Local news

“1990” සුව සැරිය හදිසි ගිලන් රථ සේවාවේ පාලන අධිකාරිය විශේෂ නිවේදනයක් නිකුත් කර ඇත.

සුව සැරිය හදිසි ගිලන් රථ සේවාව අක්‍රිය වන බවට සමාජ මාධ්‍ය ඔස්සේ අසත්‍ය පුවතක් සංසරණය වන බවට එම ගිලන් රථ සේවාවේ පාලන අධිකාරිය නිරීක්ෂණය කර ඇත. 

එම පුවත සම්පූර්ණයෙන්ම අසත්‍ය පුවතක් බවත් එය ජනතාව නොමග යන සුළු ප්‍රවෘත්තියක් බව “1990” හදිසි ගිලන් රථ සේවාවේ සභාපති ඇතුළු පාලක මණ්ඩලය අවධාරණය කරයි.

තවද “1990” හදිසි ගිලන් රථ සේවාව දිවයින පුරා අඛණ්ඩව ක්‍රියාත්තමක වන අතර සුපුරුදු අයුරින් අදාළ සේවාවන් වඩා උසස් සහ කාර්යක්ෂම අයුරින් ඉටු කරනු ලබන බවද සඳහන් කරයි.

ශ්‍රී ලංකා විභාග දෙපාර්තමේන්තුව විශේෂ නිවේදනයක් නිකුත් කර ඇත.

ශ්‍රී ලංකා විභාග දෙපාර්තමේන්තුව මගින් පවත්වනු ලබන විභාග සඳහා අයදුම් කිරීමේදී ජාතික හැඳුනුම්පත් අංකය ඇතුලත් කිරීම අනිවාර්ය කර ඇති බව ශ්‍රී ලංකා විභාග දෙපාර්තමේන්තුව සඳහන් කරයි.

උක්ත විභාගය සඳහා අයදුම්පත් කැඳවීම ආරම්භ වීමට පෙර තම ජාතික හැඳුනුම්පත සකස් කර ගැනීම සියලුම පාසල් සහ පෞද්ගලික අයදුම්කරුවන්ගේ වගකීමක් බව විභාග දෙපාර්තමේන්තුව සඳහන් කරයි.

2026 දෙසැම්බර් මාසයේදී පැවැත්වීමට යෝජිත 2026 අ.පො.ස (සා.පෙළ) විභාගය සඳහා ඉල්ලුම් කිරීමට අපේක්ෂිත අයදුම්කරුවන්ගේ ජාතික හැඳුනුම්පත් සකස් කර ගැනීමට උපදෙස් ලබා දෙන ලෙස සියලුම විදුහල්පතිවරුන් වෙත මේ වන විටත් දැනුම් දී ඇති බවද සඳහන් කරයි.

පාස්කු ඉරුදින ත්‍රස්ත ප්‍රහාරය සම්බන්ධයෙන් සැකපිට අත්අඩංගුවට ගත් හිටපු බුද්ධි අංශ ප්‍රධානි මේජර් ජනරාල් සුරේෂ් සලේ සියදිවි නසාගැනිමේ අවදානමක් ඇතැයි ඔහුගේ නීතිඥයින් වන ජනාධිපති නීතිඥ ශවේන්ද්‍ර ප්‍රනාන්දු සහ නීතිඥ අසිත් සිරිවර්ධන අධිකරණයට කරුණු වාර්තා කරමින් ප්‍රකාශ කර ඇත.

සුරේෂ් සලේ පිළිබඳව දැනට ලබාදී ඇති අධිකරණ වෛද්‍ය වාර්තා මත පදනම්ව සුරේෂ් සලේට කාන්සාව විශාදය සහ පශ්චාත් කම්පන ආතති අක්‍රමිකතා (PTSD ) ඇතැයි ඇති බවට අධිකරණ වෛද්‍ය වාර්තාවල සඳහන් බව එම නීතීඥයින් සඳහන් කර ඇත.

අද (03) දින කොළඹ කොටුව මහෙස්ත්‍රාත් පසන් අමරසේන විසින් මෙම නඩුව කැඳවු අවස්ථාවේදී මේ බව සඳහන් කර ඇත.

එනිසා සුරේෂ් සලේව අපරාධ පරීක්ෂණ දෙපාර්තමේන්තුවෙන් වෙනත් ස්ථානයට සුදුසු මානසික ප්‍රතිකාරයන් සඳහා යොමු කරන ලෙසද ඔහුගේ නීතිඥයින් අධිකරණය හමුවේ ඉල්ලීමක් කර ඇත.

මෝසමක් මගින් මෙම නඩුව කැඳවමින් අධිකරණයට ඉදිරිපත් කර තිබුණු අතර මෝසම කැඳවන අවස්ථාවේදි අපරාධ පරීක්ෂණ දෙපාර්තමේන්තුව, නීතිපති දෙපාර්තමේන්තුව හෝ අගතියට පත් පාර්ශවය නියෝජනය කරන නීතිඥවරුන් පෙනී සිටියේ නැත.

ඒ අනුව සුරේස් සලේ වෙනුවෙන් ඉදිරිපත් කෙරුණු මෝසම සම්බන්ධයෙන් හෙට (04) දින කරුණු දක්වන ලෙස කොළඹ කොටුව මහෙස්ත්‍රාත් අධිකරණය විසින් අපරාධ පරීක්ෂණ දෙපාර්තමේන්තුව වෙත නොතිසි නිකුත් කළේය. 

ශ්‍රී ලංකාව ඇතුළු රටවල් 60කින් ආනයනය කරන භාණ්ඩ සඳහා 10% සිට 12.5% දක්වා අතිරේක ආනයන බදු පැනවීමට අමෙරිකානු පරිපාලනය යෝජනා කර ඇත.

