By unusuma.lk on [last-modified] (LK time)
2025 ජනවාරි සිට ඔක්තෝබර් දක්වා මාස 10ක කාලය තුළ ශ්රී ලංකාවේ අපනයනය 6.0%ක සැලකිය යුතු වර්ධනයක් සහ ස්ථාවර ප්රගතියක් පෙන්නුම් කරන බව අපනයන සංවර්ධන මණ්ඩලය සඳහන් කරයි.
ඒ අනුව මැණික් හා ස්වර්ණාභරණ සහ ඛනිජ තෙල් නිෂ්පාදන සඳහා ඇස්තමේන්තු ගත සංඛ්යාලේඛන සමඟ ශ්රී ලංකා රේගුව විසින් නිකුත් කරන ලද දත්ත වලට අනුව මුළු අපනයන ආදායම අමෙරිකානු ඩොලර් මිලියන 14,433.82කි.
මෙම ආදායම පසුගිය 2024 වසරේ එම කාලයට වඩා සාපේක්ෂ වර්ධනයක් පෙන්වන අතර මුල් මාස 10 තුළ අපනයන ආදායම ඩොලර් බිලියන දාහතර ඉක්මවා ගිය පළමු අවස්ථාව මෙය බවද අපනයන සංවර්ධන මණ්ඩලය සඳහන් කරයි.
අපනයන සංවර්ධන මණ්ඩලයේ (EDB) සභාපති සහ ප්රධාන විධායක නිලධාරී මංගල විජේසිංහ සඳහන් කළේ,
“මෙය ශ්රී ලංකා ඉතිහාසයේ ජනවාරි, ඔක්තෝබර් කාලය තුළ වාර්තා වූ ඉහළම අපනයන අගයයි. ප්රධාන බටහිර වෙළෙඳපොළවල් අඛණ්ඩව යථාතත්ත්වයට පත්වීම සහ දේශීය කර්මාන්ත විසින් පවත්වාගෙන යනු ලබන ස්ථාවර නිෂ්පාදන ධාරිතාවය මෙම වර්ධනයට දායක වී ඇත.
අපගේ අපනයනකරුවන්ගේ ශක්තිමත්බව සහ කැපී පෙනෙන ක්රියාකාරිත්වය පිළිබඳව මම ප්රශංසා කරමි. විශේෂයෙන්, මෙම කාලය තුළ වාර්ෂික අපනයන ඉලක්කය වන අමෙරිකානු ඩොලර් බිලියන 18න් 80%ක් දැනටමත් සාක්ෂාත් කර ගෙන ඇත.
2025 ඔක්තෝබර් මාසයේදී වෙළෙඳ භාණ්ඩ සහ සේවා අංශයන්හි මුළු අපනයන ආදායම අමෙරිකානු ඩොලර් මිලියන 1,474.38ක් විය. එය 2025 සැප්තැම්බර් හා සසඳන විට මාසිකව 2.2%ක වැඩිවීමක් පිළිබිඹු කරයි.
ඔක්තෝබර් මාසයේ කාර්ය සාධනය ශ්රී ලංකාවේ අපනයන අංශයේ ශක්තිමත් බව, වෙළෙඳපොළ ප්රවේශය පුළුල් කිරීම සහ ගෝලීය තරගකාරිත්වය ශක්තිමත් කිරීම අරමුණු කරගත් උපාය මාර්ගවල අඛණ්ඩ ඵලදායීතාවය අවධාරණය කරයි.
සේවා අපනයනය සමස්ත අපනයන වර්ධනයට ප්රධාන ශක්තියක් වී ඇත. 2025 ඔක්තෝබර් මාසයේදී සේවා අපනයන ආදායම අමෙරිකානු ඩොලර් මිලියන 316.14 කි. වසරේ මුල් මාස දහය තුළ සේවා අපනයන ආදායමේ වර්ධනය 4.01% කි.
එය අමෙරිකානු ඩොලර් මිලියන 3,060.21 ක් වේ. මෙම ප්රවණතාවය ශ්රී ලංකාවේ දැනුම පදනම් කරගත් ආර්ථිකය වර්ධනය වීමේ වැදගත්කම සහ එය ජාතික අපනයන ආදායම සඳහා ඉවහල් වන ආකාරය පිළිබිඹු කරයි.”
