Foreign news

අද (03) දින ලෝක වෙළෙඳපොළේ බොරතෙල් මිල ගණන් සුළු අගයකින් ඉහළ ගොස් ඇත.

ඒ අනුව ඊයේ (03) දින BRENT බොරතෙල් බැරලයක මිල අමෙරිකානු ඩොලර් 83.46 දක්වා පහළ ගියද, අද (04) දින බොරතෙල් බැරලයක මිල අමෙරිකානු ඩොලර් 84.92 දක්වා ඉහළ ගොස් ඇත.

WTI බොරතෙල් බැරලයක මිල ඊයේ (03) දින අමෙරිකානු ඩොලර් 79.81ක් දක්වා පහළ ගියද, අද (04) දින බොරතෙල් බැරලයක මිල අමෙරිකානු ඩොලර් 80.93 දක්වා ඉහළ ගොස් ඇත.

MURBAN බොරතෙල් බැරලයක මිල 85.49 දක්වා ඉහළ ගියද, අද (04) දින බොරතෙල් බැරලයක මිල ඩොලර් 81.83 දක්වා පහළ ගොස් ඇත.

අද (03) දින පස්වරුවේ ඉරානය සමඟ සාකච්ඡා ආරම්භ කරන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

හෝමූස් සමුද්‍ර සන්ධිය විවෘත කරගැනීම සහ ඉරානයේ න්‍යෂ්ටික තර්ජනය සම්පූර්ණයෙන්ම අවසන් කිරීම මෙම සාකච්ඡාවල ප්‍රධාන අරමුණ වේ.

තමන් යුද්ධයකට වඩා ගිවිසුමකට කැමැත්තක් දක්වන බවත් ප්‍රහාර හේතුවෙන් සිදුවන විශාල මිනිස් ජීවිත හානි වැළැක්වීම තම අරමුණ බව ජනාධිපති ඩොනල්ඩ් ට්‍රම්ප් සඳහන් කරයි.

සාකච්ඡා සඳහා ඉරාන රජයට බලපෑම් කිරීම සඳහා නැවතත් ප්‍රබල ප්‍රහාර එල්ල කිරීමට තමා බලාපොරොත්තු වන බව අමෙරිකානු ජනාධිපති ට්‍රම්ප් සඳහන් කරයි.

“අපි ඔවුන්ට ඉතා දැඩි ලෙස පහර දෙනවා.. යම් අවස්ථාවකදී ඔවුන් කියාවි අපට මෙය තවදුරටත් දරාගත නොහැකි බව.”

ඒ අනුව අමෙරිකානු ජනාධිපති ඩොනල්ඩ් ට්‍රම්ප් විසින් ඉරානයට එරෙහිව නව ප්‍රහාරයක් දියත් කිරීමට සිය හමුදාව වෙත උපදෙස් ලබාදී ඇති බව විදෙස් මාධ්‍ය වාර්තා කරයි.

අමෙරිකාව විසින් ඉරානයේ විදුලි බලාගාර සහ තෙල් පිරිපහදු වැනි බලශක්ති පහසුකම් ඉලක්ක කර ගනිමින් ප්‍රහාර එල්ල කිරීමට සූදානම් බව වාර්තා වේ.

ලොව මෙතෙක් නිර්මාණය කළ විශාලතම විවෘත මූලාශ්‍ර AI ආකෘතිය ලොව පුරා මහජනතාවට විවෘත කිරීමට චීනයේ Moonshot AI සමාගම පියවර ගෙන ඇත. ‍

චීනයේ නිෂ්පාදිත විවෘත මූලාශ්‍ර මහා පරිමාණ ආකෘතියක් (Open-source large model) වන Kimi K3 පසුගිය (27) වැනිදා සිට පූර්ණ වශයෙන් ලොව පුරා මහජනතාවට විවෘත කිරීමට එම සමාගම පියවර ගෙන ඇත. ‍

එහි සමස්ත පරාමිතීන් ප්‍රමාණය ට්‍රිලියන 2.8ක් වන අතර මෙම ආකෘතියට සම්පූර්ණ ආකෘති බර, තාක්ෂණික වාර්තා මෙන්ම ආකෘති පුහුණුව සඳහා සහාය වන මූලික තාක්ෂණ පහසුකම් තුනක් ඇතුළත් වීම විශේෂත්වයකි. 

