Foreign news

ඉරාන හිටපු උත්තරීතර නායක අයතුල්ලා අලි කමේනිගේ දේහය ඉරාන ශියා මුස්ලිම්වරුන්ගේ පූජනීයම ස්ථානයක් වන මෂ්හද් නගරයේ පිහිටි ඉමාම් රෙසා දේවස්ථානයේදී මිහිදන් කළ බව විදෙස් මාධ්‍ය වාර්තා කරයි.

ඉරානය සහ අසල්වැසි ඉරාකයේ නගර කිහිපයක දින හයක් පුරා පැවැති මහජන ශෝක උත්සවයන්ගෙන් අනතුරුව අවසන් ආගමික කටයුතුවලින් පසුව මෙම මිහිදන් කිරීම සිදු කළේය.

ඉරාන හිටපු උත්තරිතර නායක අයතුල්ලා අල් කමේනිගේ දේහයට අවසන් ගෞරව දැක්වීම සඳහා ලක්ෂ සංඛ්‍යාත ජනතාවක් පැමිණ සිටි බවද විදෙස් මාධ්‍ය වාර්තා කරයි.

කෙසේ වෙතත් නව උත්තරීතර නායක මොජ්තාබා කමේනි ටෙහෙරානය සහ කොම් නගරවල පැවැති අවමංගල්‍ය උත්සවවලට සහභාගි නොවූ අතර මෂ්හද්හි පැවැති මිහිදන් කිරීමේ අවස්ථාවටද ඔහු සහභාගි වූ බවට කිසිදු නිල තහවුරු කිරීමක් නොමැත.

ඉරානය සහ අමෙරිකාව අතර නැවතත් ප්‍රහාර ආරම්භ කිරීමත් සමඟ ලෝක වෙළෙඳපොළේ බොරතෙල් මිල ඉහළ ගොස් ඇත.

අද (09) උදෑසන වන විට WTI බොරතෙල් බැරලයක මිල අමෙරිකානු ඩොලර් 74.28 දක්වා ඉහළ ගොස් ඇති අතර එය සියයට 1.03ක වැඩිවීමකි.

බ්‍රෙන්ට් වර්ගයේ බොරතෙල් බැරලයක මිල ඩොලර් 78.81ක් දක්වා ඉහළ ගොස් ඇති අතර එය සියයට 1.01ක වැඩිවීමකි.

එක්සත් අරාබි එමීර් රාජ්‍යයේ මර්බන් බොරතෙල් බැරලයක මිල ඩොලර් 73.57ක් ලෙස දැක්වෙයි.

නිර්භීත ඉරාන ජාතියට අපහාසාත්මක භාෂාවෙන් ආමන්ත්‍රණය කිරීමෙන් එහි ශ්‍රේෂ්ඨත්වය අඩු නොවන බව ඉරාන විදේශ අමාත්‍ය අබ්බාස් අරග්චි සඳහන් කරයි.

තවද ඉරානය අශිෂ්ටත්වයට අශිෂ්ටත්වයෙන් පිළිතුරු දෙන්නේ නැති බවත් නමුත් ක්‍රියාවෙන් ඔප්පු කරන බව ඉරාන විදේශ අමාත්‍ය අබ්බාස් අරග්චි සඳහන් කරයි.

ඉරාන විදේශ අමාත්‍ය අබ්බාස් අරග්චි “X” හි සටහනක් තබමින් ප්‍රකාශ කළේ,

“ඉරානය ශිෂ්ට හා නිර්භීත ඉරාන ජාතියට අපහාසාත්මක භාෂාවෙන් ආමන්ත්‍රණය කිරීමෙන් එහි ශ්‍රේෂ්ඨත්වය අඩු නොවේ.

ඉරාන ජාතිකයන් ඔවුන්ගේ ශිෂ්ටත්වය, සංස්කෘතිය සහ ශක්තිමත් සදාචාරාත්මක වටිනාකම් සඳහා ප්‍රසිද්ධය.

අපි අශිෂ්ටත්වයට අශිෂ්ටත්වයෙන් පිළිතුරු දෙන්නේ නැහැ. නමුත් ක්‍රියාවෙන්, නිර්භීතව සහ මහත් ධෛර්යයෙන්.”

අමෙරිකානු ජනාධිපති ඩොනල්ඩ් ට්‍රම්ප් ඉරානයට අනතුරු අඟවමින් සිදුකළ ප්‍රකාශයට ප්‍රතිචාර දක්වමින් ඉරාන විදේශ අමාත්‍ය අබ්බාස් අරග්චි මේ බව ප්‍රකාශ කර ඇත.

අද රාත්‍රියේදී ඉරානයට බොහෝ දුරට ප්‍රහාර එල්ල කරන බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇත.

