පාස්කු ප්රහාර මාලාව සම්බන්ධයෙන් සිදු කරන විමර්ශන වලට අදාළව තමන් අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ ඉදිරිපත් කළ රිට් පෙත්සම අභියාචනාධිකරණයේ සභාපති විනිසුරු රොහාන්ත අබේසූරිය සහ සරත් දිසානායකගෙන් සමන්විත අභියාචනාධිකරණ විනිසුරු මඩුල්ල ඉදිරියේ තුන් වන දිනටත් (06) සලකා බැලිණි.
එහිදී තමන් අත්අඩංගුවට ගැනීම වැළැක්වීමේ නියෝගයක් නිකුත් කරන ලෙස ඉල්ලා හිටපු ජනාධිපති ගෝඨාභය රාජපක්ෂ ඉදිරිපත් කළ රිට් පෙත්සම ශ්රේෂ්ඨාධිකරණය වෙත යොමු කරන ලෙසට නීතිපතිවරයා අභියාචනාධිකරණය හමුවේ ඉල්ලා සිටියේය.
එහිදී පෙත්සම්කරු පෙත්සම මගින් අසාද් මවුලානා නමැති පුද්ගලයාව නොහඳුනන බවට ප්රකාශ කර තිබුණද, ඔවුන් දෙදෙනා මුණගැසී ඇති බව, වගඋත්තරකරුවන් වෙනුවෙන් පෙනී සිටි නියෝජ්ය සොලිසිටර් ජනරාල් සුහර්ෂි හේරත් අධිකරණය හමුවේ සඳහන් කළාය.
නියෝජ්ය සොලිසිටර් ජනරාල් සුහර්ෂි හේරත් සඳහන් කළේ,
“ස්වාමීණී.. පෙත්සම්කරු අසාද් මවුලානා නමැති පුද්ගලයාව තමන් නාඳුනන බව මේ පෙත්සමේ සඳහන් කර තිබුණා. එවැනි පුද්ගලයෙක් තමන් නොදන්නා බවටත්, ඔහු කවුද තමන් නොදන්නා බවත් මේ පෙත්සම්කරු ප්රකාශ කර තිබුණා. නමුත් අත්අඩංගුවේ පසුවන ඉනියභාරතී නමැති පුද්ගලයෙකු අපරාධ පරීක්ෂණ දෙපාර්තමේන්තුවට ප්රකාශයක් ලබා දීලා තිබෙනවා.
ඔහු තමන්ගේ ප්රකාශයේ සඳහන් කරලා තිබෙනවා, 2019 වසරේ හෙන්දාවිතාරණ තමන්ට කතා කර ගෝඨාභය රාජපක්ෂ හමුවන ලෙස දැනුම් දුන් බවට. ඒ අනුව ඉනියභාරතී නමැති පුද්ගලයා මිරිහානේ පිහිටි ගෝඨාභය රාජපක්ෂගේ නිවසට ගොස් තිබෙනවා.
එහිදී එම නිවසේ අසාද් මවුලානා, පිල්ලයාන්ගේ පක්ෂයේ ලේකම්වරයා සහ භාණ්ඩාගාරික ඇතුළු පිරිසක් සිටි ආකාරය තමන් දුටු බවත් ඔහු ප්රකාශ කර තිබෙනවා. ඒ බව තහවුරු කරන ඡායාරූප ද වගඋත්තරකරුවන් අධිකරණයට ඉදිරිපත් කර තිබෙනවා. ඒ ඡායාරූපවල අසාද් මවුලානා මේ පෙත්සම්කරු සමඟ සිටින ආකාරය දකින්නට තිබෙනවා.”
එම අවස්ථාවේදී මේ ඡායාරූප ලබාගෙන තිබෙන්නේ කොහෙදී දැයි අභියාචනාධිකරණ සභාපති විනිසුරුවරයා ප්රශ්නයක් මතු කළේය.
