Local news

ජාත්‍යන්තර මූල්‍ය අරමුදලේ (IMF) නියෝජිත පිරිසක් හෙට (10) දින දිවයිනට පැමිණීමට නියමිතය.

ජාත්‍යන්තර මූල්‍ය අරමුදලේ නියෝජිත පිරිසක් දිවයිනට පැමිණෙන්නේ ශ්‍රී ලංකාවේ විස්තීර්ණ අරමුදල් පහසුකම යටතේ ක්‍රියාත්මක වන ආර්ථික ප්‍රතිසංස්කරණ වැඩපිළිවෙළේ ඒකාබද්ධ සත්වන සමාලෝචනය වෙනුවෙන්ය.

2026 වසරේ වගකීම් සමාලෝචන සාකච්ඡා සඳහා පැමිණෙන ජාත්‍යන්තර මූල්‍ය අරමුදලේ නියෝජිත පිරිස සැප්තැම්බර් (10) සිට (23) දක්වා දිවයිනේ රැඳී සිටිනු ඇත.

අද (09) රාත්‍රියේ මොරටුව, රාවතාවත්ත එමානුවෙල් මාවත ප්‍රදේශයේදී වෙඩිතැබීමක් සිදුව ඇත.

යතුරුපැදියකින් පැමිණි පුද්ගලයින් දෙදෙනෙකු විසින් ත්‍රිරෝද රථ රියදුරෙකු ඉලක්ක කර මෙම වෙඩිප්‍රහාරය එල්ල කර පලාගොස් ඇත.

කෙසේ වෙතත් වෙඩි ප්‍රහාරයෙන් කිසිදු පුද්ගලයෙකුට හානියක් සිදුව නොමැති බව පොලීසිය සඳහන් කරයි.

මත්ද්‍රව්‍ය ජාවාරම්කරුවන් අතර පවතින ආරවුලක ප්‍රතිඵලයක් ලෙස මෙම වෙඩිතැබීම සිදුවන්නට ඇති බවට පොලීසිය සැක කරයි.

සැකකරුවන් අත්අඩංගුවට ගැනීම සඳහා මොරටුව පොලීසිය විසින් විශේෂ පොලිස් කණ්ඩායම් දෙකක් යොදවා ඇත.

නියමිත දිනය පසුවී 2026-08-31 දක්වා වත්කම් සහ බැරකම් ප්‍රකාශ (වාර්ෂික හෝ පශ්චාත් විශ්‍රාම ප්‍රකාශ) ඉදිරිපත් කළ තැනැත්තන්ගෙන් පරිපාලන දඩ මුදල් අයකර ගැනීමට පෙර, ඒ සඳහා හේතු දැක්වීමට අවස්ථාව ලබාදීමට අල්ලස් හෝ දූෂණ චෝදනා විමර්ශන කොමිෂන් සභාව තීරණය කර ඇත.

දූෂණ විරෝධී පනතේ 90 වන වගන්තියට අනුව ප්‍රමාද වූ දින ගණනට අදාළව පරිපාලන දඩ මුදල අය කිරීමට නීත්‍යානුකූල හැකියාවක් ඇති බව අල්ලස් හෝ දූෂණ චෝදනා විමර්ශන කොමිෂන් සභාව නිවේදනයක් නිකුත් කරමින් සඳහන් කරයි.

එසේ වුවද අදාළ ප්‍රමාදය සම්බන්ධයෙන් යම් සාධාරණ හේතුවක් පවතින්නේ නම්, ඒ බව තහවුරු කිරීමේ ලේඛන ද සමග සැප්තැම්බර් මස (30) දිනට හෝ ඊට පෙර ලිඛිතව කොමිෂන් සභාව වෙත යොමු කරන ලෙස දන්වා ඇති අතර ලිඛිත හේතු දැක්වීමේදී ප්‍රකාශය කළ තැනැත්තාගේ ජාතික හැඳුනුම්පත් අංකය සහ දුරකථන අංකය සඳහන් කිරීම අනිවාර්ය වේ.  

