Local news

පසුගිය 2019 වසරේ කටයුතු කරපු ආකාරයටම මේ මොහොතේ ආගම දඩමීමා කරගනිමින් තමන්ගේ කල්ලි යොදාගෙන කටයුතු කරන බව වමේ කේන්ද්‍රය කැඳවුම්කරු චමීර පෙරේරා සඳහන් කරයි.

ආගම දඩමීමා කරගනිමින් කටයුතු කරන ඇටසැකිලි වලට පණ දෙන්න එපා බවත් විමල් වීරවංශ සහ ගම්මන්පිල වගේ කාලකණ්ණී ඇටසැකිලි වලට පණ දෙන්න එපා බවද කැඳවුම්කරු චමීර පෙරේරා සඳහන් කරයි.

කැඳවුම්කරු චමීර පෙරේරා සඳහන් කළේ,

“නැවත වතාවක් අපිට ජේනවා 2019 කටයුතු කරපු ආකාරයටම මේ මොහොතේ ආගම දඩමීමා කරගනිමින් තමන්ගේ කල්ලි යොදාගෙන කටයුතු කරනවා. මේ කණ්ඩායම් මේ රටේ සාමාන්‍ය ජනතාව නෙමෙයි.

මේ වනචර, දේශපාලන සංස්කෘතියේ ඒ දේශපාලන කල්ලිය යොදාගෙන තියෙන අම්බැට්ටයෝ. බලන්න ඇවිල්ලා ඉන්න පිරිස කවුද කියලා. මේ අයම තමයි 2019 මේ ⁣ප්‍රශ්නය මතු කළේ.

2019 දී මේ රට ලේ විලක් දක්වා ගෙනයන තැනට අවශ්‍ය කරන උසිගැන්වීම් කළේ මෙන්න මේ තක්කඩි. ඒ ම්ලේච්ඡ ප්‍රහාරය ගෙනාවේ බලය සඳහා. මේ වනචර පවුල බලය අතට ගන්න ගෙන ගිය දේශපාලන, සිවිල්, මිලිටරි කුමන්ත්‍රණයක්.

ඕක අපි හැමදාම කිව්වා. උන් බලයේ ඉද්දිත් කිව්වා. මේක පිටිපස්සේ ඉන්නේ මේ වනචර පවුල කියලා. ඒක මේ රටේ මිනිස්සු දන්නවා. ඕනේ කරන්නේ මේ ආණ්ඩුව සක්සුදක් සේ ඒක ඔප්පු කරලා පෙන්නන්න විතරයි.

ඇටසැකිලි වලට පණ දෙන්න එපා. විමල් වීරවංශ වගේ කාලකණ්ණී ඇටසැකිලි වලට පණ දෙන්න එපා. ගම්මන්පිල වගේ කාලකණ්ණී ඇටසැකිලි වලට පණ දෙන්න එපා. ඒ නිසා ජනතා අභිලාෂයට අනුව කටයුතු කරන්න.

ඒක මේ රජයේ වගකීමක්. මේ ඒ අභිලාෂය ඇතුලේ තියෙනවා යුක්තිය ඉල්ලා කරන සටන. පාස්කු දින සිදුවුණු ඒ ම්ලේච්ඡ ප්‍රහාරයට ඒක පිටිපස්සේ ඉන්න මේ කාලකණ්ණි, නන්නත්තාර, වනචර දේශපාලන සංස්කෘතිය කුදලගෙන යන එක මේ රටේ ජනතාවගේ අභිලාෂය.”

මාධ්‍ය හමුවකට එක්වෙමින් වමේ කේන්ද්‍රය කැඳවුම්කරු චමීර පෙරේරා මේ බව සඳහන් කරයි.

පසුගිය 2023 වසරේ සිට ගල් අඟුරු ටෙන්ඩරය කිසිදු වලංගු ටෙන්ඩර් කැඳවීමක් සිදු නොකර සැපයීම සිදුකර ඇති බව විදුලිබල හා බලශක්ති අමාත්‍ය කුමාර ජයකොඩි (20) පාර්ලිමේන්තුවේදී සඳහන් කරයි.

