පාන්වල බර හා මිල නිසියාකාරව ප්‍රදර්ශනය නොකිරීම සහ නියමිත බර නැති පාන් අලෙවි කිරීම සම්බන්ධයෙන් පාරිභෝගික කටයුතු පිළිබඳ අධිකාරිය විසින් දිවයින පුරා විශේෂ වැටලීම් සහ විමර්ශන වැඩසටහනක් ක්‍රියාත්මක කර ඇත.
පසුගිය (29) වන දින ක්‍රියාත්මක කළ මෙම විශේෂ මෙහෙයුමේදී වෙළෙඳසැල් සහ බේකරි 107ක් පරීක්ෂාවට ලක්කර ඇති අතර එහිදී බර අඩු පාන් අලෙවිය සම්බන්ධයෙන් සිද්ධි 35ක්, පාන්වල බර ප්‍රදර්ශනය නොකිරීම සම්බන්ධව ස්ථාන 85ක්, පාන්වල මිල ප්‍රදර්ශනය නොකෙරූ ස්ථාන 55ක් හඳුනාගෙන ඇත.
බර අඩු පාන් හමු වූ අවස්ථාවලදී සිල්ලර වෙළෙඳුන්ට පමණක් නොව, එම පාන් නිෂ්පාදනය කළ බේකරිය දක්වාම විමර්ශන දීර්ඝ කිරීමට නිලධාරීන්ට උපදෙස් ලබාදී ඇති බව පාරිභෝගික කටයුතු අධිකාරිය සඳහන් කරයි.
එහිදී බේකරියේ පාන්වල බර ද පරීක්ෂා කර, වරද තහවුරු වන්නේ නම් නිෂ්පාදන ක්‍රියාවලිය වහා නිවැරදි කිරීමට උපදෙස් ලබාදී ඇති අතර ප්‍රමාණවත් සාක්ෂි ඇති විට මහෙස්ත්‍රාත් අධිකරණ හමුවේ නඩු පැවරීමට කටයුතු කරන බවද සඳහන් කරයි.