පෞද්ගලික රසායනාගාරයකින් Full Blood Count (FBC) රුධිර පරීක්ෂාවක් සඳහා රුපියල් 550ක බැගින් අය කර ඇති බවට පාරිභෝගික කටයුතු පිළිබඳ අධිකාරියේ නිලධාරීන් විසින් සිදුකරන ලද විශේෂ වැටලීමකදී අනාවරණය කරගෙන ඇත.
යාපනය, පලාලි පාර, කන්දර්මඩම් ප්රදේශයේ පිහිටි පෞද්ගලික ආයතනය විසින් එම පරීක්ෂාව සිදුකර ඇති අතර අනතුරුව මෙම සිද්ධිය සම්බන්ධයෙන් පාරිභෝගික කටයුතු පිළිබඳ අධිකාරිය විසින් යාපනය මහෙස්ත්රාත් අධිකරණය හමුවේ නඩු පවරා ඇත.
අනතුරුව අධිකරණයේදී විත්තිකාර ආයතනය අදාළ චෝදනාවට වරද පිළිගැනීමෙන් පසුව අධිකරණය විසින් එම ආයතනයට රුපියල් ලක්ෂ 30ක, එනම් රුපියල් මිලියන 03ක දඩයක් නියම කර ඇත.
තවද, සිදුකරන ලද එම වරද සම්බන්ධයෙන් විත්තිකාර ආයතනයේම වියදමින් ප්රධාන පුවත්පත්වල දැන්වීමක් පළ කරන ලෙසද අධිකරණය නියෝග කර ඇත.
පෞද්ගලික රෝහල් සහ වෛද්ය රසායනාගාර වලින් අය කරනු ලබන ඇතැම් වෛද්ය පරීක්ෂණ ගාස්තු සම්බන්ධයෙන් පාරිභෝගික කටයුතු පිළිබඳ අධිකාරිය, නියමිත උපරිම ගාස්තු පනවා ඇත.
ඒ අනුව, Full Blood Count (FBC) රුධිර පරීක්ෂාවක් සඳහා පෞද්ගලික අංශයෙන් අය කළ හැකි උපරිම ගාස්තුව රුපියල් 400කි. එනිසා වෛද්ය රසායනාගාරයකින් සේවාවක් ලබාගැනීමේදී නියමිත උපරිම ගාස්තු පිළිබඳ විමසිලිමත් වන පාරිභෝගික කටයුතු පිළිබඳ අධිකාරිය දැනුම් දෙයි.
ඔබ ගෙවන සෑම මුදලක් සඳහාම නිවැරදි බිල්පතක් හෝ රිසිට්පතක් ලබා ගන්නා ලෙසත් එය ඔබේ පාරිභෝගික අයිතියක් වන අතර අවශ්ය අවස්ථාවක එය වැදගත් සාක්ෂියක් ලෙස භාවිත කළ හැකිය.