මෙම සැපයීම ඉතා වංචාකාරී ලෙස පසුගිය ආණ්ඩුව විසින් දූෂිත කැබිනට් අනුමැති හරහා කිසිම සුදුසුකමක් නැති එකම එක සැපයුම්කරුවෙකුට ලබාදී තිබෙන බවද අමාත්‍ය කුමාර ජයකොඩි සඳහන් කරයි.

අමාත්‍ය කුමාර ජයකොඩි සඳහන් කළේ,

“2023 සිට මෙම ටෙන්ඩරය දක්වා කිසිදු වලංගු ටෙන්ඩර් කැඳවීමක් සිදු නොකර තමා මෙම සැපයීම ඉතා වංචාකාරී ලෙස පසුගිය ආණ්ඩුව විසින් දූෂිත කැබිනට් අනුමැති හරහා තමා කිසිම සුදුසුකමක් නැති එකම එක සැපයුම්කරුවෙකුට දීලා තියෙනවා.

මේක මුලිකවම ඉදිරිපත් කළ මන්ත්‍රීවරයා අද පාර්ලිමේන්තුවේ නෑ. ඒගොල්ලෝ වෙන කොහෙවත් රටකට සපයලත් නෑ. කිසිම මුලික සුදුසුකමක් තිබිලත් නෑ. වෙන සමාගමක මුල්‍ය සුදුසුකම්, සැපයුම් සුදුසුකම් පෙන්නලා තමා කැබිනට් එකට ඒගොල්ලෝ සැපයීම කරලා තියෙන්නේ.

ඔය ගොඩාක් අය රිදිලා, මන්ත්‍රීතුමෙක් බොහෝම දැගලුවා. මොකද ඒගොල්ලන්ට රිදිලා තියෙනවා. මොකද ඒගොල්ලන්ගේ සප්ලයස් ලොස්. ඒගොල්ලන්ගේ සප්ලයට ගන්න බැරිවුනා මේ සැරේ.”

සමගි ජන බලවේග මන්ත්‍රීවරුන්ට 5 වසර රචනා ලියන්න කියලා දෙන්න ඕන බව ප්‍රවාහන, මහාමාර්ග, වරාය සහ සිවිල් ගුවන්සේවා අමාත්‍ය, සභානායක බිමල් රත්නායක අද (21) දින පාර්ලිමේන්තුවේදී සඳහන් කරයි.

විපක්ෂ, සමගි ජන බලවේග මන්ත්‍රීවරුන් 6 ශ්‍රේණියට විරුද්ධ වුණේ 5 වසර රචනා ලියන්න දන්නේ නැති නිසා බවද අමාත්‍ය, සභානායක බිමල් රත්නායක සඳහන් කරයි.

අමාත්‍ය, සභානායක බිමල් රත්නායක සඳහන් කළේ,

“මේගොල්ලන්ට 5 වසර රචනා කියලා දෙන්න ඕන. 5 වසර රචනා. 5 වසර රචනාව දෙන්න ඕන, 6 වසර මොඩියුල් වලට කලින්. ඊළග එකත් අහන්න.

එසේම තවදුරටත් කවර හෝ අතුරු ප්‍රශ්නයක් මගින් ඇසීමට ඇති ඉඩකඩ පිළිබද රීති උල්ලංඝණය වේ යැයි කථානායකවරයාගේ මතය වන්නේ නම්, එම අතුරු ප්‍රශ්නය අසනු ලැබීමට කථානායකවරයා විසින් ඉඩදෙනු නොලැබිය යුත්තේය.

කථානායකතුමනි මේගොල්ලෝ යවන්න ඕන 5 වසරට. 5 වසරට යවන්න ඕන. මේගොල්ලෝ 6 ශ්‍රේණියට විරුද්ධ වුණේ ඒකයි. මේගොල්ලෝ 6 ශ්‍රේණියට විරුද්ධ වුණේ, මේගොල්ලෝ 5 වසර රචනා ලියන්න දන්නෑ. මේගොල්ලෝ 5 වසර රචනා ලියන්න දන්නෑ.”

