දිලිත් ජයවීර, උදය ගම්මන්පිල, විමල් වීරවංශ සුගීෂ්වර බණ්ඩාර,අසංක නවරත්න, මහින්ද පතිරණට එරෙහිව අධිකරණයට අපහාස කිරීමේ චෝදනා මත අභියාචනාධිකරණයට කරුණු වාර්තා කරන්නැයි, කොටුව මහේස්ත්රාත් අධිකරණය (05) දින නියෝග කර ඇත.
පාස්කු ප්රහාරයට සම්බන්ධ හිටපු ජාතික බුද්ධි ප්රධානී සුරේෂ් සලේ අත්අඩංගුවට ගැනීමට එරෙහිව පසුගිය ජූලි (07) සහ (15) අතර පැවති සත්යග්රහය අතරතුර අධිකරණ ක්රියාවළිය විවේචනය වන අයුරින් ප්රසිද්ධියේ අදහස් පලකිරීමේ චෝදනාවට අදාළව එම නියෝගය කර ඇත.
ජූනි (07) වනදා කොටුව දුම්රිය පොළ ඉදිරිපිට සත්යග්රහයක නිරත වෙමින් සහ විවිධ ප්රකාශ නිකුත් කරමින් මොවුන් අධිකරණයට අපහාස කර ඇති බවට අපරාධ පරීක්ෂණ දෙපාර්තමේන්තුව දීර්ඝ වාර්තාවක් මගින් අධිකරණයට කරුණු ඉදිරිපත් කර තිබුණේය.
මේ සම්බන්ධයෙන් සිදුකල විමර්ශනයට අදාළව අපරාධ පරීක්ෂණ දෙපාර්තමේන්තුව (05) දින කොටුව මහේස්ත්රාත් පසන් අමරසේන හමුවේ කරුණු වාර්තා කළේය.
මෙම පුද්ගලයින්ගේ ප්රකාශවලින් අධිකරණ ක්රියාවලිය විවේචනය කර ඇතැයි බැලූ බැල්මට පෙනී යන බව එහිදී මහේස්ත්රාත් අධිකරණය තීරණය කළේය.
මේ සම්බන්ධයෙන් ඉදිරි නීතිමය පියවර ගැනීම සඳහා මෙම තීරණය අභියාචනාධිකරණය වෙත දැනුම් දීමට කොටුව මහේස්ත්රාත්වරයා නියෝග කළේය.
