Local news

දුවේ පුතේ, තාත්තා කෙනෙක් විදිහට මං කියන්නේ තව අවුරුදු 5කින් අපි කොතනද ඉන්නේ, තව අවුරුදු 10න් රට කොතනද තියන්නේ කියලා නාමල් රාජපක්ෂගෙන් අහලා දැනගන්නා ලෙසට හිටපු මන්ත්‍රී ඉන්දික අනුරුද්ධ සඳහන් කරයි.

ඉන්දික අනුරුද්ධ සඳහන් කළේ,

“හැම තරුණයෙක්ම ප්‍රශ්න කරන්න ඕන නාමල් රාජපක්ෂගෙන්. තව අවුරුදු 5කින් අපි කොතනද ඉන්නේ. තව අවුරුදු 10න් රට කොතනද තියන්නේ. අන්න ඒ ප්‍රශ්න ටික, අන්න ඒ උත්තර ටික අපි නාමල් රාජපක්ෂගෙන් ගත යුතුමයි.

මම මේ තාත්තා කෙනෙක් විදිහට කියන්නේ. දුවේ පුතේ තාත්තා කෙනෙක් විදිහට මං කියන්නේ, අනාගතේ හදන නායකයාගෙන් අපි අහන්න ඕන, උබලා අපිව කොහෙටද ගිහින් තියන්නේ. උබලා රටට මොනවද දෙන්නේ. අපි රැවටුනේ ඉබාගාතේ ගිහිල්ලා.”

ශ්‍රී ලංකා පොදුජන පෙරමුණේ කැළණිය ආසනයේ තරුණ සමුළුව අමතමින් ඉන්දික අනුරුද්ධ මේ බව සඳහන් කරයි.

අග්‍රාමාත්‍ය ආචාර්ය හරිනි අමරසූරිය අද (19) උදෑසන ස්විට්සර්ලන්තයේ පැවැත්වෙන 56 වන ලෝක ආර්ථික සංසදයේ වාර්ෂික රැස්වීමට සහභාගී වීම සඳහා දිවයිනෙන් පිටත්ව ගොස් ඇත.

මෙම 2026 ලෝක ආර්ථික සංසදයේ වාර්ෂික රැස්වීම අද (19) සිට (23) දින දක්වා ස්විට්සර්ලන්තයේ Davos-Klostersහි පැවැත්වීමට නියමිතය.

‘A Spirit of Dialogue’ යන තේමාව යටතේ පවත්වනු ලබන 2026 ලෝක ආර්ථික සංසදය සඳහා රාජ්‍ය නායකයින්, ප්‍රමුඛ බහුජාතික සමාගම්වල ප්‍රධාන විධායක නිලධාරීන්, ප්‍රතිපත්ති සම්පාදකයින් සහ තාක්ෂණ නවෝත්පාදකයින් ඇතුළු ගෝලීය නායකයින් 3,000කට අධික සංඛ්‍යාවක් සහභාගී වනු ඇත.

සංචාරය අතරතුර අග්‍රාමාත්‍යවරිය සහ ජාත්‍යන්තර නායකයින්, ගෝලීය ආයතන ප්‍රධානීන් සහ අනෙකුත් සම්භාවනීය අමුත්තන් අතර ඉහළ මට්ටමේ ද්විපාර්ශ්වික සාකච්ඡා මාලාවක් පැවැත්වීමට නියමිතය.

එදා ප්‍රසන්න රණවීර හම්බවුණාම මම කොර වුණා, මුළු ලෝකෙටම මිරිස් කුඩු වුණත් යවන්න පුළුවන් බඩුවක් තමයි ප්‍රසන්න රණවීර බව ශ්‍රී ලංකා පොදුජන පෙරමුණ මිලින්ද රාජපක්ෂ සඳහන් කරයි.

මිලින්ද රාජපක්ෂ සඳහන් කළේ,

“ප්‍රසන්න රණවීර කියන දේශපාලඥයා 2020 ඡන්දය තිබිලා මට හම්බුනා ප්‍රසන්න රණවීර කියලා නියෝජ්‍ය ඇමති කෙනෙක්. මම ඒ වෙලාවේ කොර වුණා.

ඒ වෙලාවේ මම කල්පනා කරා මේ මිනිහා ඇත්තටම හම්බෙන්න ඕන. මේ මිනිහා මාර වැඩක් කරන්න පුළුවන් මිනිහෙක්නේ. මේ මිනිහට කීවොත් එහෙම මුළු ලංකාවම මිරිස් වවලා මුළු ලෝකෙටම මිරිස් කුඩු යවයි කියලා.

