අපේක්ෂකයින් 451,463 දෙනෙකු පෙනී සිටිනා 2025 වර්ෂයට අදාළ අධ්යාපන පොදු සහතික පත්ර සාමාන්ය පෙළ විභාගය අදින් (17) ආරම්භ වේ.
විභාග දෙපාර්තමේන්තුව පැවසූවේ දිවයින පුරා විභාග මධ්යස්ථාන 3545ක දී විභාගය පැවැත්වීමට නියමිත අතර විභාග කටයුතු සදහා සම්බන්ධීකරණ මධ්යස්ථාන 531ක් සහ ප්රාදේශීය එක්රැස් කිරීමේ මධ්යස්ථාන 33ක් පිහිටුවා ඇති බවයි.
අධ්යයන පොදු සහතික පත්ර සාමාන්ය පෙළ විභාගය සම්බන්ධයෙන් දැනුම්වත් කිරීමේ මාධ්ය හමුවකට එක්වෙමින් විභාග කොමසාරිස් ජනරාල් ඒ. කේ. එස්. ඉන්දිකා කුමාරි ලියනගේ මහත්මිය සඳහන් කර සිටියේ, ශ්රී ලංකා විභාග දෙපාර්තමේන්තු නිල වෙබ් අඩවියේ සහ නිල ෆේස්බුක් ගිණුමෙහි ඇති කාලසටහන ගැන පමණක් අවධානය යොමුකරන ලෙසය.
ඇය වැඩිදුරටත් පැවසූවේ පසුගිය වසරට වඩා මෙවර සාමාන්ය පෙළ විභාගයේ විෂය පෙළ ගැස්ම පස්වන, හයවන, හත්වන සහ අටවන දිනයන් හි වෙනස් කර ඇති බැවින් නිවැරදි කාලසටහන පමණක් භාවිත කරන ලෙසයි.
අද උදෑසන 8.30ට විභාග ආරම්භ වීමට නියමිත අතර විභාග ආරම්භයට පැයකට පෙර විභාග අපේක්ෂකයින්ට විභාග මධ්යස්ථාන වෙත යා යුතු වේ.
සවස් වරුවේ විභාගය පස්වරු 1.30ට ආරම්භ වීමට නියමිත අතර විභාග අපේක්ෂකයින් දහවල් 12.30 වන විට විභාග මධ්යස්ථාන වෙත වාර්තා කළ යුතු බවද විභාග කොමසාරිස් ජනරාල් ඉන්දිකා කුමාරි මහත්මිය පැවසුවාය.
මේ අතර විභාග මධ්යස්ථානවලට ජංගම දුරකථන, bluetooth, ස්මාට් වොච්, සටහන්, හෝ ලේඛන කිසිවක් රැගෙන යාම තහනම් වන බවද පැවසු ඉන්දිකා කුමාරි මහත්මිය සෑම අපේක්ෂකයෙකුම සිය අනන්යතා පත්රය විභාග අවසන්වන තුරු රැගෙන යා යුතු බවද අවධාරණය කළාය.
ඒ සඳහා පාසල් අපේක්ෂකයින්ට ජාතික හැදුනුම්පත, රියදුරු ගමන්පත්රය හෝ විදෙස් ගමන් බලපත්රය භාවිත කළ හැකි අතර, පෞද්ගලික අපේක්ෂකයින්ට අවශ්ය නම් ජායාරූප දෙකක් ග්රාමනිලධාරීවරයා විසින් ලවා සහතික කරගත් තාවකාලික හැඳුනුම්පතක් භාවිත කළ හැකි බවද විභාග කොමසාරිස් ජනරාල්වරිය දැනුම්දෙයි.
එමෙන්ම සියලු විභාග අපේක්ෂකයින් පිළිතුරු සැපයීමට පළමුව හොඳින් ප්රශ්නපත්රයේ උපදෙස් කියවා සියලු කොටස් තමා වෙත ලැබී ඇත්දැයි බැලිය යුතු බවද සඳහන් කර සිටි විභාග කොමසාරිස් ජනරාල්වරිය කාලය මැනවින් කළමනාකරණය කර නිවැරදිව විභාග අංකය සඳහන් කර විභාගයට පිළිතුරු සපයන ලෙසද අපේක්ෂකයින්ට දැනුම් දුන්නාය.
අත්අකුරු පැහැදිලිව සටහන් කරන ලෙසත් කිසිදු අවස්ථාවක ටිපෙක්ස් භාවිතයට යොමු නොවන ලෙසත් වැරද්දක් සිදුවුවහොත් එය ඉරකින් කපා නැවත පිළිතුරු සපයන ලෙසත් පැවසු ඉන්දිකා කුමාරි මහත්මිය පිළිතුරු පත්රය නිවැරදිව ඇමිණීමට වගබලාගත යුතු බවද සඳහන් කළාය.
සෑම විභාග අපේක්ෂකයෙකුම විභාග කාලය තුළ විභාග ශාලාවෙහි නීතිරීති ආරක්ෂා කළ යුතු බවත්, මුහුණ පැහැදිලිව හඳුනාගත හැකි වන ලෙස විභාග මධ්යස්ථාන වෙත පැමිණිය යුතු බවත් ඉන්දිකා කුමාරි මහත්මිය පැවසීය.
එමෙන්ම කිසිදු අවස්ථාවක වෙනත් විභාග අපේක්ෂකයෙකුට බාධා ඇති වෙන ලෙස හැසිරිය නොහැකි බවත්, එය ඇතැම් විට ප්රතිඵල අත්හිටුවීමට සිදුවන වැරැද්දක් විය හැකි බවද සඳහන් කර සිටි විභාග කොමසාරිස් ජනරාල්වරිය, විවේක කාලයේ දී ද අනෙක් අපේක්ෂකයින්ට බාධා ඇති වෙන ලෙස හැසිරීමෙන් වළකින ලෙස සඳහන් කළාය.
