14 හැවිරිදි බාලවයස්කාර පිරිමි දරුවෙකු පැවිදිවීම සඳහා විහාරස්ථානයට පැමිණීමෙන් අනතුරුව එදින රාත්රියේම එම දරුවා බරපතළ ලෙස ලිංගික අපයෝජනයට ලක් කළ 65 හැවිරිදි භික්ෂුවකට වසර 30ක බරපතළ වැඩ සහිත සිර දඬුවමක් නියම කළේය.
තඹුත්තේගම, හුරිගස්වැව, තලාකොළවැව ශ්රී සම්බුද්ධ වාලුකාරාමාධිපති මුල්ලේරියාවේ විමලතිස්ස නමැති 65 හැවිරිදි හිමි නමකට මෙලෙස වසර 30ක බරපතළ වැඩ සහිත සිර දඬුවමක් නියම කළේය.
අදාළ භික්ෂුවට එරෙහිව මහාධිකරණය හමුවේ අධිචෝදනා 3ක් ගොනු කර තිබූ අතර භික්ෂුව එකී අධිචෝදනා තුනටම වරදකරු බවට තීන්දු කළ ළමා අපරාධ පිළිබඳ අනුරාධපුර විශේෂ මහාධිකරණ විනිසුරු සඳුන් විතාන විත්තිකාර හිමිනමට එම දඬුවම නියම කළේය.
වින්දිත බාලවයස්කාර දරුවාට මුදලින් රුපියල් ලක්ෂ 5ක වන්දියක් ගෙවන ලෙසටත් එම වන්දි මුදල ගෙවීම පැහැර හැරියහොත් විත්තිකාර භික්ෂුවට තවත් මාස 6ක සිර දඩුවමක්ද මහාධිකරණ විනිසුරුවරයා නියම කළේය.
විත්තිකාර හිමිනමට පළමු චෝදනාවට රුපියල් 5000ක්, දෙවන සහ තුන්වන චෝදනාවලට රුපියල් 15,000 බැගින් දඩ ගෙවන ලෙසට නියෝග කළ මහාධිකරණ විනිසුරුවරයා, එම දඩ මුදල ගෙවීම පැහැර හරින්නේ නම් චෝදනා 3ට වෙන් වෙන් වශයෙන් තවත් මාස 4 බැගින් සිර දඬුවම් නියම කළේය.
ඒ අනුව එක් අධිචෝදනාවකට දස වසර බැගින් වෙන් වෙන් වශයෙන් මෙම 30 වසරක සිර දඬුවම නියම කළේය.
එහිදී තම සේවාදායක විත්තිකාර හිමිනම විවිධ අසනීප තත්ත්වයන්ගෙන් පෙළෙන අයෙකු බව මහාධිකරණයට වෛද්ය වාර්තා ඉදිරිපත් කරමින් හිමිනම වෙනුවෙන් පෙනී සිටි නීතීඥවරයා දැක්වූ කරුණු සැලකිල්ලට ගත් මහාධිකරණ විනිසුරුවරයා, විත්තිකරුට නියම කළ බරපතළ වැඩ සහිත 30 වසරක සිර දඬුවම දස වසරකින් එක් වර ගෙවී යා යුතු බවට නියම කළේය.