Local news

අද (14) දින ශ්‍රී ලංකා දුම්රිය සේවයේ නිල වෙබ් අඩවියට සයිබර් ප්‍රහාරයක් එල්ල වී ඇත.

වෙබ් අඩවියේ පවතින දුම්රිය කාලසටහන් පද්ධතියට (Timetable System) පමණක් මෙම ප්‍රහාරයෙන් බලපෑම් එල්ල වී ඇති බව දුම්රිය බලධාරීන් සඳහන් කරයි.

සිදුව ඇති හානිය නිවැරදි කර, වෙබ් අඩවිය නැවත යථා තත්ත්වයට පත් කරන තෙක් ආරක්ෂිත පියවරක් ලෙස දුම්රිය නිල වෙබ් අඩවියේ එම කොටස පමණක් තාවකාලිකව අක්‍රිය කර ඇත.

මේ රටට දැනෙන සේවාවක් කරපු සහ රට බේරගත්ත මහින්ද රාජපක්ෂට නින්දා අපහාස කළ බවත් ඔහුට නාකි මයිනා කියලා බැන්න බවද හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු සඳහන් කරයි.

හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු සඳහන් කළේ,

“මේ රටට වැඩ කරපු අවුරුදු 76ක් මේ රටට යම් සේවාවක්, පවතින සේවාවක්, දැනෙන සේවාවක් කරපු නායකයින්ට නින්දා අපහාස කෙරුවා. මේ රට බේරගත්ත මහින්ද රාජපක්ෂ මහත්තයාට නින්දා අපහාස කෙරුවා.

‘නාකි මයිනා’ කියලා බැන්නා. මේ රටට නිදහසේ හුස්ම ගන්න, නිදහසේ හුස්ම ගන්න උපන් නූපන් දරුවන්ට රටක් හිමිකරලා දුන්නේ මහින්ද රාජපක්ෂ මහත්තයා. ඒ මහින්ද රාජපක්ෂ මහත්තයාට දොස් කිවුවා, නින්දා අපහාස කෙරුවා.

රට වෙනුවෙන් මහින්ද රාජපක්ෂ මහත්තයා වෙනුවෙන් පෙනී හිටපු ගොවියා, කම්කරුවා, වැඩකරන ජනතාව හැම අංශයකටම නින්දා අපහාස කෙරුවා. නින්දා අපහාස කරලා කිවුවා, ඒගොල්ලන්ට විතරයි මේ රට ගොඩගන්න පුළුවන් කියලා.”

ශ්‍රී ලංකා පොදුජන පෙරමුණ ජන හමුවක් අමතමින් හිටපු පාර්ලිමේන්තු මන්ත්‍රී ජොන්ස්ටන් ප්‍රනාන්දු මේ බව සඳහන් කරයි.

ශ්‍රී ලාංකේය කලා ඉතිහාසයේ නොමැකෙන රන් අකුරක් සනිටුහන් කරමින් අද (14) දින ගාලුමුවදොර පිටියේදී පැවති ‘සංගමම් 2026’ භරත නාට්‍ය උත්වසවය නව ගිනස් ලෝක වාර්තාවක් පිහිටුවීමට සමත්ව ඇත.

මෙම වැඩසටහනට කලාකරුවන් 4,988ක් සහභාගි වී ඇති අතර වතු යටිතල පහසුකම් සහ ප්‍රජා සංවර්ධන නියෝජ්‍ය අමාත්‍ය සුන්දරලිංගම් ප්‍රදීප්ගේ සෘජු මඟපෙන්වීම සහ සංකල්පයකට අනුව මෙම උත්සවය සංවිධානය කර ඇත.

ඉන්දියාවේ ‘සංගමම් ග්ලෝබල් ඇකඩමි’ සහ ශ්‍රී ලංකාවේ ‘සංගමම් ලියා හොලිඩේස්’ යන ආයතන ඒකාබද්ධව මෙම දැවැන්ත උත්සවය සංවිධානය කර ඇත.

