Local news

අද (15) පස්වරුවේ මහනුවර – යාපනය A-9 මාර්ගයේ කටුගස්තොට, කලුගල ප්‍රදේශයේදී පාසල් වෑන් රථයක් හා පෞද්ගලික බස් රථයක් මුහුණට මුහුණ ගැටීමෙන් බිහිසුණු අනතුරක් සිදුව ඇත.

මෙම බිහිසුණු අනතුරින් පාසල් සිසු සිසුවියන් 17 දෙනෙකු හා වෑන් රථයේ රියදුරු තුවාල ලබා රෝහල්ගත කළ බව පොලීසිය සඳහන් කරයි.

තුවාල ලැබූවන් කටුගස්තොට ප්‍රාදේශීය රෝහලට හා මහනුවර ජාතික රෝහලට ඇතුළත් කළ බවද පොලීසිය සඳහන් කරයි.

මෙම අනතුර සම්බන්ධයෙන් කටුගස්තොට පොලීසිය වැඩිදුර පරීක්ෂණ පවත්වයි.

තමන්ට එරෙහිව නීතිපතිවරයා විසින් මුදල් විශුද්ධිකරණය වැළැක්වීමේ පනත යටතේ ගොනු කර තිබෙන නඩුවේ ‘කුමන්ත්‍රණය’ නැමැති චෝදනාව පවත්වාගෙන යාමට නොහැකි බවට තීන්දුවක් ලබාදෙන ලෙස ඉල්ලා යෝෂිත රාජපක්ෂ විසින් ඉදිරිපත් කළ ප්‍රතිශෝධන පෙත්සම හෙට (16) දින විභාගයට ගැනීමට අභියාචනාධිකරණය නියෝග කර ඇත.

අමල් රණරාජා සහ ආචාර්ය සුමුදු ප්‍රේමචන්ද්‍ර යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ලක් ඉදිරියේ මෙම පෙත්සම විභාගයට ගැනීමට නියමිතය.

මෙරට රත්‍රං මිල සැලකිය යුතු ලෙස ඉහළ ගොස් ඇති බව වාර්තා වේ.

අද උදෑසන මෙරට රන් මිල රුපියල් 6,000කින් ඉහළ ගොස් ඇති බව කොළඹ හෙට්ටිවීදිය රත්‍රං වෙළෙඳපොළ ආරංචි මාර්ග සඳහන් කරයි.

ඒ අනුව කැරට් 22 රන් පවුමක මිල රුපියල් 360,600ක් ලෙස සටහන් වී ඇත.

කැරට් 24 රන් පවුමක මිල රුපියල් 392,000 දක්වා ඉහළ ගොස් ඇත.

අමෙරිකාව සහ ඉරානය එකඟතාවකට පැමිණ ඇති බව ජනාධිපති ඩොනල්ඩ් ට්‍රම්ප් ප්‍රකාශ කිරීමත් සමඟ ලෝක වෙළඳපොළේ බොරතෙල් මිල පහත වැටී ඇත.

ඒ අනුව බ්‍රෙන්ට් බොරතෙල් බැරලයක මිල අමෙරිකානු ඩොලර් 83.91 දක්වා පහත වැටී ඇත. 

තවද WTI බොරතෙල් බැරලයක මිල අමෙරිකානු ඩොලර් 80.89 දක්වා පහත වැටී ඇත.

අපරාධ පරීක්ෂණ දෙපාර්තමේන්තුව භාරයේ කොළඹ ජාතික රෝහලේ ප්‍රතිකාර ලබන විශ්‍රාමික මේජර් ජෙනරාල් සුරේෂ් සලේට දෛනිකව නීතිඥ සහාය ලබාදීම අපරාධ පරීක්ෂණ දෙපාර්තමේන්තුව ප්‍රතික්ෂේප කර ඇත.

සුරේෂ්⁣ සලේට සතියේ දින 5 පුරා ඔහුගේ නීතිඥ අසිත සිරිවර්ධන හමුවීමට අවසර දෙන ලෙස ඉල්ලා සලේගේ බිරිඳ වන මනෝරි සලේ විසින් අපරාධ පරීක්ෂණ දෙපාර්තමේන්තුවෙන් ඉල්ලා තිබූ අතර ඊට පිළිතුරු ලබා දෙමින් CID අධ්‍යක්ෂ ශානි අබේසේකර විසින් මේ බව දැනුවත් කර ඇත.

සුරේෂ් සලේ මේ වන විට විමර්ශන කටයුතු වලින් බැහැරව රෝහල්ගතව සිටින බැවින් මෙම අවස්ථාවේදී ඔහුට නීති උපදෙස් ලබා ගැනීමේ අවශ්‍යතාවයක් පැන නොනගින බව අපරාධ පරීක්ෂණ දෙපාර්තමේන්තුවේ අධ්‍යක්ෂවරයා සඳහන් කර ඇත.

නිරන්තරයෙන් නීතිඥවරයා හමුවීම තුළින් සැකකරුට අවශ්‍ය මානසික විවේකය අහිමිවී සෞඛ්‍ය තත්ත්වයට අහිතරක බලපෑම් එල්ල විය හැකි බවත් අධිකරණ නියෝග මත දැනටමත් සෑම සතියේ දිනකම බදාදා දිනවල පමණක් නීතිඥවරයාට ඔහුව හමුවීමට ඉඩ ලබාදී ඇති බවද CID අධ්‍යක්ෂවරයා සඳහන් කර ඇත.