චීන මහා පරිමාණ AI ආකෘතියක් ලොවට විවෘත කළ පළමු අවස්ථාව මෙය නොවුන ද, ට්‍රිලියන 2.8ක පරාමිතීන් සහිත විශාල ආකෘතියක් ගෝලීයව පූර්ණ වශයෙන් විවෘත කළ පළමු අවස්ථාව මෙය වේ.

මෙම Kimi K3 ආකෘතිය, චීන Moonshot AI සමාගමේ ප්‍රමුඛතම නිෂ්පාදනය වන අතර ලොව පුරා කෘත්‍රිම බුද්ධි සංවර්ධකයින්ට එය නොමිලේ බාගත කර දේශීයව භාවිත කළ හැකිය.

තමන් නම් කළ “Board of Peace” මණ්ඩලය ගාසා තීරයේ පලස්තීන හමාස් සංවිධානය සහ අනෙකුත් සන්නද්ධ කණ්ඩායම් සම්පූර්ණයෙන් නිරායුධ කිරීම සඳහා එකඟතාවකට පැමිණ ඇති බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

මෙය ඊශ්‍රායල–ගාසා යුද්ධය අවසන් කිරීම සඳහා යෝජනා කර ඇති “Trump 20-Point Plan” ක්‍රියාත්මක කිරීමේ වැදගත් සන්ධිස්ථානයක් බවද අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

Truth Social ගිණුමේ සටහනක් තබමින් අමෙරිකානු ජනාධිපති ඩොනල්ඩ් ට්‍රම්ප් මේ බව සඳහන් කරයි.

“මෙම එකඟතාව ගාසා තීඑයේ නව පලස්තීන රජයක් යටතේ පාලනය වීම සඳහා වැදගත් පියවරක් වන අතර, එම රජය Board of Peace සමඟ සමීපව කටයුතු කරමින් පලස්තීන ජනතාවට සහාය වනු ඇත. ඒ සමඟම ඊශ්‍රායලයට ලැබිය යුතු ආරක්ෂාව ද තහවුරු වනු ඇත.”

මෙම ගිවිසුම අදියර කිහිපයක් යටතේ ක්‍රියාත්මක වන අතර නිරායුධකරණය ඉදිරියට යාමත් සමඟ ඊශ්‍රායල හමුදා ගාසා තීරයෙන් ඉවත් වනු ඇත. 

ඉරානයට එරෙහිව දැවැන්ත සහ ප්‍රබල ප්‍රහාර මාලාවක් දියත් කර ඇති බව අමෙරිකානු හමුදාව නිවේදනය කරයි.

මැදපෙරදිග අමෙරිකානු හමුදාවන් ඉලක්ක කර ගනිමින් ඉරානය විසින් සිදු කරන ලද හදිසි ප්‍රහාර උත්සාහයකට ප්‍රතිචාර වශයෙන් මෙම ප්‍රහාර මාලාව දියත් කර ඇත.

පසුගියදා ජෝර්දානයේ පිහිටි අමෙරිකානු කඳවුරු සහ හෝමූස් සමුද්‍ර සන්ධියේ නාවික යාත්‍රා ඉලක්ක කර ඉරානය විසින් එල්ල කරන ලද ප්‍රහාර වලට එරෙහිව මෙම ප්‍රබල ප්‍රතිචාරය ලබා දුන් බව අමෙරිකානු මධ්‍යම අණදෙන මධ්‍යස්ථානය සඳහන් කරයි.

අද (30) දින ලෝක වෙළෙඳපොළේ බොරතෙල් මිල ගණන් නැවතත් ඉහළ ගොස් ඇත.

ඒ අනුව BRENT බොරතෙල් බැරලයක මිල අමෙරිකානු ඩොලර් 90.60 දක්වා ඉහළ ගොස් ඇත.

WTI බොරතෙල් බැරලයක මිල අමෙරිකානු ඩොලර් 84.60 දක්වා ඉහළ ගොස් ඇත.

තවද, MURBAN බොරතෙල් බැරලයක මිල 86.00 දක්වා ඉහළ ගොස් ඇත.

අමෙරිකාව සහ සෞදි අරාබිය එක්ව ඉරාකයේ සන්නද්ධ කඳවුරු ඉලක්ක කර ගුවන් ප්‍රහාර එල්ල කර ඇති අතර එම ගුවන් ප්‍රහාර වලින් ඉරාකයේ 10 දෙනෙකු පමණ ජීවිතක්ෂයට පත්ව ඇති බව වාර්තා වේ.