මේ අතර අමාත්‍ය, සභානායක බිමල් රත්නායකගේ ප්‍රකාශයට ප්‍රතිචාර දක්වමින් විපක්ෂ නායක සජිත් ප්‍රේමදාස අද (21) දින පාර්ලිමේන්තුවේදී සඳහන් කළේ,

“සභානායකතුමා, එතුමාගේ අදහස් ඉදිරිපත් කිරීමේදී අපේ මන්ත්‍රීතුමන්ලාට කිවුවා 5 ශ්‍රේණියවත් ඉගෙන ගෙන නෑ කියන කතාව. මම පැහැදිළිව කියන්න කැමතියි. 5 ශ්‍රේණිය කෙසේ වෙතත් 6 ශ්‍රේණියේ අසභ්‍යකරණයට මේ රජය වගකිව යුතුයි.”

ශ්‍රී ලංකා නීතිඥ සංගමය නිවේදනයක් නිකුත් කරමින් නීතිපතිවරයා ඉලක්ක කරගනිමින් මෑතකාලීනව සමාජ මාධ්‍ය ඔස්සේ පළවන සටහන් පිළිබඳව සිය කනස්සල්ල පළ කර ඇත.

මෙම සමාජ මාධ්‍ය සටහන් මගින් පුද්ගලයින් නීතිපති ධුරයේ ස්වාධීනත්වයට අසාධාරණ ලෙස බාධා කිරීමට උත්සාහ දරන බව ශ්‍රී ලංකා නීතිඥ සංගමය සඳහන් කරයි.

අපරාධමය නඩු කටයුතු වලට අදාළව නීතිපතිවරයා අර්ධ අධිකරණමය හෙවත් (quasi-judicial) කාර්යභාරයක් ඉටු කරන බව ශ්‍රී ලංකා නීතිඥ සංගමය සිය නිවේදනය මගින් පෙන්වා දී ඇත.

විමර්ශන නිලධාරීන් තමන් වෙත ඉදිරිපත් කරනු ලබන කරුණු පදනම් කරගෙන, සැකකරුවෙකුට එරෙහිව චෝදනා ගොනු කරන්නේද නැද්ද යන්න හෝ අධිචෝදනා ඉදිරිපත් කරන්නේද නැද්ද යන්න පිළිබඳව නීතිපතිවරයා තීරණය කළ යුතු බවද සඳහන් කරයි.

අදාළ කරුණු නීත්‍යානුකූලව පිළිගත හැකි සාක්ෂි ද යන්න සහ එම කරුණු මත පදනම්ව වරදකරු කිරීමේ සාධාරණ සම්භාවිතාවක් පවතින්නේ ද යන්න සලකා බැලීමට නීතිපතිවරයාට සිදුවන බවද සඳහන් කරයි.

නීතිපතිවරයාගේ තීරණ, අභියාචනාධිකරණය හමුවේ රිට් ආඥාවක් මගින් හෝ ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සම් මගින් සමාලෝචනය කළ හැකි බවද සඳහන් කරයි.

ඉන්ධන ලබාදීමේ ක්‍රියාවලිය වඩාත් කාර්යක්ෂම කිරීම සහ එහි විනිවිදභාවය තහවුරු කිරීම සඳහා ලංකා ඛනිජ තෙල් නීතිගත සංස්ථාව විසින් නව ඩිජිටල් ඉන්ධන කාඩ්පත් පද්ධතියක් හඳුන්වාදී ඇත.

ඒ අනුව මෙම නව වැඩපිළිවෙළ යටතේ සියලු රජයේ වාහන සඳහා විශේෂිත ඩිජිටල් ඉන්ධන කාඩ්පතක් නිකුත් කෙරෙන අතර එමගින් දිවයින පුරා පිහිටි ඕනෑම ඉන්ධන පිරවුම්හලකින් ඉන්ධන ලබා ගැනීමේ හැකියාව ඇත.

