හිටපු ජනාධිපති මහින්ද රාජපක්ෂගේ පුත් පාර්ලිමේන්තු මන්ත්රී නාමල් රාජපක්ෂගේ විවාහ උත්සවය සඳහා භාවිත කළ විදුලිය වෙනුවෙන් ගෙවිය යුතු ගාස්තු ගෙවීම පැහැර හැරීම තුළින් ජනතාවගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙස ඉල්ලා ගොනු කළ මූලික අයිතිවාසිකම් පෙත්සම ඒ.එච්.එම්.ඩී. නවාස් සහ සම්පත් අබේකෝන් යන ශ්රේෂ්ඨාධිකරණ විනිසුරු මඩුල්ල ඉදිරියේ (24) දින කැඳවයි.
නීතිඥ විජිත කුමාර නමැත්තෙකු මෙම පෙත්සම ඉදිරිපත් කර ඇති අතර පෙත්සම්කරු කියා සිටියේ, පාර්ලිමේන්තු මන්ත්රී නාමල් රාජපක්ෂගේ විවාහ උත්සවය පසුගිය 2019 වසරේ සැප්තැම්බර් මස (12) වනදා සිට (15) වනදා තෙක් මහින්ද රාජපක්ෂගේ වීරකැටියේ පිහිටි නිවසේදී පැවති බවයි.
පාර්ලිමේන්තු මන්ත්රී නාමල් රාජපක්ෂගේ විවාහ උත්සවය සඳහා ලබාගත් විදුලිය වෙනුවෙන් අය විය යුතු මුදල රුපියල් 2,682,246.57ක් බව පෙත්සම්කරු සඳහන් කරයි.
තම නිවසේ රුපියල් 7,390ක මාසික විදුලි බිල නොගෙවීම හේතුවෙන් නිවසේ විදුලිය විසන්ධි කිරීමට විදුලි බල මණ්ඩලය කටයුතු කළ බව පෙත්සම්කරු සඳහන් කරයි.
එහෙත් අතිවිශාල විදුලි බිලක් නොගෙවා තිබියදී වීරකැටිය නිවසේ විදුලිය විසන්ධි නොකර තම නිවසේ විදුලිය කප්පාදු කිරීමට විදුලි බල මණ්ඩලයේ බලධාරීන් කටයුතු කළ ආකාරය සම්පූර්ණයෙන්ම නීතිය ඉදිරියේ අසමාන ක්රියාකලාපයක් බවද පෙත්සම්කරු සඳහන් කරයි.
ආණ්ඩුක්රම ව්යවස්ථාවේ 12(1) වගන්තිය මගින් සහතික කර ඇති මූලික අයිතිවාසිකම් මේ තුළින් උල්ලංඝනය වන බවට තීන්දුවක් ලබා දෙන ලෙස පෙත්සම්කරු අධිකරණයෙන් ඉල්ලා සිටියේය.
ඉදිරිපත් වූ කරුණු සලකා බැලූ විනිසුරු මඩුල්ල ලංකා විදුලි බල මණ්ඩලය මේ වනවිට ප්රතිව්යුහගත කරණයකට ලක්වී ඇති බැවින් ඊට අදාළ අනුප්රාප්තික සමාගම මෙම පෙත්සමේ වගඋත්තරකරුවෙකු ලෙස නම් කිරීමට පෙත්සම්කාර පාර්ශ්වයට අවසර ලබා දුන්නේය.
අනතුරුව මෙම පෙත්සම දෙසැම්බර් මස (04) වනදා විභාගයට ගැනීමට අධිකරණය දින නියම කළේය.