තවද ඉරානයට එරෙහිව නැවතත් නාවික අවහිරතාවක් පැනවීමට කටයුතු කරන බවද ජනාධිපති ඩොනල්ඩ් ට්‍රම්ප් ප්‍රකාශ කර ඇත.

අමෙරිකාව සහ ඉරානය අතර අන්‍යෝන්‍ය වශයෙන් ප්‍රහාර එල්ල කර ගැනීමෙන් පසුව ජනාධිපති ඩොනල්ඩ් ට්‍රම්ප් මේ බව ප්‍රකාශ කර ඇත.

“මට ඔවුන් සමඟ තවදුරටත් කටයුතු කිරීමට අවශ්‍ය නැත, ඔවුන් ජරාවක්. ඔවුන් අසනීප මිනිසුන්, ඔවුන් අසනීප මිනිසුන් විසින් මෙහෙයවනු ලැබේ.”

ඉරානය සමඟ ඇති කරගත් තාවකාලික ගිවිසුම දැන් අවසන් බවත්, එහෙත් ඔවුන්ට සාකච්ජා කිරීමට පුළුවන් බව අම‍ෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

ඉරාන නියෝජිතයින්ට අමෙරිකාව සමඟ දිගටම සාකච්ඡා කළ හැකි වුවත්, ඉන් සාර්ථක ප්‍රතිඵලයක් ලැබෙයිද යන්න ගැන තමන්ට සැකයක් ඇති බවද ජනාධිපති ඩොනල්ඩ් ට්‍රම්ප් සඳහන් කරයි.

අද (08) තුර්කියේ අන්කාරා නුවර පැවැත්වෙන නේටෝ (NATO) සමුළුව අතරතුර අම‍ෙරිකානු ජනාධිපති ඩොනල්ඩ් ට්‍රම්ප් මේ බව සඳහන් කරයි.

“ඔවුන්ට කතා කරන්න පුළුවන්. හැබැයි මම හිතන්නේ ඔවුන් ඒ නාස්ති කරන්නේ තමන්ගේ කාලය.”

පාකිස්තාන භාණ්ඩ ප්‍රවාහන ගුවන් යානයක් අතුරුදන් වී ඇති බව විදෙස් මාධ්‍ය වාර්තා කරයි.

එක්සත් අරාබි එමීර් රාජ්‍යයේ ෂාර්ජා සිට පාකිස්තානයේ කරාචි බලා පියාසර කරමින් තිබූ බෝයිං 737 වර්ගයේ භාණ්ඩ ප්‍රවාහන ගුවන් යානයක් මෙලෙස අතුරුදන් වී ඇත.

එම සිද්ධිය සිදුවන අවස්ථාවේ ගුවන් යානයේ කාර්ය මණ්ඩල සාමාජිකයින් පස් දෙනෙකු සිට ඇති බව වාර්තා වේ.

මෙම ගුවන් යානය මාර්ගෝපදේශන පද්ධතියේ දෝෂයක් වාර්තා කිරීමෙන් අනතුරුව ගුවන් ගමනාගමන පාලකයන් සමඟ තිබූ සම්බන්ධතාව බිඳ වැටුණ බව පාකිස්තාන ගුවන් සේවා බලධාරීන් සඳහන් කරයි.

ගුවන් යානය මුහුදට කඩා වැටී තිබිය හැකි බවට සැක පළ කළද, එය මෙතෙක් නිල වශයෙන් තහවුරු කර නොමැත.

අමෙරිකාව විසින් ඉරානයට දැවැන්ත ප්‍රහාර මාලාවක් එල්ල කර ඇති බව විදෙස් මාධ්‍ය වාර්තා කරයි.

හෝමුස් සමුද්‍ර සන්ධියේදී කටාර් රාජ්‍යයට අයත් LNG ප්‍රවාහන නෞකාවක් සහ සෞදි අරාබියට අයත් බොරතෙල් ප්‍රවාහන නෞකාවක් ඇතුළු වාණිජ නෞකා තුනකට එල්ල වූ ප්‍රහාරවලට ප්‍රතිචාර වශයෙන් මෙම ප්‍රහාර එල්ල කළ බව අමෙරිකාව සඳහන් කරයි.

ඒ අනුව ඇමරිකානු මධ්‍යම විධානය (CENTCOM) විසින් දකුණු ඉරානයේ සිරික් (Sirik), බන්ඩර් අබ්බාස් (Bandar Abbas) සහ කේෂ්ම් (Qeshm) දූපත අවට පිහිටි ඉරාන ගුවන් ආරක්ෂක පද්ධති, වෙරළබඩ නිරීක්ෂණ මධ්‍යස්ථාන, සහ මිසයිල හා ඩ්‍රෝන දියත් කිරීමේ කඳවුරු ඉලක්ක කර ගනිමින් දැවැන්ත ප්‍රහාර මාලාවක් එල්ල කර ඇත.

