අද ප්‍රදේශ රැසකට තද සුළං

අද (07) දිනයේ දිවයිනේ ප්‍රදේශ රැසක පැයට කිලෝමීටර් 40ත් 50ත් අතර තද සුළං ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

මධ්‍යම, උතුරු සහ උතුරු-මැද පළාත්වලටත්, රත්නපුර, හම්බන්තොට සහ ත්‍රිකුණාමලය දිස්ත්‍රික්කවලත් එලෙස තද සුළං බලාපොරොත්තු විය හැකි බව එම දෙපාර්තමේන්තුව සඳහන් කරයි.

කන්කසන්තුරේ සිට මන්නාරම හරහා පුත්තලම දක්වා සහ මාතර සිට හම්බන්තොට හරහා පොතුවිල් දක්වා වන මුහුදු ප්‍රදේශ ඉතා රළු විය හැකි බවට එම දෙපාර්තමේන්තුව අනතුරු අඟවයි.

එම මුහුදු ප්‍රදේශවල සුළඟේ වේගය පැයට කිලෝමීටර් 55ත් 65ත් දක්වා වැඩි විය හැකි බවද එම දෙපාර්තමේන්තුව සඳහන් කරයි.