Foreign news

චීනයේ චින්හයි ප්‍රාන්තයේ හයිසි ප්‍රදේශයට රික්ටර් පරිමාණ 6.3ක ප්‍රබල භූකම්පනයක් සිදුව ඇති බව විදෙස් මාධ්‍ය වාර්තා කරයි.

මෙම භූකම්පනය පොළොව මතුපිට සිට කිලෝමීටර් 10ක් ගැඹුරකින් සිදුව ඇති අතර එම භූකම්පනයෙන් පසුව රික්ටර් පරිමාණ 5.0ක පමණ ප්‍රබලතාවයෙන් යුත් පසු කම්පන කිහිපයක් ද හඳුනාගෙන ඇත.

කෙසේ වෙතත් මෙම භූකම්පනය හේතුවෙන් සිදු වූ ජීවිත හානි හෝ දේපළ හානි පිළිබඳව මෙතෙක් කිසිවක් වාර්තා වී නොමැති බවද විදෙස් මාධ්‍ය වාර්තා කරයි.

අමෙරිකානු ගුවන් හමුදාවේ බී-52 ස්ට්‍රැටෝෆෝට්‍රස් වර්ගයේ ගුවන් යානයක් කඩා වැටීමෙන් පුද්ගලයන් අට දෙනෙකු ජීවිතක්ෂයට පත්ව ඇති බව විදෙස් මාධ්‍ය වාර්තා කරයි.

අමෙරිකාවේ දකුණු කැලිෆෝනියාවේ පිහිටි එඩ්වර්ඩ්ස් ගුවන් හමුදා කඳවුරේ ධාවන පථය තුළදී මෙම අනතුර සිදුව ඇති අතර මේ හේතුවෙන් කඳවුරේ මෙහෙයුම් කටයුතු තාවකාලිකව අත්හිටුවා ඇත.

ඉරානය සහ අමෙරිකාව අතර නව අවබෝධතා ගිවිසුමකට අමෙරිකානු ජනාධිපති ඩොනල්ඩ් ට්‍රම්ප්, උප ජනාධිපති ජේ.ඩී. වෑන්ස් සහ ඉරාන පාර්ලිමේන්තුවේ කථානායක මොහොමඩ් බගර් කලීබාෆ් විසින් අත්සන් තබා ඇති බව විදෙස් මාධ්‍ය වාර්තා කරයි.

මෙම ගිවිසුම මඟින් උපායමාර්ගිකව වැදගත් වන හෝමුස් සමුද්‍ර සන්ධිය වහාම ක්‍රියාත්මක වන පරිදි විවෘත කිරීමටත් ඉරානයට පනවා තිබූ අමෙරිකානු නාවික අවහිරතා ඉවත් කිරීමටත් ප්‍රතිපාදන සැලසේ.

මෙම නව ගිවිසුමට අදාළ සම්පූර්ණ විස්තර ඉදිරි පැය 24 ත් 48 ත් අතර කාලය තුළ ප්‍රසිද්ධියට පත් කිරීමට නියමිතය.

හෙලිකොප්ටර් යානා දෙකක් එකිනෙක ගැටී අමෙරිකානු ජනප්‍රිය ගායන ශිල්පියෙකු වන ඔලිවර් ට්‍රී ඇතුළුව 6 දෙනෙකු ජීවිතක්ෂයට පත්ව ඇති බව විදෙස් මාධ්‍ය වාර්තා කරයි.

බ්‍රසීලයේ රියෝ ද ජැනයිරෝ නගරයට ඉහළින් මෙම හෙලිකොප්ටර් යානා දෙක ගැටී ඇති අතර එම යානාවල සිටි පුද්ගලයින් 6 දෙනාම ජීවිතක්ෂයට පත්ව ඇත.

එක් හෙලිකොප්ටර් යානයක් තුළ ගුවන් මගීන් පස් දෙනෙකු සිට ඇති අතර අනෙක් ගුවන් යානයේ නියමුවා පමණක් ගමන් කර ඇති බව විදෙස් මාධ්‍ය වාර්තා කරයි.