සැප්තැම්බර් (30) වන විටත් කිසිදු හේතු දැක්වීමක් නොලැබුණහොත්, ප්‍රමාදය පිළිබඳ දැක්වීමට සාධාරණ හේතුවක් නොමැති බව සලකා පනතේ ප්‍රතිපාදන වලට අනුව අදාළ පරිපාලන දඩ මුදල් අයකර ගැනීමට කටයුතු කරන බව අදාළ නිවේදනයේ සඳහන් කර ඇත.

ආරක්ෂක මාණ්ඩලික ප්‍රධානී (ඉවත් කිරීමේ) පනත් කෙටුම්පත අද (09) පාර්ලිමේන්තුවේදී සම්මත විය.

අදාළ පනත් කෙටුම්පතේ දෙවැනිවර කියවීමේ විවාදය අද පෙරවරු 11.00 සිට පස්වරු 5.00 දක්වා පාර්ලිමේන්තුවේදී පැවැති අතර, අනතුරුව ඡන්ද විමසීමකින් තොරව එය සම්මත කෙරිණි.

මෙම පනත් කෙටුම්පත පළමුවර කියවීම සඳහා 2026 අගෝස්තු (04) දින පාර්ලිමේන්තුවට ඉදිරිපත් කර තිබිණි.

ආරක්ෂක මාණ්ඩලික ප්‍රධානී තනතුර ස්ථාපිත කරමින් හඳුන්වාදුන් 2009 අංක 35 දරන ආරක්ෂක මාණ්ඩලික ප්‍රධානී පනත ඉවත් කිරීම සඳහා මෙම පනත් කෙටුම්පත ඉදිරිපත් කර තිබේ.

2009 වසරේදී සම්මත කරන ලද එම පනත මගින් කාලීන අවශ්‍යතා අනුව සන්නද්ධ හමුදා සහ ආරක්ෂක අමාත්‍යාංශය අතර කටයුතු සම්බන්ධීකරණය ඇතුළු කාර්යයන් සඳහා ආරක්ෂක මාණ්ඩලික ප්‍රධානී තනතුර ස්ථාපිත කර තිබිණි.

ඒ අනුව මෙම පනත් කෙටුම්පත මගින් 2009 අංක 35 දරන ආරක්ෂක මාණ්ඩලික ප්‍රධානී පනත ඉවත් කිරීමත් සමඟ ආරක්ෂක මාණ්ඩලික ප්‍රධානී තනතුරද අවසන් කිරීමට නියමිතය.

තවද, මෙම පනත ක්‍රියාත්මක වීමත් සමඟ ආරක්ෂක මාණ්ඩලික ප්‍රධානී කාර්යාලයට අයත් සියලු චංචල හා නිශ්චල දේපළ, ආරක්ෂක විෂය පවරා ඇති අමාත්‍යවරයාගේ අමාත්‍යාංශය වෙත පැවරෙනු ඇති.

ජනාධිපති වැය ශීර්ෂය යටතේ එකවර වැටුප් දෙකක් ලබාගනිමින් මූල්‍ය අක්‍රමිකතාවක් සිදුකළ බවට චෝදනා එල්ල වී සිටින හිටපු ජනාධිපති ගෝඨාභය රාජපක්ෂගේ පෞද්ගලික ලේකම් සුගීෂ්වර බණ්ඩාර අද (09) දින කොටුව මහේස්ත්‍රාත් පසන් අමරසේන හමුවට ඉදිරිපත් කළේය.

එහිදී විමර්ශන නිලධාරීන් විසින් සිද්ධියට අදාළව මෙතෙක් සිදුකර ඇති පරීක්ෂණවල ප්‍රගතිය සහ වැඩිදුර කරුණු අධිකරණය හමුවේ වාර්තා කරනු ලැබුවෙිය.

