පාරිභෝගික ජනතාවගේ අයිතිවාසිකම් ආරක්ෂා කිරීම සහ අටපිරිකර හා පිරිකර භාණ්ඩ අලෙවියේදී නීතිමය කරුණු අනුගමන කරන්නේ දැයි පරීක්ෂණ කිරීමේ අරමුණින් විශේෂ වැටලීම් සිදුකර ඇති බව පාරිභෝගික කටයුතු පිළිබඳ අධිකාරිය සඳහන් කරයි.
ඒ අනුව අටපිරිකර හා පිරිකර අලෙවිය සම්බන්ධයෙන් දිවයින පුරා මේ වනවිට විශේෂ වැටලීම් 119ක් සිදුකර ඇති අතර එම වැටලීම් වලදී අදාළ භාණ්ඩවල හෝ ඒවායේ ඇසුරුම් වල නියමිත තොරතුරු සඳහන් කර තිබේ ද යන්න සහ අදාළ නීතිමය අවශ්යතා පිළිපදිනවාද යන්න පරීක්ෂාවට ලක්කර ඇත.
වෙළෙඳුන් විසින් පවත්වාගෙන යා යුතු බිල්පත්, ඉන්වොයිස් සහ අනෙකුත් අදාළ ලේඛන සම්බන්ධයෙන් මෙහිදී විමර්ශනය කර ඇති අතර එහිදී නීති උල්ලංඝනයට අදාළ අටපිරිකර, සිවුරු, අදනකඩ, බඳපටි, පාත්ර සහ අනෙකුත් පිරිකර ඒකක 436ක් නිලධාරීන් භාරයට ගෙන ඇත.
අටපිරිකරවල දෙපට සිවුර වෙනුවට තනිපට සිවුරක් ඇතුළත් කර තිබීම, අටපිරිකරට අදාළ කොටස් අට සම්පූර්ණ නොවීම, මිල අනුව ඇතුළත් කර ඇති භාණ්ඩ වෙනස් වීම, ඇලුමිනියම්වලින් නිෂ්පාදනය කළ පාත්ර, තැලී ගිය පාත්ර සහ මළ බැදුණු දැලි පිහි ඇතුළත් කර තිබීම වැනි අක්රමිකතා මෙම වැටලීමේදී අනාවරණය වී ඇත.
