිවරයා අවධාරණය කළේය.
මේ තත්ත්ව වලට මුහුණ දීම සඳහා දිගුකාලීන වැඩපිළිවෙළක අවශ්යතාව පෙන්වා දුන් ජනාධිපතිවරයා, එම අභියෝගවලට මුහුණ දීම සඳහා ආසියානු සංවර්ධන බැංකුව ලබා දෙන සහාය කෘතවේදීව පිළිගන්නා බවද පැවසීය.
මෙහිදී ආසියානු සංවර්ධන බැංකුව විසින් 2026 වසරේ සිට මෙරට සිදු කරනු ලැබීමට සැලසුම් කර ඇති ආයෝජන, ලබා දීමට අපේක්ෂිත අයවැය සහාය සහ 2026 මැදභාගයේදී සිදු කිරීමට නියමිත ආසියානු සංවර්ධන බැංකුවේ සභාපතිවරයාගේ ශ්රී ලංකා සංචාරය ඇතුළු ඉදිරි සැලසුම් සමාලෝචනය කෙරුණු අතර, තිරසාර සංවර්ධනය උදෙසා ශ්රී ලංකාවේ සහ ආසියානු සංවර්ධන බැංකුවේ අන්යෝන්ය කැපවීම යළි තහවුරු කෙරිණි.
