Local news

නිල වාහන අංක තහඩු නිකුත් නොකළත්, ප්‍රමිතිය විකෘති අංක තහඩු සවිකර රථ වාහන ධාවනය සිදුකළ නොහැකි බව, රථවාහන පාලන හා මාර්ග ආරක්ෂාව දිසාව භාර නියෝජ්‍ය පොලිස්පති ඩබ්ලිව්.පී.ජේ. සේනාධීර සඳහන් කරයි.

මෝටර් රථ ප්‍රවාහන දෙපාර්තමේන්තුවේ මාර්ගෝපදේශ අනුව ‘A4’ ප්‍රමාණයේ කොළයක මුද්‍රණය කළ අංක තහඩුවක් ප්‍රදර්ශනය කිරීමට කිසිදු බාධාවක් නොමැති බවද නියෝජ්‍ය පොලිස්පති ඩබ්ලිව්.පී.ජේ. සේනාධීර සඳහන් කරයි.

ශ්‍රී ලංකා මහ බැංකුව නිවේදනයක් නිකුත් කර ඇත.

ඒ අනුව ලියාපදිංචි නොකළ සහ ප්‍රථම ලියාපදිංචියෙන් වසරකට වඩා අඩු කාලයක් භාවිත කරන ලද වාහන සඳහා ලබාදෙන ලීසිං පහසුකම ඉහළ දැමීමට පියවර ගෙන ඇත.

හෙට (25) සිට ක්‍රියාත්මක වන පරිදි මෙම උපරිම ‘ණය සහ වටිනාකම අතර අනුපාතයන්’ (LTV Ratios) ක්‍රියාත්මක වන බව ශ්‍රී ලංකා මහ බැංකුව සඳහන් කරයි.

සංශෝධිත උපරිම ණය සීමාවන් අනුව වාණිජ වාහන (Commercial Vehicles) සඳහා වාහනයේ වටිනාකමෙන් 60%ක් දක්වා ඉහළ දමා ඇති අතර මෝටර් රථ, SUV රථ, වෑන් රථ, ත්‍රිරෝද රථ සහ අනෙකුත් වාහන සඳහා වාහනයේ වටිනාකමෙන් 40%ක් දක්වා ඉහළ දමා ඇත.

ලියාපදිංචි නොකළ හෝ වසරකට වඩා අඩුවෙන් භාවිත කළ මෝටර් රථ, SUV සහ ත්‍රිරෝද රථ වැනි වාහන මිලදී ගැනීමේදී වාහනයේ වටිනාකමෙන් අවම වශයෙන් 60%ක මුදලක් ගැනුම්කරු විසින් දැරිය යුතුයි.

මූල්‍ය පද්ධතියේ ස්ථාවරත්වය සුරැකීම සහ අවදානම් කළමනාකරණය කිරීමේ අරමුණින් මෙලෙස මෝටර් රථ සඳහා ලබාදෙන ණය සීමාවන් තවදුරටත් දැඩි කිරීමට මහ බැංකුව පියවර ගෙන ඇත. 

බිරිඳගේ සිරුරට පෙට්‍රල් දමා ගිනි තැබීම සම්බන්ධයෙන් මීගහවත්ත, අංගොඩ ප්‍රදේශයේ පදිංචි වයස අවුරුදු 41ක සැකකාර සැමියා පොලිසිය විසින් අත්අඩංගුවට ගෙන ඇත.

පසුගිය (18) වෙනිදා සවස ත්‍රිරෝද රථයකින් පැමිණි සැමියා අදාළ කාන්තාවකගේ හිසට පෙට්‍රල් දමා ගිනි තබා පළා ගොස් ඇති අතර අනතුරුව බරපතළ තුවාල ලැබූ කාන්තාව රෝහල්ගත කර ඇති බවත් ඇය මේ වනවිට කොළඹ ජාතික රෝහලේ දැඩිසත්කාර ඒකකයේ ප්‍රතිකාර ලබන බව පොලීසිය සඳහන් කරයි.

ඇයගේ මුහුණ සහ පපුව ප්‍රදේශය බරපතළ පිළිස්සුම් ලැබීම හේතුවෙන් ඇය දැඩි අසාධ්‍ය තත්ත්වයේ පසුවන බව වාර්තා වන අතර ඇයගෙන් මේ වන විටත් කටඋත්තර ලබාගෙන ඇති බව පොලිසිය සඳහන් කරයි.