කැනඩාව, මෙක්සිකෝව, පකිස්තානය, බංග්ලාදේශය, මැලේසියාව ඇතුළු රටවල් කිහිපයකින් ආනයනය කරන භාණ්ඩ සඳහා 10%ක අතිරේක බද්දක් පැනවීමට යෝජනා කර ඇත.

ශ්‍රී ලංකාව ඇතුළු තවත් රටවල් 45ක් සඳහා 12.5%ක අතිරේක බද්දක් පැනවීමට යෝජනා කර ඇත.

බලහත්කාර ශ්‍රමය (Forced Labor) භාවිතයෙන් නිෂ්පාදිත භාණ්ඩ ආනයනය වැළැක්වීම සඳහා ප්‍රමාණවත් ක්‍රියාමාර්ග නොගැනීම සහ එමගින් අමෙරිකානු වෙළෙඳ කටයුතුවලට අසාධාරණ බලපෑම් එල්ල වන බව පෙන්වා දෙමින් මෙම යෝජනාව ඉදිරිපත් කර ඇත.

ශ්‍රී ලංකාව බලහත්කාර ශ්‍රමයෙන් නිෂ්පාදිත භාණ්ඩ ආනයනය තහනම් කිරීම සහ එම නීති ඵලදායී ලෙස ක්‍රියාත්මක කිරීම සම්බන්ධයෙන් ප්‍රමාණවත් පියවර ගෙන නොමැති බව විමර්ශනයකදී අනාවරණය වූ බව අමෙරිකානු වෙළෙඳ නියෝජිත කාර්යාලය සඳහන් කරයි.

ඇඟලුම් සහ රෙදිපිළි ආනයන සඳහා අඩු බදු අනුපාත යටතේ යම් ප්‍රමාණයක් අමෙරිකානු වෙළෙඳපොළට ඇතුළත් කිරීමට ඉඩ සලසන විශේෂ යාන්ත්‍රණයක් ද යෝජනා කර ඇති අතර ඒ සම්බන්ධ වැඩිදුර තොරතුරු මෙතෙක් ප්‍රකාශයට පත් කර නොමැත.

මුදල් විශුද්ධිකරණය වැළැක්වීමේ පනත යටතේ තමන්ට එරෙහිව ගොනුකර තිබෙන කුමන්ත්‍රණය නැමති චෝදනාව පවත්වාගෙන යා හැකි බවට කොළඹ මහාධිකරණය විසින් දී ඇති නියෝගයක් බලරහිත කරන ලෙස ඉල්ලා යෝෂිත රාජපක්ෂ විසින් ඉදිරිපත් කළ ප්‍රතිශෝධන පෙත්සම විභාගයට ගැනීමට අභියාචනාධිකරණය අවසර ලබා දුන්නේය.

එම පෙත්සම අද (03) අභියාචනාධිකරණය හමුවේ දීර්ඝ ලෙස කරුණු සලකා බැලීමෙන් අනතුරුව මෙම නියෝගය නිකුත් කළ අතර එම පෙත්සම විභාගය සඳහා ජුනි මස (16) වනදා කැඳවන ලෙසත් අධිකරණය දින නියම කළේය.

මෙම පෙත්සම සලකා බැලූ අවස්ථාවේදී පෙත්සම්කාර යෝෂිත රාජපක්ෂ අධිකරණය හමුවේ පෙනී සිටියේය. 

අද (03) දින කිරිඇල්ල මාටුවාගල මුදුන්කොටුව ප්‍රදේශයේ වෙඩි තැබීමක් සිදුව ඇති බව පොලීසිය සඳහන් කරයි.

දෙපාර්ශ්වයක් අතර ඇති වූ ගැටුමදී එක් පාර්ශ්වයක පුද්ගලයෙකු විසින් අහසට වෙඩි තබා ඇති බවද පොලීසිය සඳහන් කරයි.

පිස්තෝල වර්ගයේ ගිනිඅවියකින් අදාළ වෙඩි තැබීම සිදුකර ඇති අතර ඉන් කිසිවෙකුටත් හානියක් සිදුව නොමැත. 

අදාළ වෙඩි තැබීම සිදුකළ රිවෝල්වරය සහ සැකකරුවෙකු කිරිඇල්ල පොලීසිය විසින් අත්අඩංගුවට ගෙන ඇති අතර තවත් සැකකරුවෙක් සොයා විමර්ශන ආරම්භ කර ඇත.

කෙසේ වෙතත් දෙපාර්ශ්වය අතර සිදුවූ ගැටුම හේතුවෙන් එක් පුද්ගලයෙකු තුවාල ලබා රත්නපුර රෝහල වෙත ඇතුළත් කර ඇත.

මෙරට නිෂ්පාදනය කරන ලද රිවෝල්වර 19ක් සමග සැකකරුවන් සිව් දෙනෙකු දෙමටගොඩ ප්‍රදේශයේදී අත්අඩංගුවට ගත් බව පොලීසිය සඳහන් කරයි.

මෙම සැකකරුවන් සිව් දෙනා බස්නාහිර පළාත් උතුර අපරාධ කොට්ඨාසය විසින් අත්අඩංගුවට ගෙන ඇති බව පොලීසිය සඳහන් කරයි.

අද (03) දින බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව සඳහන් කරයි.

තවද බස්නාහිර සහ සබරගමුව පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් ඇතැම් ස්ථාන වලට මි.මී 100ක පමණ තද වැසි ඇති විය හැකි බවද කාලගුණ විද්‍යා දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසද එම දෙපාර්තමේන්තුව ජනතාවට දැනුම් දෙයි.