ඊට පිළිතුරු දෙමින් නියෝජ්ය සොලිසිටර් ජනරාල් සුහර්ෂි හේරත් සඳහන් කළේ,
“ස්වාමීනී.. මේ ඡායාරූප ලබාගෙන තිබෙන්නේ පෙත්සම්කාර ගෝඨාභය රාජපක්ෂගේ නිවසේදී. ඒ නිසා ඔහු අසාද් මවුලානා හඳුනන්නේ නැහැ කියා තමන්ගේ පෙත්සමේ ඉදිරිපත් කළ කරුණු පිළිගන්න බැහැ. ඒ නිසා ඔහු මේ අධිකරණයට ඇවිත් තිබෙන්නේ පිරිසුදු දෑතින් නෙවෙයි. ඔහු මේ නඩුකරය හරහා සත්ය කරුණු සැඟවීමක් සිදුකරලා තිබෙනවා. ඒ නිසා ඔහු ඉල්ලා සිටින සහන ප්රදානය කිරීමට අධිකරණයට හැකියාවක් නැහැ.”
“ස්වාමීණී.. මෙම පෙත්සම්කරු මේ පෙත්සම තුළින් තමන්ගේ නිදහසේ ගමන් බිමන් යාමේ අයිතිය උල්ලංඝනය වී ඇති බව ප්රකාශ කර තිබෙනවා. පුද්ගලික නිදහසට බාධා සිදුවී ඇති බවත් ප්රකාශ කර තිබෙනවා. ඒවා සම්පූර්ණයෙන් ම මූලික අයිතිවාසිකම් හා බැඳුණු කරුණු.
ආණ්ඩුක්රම ව්යවස්ථාවේ 126 වන ව්යවස්ථාවට අනුව මෙවැනි කාරණා සම්බන්ධව විභාගයක් පැවැත්විය හැක්කේ ශ්රේෂ්ඨාධිකරණයට පමණයි. අභියාචනාධිකරණයට එවැනි ඉල්ලීම් සම්බන්ධයෙන් විභාග කරන්න බැහැ. එනිසා මා ඉල්ලා සිටිනවා ආණ්ඩුක්රම ව්යවස්ථාවේ 126(3) ව්යවස්ථාව යටතේ මෙම පෙත්සම ශ්රේෂ්ඨාධිකරණයට යොමු කරන ලෙසට.”
පෙත්සම්කාර ගෝඨාභය රාජපක්ෂ වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා සඳහන් කළේ,
“ස්වාමීණී.. යම් පුද්ගලයෙකු අත්අඩංගුවට ගැනීමට ඔහුගේ පුද්ගලික නිදහස සීමා කිරීම සඳහා ප්රබල සාක්ෂි ඉදිරිපත් වී තිබිය යුතු යි. සාධාරණ සැකයක් උද්ගත විය යුතු යි. ත්රස්තවාදය වැළැක්වීමේ පනත යටතේ හෝ සාමාන්ය නීතිය යටතේ අත්අඩංගුවට ගැනීම් සිදු කිරීමේදී මෙම තත්ත්වය අදාළ වන බව මීට පෙර ශ්රේෂ්ඨාධිකරණය විසින් ප්රකාශයට පත් කරනු ලැබූ විනිශ්චිත නඩු තීන්දුවලින් අවධාරණය කර තිබෙනවා.
පාස්කු ඉරුදින ත්රස්ත ප්රහාරයෙන් පසුව මේ දක්වා එම සිද්ධිය පිළිබඳව සොයා බැලීම සඳහා කොමිෂන් සභා ගණනාවක් පත් කර තිබුණා. එම කිසිදු කොමිෂන් වාර්තාවක මේ පෙත්සම්කරු ගැන වචනයක් වත් සඳහන් කර තිබුණේ නෑ.
ඉන්පසුව අසාද් මවුලානා නමැත්තා බ්රිතාන්යයේ චැනල් ෆෝ නාලිකාවට කළ ප්රකාශයෙන් අනතුරුව ඒ පිළිබඳව සොයා බැලීම සඳහා හිටපු ශ්රේෂ්ඨාධිකරණය විසින් ඉමාම් මහතාගේ ප්රධානත්වයෙන් කොමිසමක් පත්කර විමර්ශන සිදු කළා. එම කොමිෂන් වාර්තාවේ පවා මේ පෙත්සම්කරු ගැන කිසිදු වචනයක් සඳහන් කර නැහැ. එසේ තිබියදී මෙම පෙත්සම්කරු නීතියට පටහැනි ලෙස වගඋත්තරකරුවන් විසින් අත් අඩංගුවට ගනු ලැබීමට සූදානම් වන බව සඳහන් කළ යුතුයි.“