අධ්‍යයන පොදු සහතික පත්‍ර සාමාන්‍ය පෙළ විභාගයේ ප්‍රතිඵල නිකුත් කිරීම ප්‍රමාද වනු ඇති බව විභාග දෙපාර්තමේන්තුව සඳහන් කරයි.

ප්‍රතිඵල සකස් කිරීමේ කටයුතු අවසන් අදියරට පැමිණ ඇති අතර ඉදිරි සති දෙක තුළ ප්‍රතිඵල නිකුත් කිරීමට බලාපොරොත්තු වන බවද විභාග දෙපාර්තමේන්තුව සදහන් කරයි.

ජුනි මස (15) වන දින සාමාන්‍ය පෙළ විභාගයේ ප්‍රතිඵල නිකුත් කිරීමට මීට පෙර සැලසුම් කර තිබු බව එම දෙපාර්තමේන්තුවේ ප්‍රකාශකයෙකු සඳහන් කරයි.

මේ වනවිට භික්ෂුත්වයෙන් නෙරපා සිටින රාජාංගනේ සද්ධාරතන නමැති චීවරධාරියාට නාඳුනන පුද්ගලයන් දෙදෙනෙකු විසින් පහරදී ඇති බව පොලිසිය සඳහන් කරයි.

පසුගිය සෙනසුරාදා (06) රාත්‍රියේ වෑන් රථයකින් පැමිණි දෙදෙනෙකු විසින් මුහුණු ආවරණය කර පහරදී පලාගොස් ඇති බව පොලිසිය සඳහන් කරයි.

එම පහරකෑමෙන් තුවාල ලැබූ චීවරධාරීයා ප්‍රතිකාර සදහා රෝහල්ගත කර ඇති බවට තොරතුරු වාර්තා වේ.

කෙසේ වෙතත් එම පහරදීමට හේතුව සහ පහරදුන් පුද්ගලයන් කවුරුන්ද යන්න මෙතෙක් අනාවරණ වී නොමැති අතර මෙම පහරදීම සම්බන්ධයෙන් විමර්ශන ක්‍රියාත්මක බව පොලීසිය සඳහන් කරයි.

මාවතගම, පරගහදෙනිය ප්‍රදේශයේදී සැකකටයුතු ලෙස මියගිය 38 හැවිරිදි පුද්ගලයෙකුගේ මළ සිරුරක් මාවතගම පොලීසිය විසින් සොයාගෙන ඇත.

මාවතගම පොලිසියට ලද තොරතුරක් මත සිදුකළ මෙහෙයුමකදී මෙම මළ සිරුර සොයාගෙන ඇති බව පොලිස් මාධ්‍ය කොට්ඨාශය සඳහන් කරයි.

පරගහදෙනිය ප්‍රදේශයේ පුද්ගලික ඉඩමක පිහිටි භාවිතයට නොගන්නා ළිඳක් තුළ තිබී එම මළ සිරුර සොයාගෙන ඇති බවද පොලිස් මාධ්‍ය කොට්ඨාශය සඳහන් කරයි.

මෙම සැකකටයුතු මරණය සම්බන්ධයෙන් මාවතගම පොලිසිය වැඩිදුර විමර්ශන සිදු කර‍යි.

සංවිධානාත්මක අපරාධ සහ මත්ද්‍රව්‍ය ජාවාරම්කරුවන් දෙදෙනෙකු වන මෝදර නිපුන නැමැත්තාගේ සහෝදරයෙකු වන මෝදර චතුර සහ බ්ලූමැන්ඩල් සංඛ නැමැති අපරාධකරුවන් දෙදෙනා දිවයිනට  රැගෙන විත් ඇත.

සැකකරුවන් දෙදෙනා ගුවන්තොටුපොළ වෙත පැමිණි පසු ගුවන් තොටුපළ අපරාධ පරීක්ෂණ දෙපාර්තමේන්තු නිලධාරීන් විසින් අත්අඩංගුවට ගෙන ඇත.