ඒ ජාතියේ බඩුවක්නේ කියලා මට තේරුණා. තුන්වැනි වතාවට මට ප්‍රසන්න රණවීර හම්බුණේ අපි සේරම දෙකයි පනහට වැටිච්ච වෙලාවේ. මාර බඩුවක්.

ඒ තමයි තුන්වැනියට මට හම්බුන ප්‍රසන්න රණවීර. එතකොට මගෙ ගෞරවය ගොඩක් වැඩි වෙලා. එතකොට මම හිතුවා කවදාහරි ප්‍රසන්න රණවීර ඇමතිතුමා ඡන්දෙ ඉල්ලන දවසක මම ඇවිල්ලා ඒ ඡන්ද රැස්වීමක හරි කතා පවත්වනවා කියලා.”

කිරිබත්ගොඩ පැවති හමුවක් අමතමින් මිලින්ද රාජපක්ෂ මේ බව සඳහන් කරයි.

අපරාධකරුවන්ට සහ ජාවාරම්කරුවන්ට සහාය දක්වන පොලිස් නිලධාරීන්ට එරෙහිව නීතිය දැඩිව ක්‍රියාත්මක කරන බව පොලිස්පති නීතීඥ ප්‍රියන්ත වීරසූරිය සඳහන් කරයි.

ශ්‍රී ලංකා පොලිසියේ කණිෂ්ඨ පොලිස් නිලධාරීන්ගේ සුභසාධනය සඳහා අනුරාධපුර පූජා නගරයේ අරිප්පු පාර පළමු පටුමග ප්‍රදේශයේ ඉදිකරන ලද “රජරට සිසිල” කණිෂ්ඨ පොලිස් නිවස්නය විවෘත කිරීමේ අවස්තාවට එක්වෙමින් පොලිස්පති නීතීඥ ප්‍රියන්ත වීරසූරිය මේ බව සඳහන් කරයි.

පොලිස්පති නීතීඥ ප්‍රියන්ත වීරසූරිය සඳහන් කළේ,

“පොලීසියයි, ජාවාරම්කාරයොයි, අපරාධකාරයොයි පොලීසියට ඉන්න බෑ. නිලධාරීන් ඒ තත්වයට පෙළඹෙනවා නම් ඒ සම්බන්ධයෙන් තීන්දු තීරණ ගන්න කිසිම ආකාරයෙන් පැකිලෙන්නේ නෑ.”

වසර 20කට ආසන්න කාලයක් පුරා පැවති සාකච්ඡාවලින් පසු සාගරය සහ සාගර ජීවීන් ආරක්ෂා කිරීම සඳහා කලක සිට සාකච්ඡා මට්ටමින් තිබූ (Biodiversity Beyond National Jurisdictions) ගිවිසුම බලාත්මක කර ඇත.

ඉකුත් සැප්තැම්බර් මාසයේදී රටවල් 60ක් මෙම ගිවිසුමේ අන්තර්ගත නිර්ණායක අනුමත කර තිබූ අතර එතැන් සිට දින 120කට පසුව මෙය බලාත්මක වීම සුවිශේෂීය.

දේශගුණික විපර්යාස හේතුවෙන් උග්‍රවන විනාශකාරී ධීවර පිළිවෙත්, නැව්ගත කිරීම, ප්ලාස්ටික් දූෂණය, අධික ලෙස මසුන් ඇල්ලීම සහ ගැඹුරු මුහුදේ කැණීම් වැනි කටයුතු පාලනය කිරීම සඳහා මෙම ගිවිසුම බලාත්මක කර ඇත.

දෙසැම්බර් මස මේ සඳහා චීනය, ජපානය වැනි ප්‍රධාන සමුද්‍රීය බලවතුන් එක්වීමත් සමග අදාළ ගිවිසුම අනුමත කළ රටවල් ගණන ජනවාරි වනවිට 83ක් දක්වා ඉහළ ගොස් ඇත.

ලොව විශාලතම සහ ඉහළම වටිනාකමින් යුතු දම් පැහැති ආර්නූල් මැණික කොළඹදී එළිදක්වා ඇත.

මෙරටින් හමුවූ මෙම ආර්නූල් මැණික කැරට් 3,563ක බරකින් යුතු දුර්ලභ ගණයේ මැණිකක් වන අතර එය රත්නපුර ප්‍රදේශයෙන් 2023 වසරේදී හමුවී ඇත.

