අල්ලස් කොමිසම විසින් ගොනුකළ දූෂණ චෝදනාවක් යටතේ වරදකරු කළ හිටපු අමාත්ය පියංකර ජයරත්නට වසර 7ක බරපතළ වැඩසහිත සිරදඬුවම් නියම කර ඇත.
කොළඹ මහාධිකරණය විසින් මීට සුළු මොහොතකට පෙර හිටපු අමාත්ය පියංකර ජයරත්නට වසර 7ක බරපතළ වැඩසහිත සිරදඬුවම් නියම කළේය.
පසුගිය 2014 වසරේ එක්සත් ජනතා නිදහස් සන්ධානයේ මැයි දින පෙළපාළියට සහභාගි වූ දේශපාලන ආධාරකරුවන්ට ආහාර ලබාදීම සඳහා ශ්රී ලන්කන් කේටරින් සමාගමේ ගිණුමෙන් මුදල් ගෙවීමක් සම්බන්ධයෙන් එවකට සිවිල් ගුවන්සේවා අමාත්ය පියංකර ජයරත්නට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව කොළඹ මහාධිකරණ හමුවේ අධිචෝදනා ගොනුකර තිබුණි.
රාජ්ය සමාගමක් වන ශ්රී ලන්කන් කේටරින් සමාගමේ ගිණුමෙන් අදාළ සංග්රහ කටයුතු සඳහා මාරවිල පිහිටි පෞද්ගලික කේටර්ස් ආයතනයට රුපියල් තුන්ලක්ෂ තිස්දහසක මුදලක් ගෙවා ඇති බවට චෝදනාවල සඳහන් වේ.
කොළඹ මහාධිකරණ විනිසුරු මොහොමඩ් මිහායිල් හමුවේ සිදුකෙරුණු දීර්ඝ නඩු විභාගයකින් පසුව එහි තීන්දුව ප්රකාශයට පත්කිරීම අද (01) දිනට දින නියම කර තිබුණේය.
ඒ අනුව පළමු චෝදනාව යටතේ වසර 7ක සිරදඬුවම් සහ දෙවැනි චෝදනාව යටතේ තවත් වසර 7ක සිරදඬුවම් නියම කළ අතර ඒ අනුව වසර 14ක් වු සිරදඬුවම වසර 7කින් එකවර ගෙවීයන ලෙස පැනවීමට කොළඹ මහාධිකරණය නියෝග කර ඇත.
තවද පියංකර ජයරත්නට රුපියල් ලක්ෂ දෙකක දඩයක්ද පැනවීමට කොළඹ මහාධිකරණය නියෝග කර ඇත.