මේ අතර ඉරානයට ලබාදී තිබූ තෙල් අපනයන සම්බාධක සහනය අවලංගු කිරීමට අමෙරිකාව පියවර ගෙන ඇත.

ලෝක කුසලාන පන්දු තරගාවලියේ සුපිරි 16දෙනාගේ තරග වටයේ ස්පාඤ්ඤය සමඟ පැවති තරගය ගෝල 1-0 ක් ලෙස පරාජය වීමත් සමඟ පෘතුගාලයෙන් බිහි වූ සුපිරි පාපන්දු තරුව ක්‍රිස්ටියානෝ රොනල්ඩෝ ජාත්‍යන්තර පාපන්දු පිටියෙන් සමුගෙන ඇත.

ඩලස් (Dallas) නුවර පැවති මෙම තරඟයේ අතිරේක කාලයේදී මිකෙල් මෙරිනෝ ලබාගත් ගෝලයත් සමඟ ස්පාඤ්ඤය ජයග්‍රහණය කළ අතර එහිදී රොනාල්ඩෝ දැඩි ලෙස සංවේදී වෙමින් කඳුළු සලන අයුරු විදෙස් මාධ්‍ය වාර්තා කළේය.

ක්‍රිස්ටියානෝ රොනල්ඩෝ සම්මුඛ සාකච්ඡාවකට එක්වෙමින් සඳහන් කළේ,

“මම හිතනවා මම ඒකට සූදානම් කියලා. ඒක හරිම දුෂ්කර වේවි. නමුත් මම වයස අවුරුදු 25, 26 ඉඳන්ම මගේ අනාගතය සැලසුම් කළා. පාපන්දු ක්‍රීඩා පිටියෙන් ලැබෙන සතුට හා ජවය වෙන කිසිම දේකින් ලැබෙන්නේ නැහැ.

නමුත් හැම දේකටම ආරම්භයක් වගේම අවසානයක් තියෙනවා. විශ්‍රාම ගත්තට පස්සේ මට මගේ පවුලේ අය සහ දරුවන් වෙනුවෙන් වැඩි කාලයක් වෙන් කරන්න පුළුවන්.”

රොනාල්ඩෝ මේ වනවිට බැලන්ඩෝර් (Ballon d’Or) සම්මාන 5ක්, චැම්පියන්ස් ලීග් කුසලාන 5ක් සහ 2016 යුරෝ කුසලානය දිනා ඇති අතර ලෝක වාර්තාවක් තබමින් ගෝල 976ක් ලබාගෙන ඇත.

වෙනිසියුලාවේ භූකම්පනයෙන් මියගිය පුද්ගලයින් සංඛ්‍යාව 3,300 ඉක්මවා ගොස් ඇති බව විදෙස් මාධ්‍ය වාර්තා කරයි.

මියගිය පුද්ගලයින්ගේ මළ සිරුරු 3,342ක් සොයාගෙන ඇති අතර තවත් පුද්ගලයින් 41,000කට අධික සංඛ්‍යාවක් අතුරුදන්ව පවතින බව විදෙස් මාධ්‍ය වාර්තා කරයි.

මෙම භූකම්පනයෙන් තුවාල ලැබූ පුද්ගලයින් 16,000කට අධික සංඛ්‍යාවක් මේ වන විටත් රෝහල්ගතව ප්‍රතිකාර ලබන බව විදෙස් මාධ්‍ය වාර්තා කරයි.

2026 විස්සයි විස්ස කාන්තා ලෝක කුසලානය 7වැනි වරටත් ජයග්‍රහණය කිරීමට ඔස්ට්‍රේලියානු කාන්තා කණ්ඩායම සමත් විය.

තරගයේ පළමුවෙන් පන්දුවට පහරදුන් එංගලන්ත කාන්තා කණ්ඩායම නියමිත පන්දුවාර 20 අවසානයේ කඩුලු 4ක් දැවී ලකුණු 150ක් රැස්කරගැනීමට සමත් විය.

අනතුරුව පිළිතුරු ඉනිම ක්‍රීඩා කිරීමට පිටියට පිවිසි ඔස්ට්‍රේලියානු කාන්තා කණ්ඩායම පන්දුවාර 17යි පන්දු 1ක් අවසානයේ කඩුලු 3ක් දැවී ලකුණු 153ක් රැස්කරගනිමින් තරගය ජයග්‍රහණය කළේය.

ඒ අනුව 2026 විස්සයි විස්ස කාන්තා ලෝක කුසලාන තරගාවලියේ අවසන් මහා තරගය කඩුලු 7කින් ජයග්‍රහණය කිරීමට ඔස්ට්‍රේලියානු කාන්තා කණ්ඩායම සමත් විය.