මෙම කාන්තාවගේ නිත්‍යානුකූල ස්වාමිපුරුෂයා විසින් මෙම ගිනි තැබීම සිදු කර ඇති බවට විමර්ශන වලදී අනාවරණය වී ඇති අතර අනතුරුව මුල්ලේරියාව පොලිස් බල ප්‍රදේශයේදී මෙම සැකකරු අත්අඩංගුවට ගෙන ඇත. 

අනතුරුව ඔහුගෙන් ලද ප්‍රකාශ අනුව සිද්ධිය සඳහා භාවිත කරන ලද පෙට්‍රල් බෝතලයක් සහ ත්‍රී රෝද රථයද පොලිස් භාරයට ගෙන ඇත.

එහෙත් මෙම කාන්තාව විවිධ පුද්ගලයන් ඇසුර කර ඇති බවත් දින ගණනාවක් යන තුරු නැවත නිවසට නොපැමිණෙන බවත් ඇයට කොපමණ උපදෙස් ලබාදුන්න ද ඇය දිගින් දිගටම මෙලෙස අනාචාරයේ යෙදී ඇති බවද අත්අඩංගුවට ගත් සැකකරු පාපොච්චාරණය කර ඇත.

අත්අඩංගුවට ගත් සැකකරු මීට ඉහතදී කිසිම අපරාධයකට, කිසිම චෝදනාවකට ලක් නොවූ ත්‍රිරෝද රථ රියදුරෙක් ලෙස කටයුතු කළ අය බවට ප්‍රදේශවාසීන් පැවසු බව පොලිසිය සඳහන් කරයි.

පහත වැටෙමින් තිබූ ශ්‍රී ලංකා රුපියලේ අගය පසුගිය සිකුරාදා දින අමෙරිකානු ඩොලරයට සාපේක්ෂව 2.7% කින් කැපී පෙනෙන ලෙස ඉහළ ගොස් ඇත.

2023 මාර්තු මාසයෙන් පසු රුපියල වාර්තා කළ විශාලතම එක්දින වර්ධනය මෙය බවත් එය එදින ආසියාවේ හොඳම ක්‍රියාකාරීත්වය පෙන්වූ මුදල් ඒකකය බවද ‘Bloomberg’වෙබ් අඩවිය සඳහන් කරයි.

ජාත්‍යන්තර මූල්‍ය අරමුදල සහ ආසියානු සංවර්ධන බැංකුවෙන් ශ්‍රී ලංකාවට මුදල් ලැබීමට නියමිත බැවින් වෙළඳපොළේ සිටින පිරිස් තමන් සතු ඩොලර් විකිණීමට පෙළඹීම රුපියල ශක්තිමත් වීමට හේතුවක් ලෙස රජය පවසන බවද එම වෙබ් අඩවිය සඳහන් කරයි.

මේ වනවිට විදෙස්ගතව සැගව සිටින සංවිධානාත්මක අපරාධකරුවන් ඇතුළු විවිධ වැරදිවලට සම්බන්ධ පුද්ගලයින් අත්අඩංගුවට ගැනීම සඳහා ජාත්‍යන්තර රතු නිවේදන නිකුත් කර ඇති බව පොලිසිය සඳහන් කරයි.

ඒ අනුව අපරාධකරුවන් පුද්ගලයින් 226 දෙනෙකු අත්අඩංගුවට ගැනීමට ජාත්‍යන්තර රතු නිවේදන නිකුත් කර ඇති බවත් එම පිරිස අතර සංවිධානාත්මක අපරාධකරුවන් 90කට ආසන්න පිරිසක් සිටින බව කොළඹ දිසාව භාර නියෝජ්‍ය පොලිස්පති නිශාන්ත සොයිසා සඳහන් කරයි.

