පොලිස් නිලධාරීන් පිරිසකට පහරදී මරණ තර්ජනය එල්ල කිරීමේ චෝදනා වලට වරදකරු වූ සමගි ජන බලවේගයේ බදුල්ල දිස්ත්රික් පාර්ලිමේන්තු මන්ත්රී චමින්ද විජේසිරිට බදුල්ල මහාධිකරණය විසින් (28) මාස 18ක සිරදඬුවමක් නියම කළේය.
මන්ත්රී චමින්ද විජේසිරි සහ රියදුරු බන්දුල රත්නායක යන විත්තිකරුවන් දෙදෙනා චෝදනා 4කටත්, ඇමති ආරක්ෂක සේවයේ පොලිස් නිලධාරී රසික කරුණාතිලක චෝදනා 3ටත් වැරදිකරු බව තීරණය කළේය.
මේ අතර පාර්ලිමේන්තු මන්ත්රීවරයෙකුට වසර දෙකකට නොඅඩු සිර දඬුවමක් නියම කළ හැකි වරදකට, මාස හයකට වැඩි කාලයක් සිරදඬුවම් නියම කිරීමට අධිකරණය තීන්දු කළහොත්, අදාළ මන්ත්රීවරයාගේ මන්ත්රී ධුරය වහාම අහෝසි වන බව මහාචාර්ය නීතිඥ ප්රතිභා මහානාම හේවා සඳහන් කරයි.
එවැනි දඬුවමකට ලක්වන පුද්ගලයෙකුට වසර හතක කාලයක් යනතුරු මැතිවරණයකට ඉදිරිපත් වීමට හෝ ඡන්දය ප්රකාශ කිරීමට පවා නීතිමය හිමිකමක් නොමැති බවද මහාචාර්ය නීතිඥ ප්රතිභා මහානාම හේවා සඳහන් කරයි.
කෙසේ වෙතත් අධිකරණ තීන්දුවට එරෙහිව මන්ත්රීවරයා ඇපෑලක් හෙවත් අභියාචනයක් ඉදිරිපත් කළහොත්, එම අභියාචනා ක්රියාවලිය අවසන් වනතුරු මන්ත්රී ධුරය අහෝසි නොවන බවද මහාචාර්ය නීතිඥ ප්රතිභා මහානාම හේවා සඳහන් කරයි.
මන්ත්රී චමින්ද විජේසිරිට වසර එකහමාරක සිර දඬුවමක් නියම කිරීමත් සමඟ ඔහුගේ මන්ත්රී ධුරය පිළිබඳව නීතිමය ගැටලුව සම්බන්ධයෙන් අදහස් දක්වමින් මහාචාර්ය නීතිඥ ප්රතිභා මහානාම හේවා මේ බව සඳහන් කරයි.
