ශ්රී ලංකාවේ ආරක්ෂක ලේකම් එයාර් වයිස් මාර්ෂල් සම්පත් තුයිය කොන්තා (විශ්රාමික) රුසියාවේ මොස්කව් නුවර (28) පැවැත්වුණු “ආරක්ෂක කරුණු පිළිබඳ උසස් නිලධාරීන්ගේ 14 වන ජාත්යන්තර හමුව” (XIV International Meeting of High-Ranking Officials Responsible for Security Matters) සඳහා සහභාගී විය.
එහිදී ඔහු විසින් නව ගෝලීය ආරක්ෂක අභියෝග (Emerging Global Challenges) පිළිබඳව අදහස් දැක්වීමක් සිදු කළේය.
එම හමුවේදී, ආරක්ෂක ලේකම්වරයා ඉන්දියන් සාගර කලාපයේ ඇති භූ – දේශපාලනික වැදගත්කම පෙන්වා දුන් අතර, මෙම කලාපය සාමය, සහයෝගීතාවය සහ සාමුහික දියුණුවක් පවතින කලාපයක් ලෙස පවත්වා ගෙන යාමේ වැදගත්කම අවධාරණය කළේය.
එමෙන්ම, කලාපීය තරඟකාරීත්වයන්, ගැටුම් දක්වා දුරදිග යාම වැළැක්වීම සඳහා නාවික ගමනාගමනයේ නිදහස සුරැකීම, ජාත්යන්තර නීතිවලට ගරුකිරීම සහ රටවල් අතර සුහද සංවාද පැවැත්වීමෙහිලා ඇති වැදගත්කම පිළිබඳව ඔහු සඳහන් කළේය.
තවද, ත්රස්තවාදය, සයිබර් අපරාධ, මුහුදු සීමාවන්හි අනාරක්ෂිතභාවය සහ දේශගුණික විපර්යාස හේතුවෙන් ඇති වන අවදානම් වැනි නූතන තර්ජන වලට මුහුණ දීම සඳහා අවැසි ජාත්යන්තර සහයෝගීතාවය, බුද්ධි තොරතුරු හුවමාරු කර ගැනීම සහ සාමූහිකව ක්රියා කිරීම ඉතා වැදගත් බවද ඔහු කියා සිටියේය.
සංකීර්ණ ගෝලීය වටපිටාවක විශ්වාසය සහ කලාපීය ස්ථාවරත්වය ඇති කිරීම සඳහා කුඩා රටවලට විශාල කාර්යභාරයක් පැවරෙන බව පෙන්වා දුන් ආරක්ෂක ලේකම්වරයා, නොබැඳි පිළිවෙත සහ සාමකාමී සහජීවනය වෙනුවෙන් ශ්රී ලංකාව තුළ ඇති කැපවීම ද සිහිපත් කළේය.