ඉරාකයේ ප්‍රාන්ත කිහිපයකටම ප්‍රහාර එල්ල වී ඇති අතර ඉන් වැඩිම පිරිසක් මියගොස් ඇත්තේ ‘නිනවෙහ්’ (Nineveh) ප්‍රාන්තයට එල්ල වූ ප්‍රහාර වලින් බව වාර්තා වේ.

අමෙරිකානු හමුදා සහ සෞදි අරාබියේ තෙල් පිරිපහදු ඉලක්ක කර ගනිමින් ඉරාන හිතවාදී සන්නද්ධ කණ්ඩායම් එල්ල කළ ඩ්‍රෝන ප්‍රහාර වලට ප්‍රතිචාර වශයෙන් මෙම ඒකාබද්ධ ප්‍රහාරය දියත් කළ බව අමෙරිකාව සඳහන් කරයි.

මෙටා (Meta) සමාගම ඉන්දියාවේ අග්‍රාමාත්‍ය නරේන්ද්‍ර මෝදිගේ වීඩියෝවක් ෆේස්බුක් (Facebook) ඔස්සේ කෙටිකාලීනව අවහිර කරනු ලැබීම සම්බන්ධයෙන් ඉන්දීය රජයෙන් සමාව අයැද ඇත.

“මෙම අන්තර්ගතය වැරදීමකින් ඉවත් කර තිබූ අතර දැන් එය යථා තත්ත්වයට පත් කර ඇත” යනුවෙන් මෙටා ප්‍රකාශකයෙකු නිවේදනයක් නිකුත් කරමින් සඳහන් කර ඇත.

අගමැති මෝදිගේ ෆේස්බුක් (Facebook) වීඩියෝව තාවකාලිකව අවහිර කිරීම සම්බන්ධයෙන් ඉලෙක්ට්‍රොනික හා තොරතුරු තාක්ෂණ අමාත්‍යාංශය විසින් මෙටා සහ ඉන්ස්ටග්‍රෑම් හි ගෝලීය ප්‍රධානීන් කැඳවා ඇති බව වාර්තා වේ.

මෙම වීඩියෝවෙන් ‘කොක්රෝච් ජනතා පක්ෂය’ (CJP) විසින් සංවිධානය කරන ලද ශිෂ්‍ය විරෝධතාවක් අතරතුර අගමැති මෝදි ‘Gen Z’ (නව පරම්පරාව) තරුණ තරුණියන් වෙත පණිවිඩයක් ලබාදී තිබුණේය.

කෙසේ වෙතත් ඉන්දීය මාධ්‍ය සඳහන් කරන ආකාරයට, මෙම වීඩියෝව ඉවත් කිරීමට හේතු වී ඇත්තේ තාක්ෂණික දෝෂයකි.

නව කාර්ය සාධන බලකායක් පත් කිරීමට ඉන්දීය අග්‍රාමාත්‍ය නරේන්ද්‍ර මෝදි පියවර ගෙන ඇත.

ඉන්දීය විභාග ක්‍රමය වැඩිදියුණු කළ හැක්කේ කෙසේද යන්න සොයා බැලීමට මෙම නව කාර්ය සාධන බලකාය පත්කළ බව අග්‍රාමාත්‍ය නරේන්ද්‍ර මෝදි එක්ස් පණිවුඩයක් නිකුත් කරමින් සඳහන් කරයි.

ඉන්ෆොසිස් සමාගමේ සම නිර්මාතෘ නන්දන් නිලේකානිගේ ප්‍රධානත්වයෙන් යුත් අදාළ කමිටුව ඔවුන්ගේ නිර්දේශ ඇතුළත් වාර්තාවක් කඩිනමින් රජයට ලබාදෙනු ඇති බවද සඳහන් කරයි.

සිසුන්ගේ අනාගතය සමග සෙල්ලම් කළ පිරිස් දැන් සිරගත කර ඇති බවත් විභාග සම්බන්ධයෙන් දැඩි නීතිමය විධිවිධාන සහිත නව නීති සම්පාදනය කිරීමේ මුල් පියවර අද පාර්ලිමේන්තුවේදී ගන්නා බවද ඉන්දීය අග්‍රාමාත්‍යවරයා සඳහන් කරයි.

නව කාර්ය සාධක බලකායට ඉන්දියානු අභ්‍යවකාශ පර්යේෂණ සංවිධානයේ හිටපු සභාපතිවරයෙක්, බුද්ධි තොරතුරු කාර්යාංශ හිටපු අධ්‍යක්ෂවරයෙක්, හිටපු අධ්‍යාපන ලේකම්වරියන් ඇතුළු සාමාජිකයින්ද ඇතුළත් වේ.