Foreign news

යළිත් හෝමූස් සමුද්‍ර සන්ධිය විවෘත කිරීම සඳහා වන එකඟතාවන්ට ඉරානය එකඟ නොවන්නේ නම්, එරටට එල්ල කරන බෝම්බ ප්‍රහාර ඉතා ඉහළ මට්ටමකින් සහ දැඩි තීව්‍රතාවයකින් ආරම්භ කරන බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

දැනට එකඟ වී ඇති කොන්දේසි වලට ඉරානය එකඟ වන්නේ නම් පමණක් දැනට ක්‍රියාත්මක යුදමය තත්ත්වය අවසන් වන බවද අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

සිය ‘Truth Social’ ගිණුමේ සටහනක් තබමින් අමෙරිකානු ජනාධිපති ඩොනල්ඩ් ට්‍රම්ප් මේ බව සඳහන් කරයි.

ඉන්දියාවේ තමිල්නාඩු ප්‍රාන්ත මැතිවරණය සුපිරි නළු තලපති විජේ ජයග්‍රහණය කිරීමත් සමඟ ප්‍රාන්තයේ හිටපු මහ ඇමති එම්.කේ.ස්ටාර්ලින් සිය ධුරයෙන් ඉල්ලා අස්වී ඇත.

විජේගේ නායකත්වයෙන් යුත් TVK පක්ෂය ප්‍රාන්ත ආසන 234න් ආසන 108ක් හිමිව ඇති අතර හිටපු ප්‍රධාන අමාත්‍ය එම්.කේ. ස්ටාර්ලින්ගේ නායකත්වයෙන් යුතු DMK පක්ෂයට හිමිව ඇත්තේ ආසන 59ක් පමණයි.

වර්තමාන අගමැති නරේන්ද්‍ර මෝදිගේ භාරතීය ජනතා පක්ෂය සමඟ සන්ධාන ගතව සිටින AIADMK පක්ෂය පවා දිනා ඇත්තේ ආසන 47ක් පමණයි.

ඉරානය විසින් එක්සත් අරාබි එමීර් රාජ්‍යයට සහ මැදපෙරදිග ගල්ෆ් කලාපයේ නෞකා වලට එල්ල කරන ප්‍රහාර දැඩි කිරීමත් සමඟ ලෝක වෙළඳපොළේ තෙල් මිල 6%කින් පමණ ඉහළ ගොස් ඇත.

ඒ අනුව බ්‍රෙන්ට් වර්ගයේ බොරතෙල් බැරලයක මිල අමෙරිකානු ඩොලර් 6.79කින් හෙවත් 6.3%කින් ඉහළ ගොස් බැරලයක මිල ඩොලර් 114.96ක් ලෙස සටහන් විය. 

අමෙරිකානු වෙස්ට් ටෙක්සාස් ඉන්ටර්මීඩියට් බොරතෙල් මිල ඩොලර් 4.23කින් හෙවත් 4.2%කින් ඉහළ ගොස් බැරලයක මිල ඩොලර් 106.17ක් දක්වා වැඩි වී ඇත.

දෙමළ සිනමාවේ සුපිරි නළු විජේගේ TVK පක්ෂය 17 වන තමිල්නාඩු ව්‍යවස්ථාදායක සභා මැතිවරණයෙන් ආසන 108ක් දිනා ගනිමින් දැවැන්ත ජයක් ලබාගෙන ඇත.

දශක පහකට ආසන්න කාලයක් තමිල්නාඩු දේශපාලනය මෙහෙයවූ DMK සහ AIADMK පක්ෂවල ආධිපත්‍යය බිඳ දැමීමට මෙමගින් ඔහු සමත් වී ඇති බව විදෙස් මාධ්‍ය වාර්තා කරයි.

මෙම මැතිවරණයේ දී DMK පක්ෂය ආසන 59කට සීමා වෙමින් ප්‍රධාන විපක්ෂය බවට පත්ව ඇති අතර AIADMK පක්ෂය ආසන 47ක් ලබා ගනිමින් තෙවන ස්ථානයට පත්ව ඇත.

කෙසේ වෙතත් තමිල්නාඩු ප්‍රාන්තයේ බලය පිහිටුවීම සඳහා එක් පක්ෂයක් විසින් ආසන 118ක් ජයග්‍රහණය කළ යුතු අතර TVK පක්ෂයට ඒ අනුව බලය පිහිටුවීම සඳහා තවත් පක්ෂයක සහාය ලබාගත යුතු වේ. 

එක්සත් අරාබි එමීර් රාජ්‍යය වෙත එල්ල වූ ප්‍රහාර හේතුවෙන් ඩුබායි සහ සාජා ජාත්‍යන්තර ගුවන් තොටුපළ වෙත පැමිණීමට නියමිතව තිබූ ගුවන් ගමන් රැසක් තාවකාලිකව අත්හිටුවා ඇති බව වාර්තා වේ.

මෙම හදිසි ප්‍රහාර මාලාව හේතුවෙන් ඩුබායි සහ සාජා ගුවන්තොටුපළ වෙත පැමිණීමට නියමිතව තිබූ ගුවන් ගමන් රැසක් ප්‍රමාද වී ඇති බවත් තවත් ගුවන් ගමන් කිහිපයක් වෙනත් ගමනාන්ත වෙත යොමු කර ඇති බව වාර්තා වේ.

කලාපය තුළ පවතින අනාරක්ෂිත තත්ත්වය සහ එරට ගුවන් ආරක්ෂක පද්ධති සක්‍රීය වීම හේතුවෙන් ආරක්ෂක පියවරක් ලෙස මෙලෙස ගුවන් ගමන් පාලනය කිරීමට බලධාරීන් පියවර ගෙන ඇත.