ලොව මෙතෙක් සොයාගත් දම් පැහැති ආර්නූල් මැණික් ගල් අතර විශාලතම මැණික ලෙස නම් කර ඇති මෙය ස්වභාවික ආර්නූල් මැණික් ගලක් ලෙස විද්‍යාත්මකව තහවුරු කර ඇති බව වාර්තා වේ.

මෙහි වටිනාකම අමෙරිකානු ඩොලර් මිලියන 300ත් 400ත් අතර වන බව එම මැණික එළිදැක්වීමේ අවස්ථාවට එක්වෙමින් ලංකා මැණික් පර්යේෂණාගාරයේ ප්‍රධාන රත්නවේදී අශාන් අමරසිංහ සඳහන් කරයි.

පාර්ලිමේන්තු මන්ත්‍රීවරුන්ගේ විශ්‍රාම වැටුප් අහෝසි කිරීමේ පනත් කෙටුම්පතේ වගන්ති බොහොමයක් ආණ්ඩුක්‍රම ව්‍යවස්ථාවට පටහැනි බවට තීන්දුවක් ලබාදෙන ලෙස ඉල්ලා ශ්‍රේෂ්ඨාධිකරණයට පෙත්සම් දෙකක් ඉදිරිපත් කර ඇත.

හිටපු පාර්ලිමේන්තු මන්ත්‍රීවරුන් වන එම්.එම්. ප්‍රේමසිරි, නවරත්න බණ්ඩා බී.එම්. දීපාල් ගුණසේකර සහ සමන්සිරි හේරත් යන අය විසින් එක් පෙත්සමක් ඉදිරිපත් කර ඇත.

අනෙක් පෙත්සම හිටපු පාර්ලිමේන්තු මන්ත්‍රී පියසෝම උපාලි සහ උපාලි අමරසිරි යන අය විසින් ඉදිරිපත් කර ඇත.

යෝජිත පනත් කෙටුම්පතේ ඇතැම් වගන්තිවලින් මෙරට ආණ්ඩුක්‍රම ව්‍යවස්ථාව මඟින් සහතික කර තිබෙන මූලික මිනිස් අයිතිවාසිකම් උල්ලංඝනය වන බව එම පෙත්සම් තුළින් පෙත්සම්කරුවන් සඳහන් කර ඇත.

අදාළ පනත් කෙටුම්පත සම්මත කරන්නේ නම් පාර්ලිමේන්තුවේ විශේෂ බහුතර ඡන්දයෙන් සම්මත වී ජනමත විචාරණයකින් අනුමත විය යුතු බවට තීන්දුවක් ලබාදෙන ලෙස පෙත්සම්කරුවන් සිය පෙත්සම මගින් ශ්‍රේෂ්ඨාධිකරණයෙන් ඉල්ලා ඇත.

මහින්ද රාජපක්ෂ තාත්තා බලාගත්තා වගේ අනුරාධපුර ගොවියෝ ටික බලාගන්නා ලෙස හිටපු මන්ත්‍රී තිස්ස කුට්ටිආරච්චි, පාර්ලිමේන්තු මන්ත්‍රී නාමල් රාජපක්ෂට කියයි.

හිටපු මන්ත්‍රී තිස්ස කුට්ටිආරච්චි සඳහන් කළේ,

“නායක තුමනි. ඔබතුමාගෙන් අපි ඉල්ලන්නේ, මේ අනුරාධපුර කෘෂිකාර්මික අහිංසක ගොවියෝ ටික තාත්තා බලාගත්තා වගේ බලාගන්න. බාප්පා බලාගත්තා වගේ බලාගන්න එපා.

බාප්පා බලාගත්ත විදිහ බලාගත්තොත් තොප්පි තමයි. ඒනිසා තාත්තා බලාගත්තා වගේ බලාගන්න. මොන තාත්තද, මහින්ද රාජපක්ෂ තාත්තා. බලාගත්තා වගේ බලාගන්න.”

ශ්‍රී ලංකා පොදුජන පෙරමුණේ කොට්ඨාශ සංවිධායකවරුන්ට තඹුත්තේගමදී පත්වීම් ලිපි භාරදීමේ ජනහමුවකට එක්වෙමින් තිස්ස කුට්ටිආරච්චි මේ බව සඳහන් කරයි.