නියෝජ්‍ය පොලිස්පති නිශාන්ත සොයිසා සඳහන් කළේ,

“මේ අවස්ථාව වනවිට රතු නිවේදනය ලබාගෙන සැකකරුවන් 35ක්. වෙනත් වැරදි ආකාරයෙන් වැරදිකරුවන් 33ක් වගේම සැකකරුවන් 68කට 70කට ආසන්න ප්‍රමාණයක් දිවයිනට රැගෙන ඇවිත් තියෙනවා වර්තමාන රජය බලයට පත්වීමෙන් පස්සේ. ඒ වගේම තවත් රතු නිවේදන 226ක් පමණ අරගෙන තිබෙනවා. 

මොවුන් අතර සංවිධානාත්මක අපරාධකරුවන් 90කට ආසන්න පිරිසක් සම්බන්ධයෙන් රතු නිවේදන අරගෙන තිබෙන්නේ. ඩුබායි, ඉන්දියාව, රුසියාව, ඉන්දුනීසියාව, තායිලන්තය වැනි රාජ්‍යයන්වල ඔවුන් සිටින බවට හඳුනාගෙන සිටිනවා. ඔවුන්ව ළඟදී ලංකාවට රැගෙන ඒමේ කාර්යයෙන්ම ඉෂ්ට කරනවා.”

රජයේ ප්‍රවෘත්ති දෙපාර්තමේන්තුවේ අද (23) පැවති මාධ්‍ය හමුවකට එක්වෙමින් නියෝජ්‍ය පොලිස්පති නිශාන්ත සොයිසා මේ බව සඳහන් කරයි.

පසුගියදා රණවිරු ස්මාරකය අසල සිදුවූ සිද්ධිය සම්බන්ධයෙන් දැනගන්න තියෙන විදියට අපි අත්අඩංගුවට ගනීවි යැයි හිටපු අමාත්‍ය විමල් වීරවංශ සඳහන් කරයි.

එම ස්ථානයේදී රාජකාරියට බාධා කිරීමක් කළා නම් එම අවස්ථාවේදි අත්අඩංගුවට ගැනීමට හැකියාව තිබූ බවද විමල් වීරවංශ සඳහන් කරයි.

එහෙත් පොලිසිය අපිට සඳුද එන්න කියලා තියෙන බවත් එදාට තමන් ඇතුළු කණ්ඩායම යන බවද විමල් වීරවංශ සඳහන් කරයි.

පෞද්ගලික රූපවාහිනී නාලිකාවක් සමග පැවති සාකච්ඡාවකදී විමල් වීරවංශ මේ බව සඳහන් කරයි.

එකම පවුලේ පියා, පුතුන් ඇතුලු ඥාතීන් පස් දෙනෙකුට බලපිටිය මහාධිකරණය (22) විසින් මරණ දඬුවම නියම කර ඇත.

පුද්ගලයෙකුට පොලු මුඟුරුවලින් පහරදී ඝාතනය කළ බවට චෝදනා එල්ලවූ සැකකරුවන් 5දෙනෙකුට වසර 19ක දීර්ඝ නඩු විභාගයකින් අනතුරුව මරණ දඬුවම ලබාදීමට බලපිටිය මහාධිකරණය නියෝග කර ඇත.

පසුගිය 2007 ජූලි මස (29) වැනිදා හෝ ඊට ආසන්න දිනයකදී පවුල් ආරවුලකට විත්තිකරුවන් විසින් මෙම ඝාතනය සිදුකර ඇති අතර එය සාධාරණ සැකයකින් තොරව ඔප්පුවන බව පවසමින් බලපිටිය මහාධිකරණ විනිසුරුවරයා මෙම මරණ දඬුවම ලබාදී ඇත.

අද (23) දින බස්නාහිර, සබරගමුව සහ වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව සඳහන් කරයි.

ඇතැම් ස්ථාන වලට මිලිමීටර් 100ක පමණ තද වැසි ඇති විය හැකි බවද කාලගුණ විද්‍යා දෙපාර්තමේන්තුව නිවේදනයක් නිකුත් කරමින් සඳහන් කරයි.

ඌව පළාතේත් අම්පාර සහ මඩකලපුව දිස්ත්‍රික්කවලත් ස්ථාන ස්වල්පයක පස්වරු 1.00 න් පසුව වැසි හෝ ගිගුරුම් සහිත වැසි ඇති විය හැකි බවද එම දෙපාර්තමේන්තුව සඳහන් කරයි.