අධ්යාපනය, ශ්රම බලකාය සහ මානව ප්රාග්ධනය පිළිබඳ ආංශික අධීක්ෂණ කාරක සභාව පාර්ලිමේන්තු මන්ත්රී සුනිල් රාජපක්ෂගේ සභාපතීත්වයෙන් පසුගියදා රැස්විය.
එම කාරක සභාවේ සභාපති පාර්ලිමේන්තු මන්ත්රී හේෂා විතානගේ එදින නොපැමිණීම හේතුවෙන් පාර්ලිමේන්තු මන්ත්රී සුනිල් රාජපක්ෂගේ මූලිකත්වයෙන් කාරක සභාව පැවැත්විණි.
මෙහිදී 1956 අංක 47 දරන ස්ත්රීන්, තරුණ අය හා ළමයින් සේවයෙහි යෙදවීම පනත යටතේ වන වැරදිවලට අදාළ දඩ මුදල් රුපියල් දස දහසේ සිට රුපියල් ලක්ෂය දක්වා ඉහළ දැමීම සඳහා ස්ත්රීන්, තරුණ අය සහ ළමයින් සේවයෙහි යෙදවීමේ (සංශෝධන) පනත් කෙටුම්පත ඉදිරිපත් කර ඇති බව කම්කරු අමාත්යාංශයේ නිලධාරීහු සඳහන් කළේය.
1956 අංක 47 දරන ස්ත්රීන්, තරුණ අය හා ළමයින් සේවයෙහි යෙදවීම පනත මඟින්, වයස අවුරුදු 16ට අඩු ළමයින් සේවයේ යෙදවීම සම්පූර්ණයෙන්ම තහනම් කර ඇත.
මේ අතර අගෝස්තු (20) බ්රහස්පතින්දා පෙ.ව 11.30 සිට ප.ව 5.00 දක්වා ස්ත්රීන්, තරුණ අය සහ ළමයින් සේවයෙහි යෙදවීමේ (සංශෝධන) පනත් කෙටුම්පත දෙවැනි වර කියවීමේ විවාදය පාර්ලිමේන්තුවේදී පැවැත්වීමට නියමිතව ඇත.
