හිටපු පාර්ලිමේන්තු මන්ත්රී බැසිල් රාජපක්ෂට එරෙහිව මාතර සහ කොටුව අධිකරණ මගින් වරෙන්තු නිකුත් කර ඇතත්, ඔහු දිගින් දිගටම අධිකරණය පැහැර හරිමින් සහ මග හරිමින් සිටින බව මහජන ආරක්ෂක අමාත්ය ආනන්ද විජේපාල සඳහන් කරයි.
හිටපු මන්ත්රී බැසිල් රාජපක්ෂ රටෙන් පැන ගොස් සැගවී සිටින්නේ තමන් කළ අපරාධ හෙළිවේ යැයි පවතින බිය සහ නීතියට ඇති බිය නිසා බවද අමාත්ය ආනන්ද විජේපාල සඳහන් කරයි.
ශිෂ්ටසම්පන්න පුරවැසියන් ලෙස කළ යුත්තේ අධිකරණයට ඉදිරිපත් වී තමන්ගේ නිර්දෝෂීභාවය ඔප්පු කිරීම මිස, මහජන දේපළ කොල්ලකා නීතිය මගහැර සිටීම නොවන බවද අමාත්යවරයා සඳහන් කරයි.
නීතිපති දෙපාර්තමේන්තුව ඉදිරිපත් කරන ලද කරුණු සලකා බැලීමෙන් අනතුරුව අධිකරණය මෙම වරෙන්තු නිකුත් කර ඇති බවත් ඉදිරි නඩු දිනයේදී ඔහු අනිවාර්යයෙන්ම අධිකරණය හමුවේ පෙනී සිටිය යුතු බවද අමාත්යවරයා සඳහන් කරයි.
බැසිල්ට දැන් පැවරී ඇත්තේ අධිකරණය හමුවට පැමිණ තමාට එරෙහි වරෙන්තුව ඉවත් කරවා ගැනීම බවත් එසේ නොමැති නම් නීතිය ක්රියාත්මක කරන ආයතනයක් ලෙස පොලිසිය විසින් ගත යුතු ඉදිරි නීතිමය ක්රියාමාර්ග ගැනීමට පසුබට නොවන බවද අමාත්යවරයා සඳහන් කරයි.
දේශපාලනඥයෙක්ද.? නැද්ද යන්න හෝ පුද්ගලයාගේ තරාතිරම කුමක්ද.? යන්න ශ්රී ලංකා පොලිසියට අදාළ නොවන බවත් වරෙන්තු ලැබූ ඕනෑම අයෙකුට එරෙහිව තදින්ම නීතිය ක්රියාත්මක කරන බවද අමාත්යවරයා සඳහන් කරයි.
මෙරට නඩු විභාග සඳහා අවශ්ය පුද්ගලයන් සොයා ගැනීමට ජාත්යන්තර පොලිසිය හරහා ‘බ්ලූ නෝටිස්’ නිකුත් කරන බවත් අපරාධ නීතිය යටතේ ඔවුන් ලංකාවට ගෙන්වා ගැනීම සඳහා රතු නිවේදන නිකුත් කිරීමට අවශ්ය සියලු නීතිමය පියවර ගන්නා බවද අමාත්යවරයා සඳහන් කරයි.