අද (15) දින පස්වරුවේ බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් වැසි ඇති විය හැකි බව කාලගුණ විද්‍යා දෙපාර්තමේන්තුව සඳහන් කරයි.

තවද ඌව සහ නැගෙනහිර පළාත්වලත් මුලතිව් දිස්ත්‍රික්කයේත් ස්ථාන ස්වල්පයක පස්වරු 2.00න් පසුව වැසි හෝ ගිගුරුම් සහිත වැසි ඇති විය හැකි බවද කාලගුණ විද්‍යා දෙපාර්තමේන්තුව සඳහන් කරයි.

ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙසද එම දෙපාර්තමේන්තුව ජනතාවට දැනුම්දීමක් කරයි.

හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂට අල්ලස් කොමිසමෙන් කැඳවීමක් කර තිබෙන බව, සෞඛ්‍ය හා ජනමාධ්‍ය අමාත්‍ය නලින්ද ජයතිස්ස සඳහන් කරයි.

අනුරාධපුර සාමාන්‍ය පවුලක නාවික නිලධාරියෙකුට තිබුණ අවස්ථාව ඔහුට නොදී මහින්ද රාජපක්ෂගේ පුත් යෝෂිත රාජපක්ෂට ලබාගෙන එංගලන්තයේ පුහුණුවට ගියපු ආකාරය සම්බන්ධයෙන් ප්‍රශ්න තිබෙන බවද අමාත්‍ය නලින්ද ජයතිස්ස සඳහන් කරයි.

අමාත්‍ය නලින්ද ජයතිස්ස මාධ්‍ය වෙත අදහස් දක්වමින් සඳහන් කළේ,

“සමහර විට ආයේ ඒක එල්ල වෙන්න පුළුවන්. යෝෂිත රාජපක්ෂට අල්ලස් කොමිසමෙන් කැඳවීමක් කරලා තිබෙනවා. ඔහු එංගලන්තයේ පුහුණුවට ගියපු ආකාරය සම්බන්ධයෙන් ප්‍රශ්න තිබෙනවාය.

අනුරාධපුර සාමාන්‍ය පවුලක නාවික නිලධාරියෙකුට තිබුණ අවස්ථාව තමයි මහින්ද රාජපක්ෂගේ පුතා හැටියට යෝෂිත රාජපක්ෂ ගත්තේ කියලා. සමහරවිට ඔය විමල් වීරවංශ, ගම්මන්පිලලා ඒකත් රණවිරු දඩයමක් විදිහට හඳුන්වන්න පුළුවන්.

ඒක ජනතාව තීන්දු කරයි, දඩයම රණවිරුද නැද්ද කියන එක.”

සුරේෂ්⁣ සලේගේ කොම්පියුටර් එකේ තියෙන Password එක ඉල්ලන බවත් ඒකට අත තියනවා කියන්නේ මේ රටේ සම්පුර්ණම යුද්ධයට සම්බන්ධ සියලු කාරණා ලෝකෙටම විවෘත කරන වැඩපිළිවෙලක් බව පාර්ලිමේන්තු මන්ත්‍රී දයාසිරි ජයසේකර සඳහන් කරයි.

මහනුවර පැවති හමුවක් අමතමින් පාර්ලිමේන්තු මන්ත්‍රී දයාසිරි ජයසේකර සඳහන් කළේ,

“දැන් මේ සලේගේ ක්‍රියාවලිය ගත්තාම තමුන්නාන්සේලා දන්නවා ඔහුව අත්අඩංගුවට අරගෙන, ඔහුගෙන් කටඋත්තර අරගෙන, ඔහු පාස්කු ප්‍රහාරයට සම්බන්ධ වැඩකටයුතු කරලා තියෙනවා නම් ඔහුට විරුද්ධව නීතිය ක්‍රියාත්මක කරන්න. ඒක ගැන කිසි ගැටලුවක් නෑ.

හැබැයි දැන් මොකක්ද කියන්නේ. දැන් කියනවා සලේගේ කොම්පියුටර් එකේ මුරපද (password) ටික දීපන්. මේ මොකක්ද කියන්නේ. මේ ඉතිහාසේ, මේ යුද්ධය අවසන් කරනකොට බුද්ධි අංශයේ හිටපු ප්‍රධානියාගේ කොම්පියුටර් එකේ තියෙන්න පුළුවන් 2009 යුද්ධය අවසන්වනතුරු ගත්ත, තමුන්නාන්සේලා දන්නවා තමිල් සෙල්වම් මරාදාන්න ඒ බුද්ධි තොරතුර ආවේ සලේගේ කොම්පියුටර් එකෙන්.

ඒ ආපු දිගදුර විහිදුම් බලකායවල් ගිහිල්ලා කරපු ක්‍රියාදාමය සිද්ද කෙරුවේ එතනින්. හැබැයි ඒකට අත තියනවා කියන්නේ, මතක තියාගන්න මේ රටේ සම්පුර්ණම යුද්දෙට සම්බන්ධ වෙච්ච සියලු කාරණා ලෝකෙටම ඕපන් කරලා නැත්තම්, විවෘත කරන වැඩපිළිවෙල. මේක තමයි ක්‍රියාත්මක කරන්නේ.”