රට තුළ ගෑස් සැපයුම ස්ථාවර කර ගැනීමට සහ පවතින අවශ්යතා සපුරාලීමට හැකි වනු ඇති බව ජනාධිපති අනුර කුමාර දිසානායක සඳහන් කරයි.
මාර්තු මාසය තුළ ලිට්රෝ ගෑස් මෙට්රික්ටොන් 38,000ක් දැනටමත් රටට ගෙනවිත් ඇති බවත් ඉදිරි දින දෙකක් ඇතුළත මෙට්රික් ටොන් 33,000ක් ගෑස් තොග මෙරටට ලැබීමට නියමිත බව ජනාධිපතිවරයා සඳහන් කරයි.
අද (17) දින පැවැති විශේෂ මාධ්ය හමුවක් අමතමින් ජනාධිපතිවරයා සඳහන් කළේ,
“ගෑස් පිළිබඳව ගතහොත් අපිට මාර්තු මාසයේ ගෑස් අවශ්යතාව තිබුණේ මෙට්රික් ටොන් 33,000යි. එහෙත් පෞද්ගලික සමාගමක් ගෑස් සැපයුම අඩපණ කර තිබෙන නිසා මාර්තු මාසයට අපි 38,000ක් ඇනවුම් කළා. ඊට අවශ්ය වන ගෑස් තමයි අපේ ලිට්රෝ සමාගම ආනයනය කරන්නේ. ඒ මෙට්රික් ටොන් 38,000ම දැන් ලැබී තිබෙනවා.
සමහර ඒවා වෙළෙඳපොළට නිකුත් කර තිබෙනවා. සමහර ඒවා දේශීය ගබඩාවල තිබෙනවා. අනෙක් ඒවා මාලදිවයිනේ පාවෙන ගබඩාවල තැන්පත් කර තිබෙනවා. අපි තව ගෑස් නැවක් ඇනවුම් කර තිබෙනවා. ඒ අනුව හෙට හෝ අනිද්දා මෙට්රික් ටොන් 33,000ක ගෑස් නැවක් ලැබීමට නියමිතව තිබෙනවා. ඒ නිසා ගෑස් වෙළෙඳපොළෙහි අර්බුදයක් මතු වන්නේ නැහැ.
ඊළඟට ගෑස් සපයන්න තිබෙන්නේ අප්රේල් 21-23 කාලයේ. ඒ කාලයේදී ඊළඟ නැව ඔවුන් අපට ලබා දේවි කියල අපට විශ්වාසයක් තිබෙනවා. ගෑස් වෙළෙඳපොළේ අර්බුදයක් ඇති වීමේ අනතුර අඩුයි.”