ඉස්ලාම් දහමට අපහාස වන ආකාරයේ ප්රකාශයක් සිදු කළේ යැයි චෝදනා කරමින් බොදු බල සේනා සංවිධානයේ ලේකම් පූජ්ය ගලගොඩඅත්තේ ඥානසාර හිමිට එරෙහිව ගොනු කර තිබෙන නඩුව ඊයේ (01) කොළඹ මහාධිකරණ විනිසුරු බුද්ධික සී. රාගල ඉදිරියේ කැඳවිය.
ඒ අනුව බොදු බල සේනා සංවිධානයේ ලේකම් පූජ්ය ගලගොඩඅත්තේ ඥානසාර හිමිට එරෙහිව ගොනු කර තිබෙන නඩුව විභාග කරන දිනය නියම කිරීම සඳහා එළඹෙන ජූනි මස (26) වනදා කැඳවන ලෙස කොළඹ මහාධිකරණය ඊයේ (01) නියම කළේය.
පසුගිය 2014 වසරේ විල්පත්තුව ප්රදේශයේ නැවත පදිංචි කිරීම් සම්බන්ධයෙන් සිදු කළ ප්රකාශයකින් ඉස්ලාම් දහමට අපහාසයක් සිදුකර ඇති බවට චෝදනා කරමින් නීතිපතිවරයා විසින් පූජ්ය ගලගොඩඅත්තේ ඥානසාර හිමිට එරෙහිව මෙම නඩුව ගොනු කර ඇත.
එහිදී මෙම නඩුවට අදාළ වීඩියෝ සාක්ෂි මෙහෙයවීමට තමන් අපේක්ෂා කරන බවත් ඊට අදාළ වීඩියෝ දර්ශන ඇතුළත් සංයුක්ත තැටි කොටුව මහේස්ත්රාත් අධිකරණයේ තිබෙන බවත් එම සංයුක්ත තැටි කොළඹ මහාධිකරණයට ගෙන්වා ගැනීම සඳහා අවශ්ය නියෝග නිකුත් කරන ලෙස රජයේ නීතිඥවරයා අධිකරණය හමුවේ කරුණු දක්වමින් ඉල්ලා සිටියේය.
“මීට වසර 14කට පමණ පෙර” සිදුවූ සිද්ධියක් පදනම් කරගෙන මෙම නඩුව ගොනු කර තිබෙන බවත් එය “කෙටියෙන් අවසන් කර ගැනීමට” සිය සේවාදායකයා අපේක්ෂා කරන බවත් ඒ පිළිබඳ නීතිපතිවරයා සමග සාකච්ඡා කිරීමට තමන් කටයුතු කරන බව විත්තිකාර ඥානසාර හිමි වෙනුවෙන් පෙනී සිටි නීතිඥවරයා අධිකරණය හමුවේ සඳහන් කරයි.
අනතුරුව විනිසුරුවරයා සඳහන් කළේ, මෙම චෝදනාවලට වරද පිළිගෙන නඩුව අවසන් කිරීමට විත්තිකරුට හැකියාව තිබෙන බවත් එම කටයුතු වලට තම අධිකරණය මැදිහත් නොවන බවයි.
විනිසුරුවරයා මෙම නඩුව විභාග කරන දිනය නියම කිරීම සඳහා ජූනි මස (26) වනදා කැඳවන ලෙස නියම කළේය.