මෙම අනතුරින් ගායන ශිල්පි ඔලිවර් ට්‍රී, බ්‍රසීලයේ යූටියුබ් තරුවක් වන ගැස්පාර් ප්‍රිම් ඩයස්, චිත්‍රපට අධ්‍යක්ෂකවරයෙකු වන ලූකස් විග්නේල්, බ්‍රසීල සංගීත ශිල්පියෙකු වන ලූකස් බ්‍රිටෝ චාවේස් සහ හෙලිකොප්ටර් යානා දෙකේ නියමුවන් දෙදෙනා ජීවිතක්ෂයට පත්ව ඇත.

අමෙරිකාව සහ ඉරානය අතර පවතින යුද්ධය අවසන් කිරීම සඳහා දෙපාර්ශවයම එකඟතාවකට පැමිණ ඇති බව අමෙරිකානු ජනාධිපති ඩොනල්ඩ් ට්‍රම්ප් සඳහන් කරයි.

තවද හෝමුස් සමුද්‍ර සන්ධිය කිසිදු ගාස්තුවකින් තොරව විවෘත වන අතර අමෙරිකානු නාවික අවහිරතාවය ද අවසන් වන බවද ජනාධිපති ඩොනල්ඩ් ට්‍රම්ප් සඳහන් කරයි.

සිය සමාජ මාධ්‍යයේ සටහනක් තබමින් ජනාධිපති ඩොනල්ඩ් ට්‍රම්ප් මේ බව සඳහන් කරයි.

“ලෝකයේ නැව් සියල්ලම, ඔබේ එන්ජින් පණගන්වන්න. තෙල් ගලා යාමට ඉඩ හරින්න!”

මේ අතර ඉරාන – අමෙරිකා සාම ගිවිසුම ලබන ජුනි (19) වැනිදා ස්විස්ටර්ලන්තයේ ජිනීවාහිදී අත්සන් තැබීමට නියමිත බව ඉරාන නියෝජ්‍ය විදේශ අමාත්‍යවරයා සඳහන් කර ඇත.

මැදපෙරදිග යුද ගැටුම් අවසන් කිරීම සම්බන්ධව ඉරානය සහ අමෙරිකාව අතර යෝජිත සාම ගිවිසුමට අත්සන් තබන දිනය සම්බන්ධයෙන් මේ වනවිට ගැටලුකාරී තත්ත්වයක් මතුව ඇත.

අද දිනයේ ඉරානය සහ අමෙරිකාව අතර සාම ගිවිසුමට අත්සන් තැබීම සිදුවනු ඇති බව අමෙරිකානු ජනාධිපති ඩොනල්ඩ් ට්‍රම්ප් විසින් ප්‍රකාශ කර තිබුණේය.

එහෙත් අද දිනයේ සාම ගිවිසුමට අත්සන් තැබීම සිදු නොවන බවත් එය ඉදිරි දින කිහිපය තුළ සිදුවනු ඇති බව ඉරාන විදේශ කටයුතු අමාත්‍යංශ ප්‍රකාශක ඉස්මයිල් බගායි ප්‍රකාශ කළේය.

කෙසේ වෙතත් අමෙරිකාව සමඟ ගිවිසුමකට එළඹීමේ සූදානම සම්බන්ධයෙන් ඉරාන දැඩි මතධාරීන් විසින් ඉරාන රජයට අප්‍රසාදය පළ කර ඇති බව විදෙස් මාධ්‍ය වාර්තා කරයි.

මෙම තත්ත්වය හමුවේ අමෙරිකාව සහ ඉරානය අතර සාම ගිවිසුම අත්සන් තැබීම අවිනිශ්චිත තත්ත්වයක පවතින බව විදෙස් මාධ්‍ය රැසක් වාර්තා කර ඇත.

මැදපෙරදිග පවතින යුද්ධය අවසන් කිරීම සඳහා අමෙරිකාව සහ ඉරානය සාම ගිවිසුමකට එකඟ වී ඇති බව පාකිස්ථාන අග්‍රාමාත්‍ය ෂෙහ්බාස් ෂරීෆ් සඳහන් කරයි.

එය මේ වන විට අවසන් අදියරේ පවතින බවත් ඉදිරි පැය 24 ඇතුළත මෙම ගිවිසුමට අන්තර්ජාලය හරහා අත්සන් තැබීමට නියමිත බවද අග්‍රාමාත්‍ය ෂෙහ්බාස් ෂරීෆ් සඳහන් කරයි.