කලාපීය ආරක්ෂාව පිළිබඳ අවිනිශ්චිතතාවයක් පවතින බැවින් එක්සත් අරාබි එමීර් රාජ්‍යයේ ආරක්ෂක අංශ දැඩි සෝදිසියෙන් පසුවන බවද වාර්තා වේ.

අමෙරිකානු මධ්‍යම අණදෙන මූලස්ථානයේ (CENTCOM) ප්‍රධානී අද්මිරාල් බ්‍රැඩ් කූපර් විසින් අමෙරිකානු හමුදා වත්කම් සහ මධ්‍යස්ථාන වලින් ඈත්ව සිටින ලෙසට ඉරානයට අනතුරු අඟවා ඇත.

හෝමූස් සමුද්‍ර සන්ධිය විවෘත කිරීම සඳහා ක්‍රියාත්මක කෙරෙන “Project Freedom” මෙහෙයුම අතරතුර වාණිජ නෞකාවලට බාධා කිරීමට උත්සාහ කළ ඉරාන බෝට්ටු හයක් ගිල්වා දැමූ බවද අද්මිරාල් බ්‍රැඩ් කූපර් සඳහන් කරයි.

ඉරාන කෲස් මිසයිල සහ ඩ්‍රෝන යානා කිහිපයක් සාර්ථකව විනාශ කළ බවත් මෙය ආරක්ෂක මෙහෙයුමක් වන අතර ඒ සඳහා බැලැස්ටික් විරෝධී මිසයිල නාශක නෞකා යොදවා ඇති බවද අද්මිරාල් බ්‍රැඩ් කූපර් සඳහන් කරයි.

ගල්ෆ් මුහුදු සීමාවේ රටවල් 87කට අයත් නෞකා පවතින බවත් බියකින් තොරව හෝමූස් සමුද්‍ර සන්ධිය තරණය කරන ලෙසද අද්මිරාල් බ්‍රැඩ් කූපර් එම නෞකාවලින් ඉල්ලා සිටියි.

ඉරාන ඩ්‍රෝන ප්‍රහාරයක් හේතුවෙන් එක්සත් අරාබි එමීර් රාජ්‍යයේ ෆුජයිරා ඛනිජ තෙල් කර්මාන්ත කලාපයේ පිහිටි තෙල් පර්යන්තයක දැවැන්ත ගින්නක්‌ හටගෙන ඇත.

ප්‍රහාරයත් සමඟ හටගත් ගින්න පාලනය කිරීම සඳහා සිවිල් ආරක්ෂක බලකායේ ගිනි නිවන ඒකක සහ හදිසි සහන සේවා කණ්ඩායම් වහාම ක්‍රියාත්මක වී ඇත.

මේ අතර ඉරානයේ සිට මෙරට ඉලක්ක කර එල්ල වූ තවත් මිසයිල ප්‍රහාර කිහිපයක් සහ ඩ්‍රෝන යානා එරට ගුවන් ආරක්ෂක පද්ධති මගින් සාර්ථකව විනාශ කළ බව එක්සත් අරාබි එමීර් රාජ්‍යයේ ආරක්ෂක අමාත්‍යාංශය සඳහන් කරයි.

ගින්න පැතිර යාම වැළැක්වීම සඳහා මේ වන විටත් දැවැන්ත මෙහෙයුමක් දියත් කර ඇති අතර තෙල් පර්යන්තයට සිදුවූ අලාභ හානිය පිළිබඳ වැඩිදුර විමර්ශන ආරම්භ කර ඇත.

හෝමූස් සමුද්‍ර සන්ධිය වෙත ඇතුළු වීමට උත්සාහ කළ අමෙරිකානු යුද නෞකාවකට මිසයිල ප්‍රහාර දෙකක් එල්ල කළ බවට ඉරානය නිල වශයෙන් ප්‍රකාශ කර ඇත.

ඉරානය විසින් ලබාදුන් අනතුරු ඇඟවීම් නොසලකා හැරීම හේතුවෙන් ජාස්ක් (Jask) දූපත අසලදී අමෙරිකානු යුද නෞකාවට මිසයිල ප්‍රහාර දෙකක් එල්ල කර ඇත.

ප්‍රහාරයෙන් පසුව අදාළ අමෙරිකානු යුද නෞකාව එම ප්‍රදේශයෙන් ආපසු හැරී ගොස් ඇති බව සඳහන් වේ.

ඉස්තාන්බුල්හි හෝටලයක නවාතැන් ගෙන සිටියදී විෂ සහිත පළිබෝධ නාශක දුමාරයකට නිරාවරණය වීම හේතුවෙන් එකම පවුලක සාමාජිකයින් සිව් දෙනෙකු මියගොස් ඇත.

පළිබෝධකයින් පාලනය කිරීමට භාවිත කරන ඉතා විෂ සහිත රසායනික ද්‍රව්‍යයක් වන “ෆොෆීන් වායුව” ඔවුන්ගේ සිරුරු තුළ ඉහළ ප්‍රමාණයක් තිබූ බව වාර්තා වේ.

මෙම මරණ හේතුවෙන් පළිබෝධනාශක සමාගමේ පුද්ගලයින් සහ හෝටලයේ හිමිකරු ඇතුළු පස් දෙනෙකු අත්අඩංගුවට ගෙන ඇති බව විදෙස් මාධ්‍ය වාර්තා කරයි.