මීගමුව බන්ධනාගාරයේ ඇතිවූ ගැටුම්කාරී තත්ත්වය සම්බන්ධ වූ නඩුකරය අද (28) දින යළිත් මීගමුව මහේස්ත්රාත් අධිකරණයේ කැඳවයි.
බන්ධනාගාර ගැටුමෙන් 30 දෙදෙනෙකු මියයාම සම්බන්ධයෙන් සැකකරුවන් හඳුනාගැනීමේ පෙරෙට්ටුවට ඉදිරිපත් කිරීමට 20 දෙනෙකුට නොතිසි නිකුත් කරන ලෙසට මීගමුව ප්රධාන මහේස්ත්රාත් ශිලනි පෙරේරා නියෝග කළාය.
ඒ අනුව ලබන සැප්තැම්බර් මස (08) වැනිදා මීගමුව අධිකරණය හමුවේ පෙනී සිටින ලෙසට මීගමුව ප්රධාන ජේලර් සහ බන්ධනාගාර නිලධාරීන් ඇතුළු 20කට නොතිසි නිකුත් කර ඇත.
අපරාධ පරීක්ෂණ දෙපාර්තමේන්තුව විසින් පසුගිය නඩුවාරයේදී සැකකරුවන් 70 නම් කර තිබු අතර අද දින සැකකරු අංක 1 සිට 6 දක්වා හඳුනා ගැනීමේ පෙරට්ටුවට ඉදිරිපත් කිරීමට නියමිතව තිබුණේය.
එහෙත් සෞඛ්ය හේතුවක් සහ වෙනත් නඩු කටයුත්තක් හේතුවෙන් අද දින සැකකරුවන් දෙදනෙකු ඉදිරිපත් නොකළ අතර සැකකරුවන් හතර දෙනෙකු සහ එම සැකකරුවන් හඳුනා ගැනීමට අපරාධ පරික්ෂණ දෙපාර්තමේන්තුව විසින් සාක්ෂිකරුවන් 4 දෙනෙකු අධිකරණයට ඉදිරිපත් කළේය.
ඉදිරිපත් නොකළ සැකකරුවන් දෙදෙනා සම්බන්ධයෙන් බන්ධනාගාරය විසින් අධිකරණයට ලිපි ඉදිරිපත් කරනු ලැබු අතර හඳුනාගැනීමේ පෙරට්ටුවට සාක්ෂිකරුවෝ 4 දෙනෙක් ඉදිරිපත් වූ අතර ඔවුහු විසින් සැකකරුවෝ හඳුනා ගත්තහ.
මෙම සිද්ධිය සම්බන්ධයෙන් 2,100කට අධික පිරිසකගෙන් ප්රකාශ ලබා ගෙන ඇති බවත් තවත් ප්රකාශ ලබා ගැනීමට ඇති බවද අපරාධ පරික්ෂණ දෙපාර්තමේන්තුව අධිකරණය හමුවේ සඳහන් කළේය.