ලෝකයම ආදරය කරන නවසීලන්ත ක්‍රිකට් කණ්ඩායමේ හිටපු නායක කේන් විලියම්සන් ජාත්‍යන්තර ක්‍රිකට් පිටියෙන් විශ්‍රාම ගැනීමට තීරණය කර ඇත.

එංගලන්තය සමඟ තරග තුනකින් සමන්විත ටෙස්ට් තරගාවලියට සහභාගී වන අතරතුර කේන් විලියම්සන් මෙම තීරණය ගෙන ඇති බව ක්‍රීඩා මාධ්‍ය වාර්තා සඳහන් කරයි.

තම රට වෙනුවෙන් කේන් විලියම්සන් ටෙස්ට් තරග 110කදී ලකුණු 9515ක් රැස්කරගෙන සිටියි. 

එක්දින තරග 175කට ක්‍රීඩා කර ඇති ඔහු ලබාගෙන ඇති ලකුණු සංඛ්‍යාව 7256ක් වන අතර විස්සයි විස්ස තරග 93කදී ලකුණු 2575ක් කේන් විලියම්ස්න් විසින් රැස්කරගෙන ඇත. 

ඉරානය සහ අමෙරිකාව අතර සටන් අවසන් කිරීම සඳහා එකඟතාවකට පැමිණීම අවසන් අදියරට පැමිණ ඇති බැවින් එහි කොටසක් ලෙස හෝමුස් සමුද්‍ර සන්ධිය නැවත විවෘත කිරීම පිළිබඳ අවධානය යොමුව ඇති බව ඉරාන විදේශ අමාත්‍ය අබ්බාස් අරාග්චි සඳහන් කරයි.

ඉරානයට එරෙහිව පනවා ඇති අමෙරිකානු අවහිර කිරීම් ඉවත් කිරීම මෙම ගිවිසුමට ඇතුළත් වන අතර ඉරානයේ න්‍යෂ්ටික වැඩසටහන සම්බන්ධ සාකච්ඡා පසුව ආරම්භ කිරීමට නියමිත බවද විදේශ අමාත්‍ය අබ්බාස් අරාග්චි සඳහන් කරයි.

රාජ්‍ය රූපවාහිනියට අදහස් දක්වමින් ඉරාන විදේශ අමාත්‍ය අබ්බාස් අරාග්චි මේ බව සඳහන් කරයි.

එහෙත්, ගිවිසුමේ ඇතැම් කරුණු අමෙරිකානු නිලධාරීන් විසින් තහවුරු කර ඇති අතර ඉරානයට ලබාදෙන ආර්ථික සහන එරට ගිවිසුම්ගත බැඳීම් ඉටුකිරීම මත රඳා පවතින බවද ඔවුන් පෙන්වා දී ඇත.

නවතම තාක්ෂණය, අභ්‍යවකාශ සහ විද්‍යුත් වාහන ක්ෂේත්‍රවල දැවැන්තයෙක් වන ප්‍රකට ව්‍යාපාරික Elon Musk ලොව පළමු ට්‍රිලියනපතියා බවට පත්ව ඇතැයි විදෙස් මාධ්‍ය සඳහන් කරයි.

සුප්‍රසිද්ධ “SpaceX” සමාගම කොටස් වෙළෙඳපොළට ඇතුළත් කිරීමත් සමග එහි කොටස් අමෙරිකානු ඩොලර් 150 කින් ආරම්භ වී ඉතා ඉක්මනින් අමෙරිකානු ඩොලර් 160 දක්වා ඉහළ ගොස් ඇත.

මෙම සමාගම සිය IPO හි අමෙරිකානු ඩොලර් බිලියන 75ක් රැස් කරමින් නව වාර්තාවක් තබා ඇති බවද විදෙස් මාධ්‍ය සඳහන් කරයි.

මෙම සමාගම ඔහු සතු කොටස්වල වටිනාකම ඇතුළු ඔහුගේ වත්කම් ඉහළ යාමත් සමඟ, ඔහුගේ සමස්ත වත්කම් වටිනාකම අමෙරිකානු ඩොලර් ට්‍රිලියන 1.1 ඉක්මවනු ඇතැයි ගණනය කර ඇත.