අනතුරුව සුගීෂ්වර බණ්ඩාර ලබන (23) වැනිදා දක්වා යළිත් රක්ෂිත බන්ධනාගාරගත කිරීමට කොටුව මහේස්ත්‍රාත් අධිකරණය අද (09) නියෝග කළේය.

ජනාධිපති ලේකම් කාර්යාලයේ වැය ශීර්ෂය යටතේ තවත් තනතුරක් සඳහා එකවර වැටුප් හා දීමනා ලබාගැනීම සම්බන්ධයෙන් වන මූල්‍ය සාක්ෂි හා විමර්ශන වාර්තා සලකා බැලූ මහේස්ත්‍රාත්වරයා, සැකකරුගේ රක්ෂිත බන්ධනාගාර කාලසීමාව තවදුරටත් දීර්ඝ කිරීමට නියෝග කළේය.

මෙරට නාගරික ප්‍රවාහන ක්ෂේත්‍රය නව දිශානතියකට යොමු කරමින් ⁣ඉදිකළ තෙවන ඒකල මෙට්‍රෝ ඩිපෝව අද (09) සිට මෙහෙයුම් කටයුතු ආරම්භ කළේය.

නව බස් සේවාවට පහසුකම් සැපයීම සඳහා අවශ්‍ය යටිතල පහසුකම් සංවර්ධනය කිරීම ප්‍රවාහන, මහාමාර්ග සහ නාගරික සංවර්ධන අමාත්‍යංශය, Clean Sri Lanka ලේකම් කාර්යාලය, ශ්‍රී ලංකා ගමනා ගමන මණ්ඩලය සහ ලංකා මෙට්‍රො ට්‍රාන්සිට් (පුද්.) සමාගම ඒකාබද්ධව කඩිනම් ව්‍යාපෘතියක් ලෙස මෙය ක්‍රියාත්මක කෙරේ.

මෙට්‍රො ව්‍යාපෘතිය යටතේ ඉදිකල පළමු ඩිපෝ අංගනය පසුගිය (04) වන දින බත්තරමුල්ල, තලංගම දී ජනතා අයිතියට පත් කළ අතර දෙවන කඩවත මෙට්‍රො ඩිපෝ අංගනයේ මෙහෙයුම් කටයුතු (07) දින නිල වශයෙන් ආරම්භ කළේය.

මෙට්‍රො බස් ව්‍යාපෘතියේ සේවා ධාරිතාව වැඩිකිරීම සඳහාත් පරිපාලන, මෙහෙයුම් හා නඩත්තු කටයුතු පවත්වාගෙන යාම සඳහාත් පළමු අදියර යටතේ නව ඩිපෝ 04ක් ඉදිකිරීමට ලංකා මෙට්‍රො ට්‍රාන්සිට් (පුද්.) සමාගම සැලසුම් කර ඇත.

ඔලුවෙන් හි⁣ටගෙන කීවත්, මහ බැංකු හොරකම සිදුකළ අර්ජුන මහේන්ද්‍රන් ලංකාවට ගේන්න බැරි බවත් පුළුවන්නම් ලංකාවට ගෙනත් පෙන්නන ලෙසට අභියෝග කරන බව පාර්ලිමේන්තු මන්ත්‍රී චාමර සම්පත් දසනායක සඳහන් කරයි.

අද (09) දින පාර්ලිමේන්තුවේදී, මන්ත්‍රී චාමර සම්පත් දසනායක සඳහන් කළේ,

“අර අර්ජුන මහේන්ද්‍රන් මහ බැංකු හොරකම කරපු මිනිහා රටින් යැවුවේ කවුද.? අද මෙි රටේ ප්‍රධාන ආයතනයක ප්‍රධානියා. පාස්පොට් එක දෙනකොට එයා අධිකරණයේ කොටුව මහේස්ත්‍රාත්. තුන් පාරක්.

