Local news

ඉන්දීය නාවික හමුදාවට අයත් INS සින්දුකේසරි සබ්මැරීනය දින තුනක මෙහෙයුම් චාරිකාවක් සඳහා කොළඹට පැමිණ ඇත.

කොළඹ වරාය වෙත පැමිණි සබ්මැරීනයට ශ්‍රී ලංකා නාවික හමුදාවෙන් සාම්ප්‍රදායික පිළිගැනීමක් ලබාදුන් බව වාර්තා වේ.

INS සින්දුකේසරි සබ්මැරීනය නේටෝ සංවිධානයේ වර්ග කිරීම අනුව ටොන් 3000ක් කිලෝ පන්තියේ ඩීසල් – විදුලි (Kilo-class diesel-electric) සබ්මරීනයකි.

ගාල්ල බන්ධනාගාර රැඳවියන් පැවැත්වූ උපන්දින සාදයක වීඩියෝවට අදාළව වාර්තාවක් කැඳවා ඇති බව බන්ධනාගාර දෙපාර්තමේන්තුව සඳහන් කරයි.

මෙම සිදුවීම කුමන කාලයේ සිදුවූවක්ද යන්න පිළිබඳ සොයා බලා කඩිනමින් වාර්තාවක් ලබාදෙන ලෙස ගාල්ල බන්ධනාගාර අධිකාරිවරයාට දැනුම් දී ඇති බව බන්ධනාගාර මාධ්‍ය ප්‍රකාශක බන්ධනාගාර කොමසාරිස් ඒ.සී ගජනායක සඳහන් කරයි.

එම වීඩියෝවේ සිටින බොහෝ රැඳවියන් මේ වනවිට ඇප මත නිදහස ලබා පිටව ගොස් ඇතැයිද, බන්ධනාගාර මාධ්‍ය ප්‍රකාශක බන්ධනාගාර කොමසාරිස් ඒ.සී ගජනායක සඳහන් කරයි.

අපරාධ කල්ලි සාමාජිකයෙකු බව කියන ‘අහුංගල්ලේ ලොකු පැටී’ නමැත්තාගේ සමීපතමයෙකු වන නාමල් නොහොත් ‘පොඩියා’ නමැත්තාගේ උපන්දිනය සමරන බව කියන වීඩියෝවක් මේ දිනවල සමාජ මාධ්‍ය ඔස්සේ සංසරණය වේ.

කටුගස්තොට, ගුහාගොඩ ප්‍රදේශයේදී වෙඩි තැබීමක් සිදුව ඇත.

මෙම වෙඩි තැබීමෙන් පුද්ගලයෙකු තුවාල ලබා ඇති අතර ඔහු මහනුවර ජාතික රෝහලට ඇතුළත් කර ඇත.

වෙඩි තැබීමෙන් තුවාල ලැබු පුද්ගලයා මහනුවර ජාතික රෝහලේ පිරිසිදු කිරීම් අධික්ෂකවරයෙකු බව වාර්තා වේ.

විදෙස් රටක නිෂ්පාදිත පිස්තෝල අවියක්, පතරොම් ගැබ් 01ක්, ජීව පතරොම් 16ක් හා අයිස් මත්ද්‍රව්‍ය ග්‍රෑම් 11 මිලිග්‍රෑම් 500ක් සමග සැකකරුවෙක් අම්බලන්ගොඩ, බලපිටිය ප්‍රදේශයේදී අත්අඩංගුවට ගෙන ඇත. 

මෙලෙස අත්අඩංගුවට ගෙන ඇත්තේ වයස අවුරුදු 31ක් වන බලපිටිය ප්‍රදේශයේ පදිංචිකරුවෙක් වන අතර අහුංගල්ල පොලිස් ස්ථානයේ නිලධාරීන් කණ්ඩායමක් විසින් සිදුකළ වැටලීමකදී ඔහු අත්අඩංගුවට ගෙන ඇත.

මෙම පිස්තෝල අවිය මීට දින කිහිපයකට පෙර වෙනත් පුද්ගලයෙකු විසින් මොහුට ලබාදී ඇති බවට අනාවරණය වී ඇති අතර එම සැකකරුද අම්බලන්ගොඩ, වාද්දූව ප්‍රදේශයේදී අත්අඩංගුවට ගෙන ඇත. 

අත්අඩංගුවට ගත් මෙම සැකකරුවන් දෙදෙනා සංවිධානාත්මක අපරාධකරුවෙකු වන ලොකු පැටී නමැත්තාගේ ගෝලයින් බවට අනාවරණය වී ඇත.

අද (03) දින ගාල්ල බන්ධනාගාරය තුළ වෙඩි තැබීමක් සිදුව ඇති බව පොලිස් මාධ්‍ය කොට්ඨාසය සඳහන් කරයි.

බන්ධනාගාරගත කර සිටින සිරකරුවන් දෙදෙනෙකු පලායෑමට උත්සහා කිරීමේදී නිලධාරින් විසින් මෙම වෙඩිතැබීම සිදුකර ඇත. 

වෙඩි තැබීමෙන් තුවාල ලැබූ එක් අයෙකු කරාපිටිය රෝහලට ඇතුළත් කර ඇති බව පොලිස් මාධ්‍ය කොට්ඨාසය සඳහන් කරයි.

වාහන මිල ගණන් ඉදිරියේදී ඉහළ යනු ඇති බව ශ්‍රී ලංකා වාහන ආනයනකරුවන්ගේ සංගමයේ සභාපති ප්‍රසාද් මානගේ සඳහන් කරයි.

මැයි මාසයේ සිට සමාජ ආරක්ෂණ බද්ධ 2.5 දක්වා ඉහළ දැමීම, වාහන මිල වැඩි වීමට හේතුවක් වනු ඇති බවද ප්‍රසාද් මානගේ සඳහන් කරයි.

සභාපති ප්‍රසාද් මානගේ සඳහන් කළේ,

“රජය වාහනය ආනයනය කරන එකෙන් ලොකු ආදායමක් බලාපොරොත්තු වෙනවා. මගේ ගණනය කිරීම හරි නම්, බිලියන 700ක් විතර මේ වතාවේ බලාපොරොත්තු වෙනවා. රජයට වැඩිපුර ආදායමක් ලබා දෙන්නේ අපි.

විශේෂයෙන්ම භාවිත කරන ලද කාර් වලින්. ආණ්ඩුව බලාපොරොත්තු වෙනවා ඩොලරයකට ඩොලර් 1.5ක ආදායමක්. අපි ගෙන්වන වාහනවලදී ඩොලර් දෙකක්, 2.5ක් දක්වා බදු ගෙවනවා.

සමහර විද්‍යුත් වාහන ආනයනයේදී තියෙන බදු ප්‍රශ්න නිසා ඩොලර් එකකට ඊටත් වඩා අඩු ආදායමක් තමයි ලැබෙන්නේ. මේවා විශ්ලේෂණය කරලා බලන්න කියලා අපි රජයට කියලා තියෙනවා.

රජය බලාපොරොත්තු වෙන ආදායමට වඩා වැඩි ප්‍රමාණයක් භාවිත කළ කාර් වලින් ලැබෙන නිසා රජය දිනුම් වගේ පේනවා.  

මැයි මාසයේ සිට සමාජ ආරක්ෂණ දායකත්ව බද්ධ 2.5ක් වෙලා තියෙනවා. ඒ එකක්ම විදේශ විනිමය අනුපාතවල අගයන් වැඩි වෙලා තියෙනවා. වාහනවල මිල යම් ඉහළ යාමක් ඉදිරියේදී දකින්න පුළුවන්.”