අත්අඩංගුවට ගෙන දීර්ඝ ලෙස ප්‍රකාශ සටහන් කර ගැනීමෙන් පසුව මෝදර චතුර කොළඹ, නාරහෙන්පිට මධ්‍යම අපරාධ විමර්ශන කාර්යාංශය වෙත රැගෙන ගොස් ඇති අතර බ්ලූමැන්ඩල් සංඛ තවදුරටත් ගුවන් තොටුපළ අපරාධ පරීක්ෂණ දෙපාර්තමේන්තු නිලධාරීන් විසින් රඳවා ප්‍රකාශ සටහන් කරගනිමින් සිටින බව වාර්තා වේ.

මෙම සැකකරුවන් මෙරටින් පළා ගොස් අබුඩාබි නුවර සැඟවී සිටින අතරතුර ඉරානය විසින් ප්‍රහාර සඳහා භාවිත කළ ඩ්‍රෝන යානා සහ මිසයිලවල ඡයාරූප සහ වීඩියෝ දර්ශන සිය ජංගම දුරකථන වල රඳවා තබා ගෙන සිටියදී එරට ආරක්ෂක අංශ නිලධාරීන් විසින් අත්අඩංගුවට ගෙන බන්ධනාගාර ගත කර පසුව මෙරටට පිටුවහල් කර ඇත.

හෙට (14) දිනයේ “ඉස්ලාමාබාද් සාම සංදේශය” අත්සන් කිරීම සිදු නොවන බව ඉරානය සඳහන් කර ඇත. 

ඉරාන රාජ්‍ය මාධ්‍ය එරට විදේශ අමාත්‍යාංශයේ මාධ්‍ය ප්‍රකාශක එස්මයිල් බගයි උපුටා දක්වමින් මේ බව සඳහන් කර ඇත. 

අනෙක් පාර්ශවයේ පැකිලීම හේතුවෙන් අත්සන් කිරීමේ දිනය පිළිබඳ කිසියම් අදහසක් සම්බන්ධයෙන් ප්‍රවේශම්කාරි විය යුතු බව ඉරානය අවධාරණය කරයි.

අමෙරිකාව සහ ඉරානය අතර පවතින ගැටුම් අවසන් කරමින් “ඉස්ලාමාබාද් සාම සංදේශය” අත්සන් කිරීම හෙට (14) සිදු කරන බවට විදෙස් මාධ්‍ය වාර්තා කළේය.  

ජනතාව මුහුණ දෙන පීඩනය අවසන් කිරීමට අවශ්‍ය ශක්තිය තමන් සතු බවත් ඒ සඳහා නැවත බලය ලබාදෙන ලෙස හිටපු ජනාධිපති මහින්ද රාජපක්ෂ සඳහන් කරයි.

එනිසා නැවත වතාවක් රටේ පාලන බලය ලබා දුන්නොත් එය ක්‍රියාවෙන්ම ඔප්පු කර පෙන්වන බවද හිටපු ජනාධිපති මහින්ද රාජපක්ෂ සඳහන් කරයි.

අද රටේ ආර්ථික දුෂ්කරතා හේතුවෙන් ජනතාව බොහොම අමාරුවෙන් ජීවත්වෙන බවද හිටපු ජනාධිපති මහින්ද රාජපක්ෂ සඳහන් කරයි.

මාධ්‍ය වෙත අදහස් දක්වමින් හිටපු ජනාධිපති මහින්ද රාජපක්ෂ සඳහන් කළේ,

“බොහොම අමාරුවෙන් ජීවත්වෙන ජනතාවක් අද රටේ ඉන්නේ. මම හිතන්නේ ජනතාවගේ පැත්තෙන්, මම හිතන්නෑ එදා වේල කන්න පුළුවන් තත්ත්වයක් තියෙනවා කියලා ඉන්න කට්ටියට.”

“ශක්තියක් තියෙනවා. අපිට බලය දෙන්න අපි කරලා පෙන්නන්නම්.”