කිසිම කොන්දේසියකින් තොරව තමයි එයාට පාස්පොට් එක දුන්නේ. තුන් පාරක් ලංකාවට ආවා ගියා. හතරවෙනි පාර තමයි අර්ජුන මහේන්ද්‍රන් නැවතුනේ. ඉතිං එයා අද, එයාට කොන්දේසි නැ.

මම රට යනකොට, රජයෙන් මම රට යනකොට මගේ පාස්පොට් එකට තව එක්කෙනෙක්ගේ පාස්පොට් එකක් ඇප තියලා දුන්නේ. කිසිම කොන්දේසියක් නැතුව තමයි අද අර්ජුන මහේන්ද්‍රන් ගිහින් ඉන්නේ.

දැන් අර්ජුන මහේන්ද්‍රන් නමත් වෙනස් කරලා. මොකක්ද වෙන නමක් දාගෙන අර්ජුන මහේන්ද්‍රන්. ආයේ අර්ජුන මහේන්ද්‍රන් ගේන්න වෙන්නෑ මේ රටට. ඔලුවෙන් හිටගෙන කීවත්.

ජනාධිපතිතුමා රැස්වීම්වල කීවේ මොකක්ද. දේශපාලන රැස්වීම්වල. පළවෙනිය⁣ටම, අපේ පළවෙනි වැඩේ අර්ජුන මහේන්ද්‍රන් ලංකාවට ගේනවා කිවුවා. පුළුවන්නම් ගෙනත් පෙන්නන්න කියන්න.

මේ ආණ්ඩුව ඉවර වෙන්න ඉස්සෙල්ලා. අර්ජුන මහේන්ද්‍රන් ගේන්න බෑ. අර්ජුන මහේන්ද්‍රන් යවපු මිනිහා තමයි අද ලංකාවේ අනිත් මිනිස්සූ හිරේ දාන්නේ.

එයාට තියෙන පළවෙනි නඩුව ආණ්ඩුව පෙරලුනාම පළවෙනි නඩුව තමයි අර්ජුන මහේන්ද්‍රන්ට ⁣පාස්පෝට් එක නිදහස් කරපු මිනිහට තමයි අපි පටන් ගන්නේ පළවෙනි නඩුව. පළවෙනි නඩුව තියෙන්නේ එයාට.“

බ්‍රිතාන්‍යයේ ගුවන් ගමන් පාලන පද්ධතියේ ඇතිවූ දෝෂයක් හේතුවෙන් රට පුරා ගුවන් ගමන් 1000කට වැඩි සංඛ්‍යාවක් අවලංගු කිරීමට සිදුව ඇත.

ඊයේ (08) දින රාත්‍රිය වනවිට පද්ධතිය යථා තත්ත්වයට පත්කරගැනීමට හැකිවෙනු ඇතැයි, අපේක්ෂා කෙරුණද, අද දිනයේද ගුවන් ගමන් අවලංගු විය හැකි බව සඳහන් කර ඇත.

හීත්‍රෝ, ස්ටැන්-ස්ටේඩ්, මැන්චෙස්ටර්, බර්මින්ග්හැම් මෙන්ම ස්කොට්ලන්ත ගුවන්තොටුපළ මෙහෙයුම්ද ඉන් අඩාල වී ඇති බව විදෙස් මාධ්‍ය වාර්තා කරයි.

රයන් එයාර් ගුවන් සේවය පවසන්නේ ඔවුන්ගේ පමණක් ගුවන් මගීන් 65,000ක් පමණ ඉන් බලපෑමට ලක්ව ඇති බවයි.

“එයාර් ට්‍රැෆික් කන්ට්‍රෝල්” පද්ධතිය අක්‍රීය වීම තුළින්, ගුවන් යානාවලට පිටත්ව යා නොහැකි බවත් අදාළ ගුවන් යානා පිටත්ව යාමකින් තොරව වෙනත් නගර සහ විදෙස් රටවල සිට පැමිණෙන ගුවන් යානා ගොඩබැස්විය නොහැකි බවද සඳහන් කරයි.