රජයේ වාහන සඳහා ඉන්ධන බෙදා හැරීමේදී සිදුවන දූෂණ අක්‍රමිකතා අවම කිරීම, දැනට පවතින ලිපි ලේඛන කටයුතු සීමා කරමින් කාලය ඉතුරු කිරීම රාජ්‍ය ආයනයකම ඉන්ධන භාවිතය ගැන නිවැරදිව නිරීක්ෂණය කිරීමට සහ වාර්තා තබා ගැනීමට ක්‍රමවේදයක් සකස් කිරීම මෙම පද්ධතිය හඳුන්වාදීමේ අරමුණ බව ඩිජිටල් ආර්ථික අමාත්‍යාංශය සඳහන් කරයි.

මෙම නව ඩිජිටල්කරණ වැඩපිළිවෙළ හරහා රාජ්‍ය සම්පත් වඩාත් විධිමත්ව කළමනාකරණය කිරීමටත්, ඉන්ධන නාස්තිය අවම කරමින් ජාතික ආර්ථිකයට සහාය වීමටත් ලංකා ඛනිජ තෙල් සංස්ථාව අපේක්ෂා කරන බව ඩිජිටල් ආර්ථික අමාත්‍යාංශය සඳහන් කරයි.

පසුගිය 2016 ජනවාරි (01) වන දිනෙන් පසු බඳවාගත් රාජ්‍ය නිලධාරින්ගේ පත්වීම් ලිපිවල විශ්‍රාම වැටුප් හිමිකම සම්බන්ධ විධිවිධානය සංශෝධනය කිරීමට අමාත්‍ය මණ්ඩල අනුමැතිය හිමිව ඇත.

රාජ්‍ය නිලධාරින් සඳහා වඩාත් සුදුසු දායක විශ්‍රාම වැටුප් ක්‍රමයක් හඳුන්වාදීම සම්බන්ධයෙන් වූ 2016 අයවැය යෝජනාවක් අනුව 2016 ජනවාරි (01) දින සිට රාජ්‍ය සේවයට බඳවාගනු ලැබූ සියලු නිලධාරීන්ගේ පත්වීම් ලිපිවල පහත විධිවිධානයක් ඇතුළත් කර ඇත.

“මෙම පත්වීම විශ්‍රාම වැටුප් සහිතය. ඔබට හිමි විශ්‍රාම වැටුප් ක්‍රමය පිළිබඳ රජය විසින් ඉදිරියේදී ගනු ලබන ප්‍රතිපත්තිමය තීරණයකට ඔබ යටත් විය යුතු වේ.”

එහෙත්, 2016 ජනවාරි (01) වන දිනයෙන් පසු රාජ්‍ය සේවයේ පත්වීම්ලාභීන්හට නව විශ්‍රාම වැටුප් ක්‍රමයක් මෙතෙක් ක්‍රියාත්මක කර නොමැති අතර පවතින විශ්‍රාම වැටුප් ක්‍රමයට ඔවුන්ගේ හිමිකම තහවුරු කර අදාළ පත්වීම් ලිපිවල සඳහන් විශ්‍රාම වැටුප සම්බන්ධ කොන්දේසිය සංශෝධනය කිරීම සඳහා 2026 අයවැය මඟින් යෝජනා කළේය.

2016 ජනවාරි (01) දිනෙන් පසුව රාජ්‍ය සේවයට බඳවාගත් සියලුම රාජ්‍ය නිලධාරින්ගේ පත්වීම් ලිපිවල සඳහන් විශ්‍රාම වැටුප් සම්බන්ධ විධිවිධානය,

“මෙම පත්වීම විශ්‍රාම වැටුප් සහිතය. තවද, ඔබ වැන්දඹු හා අනත්දරු විශ්‍රාම වැටුප් ක්‍රමයට/වැන්දඹු පුරුෂ හා අනත්දරු විශ්‍රාම වැටුප් ක්‍රමයට දායක විය යුතුය. රජය මඟින් විටින් විට නියම කරනු ලබන ආකාරයට ඔබ විසින් ඒ සඳහා දායක මුදල් ගෙවිය යුතුය.”

එලෙස සංශෝධනය කිරීමටත්, ඊට අදාළ චක්‍රලේඛ උපදෙස් නිකුත් කිරීමටත් රාජ්‍ය පරිපාලන, පළාත් සභා සහ පළාත් පාලන අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.